ପଶ୍ଚିମବଙ୍ଗରେ ଶୁଭେନ୍ଦୁ ଅଧିକାରୀଙ୍କ ସହଯୋଗୀଙ୍କୁ ଗୁଳି କରି ହତ୍ୟା ଘଟଣାରେ ଗର୍ଜିଲେ ଶୁଭେନ୍ଦୁ ଅଧିକାରୀ । ଏହାକୁ ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ଦର୍ଶାଇବା ସହ ସେ ରାଜ୍ୟର ଆଇନ ଶୃଙ୍ଖଳା ପରିସ୍ଥିତିକୁ ନେଇ ଶାସକ ଦଳ ଉପରେ ବର୍ଷିଛନ୍ତି । କିଛି ଦିନ ପୂର୍ବରୁ ଚନ୍ଦ୍ରନାଥଙ୍କୁ ରେକି କରାଯାଇଥିବାବେଳେ ପୋଲିସକୁ ବି ଗୁରୁତ୍ଵପୂର୍ଣ୍ଣ ପ୍ରମାଣ ମିଳିଥିବା ଶୁଭେନ୍ଦୁ କହିଛନ୍ତି । ସେପଟେ ହତ୍ୟା ପଛରେ ଟିଏମସି ହାତ ଅଛି ବୋଲି ଅଭିଯୋଗ କରିଛନ୍ତି ବିଜେପି ନେତ୍ରୀ କେୟା ଘୋଷ ।

• 'ମହା-ଜଙ୍ଗଲରାଜ ଯୋଗୁଁ ଆଜି ଏଭଳି ପରିସ୍ଥିତି'

ଶୁଭେନ୍ଦୁ କହିଛନ୍ତି, "ଏହା ଏକ ପୂର୍ବ ଯୋଜନାବଦ୍ଧ ହତ୍ୟାକାଣ୍ଡ । ହତ୍ୟା ପୂର୍ବରୁ ୨-୩ ଦିନ ଧରି ଚନ୍ଦ୍ରନାଥଙ୍କର ରେକି କରାଯାଇଥିଲା । ଏହି କଥା DGP ମଧ୍ୟ ସ୍ପଷ୍ଟ କରିଛନ୍ତି । ଏହି ଘଟଣାକୁ ନେଇ ଦିଲ୍ଲୀର ସମସ୍ତ ବରିଷ୍ଠ ବିଜେପି ନେତୃତ୍ୱ ଅବଗତ ଅଛନ୍ତି । କେନ୍ଦ୍ରମନ୍ତ୍ରୀ ସୁକାନ୍ତ ମଜୁମଦାର ମୃତକଙ୍କ ପରିବାର ଏବଂ ପୋଲିସ ପ୍ରଶାସନ ସହ କଥା ହୋଇଛନ୍ତି । ରାଜ୍ୟରେ ଗତ ୧୫ ବର୍ଷ ଧରି ଚାଲିଥିବା ମହା-ଜଙ୍ଗଲରାଜ ଯୋଗୁଁ ଆଜି ଏଭଳି ପରିସ୍ଥିତି ସୃଷ୍ଟି ହୋଇଛି ।"

ଶୁଭେନ୍ଦୁ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଏବେ ବିଜେପି ରାଜ୍ୟରେ ଥିବା "ଗୁଣ୍ଡା" ମାନଙ୍କୁ ସଫା କରିବା କାମ ଆରମ୍ଭ କରିବ । ଘଟଣାସ୍ଥଳରେ ବିଭିନ୍ନ ଅଞ୍ଚଳରୁ ବହୁ ବିଜେପି ବିଧାୟକ ଏବଂ ନେତାମାନେ ପହଞ୍ଚିଛନ୍ତି । ପୋଲିସକୁ କିଛି ଗୁରୁତ୍ୱପୂର୍ଣ୍ଣ ପ୍ରମାଣ ମିଳିଥିବା ବେଳେ ତଦନ୍ତ ଜାରି ରହିଛି ।

• 'ହତ୍ୟା ପଛରେ TMCର ହାତ'

ଘଟଣାରେ ବିଜେପି ନେତ୍ରୀ କେୟା ଘୋଷ ଶାସକ ତୃଣମୂଳ କଂଗ୍ରେସ ଉପରେ ସାଙ୍ଘାତିକ ଅଭିଯୋଗ ଆଣିଛନ୍ତି । କେୟା ଘୋଷ କହିଛନ୍ତି, "ଭବାନୀପୁର ନିର୍ବାଚନରେ ଯେଉଁଠି ଶୁଭେନ୍ଦୁ ଅଧିକାରୀ ମମତା ବାନାର୍ଜୀଙ୍କ ବିରୋଧରେ ଐତିହାସିକ ବିଜୟ ହାସଲ କରିଥିଲେ, ସେଠାରେ ଚନ୍ଦ୍ରନାଥ ଅତି ନିଷ୍ଠାର ସହ କାମ କରିଥିଲେ । ସେହି ବିଜୟର ପ୍ରତିଶୋଧ ନେବା ପାଇଁ ହିଁ ତାଙ୍କୁ ଟାର୍ଗେଟ୍ କରାଯାଇଛି ।"

ପଢନ୍ତୁ ଏହି ଖବର: ଶୁଭେନ୍ଦୁ ଅଧିକାରୀଙ୍କ PA ହତ୍ୟା ଘଟଣା; ପ୍ରତ୍ୟକ୍ଷଦର୍ଶୀ ବଖାଣିଲେ ଆକ୍ରମଣର ଭୟଙ୍କର ଦୃଶ୍ୟ

ବିଜେପି ନେତ୍ରୀ TMCକୁ ଏକ ଲୁଟେରା ଏବଂ ହତ୍ୟାକାରୀଙ୍କ ଦଳ ବୋଲି କହିବା ସହ ଏହାକୁ ଏକ ପ୍ରତିଶୋଧପରାୟଣ ରାଜନୈତିକ ହତ୍ୟାକାଣ୍ଡ ବୋଲି ଦର୍ଶାଇଛନ୍ତି । ନୂଆ ସରକାର ଗଠନ ପରେ ଏହି ହତ୍ୟାକାଣ୍ଡରେ ସାମିଲ ଥିବା ଶୁଟର ଏବଂ ହତ୍ୟା ପାଇଁ 'ସୁପାରୀ' ଦେଇଥିବା ମାଷ୍ଟରମାଇଣ୍ଡମାନଙ୍କୁ କୌଣସି ପରିସ୍ଥିତିରେ ଛଡ଼ାଯିବ ନାହିଁ । ଶୁଭେନ୍ଦୁଙ୍କ PA ନିଷ୍ଠାର ସହ କାମ କରିଥିବାରୁ, କ୍ରୋଧ ଏବଂ ହତାଶା ଯୋଗୁଁ TMC ତାଙ୍କୁ ହତ୍ୟା କରିଛି । କିନ୍ତୁ ଦୋଷୀମାନେ ବର୍ତ୍ତିବେ ନାହିଁ ବୋଲି ସେ କହିଛନ୍ତି ।