ବହୁଚର୍ଚ୍ଚିତ ନୋଏଡା ମଡେଲ ତଥା ପୂର୍ବତନ ମିସ୍ ପୁନେ ତ୍ଵିଶା ଶର୍ମାଙ୍କ ମୃତ୍ୟୁ ଘଟଣାରେ ବଡ଼ ଖୁଲାସା । ସ୍ଵାମୀଙ୍କ ପାଟିରୁ ସତ ଓଗାଳିଛି ସିବିଆଇ । ତ୍ଵିଶାଙ୍କ ଗର୍ଭଧାରଣକୁ ନେଇ ସନ୍ଦେହ କରିଥିଲେ ସ୍ଵାମୀ । ତ୍ଵିଶା ଓ ସମର୍ଥଙ୍କ ମଧ୍ୟରେ ତୃତୀୟ ଥିଲେ ଅମିତ ନାମକ ଜଣେ ବ୍ୟକ୍ତି । ଏଥିଲାଗି ତ୍ଵିଶାଙ୍କ ପ୍ରେଗ୍ନେସି ଓ ଛୁଆକୁ ନେଇ ପ୍ରଶ୍ନ କରିଥିଲେ ସ୍ଵାମୀ । ଏହାସହିତ ତ୍ଵିଶାଙ୍କ ମୃତ୍ୟୁ ପରେ ସ୍ଵାମୀ ସମର୍ଥ ସିଂହ କାହିଁକି ଫେରାର ହୋଇଯାଇଥିଲେ ସେ ସମ୍ପର୍କରେ ମଧ୍ୟ ଜଣାପଡ଼ିଛି ।

ସିବିଆଇ ତଦନ୍ତ ବେଳେ ତ୍ଵିଶାଙ୍କ ସ୍ଵାମୀ ସମର୍ଥ ଦାବି କରିଛନ୍ତି ଯେ ତ୍ଵିଶାଙ୍କ ପେଟରେ ଯୋଉ ଶିଶୁଟି ବଢୁଥିଲା, ସେ ତାଙ୍କ ସନ୍ତାନ ନଥିଲା । କାରଣ ସେମାନେ ସୁରକ୍ଷିତ ଶାରୀରିକ ସମ୍ପର୍କ ରଖୁଥିଲେ । ଏଥିଲାଗି ଗର୍ଭଧାରଣକୁ ନେଇ ସ୍ଵାମୀ ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା । ତଦନ୍ତ ଓ ପଚରାଉଚରା ସମୟରେ ଜଣାପଡ଼ିଛି ଯେ ତ୍ଵିଶା ଓ ସ୍ଵାମୀ ସମର୍ଥ ଉଭୟ ମିଶି କେମିକାଲ ନିଶା କରୁଥିଲେ, ଏଥିଲାଗି ଡାକ୍ତର ତ୍ଵିଶାଙ୍କୁ ଗର୍ଭପାତ କରିବାକୁ ପରାମର୍ଶ ଦେଇଥିଲେ । କାରଣ ନିଶା ପାଇଁ ତ୍ଵିଶାଙ୍କ ଶିଶୁ ଉପରେ ଗମ୍ଭୀର ପ୍ରଭାବ ପଡ଼ିବାର ଆଶଙ୍କା ଥିଲା ।

• କାହିଁକି ଫେରାର ଥିଲେ ସମର୍ଥ ?

ତଦନ୍ତକାରୀ ଏଜେନ୍ସି ଯେତେବେଳେ ତ୍ଵିଶାଙ୍କ ଅବସରପ୍ରାପ୍ତ ବିଚାରପତି ଶାଶୂ ଗିରିବାଳା ସିଂହଙ୍କୁ ପ୍ରଶ୍ନ କରିଥିଲେ ଯେ ସେ ତାଙ୍କ ପୁଅ ସମର୍ଥଙ୍କୁ କାହିଁକି ଫେରାର କରିଥିଲେ, ଏହାର ଉତ୍ତରରେ ଗିରିବାଳା କହିଥିଲେ ଯେ ସମର୍ଥ ନିଶାରେ ଥିଲା । ଏଣୁ ସେ ଭୟରେ ତାକୁ ଫେରାର କରିଥିଲେ । ସିବିଆଇ ଏବେ ସେହି ବେଲ୍ଟର ଫରେନ୍ସିକ ଯାଞ୍ଚ କରୁଛି, ଯାହାକୁ ସମର୍ଥ ଓ ଗିରିବାଳା ଦାବି କରିଥିଲେ ଯେ ସେହି ବେଲ୍ଟ ସହାୟତାରେ ତ୍ଵିଶା ଫାଶୀ ଲଗାଇଥିଲେ । ଏହି ବେଲ୍ଟଟି କେତେ ଓଜନ ଉଠାଇପାରିବ ତାହା ଜାଣିବା ଲାଗି ଏହାର ଯାଞ୍ଚ କରୁଛି ସିବିଆଇ ।

• ଭିଡିଓରୁ ଜଣାପଡ଼ିବ ସତ

ମେ ୧୨ ତାରିଖରେ ଯେତେବେଳେ ତ୍ଵିଶାଙ୍କ ମୃତ୍ୟୁ ଖବର ଆସିଥିଲା, ସେତେବେଳେ ଭୋପାଳ କଟାରା ହିଲ୍ସ ଥାନାର ପୋଲିସ ଅଧିକାରୀ ରାଘବେନ୍ଦ୍ର ସେହି ସମୟର ଭିଡିଓ ରେକର୍ଡିଂ କରିଥିଲେ । ତ୍ଵିଶାଙ୍କ ମୃତ୍ୟୁ ହେବା ପରେ ସେହି ସମୟରେ ପୋଲିସ ଗିରିବାଳା ଓ ସମର୍ଥଙ୍କ ଘରେ ପହଞ୍ଚିଥିଲା । ଏହି ଭିଡିଓରୁ କିଛି ପ୍ରମାଣ ମିଳିପାରେ ବୋଲି ପୋଲିସ ଆଶା ରଖିଛି । ରାଘବେନ୍ଦ୍ର ପ୍ରାୟ ୩୪ ମିନିଟର ଭିଡିଓ ରେକର୍ଡ କରିଛନ୍ତି ।

ପଢନ୍ତୁ ଏହି ଖବର: ଗର୍ଭଧାରଣ, ଆଘାତ, ହ୍ଵାଟ୍ସଆପ୍ ଚାଟ୍; ତ୍ଵିଶାଙ୍କ ଜଜ୍ ଶାଶୂକୁ CBIର ୨୦ ପ୍ରଶ୍ନ

ତ୍ଵିଶାଙ୍କ ମୃତ୍ୟୁ ଘଟଣାରେ ଶାଶୂ ଓ ସ୍ଵାମୀଙ୍କୁ ଗିରଫ କରାଯାଇଛି । କିଛି ଦିନ ପୂର୍ବରୁ ସିବିଆଇ ଶାଶୂ ଗିରିବାଳାଙ୍କୁ ଅନେକ ପ୍ରଶ୍ନ ପଚାରି ମାମଲାର ତଦନ୍ତ କରୁଛି । ତ୍ଵିଶାଙ୍କ ପରିବାର ଲୋକେ ଶାଶୂ ଓ ସ୍ଵାମୀଙ୍କ ଉପରେ ହତ୍ୟା ଅଭିଯୋଗ ଆଣିଛନ୍ତି । ତ୍ଵିଶାଙ୍କ ଶରୀରରେ ଅନେକ ଦାଗ ମିଳିଥିବାରୁ ଏହା ଆତ୍ମହତ୍ୟା ନୁହେଁ ବୋଲି ସେମାନେ ଦାବି କରୁଛନ୍ତି । ତେବେ ସିବିଆଇ ଏହି ହାଇପ୍ରୋଫାଇଲ ହତ୍ୟା ଘଟଣାର ସବୁ ଦିଗରୁ ତଦନ୍ତ କରୁଛି ।