Twisha Sharma / ଗର୍ଭଧାରଣ, ଆଘାତ, ହ୍ଵାଟ୍ସଆପ୍ ଚାଟ୍; ତ୍ଵିଶାଙ୍କ ଜଜ୍ ଶାଶୂକୁ CBIର ୨୦ ପ୍ରଶ୍ନ

ବହୁଚର୍ଚ୍ଚିତ ନୋଏଡା ମଡେଲ ତ୍ଵିଶା ଶର୍ମା ସନ୍ଦେହଜନକ ମୃତ୍ୟୁ ଘଟଣା । କିଛି ଦିନ ପୂର୍ବରୁ ତ୍ଵିଶାଙ୍କ ଅବସରପ୍ରାପ୍ତ ଜଜ୍ ଶାଶୂ ଗିରିବାଳା ସିଂହଙ୍କୁ ଗିରଫ କରିବା ପରେ ଏବେ ପ୍ରଶ୍ନବାଣରେ ଘାଇଲା କରୁଛି CBI । କେନ୍ଦ୍ରୀୟ ତଦନ୍ତକାରୀ ଏଜେନ୍ସି ଗିରିବାଳାଙ୍କୁ ପ୍ରାୟ ୨୦ଟି ପ୍ରଶ୍ନ କରିଛି । ଗିରିବାଳାଙ୍କ ବିରୋଧରେ ସାକ୍ଷ୍ୟ ନଷ୍ଟ କରିବା ଓ ଗର୍ଭପାତ କରିବାକୁ ବାଧ୍ୟ କରିବା ଭଳି ଅଭିଯୋଗ ରହିଛି । ଗିରିବାଳାଙ୍କୁ ପ୍ରାୟ ୩ଦିନ ଧରି ୧୦ ଘଣ୍ଟା ପ୍ରଶ୍ନ ପଚରାଯାଇଥିବା ସିବିଆଇ କହିଛି । ସେପଟେ ତ୍ଵିଶାଙ୍କ ସ୍ଵାମୀ ସମର୍ଥ ସିଂହ ପୋଲିସ ହେପାଜତରେ ଅଛନ୍ତି ।

ମଧ୍ୟପ୍ରଦେଶ ହାଇକୋର୍ଟ ଗିରିବାଳାଙ୍କ ଆଗୁଆ ଜାମିନ ଆବେଦନ ଖାରଜ କରିବା ପରେ ସିବିଆଇ ତାଙ୍କୁ ଗିରଫ କରିଥିଲା । ଗତ ଗୁରୁବାର ସିବିଆଇ ଅଧିକାରୀମାନେ ଗିରିବାଳାଙ୍କ ଭୋପାଳ ସ୍ଥିତ ବାସଭବନକୁ ପୂର୍ବାହ୍ନ ୧୦.୩୦ଟାରେ ଯାଇଥିଲେ ଓ ବହୁ ସମୟ ଧରି ତାଙ୍କୁ ପ୍ରଶ୍ନ କରିଥିଲେ । ଏହାପରେ ସନ୍ଧ୍ୟା ୫.୧୦ଟାରେ ତାଙ୍କୁ ଗିରଫ କରାଯାଇଥିଲା । ତ୍ଵିଶାଙ୍କ ଶରୀରରେ ଲାଗିଥିବା ଆଘାତ ଓ ଗର୍ଭପାତକୁ ନେଇ ଶାଶୂ ଗିରିବାଳାଙ୍କୁ ପ୍ରଶ୍ନ କରାଯାଇଥିଲା ।

• ଗର୍ଭପାତ କରିଥିଲେ ତ୍ଵିଶା

ତ୍ଵିଶା ଶର୍ମା ଗର୍ଭପାତ କରିଥିଲେ ଏବଂ ଏଥିଲାଗି ତାଙ୍କୁ ସ୍ଵାମୀ ଓ ଶାଶୂ ବାଧ୍ୟ କରିଥିବା ତ୍ଵିଶାଙ୍କ ପିତାମାତା ଅଭିଯୋଗ କରିଥିଲେ । ସିବିଆଇ ଅଧିକାରୀମାନେ ଗିରିବାଳାଙ୍କୁ ଏହି ସମ୍ବନ୍ଧୀୟ ଅନେକ ପ୍ରଶ୍ନ କରିଥିଲେ । ତେବେ ତ୍ଵିଶା ଓ ପରିବାର ଗର୍ଭପାତ ନେଇ ଆଲୋଚନା କରିଥିଲେ କି ନାହିଁ କିମ୍ବା ତ୍ଵିଶା କେତେବେଳେ ଭୟ, ମାନସିକ ଚାପ ଆଦି ସମ୍ପର୍କରେ ପରିବାରକୁ କେବେ କିଛି କହିଥିଲେ କି, ସେ ନେଇ ମଧ୍ୟ ଗିରିବାଳାଙ୍କୁ ପ୍ରଶ୍ନ କରାଯାଇଥିଲା । ମୃତ୍ୟୁ ପୂର୍ବରୁ ତ୍ଵିଶାଙ୍କ ଶରୀରରେ ଦେଖାଯାଇଥିବା କିଛି ଚିହ୍ନକୁ ନେଇ ମଧ୍ୟ ଗିରିବାଳାଙ୍କୁ ପ୍ରଶ୍ନ କରିଥିଲା ସିବିଆଇ ।

• ପ୍ରଶ୍ନବାଣରେ ଘାଇଲା ଗିରିବାଳା

ତଦନ୍ତ ବେଳେ ସିବିଆଇ ଗିରିବାଳାଙ୍କୁ ଅନେକ ପ୍ରଶ୍ନ ପଚାରିଛି । ଯେପରିକି SITର ନୋଟିସ ପରେ ମଧ୍ୟ ଗିରିବାଳା କାହିଁକି ଆସିନଥିଲେ, ସେ କୌଣସି ଡକ୍ୟୁମେଣ୍ଟ ବା କଲ୍ ରେକର୍ଡ ବା କିଛି ପ୍ରମାଣ ଲୁଚାଉଛନ୍ତି କି, ଡିଜିଟାଲ ପ୍ରମାଣ ଓ ଗିରିବାଳାଙ୍କ ବୟାନ କାହିଁକି ମେଳ ଖାଉନି ବୋଲି ମଧ୍ୟ ପ୍ରଶ୍ନ ହୋଇଥିଲା । ସେହିପରି ଆଗୁଆ ଜାମିନ ଖାରଜକୁ ନେଇ ଗିରିବାଳା କଣ ମତ ରଖିବେ ସେ ନେଇ ପ୍ରଶ୍ନ ହୋଇଥିଲା । ତ୍ଵିଶାଙ୍କ ପରିବାର ପକ୍ଷରୁ ହୋଇଥିବା ଅଭିଯୋଗ ଉପରେ ଗିରିବାଳାଙ୍କ ମତ ଲୋଡ଼ିଥିଲା ସିବିଆଇ ।

ପଢନ୍ତୁ ଏହି ଖବର: ପ୍ରଥମେ ଜାମିନ ରଦ୍ଦ, ଏବେ ବାନ୍ଧିଲା CBI; ଅଡୁଆରେ ତ୍ଵିଶାଙ୍କ ରିଟାର୍ଡ ଜଜ୍ ଶାଶୂ

ତ୍ଵିଶାଙ୍କ ପରିବାର କାହିଁକି ତାଙ୍କ ଉପରେ ନିର୍ଯାତନା ଓ ହତ୍ୟା ଅଭିଯୋଗ ଆଣୁଛନ୍ତି ସେ ନେଇ ମଧ୍ୟ ପ୍ରଶ୍ନ ହୋଇଥିଲା । ସେହିପରି ତ୍ଵିଶାଙ୍କ ସହିତ ତାଙ୍କ ସମ୍ପର୍କ କିପରି ଥିଲା, ତ୍ଵିଶାଙ୍କ ସହିତ କେବେ ଯୁକ୍ତିତର୍କ ହୋଇଥିଲା କି ନାହିଁ, ତ୍ଵିଶାଙ୍କୁ କେବେ ମାନସିକ ବା ଶାରୀରିକ ନିର୍ଯାତନା ଦେବାରେ କିମ୍ବା ଅଣଦେଖା କରିଛନ୍ତି କି ନାହିଁ, ଏଭଳି ପ୍ରଶ୍ନ କରିଥିଲା ସିବିଆଇ ।

• ଗିରିବାଳାଙ୍କ ବିରୋଧରେ ସଙ୍ଗୀନ ଦଫା

ଗିରିବାଳା ସିଂହ ଭାରତୀୟ ନ୍ୟାୟ ସଂହିତା (BNS), ୨୦୨୩ ଅନୁଯାୟୀ ଗୁରୁତର ଅଭିଯୋଗର ସମ୍ମୁଖୀନ ହେଉଛନ୍ତି, ଯେଉଁଥିରେ ଯୌତୁକ ମୃତ୍ୟୁ ପାଇଁ ଧାରା ୮୦(୨); ଜଣେ ମହିଳାଙ୍କ ପ୍ରତି ତାଙ୍କ ସ୍ୱାମୀ କିମ୍ବା ସମ୍ପର୍କୀୟଙ୍କ ଦ୍ୱାରା ନିଷ୍ଠୁରତା ପାଇଁ ଧାରା ୮୫ ଏବଂ ଧାରା ୩(୫) ଲାଗିଛି । ଏହା ସହିତ ଗିରିବାଳାଙ୍କୁ ଯୌତୁକ ନିରୋଧ ଆଇନ, ୧୯୬୧ର ଧାରା ୩ ଏବଂ ୪ ଅନୁଯାୟୀ ଅଭିଯୁକ୍ତ କରାଯାଇଛି ।