ମଡେଲ୍‌, ଅଭିନେତ୍ରୀ ତଥା ପୂର୍ବତନ ମିସ୍ ପୁଣେ ତ୍ଵିଶା ଶର୍ମା ମୃତ୍ୟୁ ଘଟଣା । ମାମଲାରେ ଆସିଲା ବଡ଼ ଅପଡେଟ୍ । କିଛି ଦିନ ଧରି ତ୍ଵିଶାଙ୍କ ଅବସରପ୍ରାପ୍ତ ବିଚାରପତି ଶାଶୂ ଗିରିବାଳା ସିଂହ ଆଗୁଆ ଜାମିନ କରିଥିଲେ । ତେବେ ହାଇକୋର୍ଟ ପ୍ରଥମେ ତାଙ୍କ ଆଗୁଆ ଜାମିନକୁ ରଦ୍ଦ କରିଥିଲେ, ଆଉ ଏବେ ଗିରିବାଳାଙ୍କୁ ବାନ୍ଧିଛି ସିବିଆଇ । ଆଗୁଆ ଜାମିନ ରଦ୍ଦ ହେବାପରେ ସିବିଆଇ ତଦନ୍ତ ପ୍ରକ୍ରିୟାକୁ ତ୍ଵରାନ୍ବିତ କରି ଗିରିବାଳାଙ୍କୁ ତାଙ୍କ ଭୋାପାଳ କଟାରା ହିଲ୍ସ ସ୍ଥିତ ବାସଭବନରେ ଅନେକ ସମୟ ଧରି ପଚରାଉଚରା କରିବା ପରେ ଶେଷରେ ଗିରଫ କରିଛି ।

• ଅନେକ ସମୟ ଧରି ପଚରାଉଚରା

ସିବିଆଇର ଏକ ସ୍ଵତନ୍ତ୍ର ଟିମ ସକାଳ ପ୍ରାୟ ୧୦.୩୦ଟାରେ ଗିରିବାଳା ସିଂହଙ୍କ ଘରେ ପହଞ୍ଚିଥିଲା । ଏହାପରେ ଅନେକ ସମୟ ଧରି ତାଙ୍କୁ ପଚରାଉଚରା କରିଥିଲା । ସିବିଆଇ ଅଧିକାରୀମାନେ ଘରର ଏକ କୋଠରୀରେ ତାଙ୍କୁ ପଚରାଉଚରା କରିଥିଲେ । ଯାଞ୍ଚ ସମୟରେ ଏଜେନ୍ସି ଅତ୍ୟାଧୁନିକ କ୍ୟାମେରା ବ୍ୟବହାର କରି ପୂରା ଘର ଓ ଆଖପାଖ ଅଞ୍ଚଳକୁ ୩୬୦ ଡିଗ୍ରୀରେ ରେକର୍ଡିଂ କରିଥିଲେ । ଏହାସହିତ ଘଟଣାସ୍ଥଳ ଆଖପାଖ ଘରର କୌଣସି ଛାତ କିମ୍ବା ବାଲକୋନିରୁ ଦିଶୁଥିଲା ନା ନାହିଁ ତାହା ଯାଞ୍ଚ କରାଯାଇଥିଲା ।

• ଆଗୁଆ ଜାମିନକୁ ଅନୁଚିତ କହିଥିଲେ କୋର୍ଟ

ହାଇକୋର୍ଟ ବୁଧବାର ବିଳମ୍ବିତ ରାତିରେ ଜାରି କରିଥିବା ନିଜ ଆଦେଶରେ କହିଥିଲେ ଯେ ମାମଲାର ଗମ୍ଭୀରତା, ଉପଲବ୍ଧ ସାକ୍ଷ୍ୟ ପ୍ରମାଣ ଓ ତଦନ୍ତର ସ୍ଥିତି ଅନୁଯାୟୀ ଅଭିଯୁକ୍ତ ପକ୍ଷକୁ ଆଗୁଆ ଜାମିନ ଦେବା ଉଚିତ ନଥିଲା । ହାଇକୋର୍ଟ ଏହା ମଧ୍ୟ କହିଛନ୍ତି ଯେ ନିମ୍ନ ଅଦାଲତ କେସ୍ ଡାଏରୀ ଓ ଉପଲବ୍ଧ ସାକ୍ଷ୍ୟ ପ୍ରମାଣକୁ ସଠିକ୍ ଭାବରେ ଯାଞ୍ଚ କରିନାହାନ୍ତି । ଆଦେଶରେ ଏହା ମଧ୍ୟ କୁହାଯାଇଥିଲା ଯେ ତ୍ଵିଶାଙ୍କ ମୃତଦେହରେ ଫାଶୀ ଚିହ୍ନ ବ୍ୟତୀତ ଅନ୍ୟାନ୍ୟ ଚିହ୍ନ ମଧ୍ୟ ଦେଖିବାକୁ ମିଳିଥିଲା, ଯାହା ସମ୍ପର୍କରେ ଅଭିଯୁକ୍ତ ପକ୍ଷ ସନ୍ତୋଷଜନକ ଉତ୍ତର ଦେଇପାରିନଥିଲା ।

ପଢନ୍ତୁ ଏହି ଖବର: ବିଦାୟୀ ବେଳେ ୨ଲକ୍ଷ ମାଗିଥିଲେ ତ୍ଵିଶାଙ୍କ ଅବସରପ୍ରାପ୍ତ ବିଚାରପତି ଶାଶୂ !

• ତ୍ଵିଶାଙ୍କ ସ୍ଵାମୀ ବି ଗିରଫ

କୋର୍ଟ ଏହା ସ୍ପଷ୍ଟ କରିଛନ୍ତି ଯେ ହ୍ଵାଟ୍ସଆପ୍ ଚାଟ୍‌, ସାକ୍ଷ୍ୟଙ୍କ ବୟାନରୁ ତ୍ଵିଶାଙ୍କୁ ମାନସିକ ନିର୍ଯାତନା, ଗର୍ଭପାତ ପାଇଁ ଚାପ ଏବଂ ଯୌତୁକ ସମ୍ବନ୍ଧୀୟ ନିର୍ଯାତନା ସାମ୍ନାକୁ ଆସିଛି । ତ୍ଵିଶାଙ୍କ ଶାଶୂ ଘର ଲୋକେ ତଦନ୍ତ ପ୍ରକ୍ରିୟାକୁ ପ୍ରଭାବିତ କରିବାକୁ ଉଦ୍ୟମ କରିବା ସହ ମୃତ ତ୍ଵିଶାଙ୍କ ବ୍ୟକ୍ତିତ୍ଵକୁ କଳୁଷିତ କରିବା ପାଇଁ ମଧ୍ୟ ଚେଷ୍ଟା କରିଛି । ତ୍ଵିଶାଙ୍କ ସ୍ଵାମୀ ସମର୍ଥ ସିଂହଙ୍କୁ କୋର୍ଟ ମେ ୨୯ ତାରିଖ ପର୍ଯ୍ୟନ୍ତ ସିବିଆଇ ରିମାଣ୍ଡରେ ପଠାଇଛି । ଏଜେନ୍ସି ତ୍ଵିଶାଙ୍କ ମୃତଦେହ ମିଳିଥିବା ଦିନ ଅର୍ଥାତ୍ ମେ ୧୨ ତାରିଖର ଘଟଣା, ଡିଜିଟାଲ ତଥ୍ୟକୁ ଆଧାର କରି ସମର୍ଥଙ୍କୁ ପଚରାଉଚରା କରୁଛି ।

ପଢନ୍ତୁ ଏହି ଖବର: ତ୍ଵିଶା ଶର୍ମା ଶାଶୁ-ସ୍ଵାମୀଙ୍କୁ ଶକ୍ତ ଝଟକା; କେସ୍ ଲଢିବାକୁ ମନା କରିଦେଲେ ଓକିଲ

• ମେ ୧୨ରେ ତ୍ଵିଶାଙ୍କ ସନ୍ଦେହଜନକ ମୃତ୍ୟୁ

ଏଠାରେ କହିରଖୁଛୁ କି, ଗତ ମେ ୧୨ ତାରିଖରେ ତ୍ଵିଶାଙ୍କ ଶାଶୂ ଘର ଅର୍ଥାତ ଭୋପାଳର କଟାରା ହିଲ୍ସ ନିକଟ ଘରେ ତାଙ୍କର ସନ୍ଦେହଜନକ ଅବସ୍ଥାରେ ମୃତ୍ୟୁ ଘଟିଥିଲା । ଶାଶୂ ଘର ଲୋକେ ଏହାକୁ ଆତ୍ମହତ୍ୟା ବୋଲି କହିଥିବାବେଳେ ପୋଲିସକୁ ଡାକିବା ପୂର୍ବରୁ ତ୍ଵିଶାଙ୍କ ମୃତଦେହକୁ ହସ୍ପିଟାଲରେ ପହଞ୍ଚାଇଥିଲେ । ସେପଟେ ତ୍ଵିଶାଙ୍କ ପରିବାର ଲୋକେ ଏହାକୁ ହତ୍ୟା ବୋଲି ଅଭିଯୋଗ କରିଛନ୍ତି । ଏବେ ସିବିଆଇ ଏହି ପୂରା ଘଟଣାର ତଦନ୍ତ କରୁଛି ।