CM Suvendu PA Murder Case / ଶୁଭେନ୍ଦୁ ଅଧିକାରୀଙ୍କ PA ହତ୍ୟାକାଣ୍ଡର ପର୍ଦ୍ଦାଫାଶ; ମାଷ୍ଟରମାଇଣ୍ଡ କିଏ ଜଣାପଡ଼ିଲା..

କୋଲକାତା: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ଅତି ନିକଟତମ ସହଯୋଗୀ (PA) ଚନ୍ଦ୍ରନାଥ ରଥଙ୍କ ହତ୍ୟା ଘଟଣା । ମାଷ୍ଟରମାଇଣ୍ଡର ହେଲା ପର୍ଦ୍ଦାଫାଶ । କୋଲକାତାର ଏକ ସ୍ୱତନ୍ତ୍ର କୋର୍ଟରେ ସିବିଆଇ ଏକ ଚାର୍ଜସିଟ୍ ଦାଖଲ କରିଛି, ଯେଉଁଥିରେ ଏହି ମାମଲାରେ ୧୧ ଜଣ ଅଭିଯୁକ୍ତ ଅଛନ୍ତି । ସେମାନଙ୍କ ମଧ୍ୟରୁ ଦୁଇଜଣ ବିରୋଧୀ ଦଳର ଜଣେ ବିଧାୟକଙ୍କ ୨ଜଣ ସହଯୋଗୀ ମଧ୍ୟ ଚିହ୍ନଟ ହୋଇଛନ୍ତି । ଏହି ଦୁଇ ଜଣ ଚନ୍ଦ୍ରନାଥଙ୍କ ଅଫିସରେ କାମ କରୁଥିବାବେଳେ ଉତ୍ତର ପ୍ରଦେଶର ଗୁଳିଚାଳକମାନଙ୍କୁ ହତ୍ୟା ପାଇଁ ସୁପାରି ଦେଇଥିବା ଖୁଲାସା ହୋଇଛି ।

• ଅଫିସ ଷ୍ଟାଫ୍ ବାହାରିଲେ ମାଷ୍ଟରମାଇଣ୍ଡ

ଅନ୍ୟ ଏକ ରାଜନୈତିକ ଦଳର ଜଣେ ଅଧିକାରୀଙ୍କ ଭୂମିକା ମଧ୍ୟ ତଦନ୍ତାଧୀନ ବୋଲି ସିବିଆଇ କହିଛି । ସିବିଆଇ ଜାଣିବାକୁ ପାଇଛି ଯେ ହତ୍ୟା ପାଇଁ ସୁପାରି ଦେଇଥିବା ସାଗର ସୋନକର ଏବଂ ତାଙ୍କ ଭାଇ ସାହିବ ସୋନକର ୨୦୨୦ ପର୍ଯ୍ୟନ୍ତ ବିପକ୍ଷ ଦଳର ବିଧାୟକଙ୍କ ସହ କାମ କରିଥିଲେ । ପରବର୍ତ୍ତୀ ସମୟରେ ସେମାନେ ଆସି ଚନ୍ଦ୍ରନାଥଙ୍କ ସହ ଅଫିସରେ କାମ କରୁଥିଲେ । ଦୀର୍ଘ ଦିନ ଧରି ସେମାନେ ଚନ୍ଦ୍ରନାଥଙ୍କୁ ହତ୍ୟା କରିବା ଲାଗି ଷଡ଼ଯନ୍ତ୍ର କରୁଥିଲେ । ହୁଏତ ଏଥିଲାଗି ସେମାନେ ଚନ୍ଦ୍ରନାଥଙ୍କ ନିକଟରେ ରହିବାକୁ ତାଙ୍କ ଅଫିସରେ କାମ କରିବା ଆରମ୍ଭ କରିଥାଇପାରନ୍ତି ।

• ଡିସେମ୍ବର ୨୦୨୫ରୁ ହତ୍ୟା ପାଇଁ ଷଡ଼ଯନ୍ତ୍ର

ସିବିଆଇ ଅନୁଯାୟୀ, ତଦନ୍ତରୁ ଜଣାପଡିଛି ଯେ ଭବାନୀପୁର ଆସନ ପାଇଁ ଶୁଭେନ୍ଦୁ ଅଧିକାରୀଙ୍କ ନିର୍ବାଚନ ପ୍ରଚାରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ଚନ୍ଦ୍ରନାଥ ରଥଙ୍କ ହତ୍ୟା ଡିସେମ୍ବର ୨୦୨୫ରୁ ଯୋଜନାବଦ୍ଧ ଥିଲା, କିନ୍ତୁ ବିଭିନ୍ନ କାରଣ ପାଇଁ ହତ୍ୟାର ତାରିଖ ପରିବର୍ତ୍ତନ ହେଉଥିଲା । ଚନ୍ଦ୍ରନାଥଙ୍କୁ ହତ୍ୟା କରିବା ଲାଗି ସାଗର ସୁଟରଙ୍କୁ ଟଙ୍କା ଦେଇଥିଲା ।

• ୬ଜଣ ସୁଟରଙ୍କୁ ଗିରଫ କରିଛି CBI

ପଶ୍ଚିମବଙ୍ଗ ବିଧାନସଭା ନିର୍ବାଚନ ଫଳାଫଳ ଘୋଷଣା ହେବାର ଦୁଇ ଦିନ ପରେ ଅର୍ଥାତ ମେ ୬ ତାରିଖରେ ମଧ୍ୟଗ୍ରାମରେ ଶୁଭେନ୍ଦୁଙ୍କ ପିଏଙ୍କୁ ଗୁଳି କରି ହତ୍ୟା କରାଯାଇଥିଲା । ସିବିଆଇ ଅଧିକାରୀମାନେ କହିଛନ୍ତି ଯେ ସିବିଆଇ ଏପର୍ଯ୍ୟନ୍ତ ୬ ଜଣ ସୁଟରଙ୍କୁ ଗିରଫ କରିଛି । ସେମାନେ ହେଉଛନ୍ତି ମୋନୁ ସିଂହ, ରାଜ ସିଂହ, ଗୋଲୁ ସିଂହ, ମୟଙ୍କ ରାଜ ମିଶ୍ର, ଭିକି ମୌର୍ଯ୍ୟ ଏବଂ ନବୀନ କୁମାର ସିଂହ । ହତ୍ୟାକାଣ୍ଡ ଡିଲ୍ କରିଥିବା ବ୍ୟକ୍ତିଙ୍କ ମଧ୍ୟରେ ବିନୟ ରାୟ, ସଞ୍ଜୟ ରାୟ ଏବଂ ବିକାଶ ମିଶ୍ର ଅଛନ୍ତି । ଆଉ ଜଣେ ଅଭିଯୁକ୍ତ ଫେରାର ଅଛି ବୋଲି ସିବିଆଇ କହିଛି । ପଶ୍ଚିମବଙ୍ଗ ସରକାରଙ୍କ ଅନୁରୋଧରେ ସିବିଆଇ ଏବେ ରାଜ୍ୟ ପୋଲିସଠାରୁ ଏହି ହତ୍ୟାର ତଦନ୍ତ ଭାର ଗ୍ରହଣ କରିଛି ।

• କିଏ ଚନ୍ଦ୍ରନାଥ ରଥ ?

ଚନ୍ଦ୍ରନାଥ ରଥ ପୂର୍ବରୁ ବାୟୁସେନାରେ ଥିଲେ । ବାୟୁସେନାରୁ ସ୍ୱେଚ୍ଛାକୃତ ଅବସର ନେବା ପରେ ସେ କର୍ପୋରେଟ୍ ଜଗତରେ କାମ କରିବା ଆରମ୍ଭ କରିଥିଲେ । ଧୀରେ ଧୀରେ ସେ ରାଜନୈତିକ ସଂଯୋଜକ ଏବଂ ପ୍ରଶାସନିକ ଦାୟିତ୍ୱ ମଧ୍ୟ ଗ୍ରହଣ କରିଥିଲେ । ୨୦୧୯ରେ ଯେତେବେଳେ ଶୁଭେନ୍ଦୁ ଅଧିକାରୀ ମମତା ବାନାର୍ଜୀଙ୍କ ସରକାରରେ ମନ୍ତ୍ରୀ ଥିଲେ, ଚନ୍ଦ୍ରନାଥ ରଥ ସେହି ସମୟରୁ ହିଁ ଶୁଭେନ୍ଦୁଙ୍କ ସହିତ କାମ କରିବା ଆରମ୍ଭ କରିଥିଲେ ।

ପଢନ୍ତୁ ଏହି ଖବର: ଧରାପଡ଼ିଲା ଅଭିଯୁକ୍ତ ରାଜ କୁମାର; ମୁଜାଫରନଗରରେ ମାଡ଼ି ବସିଲା ଦିଲ୍ଲୀ କ୍ରାଇମବ୍ରାଞ୍ଚ

ଶୁଭେନ୍ଦୁ ଅଧିକାରୀଙ୍କ ପରି ଚନ୍ଦ୍ରନାଥ ରଥଙ୍କ ପରିବାର ମଧ୍ୟ ପୂର୍ବରୁ ତୃଣମୂଳ କଂଗ୍ରେସରେ ଥିଲେ । ତାଙ୍କ ମାଆ ହସି ରଥ ଟିଏମସିର କାର୍ଯ୍ୟକାଳ ସମୟରେ ପୂର୍ବ ମେଦିନୀପୁରରେ ଏକ ସ୍ଥାନୀୟ ପଞ୍ଚାୟତ ସମିତି ପଦବୀରେ ଥିଲେ । ପରେ ଶୁଭେନ୍ଦୁ ଟିଏମସି ଛାଡି ବିଜେପିରେ ଯୋଗଦେବା ପରେ, ଚନ୍ଦ୍ରନାଥ ରଥଙ୍କ ପରିବାର ମଧ୍ୟ ବିଜେପି ପାଇଁ କାମ କରିବା ଆରମ୍ଭ କରିଥିଲେ ।

• ଶୁଭେନ୍ଦୁଙ୍କ ଘନିଷ୍ଠ ଥିଲେ ଚନ୍ଦ୍ରନାଥ

ଚନ୍ଦ୍ରନାଥ ରଥ ପ୍ରାୟ ଦୁଇ ଦଶନ୍ଧି ଧରି ମୁଖ୍ୟମନ୍ତ୍ରୀ ଶୁଭେନ୍ଦୁଙ୍କ ସହିତ କାର୍ଯ୍ୟ କରିଥିଲେ। ଏହି ସମୟ ମଧ୍ୟରେ ସେ ସାଂଗଠନିକ କାର୍ଯ୍ୟ ସହିତ ଲଜିଷ୍ଟିକ୍ସ ପରିଚାଳନା ମଧ୍ୟ କରିଥିଲେ । ସେ ଦଳୀୟ କର୍ମୀଙ୍କ ସହିତ ସମନ୍ୱୟ ରକ୍ଷା କରି ସର୍ବଦା କାମ କରୁଥିଲେ । ଚନ୍ଦ୍ରନାଥ ଶୁଭେନ୍ଦୁଙ୍କ ନିର୍ବାଚନ ପ୍ରଚାର ପରିଚାଳନା ଏବଂ ରାଜନୈତିକ ସମନ୍ୱୟ କଥା ବୁଝୁଥିଲେ । ସେ ବିଜେପିର ଭବାନୀପୁର ନିର୍ବାଚନ ପ୍ରଚାର ସମେତ ଅନେକ ହାଇ-ଭୋଲଟେଜ୍ ରାଜନୈତିକ ପ୍ରତିଯୋଗିତାରେ ଅଧିକାରୀଙ୍କ କୋର୍ ଦଳର ଅଂଶ ଥିଲେ ।