ଜାତୀୟ ରାଜଧାନୀ ଦିଲ୍ଲୀରେ ପୁଣି ଲଜ୍ଜା । ସ୍ଲିପର ବସରେ ମହିଳାଙ୍କ ସହିତ ଗଣଦୁଷ୍କର୍ମ । ମହିଳାଙ୍କ ଅଭିଯୋଗ ଆଧାରରେ ପୋଲିସ ଡ୍ରାଇଭର ଓ କଣ୍ଡକ୍ଟରକୁ ଗିରଫ କରିଛି । ପୀଡ଼ିତାଙ୍କ କହିବାନୁସାରେ, ଡ୍ରାଇଭର ଓ ହେଲପର ତାଙ୍କୁ ବସ୍ ଭିତରକୁ ଘୋଷାଡ଼ି ନେଇ ଗଣଦୁଷ୍କର୍ମ କରିଥିଲେ ଓ ପରେ ତାଙ୍କୁ ବସ୍ ବାହାରକୁ ଫିଙ୍ଗି ପଳାଯାଇଥିଲେ । ଏହି ନିନ୍ଦନୀୟ ଘଟଣା ଦିଲ୍ଲୀର ରାଣିବାଗ ଅଞ୍ଚଳରେ ସୋମବାର ରାତିରେ ଘଟିଛି । ସେପଟେ ପୋଲିସ ବସକୁ ଜବତ କରିଛି ।

• କଣ ପୂରା ଘଟଣା ?

ମେ ୧୧ ତାରିଖ ରାତିରେ ସବୁ ଦିନ ପରି ପୀଡ଼ିତା ଜଣକ ନିଜ କାମ ସାରି ଘରକୁ ଫେରୁଥିଲେ । ମହିଳା ଜଣକ ବିବାହିତ ଥିବାବେଳେ ତାଙ୍କର ୩ଟି ସନ୍ତାନ ମଧ୍ୟ ଅଛନ୍ତି । ପୀଡ଼ିତା ମଙ୍ଗୋଲପୁରୀର ଏକ ଫ୍ୟାକ୍ଟ୍ରିରେ କାମ କରନ୍ତି । ସେ ସରସ୍ଵତୀ ବିହାର ନିକଟରେ ଠିଆ ହୋଇଥିବା ଏକ ବସ ଦେଖିଥିଲେ ଓ ବସ୍ ପ୍ରବେଶ ଡୋର୍ ପାଖରେ ଠିଆ ହୋଇଥିବା ଜଣେ ବ୍ୟକ୍ତିଙ୍କୁ ସମୟ କେତେଟା ହୋଇଛି ବୋଲି ପଚାରିଥିଲେ । ଠିକ୍ ଏହି ସମୟରେ ଉକ୍ତ ବ୍ୟକ୍ତି ଜଣକ ତାଙ୍କୁ ଜୋରଜବରଦସ୍ତ ବସ୍ ଭିତରକୁ ଘୋଷାଡ଼ି ନେଇ ଡୋର୍ ବନ୍ଦ କରିଦେଇଥିଲେ । ଏହାପରେ ଡ୍ରାଇଭର ବସଟିକୁ ନାଙ୍ଗଲୋଇ ଅଞ୍ଚଳକୁ ନେଇଯାଇଥିଲା । ଏହାପରେ ଡ୍ରାଇଭର ଓ ହେଲପର ଉଭୟ ମିଶି ତାଙ୍କୁ ଦୁଷ୍କର୍ମ କରିଥିବା ପୀଡ଼ିତା ଅଭିଯୋଗ କରିଛନ୍ତି ।

ପଢନ୍ତୁ ଏହି ଖବର: ମିଛ ଖବର ଦେଇ ହୋଟେଲକୁ ନେଲା; ଦୁଷ୍କର୍ମ କଲା ପଡ଼ୋଶୀ

ପୋଲିସ ମହିଳାଙ୍କ ଡାକ୍ତରୀ ମାଇନା କରିବା ପରେ ଅଭିଯୁକ୍ତମାନଙ୍କୁ ଗିରଫ କରିଛି । ଏହି ବସଟି ବିହାରରେ ପଞ୍ଜୀକୃତ ହୋଇଛି । ପୋଲିସ ଭାରତୀୟ ଦଣ୍ଡ ସଂହିତାର ଧାରା 64(1)/70(1)/3(5) ଅନୁସାରେ ମାମଲା ରୁଜୁ କରିଛି । ଅର୍ଥାତ୍ ଏହି ଘଟଣାରେ ଦୁଷ୍କର୍ମ, ଗଣଦୁଷ୍କର୍ମ ଓ ମିଳିତ ଷଡ଼ଯନ୍ତ୍ର ସମ୍ବନ୍ଧୀୟ ଆପରାଧିକ ମାମଲାର ଧାରା ଲଗାଯାଇଛି । ଏହି କାଣ୍ଡ ଘଟିଥିବା ବସର ମଧ୍ୟ ଫଟୋ ଓ ଭିଡିଓ ଏବେ ସାମ୍ନାକୁ ଆସିଛି । ବସଟି ନିୟମର ଘୋର ଉଲ୍ଲଙ୍ଘନ କରି ଚାଲୁଥିଲା । ଏହି ବସର ସମସ୍ତ ଝରକାରେ ପରଦା ପଡ଼ିଥିବାବେଳେ କୌଣସି ଇମରଜେନ୍ସି ଗେଟ୍ ମଧ୍ୟ ନଥିଲା ।

• ନିର୍ଭୟା କାଣ୍ଡର ପୁନରାବୃତ୍ତି

ଏହି ଘଟଣାଟି ୨୦୧୨ ଦିଲ୍ଲୀ ବସ୍ ଗଣଦୁଷ୍କର୍ମ ଘଟଣାକୁ ମନେ ପକାଇଛି, ଯେଉଁଥିରେ ଡିସେମ୍ବର ୧୬-୧୭ ରାତିରେ ଦକ୍ଷିଣ ଦିଲ୍ଲୀରେ ଏକ ଚଳନ୍ତା ବସ୍ ଭିତରେ ଜଣେ ୨୩ ବର୍ଷୀୟା ପାରାମେଡିକକାଲ ଛାତ୍ରୀଙ୍କୁ ଗଣଦୁଷ୍କର୍ମ କରାଯାଇଥିଲା, ଯାହାକୁ ପରେ ନିର୍ଭୟା ବୋଲି କୁହାଗଲା । ତାଙ୍କୁ ୬ ଜଣ ପୁରୁଷ ଦୁଷ୍କର୍ମ କରିବା ପରେ ନିର୍ମମ ଭାବରେ ଆକ୍ରମଣ କରିଥିଲେ ଏବଂ ପରେ ତାଙ୍କୁ ରାସ୍ତାରେ ଫିଙ୍ଗି ଦେଇଥିଲେ । ଏହାର କିଛି ଦିନ ପରେ ଅର୍ଥାତ୍ ଡିସେମ୍ବର ୨୯ ତାରିଖରେ ସିଙ୍ଗାପୁରର ମାଉଣ୍ଟ ଏଲିଜାବେଥ ହସ୍ପିଟାଲରେ ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା ।