Toilet Hidden Camera / ଟଏଲେଟ୍ କଣା କରି ସୁଟିଂ କରୁଥିବା ଅଶ୍ଳୀଳ ଭିଡିଓ; ପଦାରେ ପଡ଼ିଲା ଘର ମାଲିକ ପୁଅର ଘୃଣ୍ୟ କାଣ୍ଡ

ଲକ୍ଷ୍ନୌ: ଉତ୍ତର ପ୍ରଦେଶ ଭଦୋହି ଜିଲ୍ଲାରେ ଛାତ୍ରୀଙ୍କ ଗୋପନୀୟତାକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ଗୋପିଗଞ୍ଜ କୋତୱାଲି ଅଞ୍ଚଳରେ ଥିବା ଏକ ଘରୋଇ ଲାଇବ୍ରେରୀର ଟଏଲେଟ୍‌ର କାନ୍ଥ କଣା କରି ଛାତ୍ରୀଙ୍କ ଅଶ୍ଳୀଳ ଭିଡିଓ ସୁଟିଂ ହେଉଥିଲା । ତେବେ ସେହି ଘର ମାଲିକର ପୁଅ ଏହି ଘୃଣ୍ୟ କାର୍ଯ୍ୟ କରୁଥିବା ଅଭିଯୋଗ ହୋଇଛି । ପୋଲିସ ଅଭିଯୁକ୍ତଠାରୁ ଭିଡିଓ ଥିବା ମୋବାଇଲ ଫୋନକୁ ଜବତ କରିବା ସହ ତାକୁ ଗିରଫ କରିଛି । ସେହି ମୋବାଇଲରୁ ଆପତ୍ତିଜନକ ଭିଡିଓ ମିଳିଥିବା ପୋଲିସ କହିଛି ।

• କଣ ପୂରା ଘଟଣା ?

ପୋଲିସର କହିବାନୁସାରେ ଗୋପିଗଞ୍ଜ କୋତୱାଲି ଅଞ୍ଚଳର ଲାଲା ନଗର ନିକଟରେ ଏକ ଘରୋଇ ଲାଇବ୍ରେରୀ ରହିଛି । ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷା ପାଇଁ ପ୍ରସ୍ତୁତି କରୁଥିବା ପରୀକ୍ଷାର୍ଥୀ ଏଠାକୁ ଆସି ପାଠ ପଢିଥାନ୍ତି । ଲାଇବ୍ରେରୀ ପରିଚାଳକ ଭରଥରି ବିନ୍ଦ ପୋଲିସକୁ କହିଛନ୍ତି ଯେ ଛାତ୍ରୀମାନଙ୍କ ଟଏଲେଟ୍‌କୁ ଲାଗି ଘର ମାଲିକର ଏକ କୋଠରୀ ଅଛି । ଅଭିଯୋଗ ହୋଇଛି ଯେ ଘର ମାଲିକର ପୁଅ ଏହି ରୁମ୍‌ରୁ କାନ୍ଥକୁ କଣା କରି ଛାତ୍ରୀମାନଙ୍କ ଅଜାଣତରେ ଅଶ୍ଳୀଳ ଭିଡିଓ ରେକର୍ଡ କରୁଥିଲା।

• କେମିତି ଘଟଣାର ଖୁଲାସା ହେଲା ?

ଘଟଣା ସେତେବେଳେ ସାମ୍ନାକୁ ଆସିଥିଲା ଯେତେବେଳେ କିଛି ଛାତ୍ରୀ ଅଭିଯୁକ୍ତ ମୋବାଇଲରେ ଅନେକ ଛାତ୍ରୀଙ୍କ ଅଶ୍ଳୀଳ ଭିଡିଓ ଦେଖିଥିଲେ । ଏହାପରେ ଲାଇବ୍ରେରୀ ପରିଚାଳକ ପୋଲିସକୁ ଏନେଇ ସୂଚନା ଦେଇଥିଲେ । ଅଭିଯୋଗ ଆସିବା ପରେ ଗୋପିଗଞ୍ଜ ପୋଲିସ ଅଭିଯୁକ୍ତ ରବି ଶଙ୍କର ଗୁପ୍ତା ବିରୁଦ୍ଧରେ ଆଇଟି ଆକ୍ଟ ସମେତ ଅନ୍ୟ ଅପରାଧିକ ଧାରା ରୁଜୁ କରିଛି । ପୋଲିସ ଯାଞ୍ଚ ଆରମ୍ଭ କରିବା ପରେ ପ୍ରଥମେ ମୋବାଇଲ ଯାଞ୍ଚ କରିଥିଲା । ସେଥିରୁ କିଛି ଛାତ୍ରୀଙ୍କ ଆପତ୍ତିଜନକ ଭିଡିଓ ମିଳିଛି । ଏହାପରେ ପୋଲିସ ଅଭିଯୁକ୍ତକୁ ଗିରଫ କରିଛି ।

ପଢନ୍ତୁ ଏହି ଖବର: ଟିଚର ଗାଳିଦେଲେ, ଚାପୁଡ଼ା ମାରିଲେ...କାନ୍ଦି କାନ୍ଦି ଚାଲିଗଲା କୁନିପୁଅର ଜୀବନ

ଗୋପିଗଞ୍ଜ ଥାନା ମୁଖ୍ୟ ସଚିତାନନ୍ଦ ପାଣ୍ଡେ କହିଛନ୍ତି ଯେ ଏବେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ପରେ ଅଭିଯୁକ୍ତକୁ କୋର୍ଟରେ ହାଜର କରାଯିବ । ପୋଲିସ ଏବେ ମୋବାଇଲକୁ ଯାଞ୍ଚ କରିବା ସହ ଏହି ମାମଲାରେ ଆଉ କିଏ ଜଡ଼ିତ କି ନାହିଁ ସେ ନେଇ ତଦନ୍ତ କରୁଛି । ସ୍ଥାନୀୟ ଅଞ୍ଚଳରେ ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଥିବାବେଳେ ଛାତ୍ରୀମାନେ ଅଭିଯୁକ୍ତ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଅନ୍ୟପଟେ ଏହି ଘଟଣା ବାହାରେ ଛାତ୍ରୀଙ୍କ ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।