Kedarnath Yatra Resumes / ହର ହର ମହାଦେବ; ପୁଣି କେଦାରନାଥ ଯାତ୍ରା ଆରମ୍ଭ, କାହିଁକି ବନ୍ଦ ଥିଲା ?

ପୁଣି ଲାଗିଲା ଡୋରି । ଆସିଲା ବାବା କେଦାରନାଥଙ୍କ ଡାକରା । ମନରେ ଭକ୍ତି, ଶ୍ରଦ୍ଧାର ସହ ମହାଦେବଙ୍କ ଦର୍ଶନ ପାଇଁ ବାହାରିଛନ୍ତି ଶ୍ରଦ୍ଧାଳୁ । ମଝିରେ ଖରାପ ପାଗ ଯୋଗୁଁ କିଛି ସମୟ ପାଇଁ କେଦାରନାଥ ଯାତ୍ରା ବନ୍ଦ ହୋଇଯାଇଥିବାରୁ ଶ୍ରଦ୍ଧାଳୁମାନେ ଆଶା ଆଶଙ୍କାରେ ଥିଲେ । ଶେଷରେ ପାଗ ଅନୁକୂଳ ହୋଇଛି । ଶନିବାର ସକାଳେ ପୁଣି ଥରେ ଆରମ୍ଭ ହୋଇଛି କେଦାରନାଥ ଯାତ୍ରା ।

ତେବେ ଯାତ୍ରା ପୁଣି ଥରେ ଆରମ୍ଭ ହେବା ପରେ ଭକ୍ତମାନେ ଉତ୍ସାହିତ ହୋଇପଡ଼ିଛନ୍ତି । ବାବା କେଦାରଙ୍କ ଦର୍ଶନ ପାଇଁ ବହୁ ସଂଖ୍ୟକ ତୀର୍ଥଯାତ୍ରୀ ତୀର୍ଥପଥରେ ବାହାରିଥିଲେ । ଏପର୍ଯ୍ୟନ୍ତ ୧୧ ଲକ୍ଷ ଭକ୍ତ କେଦାରନାଥ ଯାତ୍ରାରେ ଦର୍ଶନ କରିସାରିଛନ୍ତି । ସୋନପ୍ରୟାଗ ଏବଂ ଗୌରୀକୁଣ୍ଡରୁ ୧୦,୦୦୦ରୁ ଅଧିକ ତୀର୍ଥଯାତ୍ରୀ କେଦାରନାଥ ଅଭିମୁଖେ ଯାତ୍ରା କରିଥିଲେ ।

• ଯାତ୍ରାରେ ବାଧା ଆଣିଥିଲା ଖରାପ ପାଗ

ଉତ୍ତରାଖଣ୍ଡର କେଦାରନାଥ ଅଞ୍ଚଳରେ ଗତ କିଛି ଦିନ ଧରି ବର୍ଷା ଏବଂ ଖରାପ ପାଗ ଲାଗି ରହିଛି । ସୁରକ୍ଷା ଦୃଷ୍ଟିରୁ ଶୁକ୍ରବାର କିଛି ସ୍ଥାନରେ ତୀର୍ଥଯାତ୍ରୀମାନଙ୍କୁ ନିରାପଦ ସ୍ଥାନରେ ଅଟକାଯାଇଥିଲା । ଜିଲ୍ଲା ପ୍ରଶାସନ କହିଛି ଯେ ତୀର୍ଥପଥରେ ତୀର୍ଥଯାତ୍ରୀଙ୍କ ସୁରକ୍ଷା ଏବଂ ସୁବିଧାକୁ ପ୍ରାଥମିକତା ଦିଆଯାଉଛି। ତୀର୍ଥଯାତ୍ରୀମାନେ ଯେପରି କୌଣସି ଅସୁବିଧାର ସମ୍ମୁଖୀନ ନ ହୁଅନ୍ତି ତାହା ନିଶ୍ଚିତ କରିବା ପାଇଁ ପୋଲିସ, ବିପର୍ଯ୍ୟୟ ପରିଚାଳନା ଏବଂ ଅନ୍ୟାନ୍ୟ ସମ୍ପୃକ୍ତ ବିଭାଗଗୁଡ଼ିକ ନିରନ୍ତର ସତର୍କତା ବଜାୟ ରଖିଛନ୍ତି।

• କେଦାରନାଥ ଯାତ୍ରାର ଖାସ୍ କଥା

୧୨ଟି ଜ୍ୟୋତିର୍ଲିଙ୍ଗ ମଧ୍ୟରୁ ଗୋଟିଏ: ଭଗବାନ ଶିବଙ୍କ ମୁଖ୍ୟ ଜ୍ୟୋତିର୍ଲିଙ୍ଗ ମଧ୍ୟରେ କେଦାରନାଥ ଧାମର ସ୍ଥାନ ରହିଛି, ତେଣୁ ଏଠାରେ ଦର୍ଶନକୁ ବିଶେଷ ଗୁରୁତ୍ୱ ଦିଆଯାଇଥାଏ ।
ଚାରିଧାମ ଯାତ୍ରା ବି ସାମିଲ: କେଦାରନାଥ ହେଉଛି ଚାରିଧାମ ଯାତ୍ରାର ଚାରୋଟି ମୁଖ୍ୟ ତୀର୍ଥସ୍ଥଳ ମଧ୍ୟରୁ ଗୋଟିଏ।
ମହାଭାରତ ସହ ଜଡିତ ଇତିହାସ: ବିଶ୍ୱାସ କରାଯାଏ ଯେ ପାଣ୍ଡବମାନେ ମହାଭାରତ ଯୁଦ୍ଧ ପରେ ଭଗବାନ ଶିବଙ୍କ ଆଶୀର୍ବାଦ ପାଇବା ପାଇଁ ଏଠାକୁ ଆସିଥିଲେ।

ପଢନ୍ତୁ ଏହି ଖବର: ଚାରିଧାମ ଆସୁଥିବା ଯାତ୍ରୀଙ୍କ ପାଇଁ ସ୍ୱାସ୍ଥ୍ୟ ପରାମର୍ଶ ଜାରି

ହିନ୍ଦୁ ଧର୍ମର ବିଶ୍ୱାସ ଅନୁସାରେ, କେଦାରନାଥ ଧାମକୁ ଯାଇ ଭଗବାନ ଶିବଙ୍କ ପୂଜା କରିବା ଦ୍ୱାରା ବ୍ୟକ୍ତିକୁ ଆଧ୍ୟାତ୍ମିକ ଶାନ୍ତି, ପୁଣ୍ୟ ଏବଂ ମୋକ୍ଷ ପ୍ରାପ୍ତିର ଆଶୀର୍ବାଦ ମିଳିଥାଏ । ସମୁଦ୍ର ପତ୍ତନଠାରୁ ପ୍ରାୟ ୧୧,୭୫୫ ଫୁଟ ଉଚ୍ଚତାରେ ଅବସ୍ଥିତ ଏହି ପବିତ୍ର ତୀର୍ଥସ୍ଥଳ ଭକ୍ତି, ତପସ୍ୟା ଏବଂ ବିଶ୍ୱାସର କେନ୍ଦ୍ରସ୍ଥଳୀ । ପ୍ରତିବର୍ଷ ଲକ୍ଷ ଲକ୍ଷ ଭକ୍ତ ବାବା କେଦାରଙ୍କ ଦର୍ଶନ ପାଇଁ ଅତ୍ୟନ୍ତ କଷ୍ଟକର ପର୍ବତ ପଥ ଦେଇ ଯାଆନ୍ତି । ଚଳିତ ବର୍ଷ ୨୨ ଏପ୍ରିଲରେ କେଦାରନାଥ ମନ୍ଦିରର ଦ୍ୱାର ଭକ୍ତମାନଙ୍କ ପାଇଁ ଖୋଲା ଯାଇଥିଲା ଏବଂ ଆଗାମୀ ୬ ମାସ ପାଇଁ ଖୋଲା ରହିବ।
ଚାରିଧାମ ଆସୁଥିବା ଯାତ୍ରୀଙ୍କ ପାଇଁ ସ୍ୱାସ୍ଥ୍ୟ ପରାମର୍ଶ ଜାରି