ଆଜି ପବିତ୍ର ରାମ ନବମୀ ଅବସରରେ 'ଜୟ ଶ୍ରୀରାମ' ଧ୍ୱନିରେ କମ୍ପୁଛି ଗଗନ ପବନ । ମର୍ଯ୍ୟାଦା ପୁରୁଷୋତ୍ତମ ଭଗବାନ ଶ୍ରୀ ରାମଙ୍କ ଜୀବନ କେବଳ ଏକ ପୁରାଣ ନୁହେଁ, ବରଂ ଏକ ଜୀବନ୍ତ ପାଠଶାଳା । ଯୁଗ ଯୁଗ ଧରି ତାଙ୍କର ଆଦର୍ଶ ମାନବ ସମାଜକୁ ଦିଗଦର୍ଶନ ଦେଇଆସିଛି ।

କାହିଁକି ଆଜିର ଯୁଗରେ ପ୍ରଭୁ ଶ୍ରୀରାମ ସବୁଠୁ ଅଧିକ ପ୍ରାସଙ୍ଗିକ ? କାରଣ, ଯେତେବେଳେ ଜୀବନରେ ଦୁଃଖ ଆସେ, ସେତେବେଳେ ଶ୍ରୀରାମ ଆମକୁ ଧୈର୍ଯ୍ୟ ଶିଖାନ୍ତି । ଯେତେବେଳେ ପରିବାରରେ ଦ୍ୱନ୍ଦ୍ୱ ଦେଖାଦିଏ, ସେତେବେଳେ ସେ ତ୍ୟାଗ ଶିଖାନ୍ତି ।

ଆଉ ଯେତେବେଳେ ଅନ୍ୟାୟ ବିରୋଧରେ ଲଢ଼ିବାର ପ୍ରଶ୍ନ ଆସେ, ସେତେବେଳେ ସେ ଆମକୁ ଦୃଢ଼ ସଂକଳ୍ପର ଶିକ୍ଷା ଦିଅନ୍ତି । ଜଣେ ଆଦର୍ଶ ପୁତ୍ର, ଜଣେ ସ୍ନେହୀ ଭାଇ ଏବଂ ଜଣେ ନ୍ୟାୟପ୍ରିୟ ରାଜା । ଏହି ସବୁ ରୂପରେ ପ୍ରଭୁ ରାମ ଆମକୁ ଶିଖାଇଛନ୍ତି ଯେ, ପରିସ୍ଥିତି ଯାହା ବି ହେଉ, ମଣିଷ ନିଜର 'ମର୍ଯ୍ୟାଦା' ଏବଂ 'ଧର୍ମ' କେବେବି ଛାଡ଼ିବା ଉଚିତ୍ ନୁହେଁ । ଆଜି ପବିତ୍ର ରାମ ନବମୀରେ ଚାରିଆଡ଼େ ଶୁଭୁଛି 'ଜୟ ଶ୍ରୀରାମ' ମନ୍ତ୍ର ।

ତେବେ ଆଜିର ଏହି ଶୁଭ ଅବସରରେ ଆସନ୍ତୁ ଜାଣିବା ପ୍ରଭୁ ଶ୍ରୀରାମଙ୍କ ଜୀବନରୁ ମିଳୁଥିବା ୧୦ଟି ବଡ଼ ଶିକ୍ଷା, ଯାହା ଆପଣଙ୍କ ଜୀବନକୁ ବଦଳାଇ ଦେଇପାରେ ।

ଏଥିସହ ପଢ଼ନ୍ତୁ: ଆସନ୍ତାକାଲି ପବିତ୍ର ଶ୍ରୀରାମ ନବମୀ ଚଳଚଞ୍ଚଳ ସାରା ଓଡ଼ିଶା


୧. ଧୈର୍ଯ୍ୟ ଓ ସଂଯମତା
ରାଜ୍ୟାଭିଷେକ ପାଇଁ ପ୍ରସ୍ତୁତ ହେଉଥିବା ବେଳେ ହଠାତ୍ ୧୪ ବର୍ଷର ବନବାସ ଆଦେଶ । କିନ୍ତୁ ଶ୍ରୀରାମଙ୍କ ମୁହଁରେ ସେହି ସମାନ ହସ । ବିପଦ ସମୟରେ ବିଚଳିତ ନହୋଇ କିପରି ଧୈର୍ଯ୍ୟର ସହ ପରିସ୍ଥିତିର ସାମ୍ନା କରିବାକୁ ହୁଏ, ତାହା ଶ୍ରୀରାମଙ୍କ ଠାରୁ ଶିଖିବା ଉଚିତ୍ ।

୨. ମାତୃ-ପିତୃ ଭକ୍ତି
ପିତାଙ୍କ କଥା ରଖିବା ପାଇଁ ସେ ସମସ୍ତ ସୁଖ-ସୁବିଧା ତ୍ୟାଗ କରିଥିଲେ । ଆଜିର ସମୟରେ ପିତା ମାତାଙ୍କ ସମ୍ମାନ ଓ ସେବା ହିଁ ସବୁଠାରୁ ବଡ଼ ଧର୍ମ ବୋଲି ସେ ପ୍ରମାଣିତ କରିଛନ୍ତି । ପିତୃ ଆଦେଶ ପାଳନ କରିବା ପାଇଁ ସେ ରାଜ୍ୟସୁଖ ତ୍ୟାଗ କରି ୧୪ ବର୍ଷ ବନବାସରେ କାଟିଥିଲେ ।

୩. ସମାନତା ଓ ଭେଦଭାବ ଶୂନ୍ୟ
ଜଣେ ରାଜକୁମାର ହୋଇ ମଧ୍ୟ ଶ୍ରୀରାମ ଶବରୀଙ୍କ ଅଇଁଠା କୋଳି ଖାଇଥିଲେ ଏବଂ ଗୁହକ ଶବରଙ୍କୁ ଆଲିଙ୍ଗନ କରିଥିଲେ । ଜାତି-ଧର୍ମ ନିର୍ବିଶେଷରେ ମଣିଷକୁ ସମ୍ମାନ ଦେବା ତାଙ୍କର ଏକ ଅମୂଲ୍ୟ ଶିକ୍ଷା ।

୪. ଭ୍ରାତୃ ପ୍ରେମ
ଭାଇ ଭାଇ ମଧ୍ୟରେ କିପରି ସମ୍ପର୍କ ରହିବା ଉଚିତ୍, ତାହା ରାମ-ଲକ୍ଷ୍ମଣ ଏବଂ ଭରତଙ୍କ ଚରିତ୍ରରୁ ସ୍ପଷ୍ଟ ହୁଏ । ସ୍ୱାର୍ଥ ତ୍ୟାଗ କରି ପରସ୍ପରକୁ ସମର୍ପଣ କରିବା ହିଁ ପ୍ରକୃତ ସମ୍ପର୍କ । ଆଜିର ଦୁନରେ ସମ୍ପର୍କର ସଂଜ୍ଞା ଦୁର୍ବଳ ହୋଇପଡୁଥିବା ବେଳେ ପ୍ରଭୁ ଶ୍ରୀରାମଙ୍କ ଜୀବନରେ ଭାତୃ ପ୍ରେମ ସଂପର୍କର ପରିଧିକୁ ବିସ୍ତୃତ କରୁଛି ।

୫. ଦୟା ଓ କ୍ଷମା
ଶ୍ରୀ ରାମ କେବଳ ଶକ୍ତିଶାଳୀ ନଥିଲେ, ସେ ଥିଲେ ଅତ୍ୟନ୍ତ ଦୟାଳୁ । ଶତ୍ରୁ ରାବଣ ମୃତ୍ୟୁ ଶଯ୍ୟାରେ ଥିବା ବେଳେ ମଧ୍ୟ ତାଙ୍କୁ ସମ୍ମାନ ଦେବା ପାଇଁ ସେ ଲକ୍ଷ୍ମଣଙ୍କୁ ପଠାଇଥିଲେ ।

୬. ଦୃଢ଼ ସଂକଳ୍ପ
ଶୂନ୍ୟ ହସ୍ତରେ ବନବାସ ବାହାରିଥିଲେ ମଧ୍ୟ ସାଧାରଣ ବାନର ସେନାଙ୍କୁ ଏକଜୁଟ କରି ସମୁଦ୍ରରେ ସେତୁ ବାନ୍ଧିବା ଏବଂ ଅତ୍ୟନ୍ତ ଶକ୍ତିଶାଳୀ ରାବଣକୁ ପରାସ୍ତ କରିବା ତାଙ୍କର ଦୃଢ଼ ଇଚ୍ଛାଶକ୍ତିର ପରିଚୟ ।

୭. ସତ୍ୟ ଓ ଧର୍ମର ପଥ
ସେ ଜାଣିଥିଲେ ରାବଣ ଜଣେ ବଡ଼ ପଣ୍ଡିତ, କିନ୍ତୁ ଅଧର୍ମ ପଥରେ ଥିବାରୁ ତାଙ୍କର ପତନ ନିଶ୍ଚିତ । ସବୁବେଳେ ସତ୍ୟ ଏବଂ ନ୍ୟାୟ ପକ୍ଷରେ ଠିଆ ହେବାକୁ ଶ୍ରୀରାମ ଶିଖାଇଛନ୍ତି ।

୮. ସଫଳ ନେତୃତ୍ୱ
ଜଣେ ଭଲ ନେତା କେବଳ ଆଦେଶ ଦିଏନି, ସେ ସମସ୍ତଙ୍କୁ ସାଥିରେ ନେଇ ଚାଲେ । ବାନର ସେନାଙ୍କୁ ବିଶ୍ୱାସକୁ ନେଇ ସେ ଅସମ୍ଭବକୁ ସମ୍ଭବ କରି ଦେଖାଇଥିଲେ ।

ପଢନ୍ତୁ ଏହି ଖବର: ରାମ ନବମୀ ବେଳେ ଚର୍ଚ୍ଚାରେ ଅଞ୍ଜନୀ ପୁତ୍ର ସେନା

୯. ବିଶ୍ୱାସୀ ବନ୍ଧୁତା
ସୁଗ୍ରୀବ ଏବଂ ବିଭୀଷଣଙ୍କ ସହ ତାଙ୍କର ବନ୍ଧୁତା ପ୍ରମାଣ କରେ ଯେ, ସଙ୍କଟ ସମୟରେ ଯିଏ ସାଥିରେ ରୁହେ, ସେ ହିଁ ପ୍ରକୃତ ବନ୍ଧୁ । ବନ୍ଧୁ ପାଇଁ ସର୍ବସ୍ୱ ତ୍ୟାଗ କରିବାକୁ ସେ ପଛାଇ ନଥିଲେ ।

୧୦. ଆଦର୍ଶ ପତି ଓ ସୁରକ୍ଷାକର୍ତ୍ତା
ମାତା ସୀତାଙ୍କ ସମ୍ମାନ ରକ୍ଷା ପାଇଁ ସେ ସମଗ୍ର ସୁବର୍ଣ୍ଣ ଲଙ୍କାକୁ ଛାରଖାର କରିଦେଇଥିଲେ । ନାରୀ ସମ୍ମାନ ଏବଂ ନିଜ ପରିବାର ପ୍ରତି ଦାୟିତ୍ୱବୋଧର ସେ ହେଉଛନ୍ତି ଶ୍ରେଷ୍ଠ ଉଦାହରଣ ।
ପ୍ରଭୁ ଶ୍ରୀରାମଙ୍କ ଏହି ୧୦ଟି ସୂତ୍ରକୁ ଯଦି ଆମେ ନିଜ ଜୀବନରେ ଟିକିଏ ବି ପ୍ରୟୋଗ କରିବା, ତେବେ ସମାଜରେ ଏକ ବଡ଼ ପରିବର୍ତ୍ତନ ଆସିପାରିବ । ଜୟ ଶ୍ରୀରାମ !