Heavy Crowd / ରତ୍ନବେଦୀରୁ ଓହ୍ଲାଇ ଆସିଛି କାଳିଆ; ଚକାନୟନକୁ ଟିକେ ଦେଖିବା ପାଇଁ ବଡ଼ଦାଣ୍ଡରେ ଜନସମୁଦ୍ର

ପୁରୀ: ଜଗାର ରଥଯାତ୍ରା ଦେଖିବାକୁ ଜନସମୁଦ୍ର ପାଲଟିଛି ବଡ଼ଦାଣ୍ଡ । ଭାବ ଓ ଭକ୍ତିରେ ଉଛୁଳି ପଡ଼ୁଛି ବଡ଼ଦାଣ୍ଡ । ଭଗବାନ ଓ ଭକ୍ତଙ୍କ ମଧ୍ୟରେ ବାଧକ ସାଜିପାରୁନି ବର୍ଷା । ଚକାଆଖିର ପ୍ରେମରେ ବିଭୋର ମନ ଓ ଆତ୍ମା । ରଥାରୂଢ଼ କଳାଶ୍ରୀମୁଖର ଦର୍ଶନ ଅପେକ୍ଷାରେ କୋଟି କୋଟି ଭକ୍ତ । ଚତୁର୍ଦ୍ଧାମୂର୍ତ୍ତିଙ୍କ ଝଲକ ପାଇବା ପାଇଁ ଭକ୍ତଙ୍କ ମଧ୍ୟରେ ଅଦ୍ଭୁତ ଶିହରଣ ଦେଖିବାକୁ ମିଳିଛି । ବର୍ଷା ଯୋଗୁଁ ବଡ଼ ଦାଣ୍ଡକୁ ଘୋଡ଼େଇଛି ଭକ୍ତଙ୍କ ମାଳମାଳ ଛତା, ଯାହାର ଦୃଶ୍ୟ ବେଶ ମନୋରମ ରହିଛି ।

• କଡ଼ା ସୁରକ୍ଷା ବଳୟରେ ଶ୍ରୀକ୍ଷେତ୍ର

ସେପଟେ କଡ଼ା ସୁରକ୍ଷା ବଳୟରେ ଅଛି ପୁରୀ ସହର । AI ଓ ସିସିଟିଭି ନଜରରେ ସାରା ସହରକୁ ରଖାଯାଇଛି । ୧୨ ହଜାର ପୋଲିସଙ୍କ ସହ ସଜାଗ ଅଛନ୍ତି କୋଷ୍ଟଗାର୍ଡ ଓ ନୌସେନା । ପୋଲିସ ଡିଜି ୱାଇ ବି ଖୁରାନିଆ କହିଲେ, ସବୁ ଠିକ୍ ସମୟରେ ଚାଲୁଛି । ସୁରୁଖୁରୁରେ ହେବ ରଥ ଟଣା । ଅନ୍ୟପଟେ ସବୁ ଠିକ୍‌ଠାକ୍ ଚାଲିଛି କହିଛନ୍ତି ପୁରୀ ଏସ୍‌ପି ପ୍ରତୀକ ସିଂ । ସେ ସବୁ ବ୍ୟବସ୍ଥାକୁ ତନତନ କରି ତଦାରଖ କରିଛନ୍ତି ।

• ଶ୍ଵାସରୁଦ୍ଧ ହେଲେ ଯୁବକ

ପୁରୀ ମେଡିକାଲରେ ୫ରୁ ଅଧିକ ରୋଗୀଙ୍କୁ ଭର୍ତ୍ତି କରାଯାଇଛି । ସାମାନ୍ୟ ଭିଡରେ ବେହୋସ୍ ହୋଇଥିବା ବେଳେ ସେମାନଙ୍କ ସ୍ୱାସ୍ଥ୍ୟ ଠିକ୍ ରହିଛି । ଅଗ୍ନିଶମ ବାହିନୀର ସ୍ପେଶାଲ ରେସକ୍ୟୁ ଟିମ ସେମାନଙ୍କୁ ଉଦ୍ଧାର କରିଛି । ସମସ୍ତେ ସୁସ୍ଥ ଥିବା ଜଣାପଡ଼ିଛି । ଅନ୍ୟପଟେ ଜଣେ ଭକ୍ତ ନାଚି ନାଚି ଚେତା ହରାଇଛନ୍ତି । କାଳିଆ ପ୍ରେମରେ ବାଇଆ ହୋଇ ନିଜକୁ ହଜାଇଲେ ଭକ୍ତ । ବଡ଼ ଦାଣ୍ଡରେ ଗଡିଲେ, ଏହାପରେ ନାଚି ନାଚି ନିଜକୁ ନିମଗ୍ନ କରି ଶେଷରେ ବେହୋସ୍ ହୋଇଗଲେ ।

• ଦେଶବିଦେଶରେ ପାଳନ ହେଉଛି ରଥଯାତ୍ରା

କେବଳ ପୁରୀ ନୁହଁ..ଦେଶ, ବିଦେଶରେ ବି ପାଳନ ହେଉଛି ରଥଯାତ୍ରା । ଗୁଜରାଟ ଅହମ୍ମଦାବାଦରେ ଘୋଷାଯାତ୍ରା ପାଇଁ ଭକ୍ତଙ୍କ ପ୍ରବଳ ଗହଳି ଦେଖିବାକୁ ମିଳିଛି । ଏଠାରେ ରଥରେ ଚତୁର୍ଦ୍ଧା ମୂରତି ବିରାଜମାନ ହୋଇଥିବାବେଳେ ଛେରା ପହଁରା କରିଛନ୍ତି ମୁଖ୍ୟମନ୍ତ୍ରୀ ଭୁପେନ୍ଦ୍ର ପଟେଲ । ମହାପ୍ରଭୁଙ୍କ ଦର୍ଶନ ପାଇଁ ପହଞ୍ଚିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ । 

ପଢନ୍ତୁ ଏହି ଖବର: ବଡ଼ଦାଣ୍ଡରେ ଦିବ୍ୟ ତିନି ରଥ; କେଉଁ ରଥ ଦର୍ଶନ କଲେ ମିଳେ କେଉଁ ଲାଭ ?

ଅନ୍ୟପଟେ, ନିର୍ଦ୍ଧାରିତ ସମୟରେ ଆରମ୍ଭ ହୋଇଛି ପହଣ୍ଡି । ଦିନ ୧୧ଟା ସୁଦ୍ଧା ବଡ଼ ଠାକୁର ବଳଭଦ୍ର, ଦେବୀ ସୁଭଦ୍ରାଙ୍କ ପହଣ୍ଡି ସରିଥିବାବେଳେ ଏବେ ଚାଲିଛି କାଳିଆ ଠାକୁରଙ୍କ ପହଣ୍ଡି । ପୂର୍ବାହ୍ନ ୧୧.୪୫ଟା ସୁଦ୍ଧା ଧାଡ଼ି ପହଣ୍ଡିରେ ଜଗା ।