Alisha Rani Pangi / ପଟାଙ୍ଗୀରୁ ଜନସେବା: ଆଲିଶା ରାଣୀ ପାଙ୍ଗୀଙ୍କ ସଫଳତା ନୂଆ ପିଢ଼ି ପାଇଁ ପ୍ରେରଣାର ଉତ୍ସ

ଭୁବନେଶ୍ୱର: କୋରାପୁଟ ଜିଲ୍ଲା ପଟାଙ୍ଗୀର ସୁଉଚ୍ଚ ପାହାଡ଼ ଘେରାରେ ବଢ଼ିଥିବା ଜଣେ ଝିଅ ଦିନେ ଏକ ବଡ଼ ସ୍ୱପ୍ନ ଦେଖିଥିଲେ । ବଳରାମ ପାଙ୍ଗୀଙ୍କ ଝିଅ ଆଲିଶା ରାଣୀ ପାଙ୍ଗୀ ନିଜର ଦୃଢ଼ ଇଚ୍ଛାଶକ୍ତି ଏବଂ ପରିଶ୍ରମ ବଳରେ ସେହି ସ୍ୱପ୍ନକୁ ସାକାର କରିପାରିଛନ୍ତି । ଓଡ଼ିଶାର ଏକ ଆଦିବାସୀ ଅଞ୍ଚଳରୁ ବାହାରି ସେ ଆଜି ରାଜ୍ୟ ସରକାରଙ୍କ ଅଧୀନରେ କନିଷ୍ଠ ଯନ୍ତ୍ରୀ (Junior Engineer) ଭାବେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ତାଙ୍କର ଏହି ସଫଳତା ଏବେ ଚାକିରି ପାଇଁ ଦିନରାତି ସଂଘର୍ଷ କରୁଥିବା ପିଲାଙ୍କ ପାଇଁ ପ୍ରେରଣାର ଉତ୍ସ ପାଲଟିଛି।

• ରଙ୍ଗ ଆଣିଲା ବର୍ଷ ବର୍ଷର ପରିଶ୍ରମ

ଆଲିଶାଙ୍କ ପାଇଁ ଏହା କେବଳ ଏକ ଚାକିରି ନୁହେଁ, ବରଂ ବର୍ଷ ବର୍ଷର ନିରବଚ୍ଛିନ୍ନ ସାଧନା, ଶିକ୍ଷା ଏବଂ ନିଷ୍ଠାର ଫଳ ଥିଲା । ଯାହା ପ୍ରମାଣିତ କରେ ଯେ, ସୁଯୋଗ ମିଳିଲେ ଓଡ଼ିଶାର ସୁଦୂର ଅଞ୍ଚଳରୁ ମଧ୍ୟ ପ୍ରତିଭାମାନେ ଆଗକୁ ଆସି ନିଜ ସ୍ୱପ୍ନ ପୂରଣ କରିପାରିବେ । ଗୃହନିର୍ମାଣ ଓ ନଗର ଉନ୍ନୟନ ବିଭାଗ ଅଧୀନରେ ମାଲକାନଗିରି RWS&S ଡିଭିଜନରେ କନିଷ୍ଠ ଯନ୍ତ୍ରୀ ଭାବେ ନିଯୁକ୍ତି ପାଇ ଆଲିଶା ଏବେ ଜନସେବା କ୍ଷେତ୍ରରେ ଏକ ନୂଆ ଅଧ୍ୟାୟ ଆରମ୍ଭ କରିବାକୁ ଯାଉଛନ୍ତି ।

• ଆଗାମୀ ପିଢିକୁ ଦେଲେ ବାର୍ତ୍ତା

ରାଜ୍ୟସ୍ତରୀୟ ନିଯୁକ୍ତି ମେଳାରେ ଆଲିଶା ପଟାଙ୍ଗୀ ଭଳି ଏକ ସୁଦୂର ଅଞ୍ଚଳରୁ ଆସି ସେହି ଭବ୍ୟ ମଞ୍ଚରେ ଛିଡ଼ା ହେବା ତାଙ୍କ ପାଇଁ ଏକ ଅଭୁଲା ମୁହୂର୍ତ୍ତ ଥିଲା । ଏହାପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ହାତରୁ ନିଯୁକ୍ତିପତ୍ର ଗ୍ରହଣ କରିଥିଲେ । ଆଲିଶାଙ୍କ ଏହି ସଫଳତା କେବଳ ତାଙ୍କର ବ୍ୟକ୍ତିଗତ ନୁହେଁ, ଏହା ଆଗାମୀ ପିଢ଼ି ପାଇଁ ଏକ ବଡ଼ ବାର୍ତ୍ତା । କୋରାପୁଟ, ମାଲକାନଗିରି, କନ୍ଧମାଳ କିମ୍ବା ଓଡ଼ିଶାର ଅନ୍ୟାନ୍ୟ ଗ୍ରାମାଞ୍ଚଳର ଝିଅମାନଙ୍କ ପାଇଁ ତାଙ୍କ ଯାତ୍ରା ଏହା ପ୍ରମାଣ କରେ ଯେ କଠିନ ପରିଶ୍ରମ କଲେ ଜଣେ ବ୍ୟକ୍ତି ନିଜ ଜୀବନରେ ବହୁ ସଫଳତା ହାସଲ କରିପାରିବ ।

ପଢନ୍ତୁ ଏହି ଖବର: ଚାକିରି ବାଣ୍ଟିଲେ ମୁଖ୍ୟମନ୍ତ୍ରୀ; ୧୩୨୬ ଜଣଙ୍କୁ ନିଯୁକ୍ତି ପତ୍ର ପ୍ରଦାନ କଲେ

ଏହି ନିଯୁକ୍ତି ମେଳାରେ ୯ଟି ବିଭାଗର ମୋଟ ୧,୩୨୬ ଜଣଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଥିଲା, ଯେଉଁଥିରେ ଗୃହନିର୍ମାଣ ଓ ନଗର ଉନ୍ନୟନ ବିଭାଗର ୩୬୪ ଜଣ ରହିଛନ୍ତି । ଏହି ନୂତନ ନିଯୁକ୍ତିଗୁଡ଼ିକ ଓଡ଼ିଶାର ବିକାଶ ଯାତ୍ରାରେ ଯୁବପିଢ଼ିଙ୍କ ସହଭାଗିତାକୁ ଆହୁରି ସୁଦୃଢ଼ କରିବ । ପଟାଙ୍ଗୀର ପାହାଡ଼ରୁ ଆରମ୍ଭ ହୋଇ ଜନସେବାର ଦାୟିତ୍ୱ ପର୍ଯ୍ୟନ୍ତ ଆଲିଶା ରାଣୀ ପାଙ୍ଗୀଙ୍କ ଏହି ଯାତ୍ରା ହେଉଛି ଆଶା, ସୁଯୋଗ ଏବଂ ନୂତନ ଓଡ଼ିଶାର ସ୍ୱପ୍ନ ସାକାର ହେବାର ଏକ ସୁନ୍ଦର କାହାଣୀ ।