ରାଷ୍ଟ୍ରପତି ଦ୍ରୌପଦୀ ମୁର୍ମୁ ଚଳିତ ୨୦୨୬ ବର୍ଷ ପାଇଁ କଳା, ସମାଜ ସେବା, ଲୋକସେବା, ବିଜ୍ଞାନ ଓ ଇଞ୍ଜିନିୟରିଂ, ବାଣିଜ୍ୟ ଓ ଶିଳ୍ପ, ଔଷଧ, ସାହିତ୍ୟ ଓ ଶିକ୍ଷା, କ୍ରୀଡା, ନାଗରିକ ସେବା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ମୋଟ୍‌ ୧୩୧ ଜଣଙ୍କୁ ପଦ୍ମ ପୁରସ୍କାର ପ୍ରଦାନ କରିବେ । ତେବେ ଆଜି (ସୋମବାର) ପ୍ରଥମ ପର୍ଯ୍ୟାୟରେ ରାଷ୍ଟ୍ରପତି ଭବନର ଗଣତନ୍ତ୍ର ମଣ୍ଡପରେ ଆୟୋଜିତ ଏକ ସ୍ଵତନ୍ତ୍ର କାର୍ଯ୍ୟକ୍ରମରେ ୬୬ ଜଣଙ୍କୁ ସମ୍ମାନିତ କରାଯିବ । ସେଥିମଧ୍ୟରୁ ଓଡ଼ିଶାର ବିଶିଷ୍ଟ ଜନଜାତି ସାହିତ୍ୟିକ ଓ ଗବେଷକ ମହେନ୍ଦ୍ର କୁମାର ମିଶ୍ରଙ୍କୁ ମଧ୍ୟ ପଦ୍ମ ପୁରସ୍କାରରେ ସମ୍ମାନିତ କରିବେ ମହାମହିମ ରାଷ୍ଟ୍ରପତି । ଚଳିତ ବର୍ଷ ପାଇଁ ରାଜ୍ୟରୁ ମୋଟ ୪ଜଣ ପଦ୍ମ ପୁରସ୍କାର ଲାଗି ମନୋନୀତ ହୋଇଛନ୍ତି ।

ଆଜି ଅପରାହ୍ନ ୫ଟାରେ ଏହି ସମାରୋହରେ ଭାରତର ଉପରାଷ୍ଟ୍ରପତି ସି.ପି ରାଧାକୃଷ୍ଣନ୍, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ଗୃହମନ୍ତ୍ରୀ ଏବଂ ସମବାୟ ମନ୍ତ୍ରୀ ଅମିତ ଶାହ, କେନ୍ଦ୍ରମନ୍ତ୍ରୀ ଏବଂ ଅନ୍ୟାନ୍ୟ ବିଶିଷ୍ଟ ଅତିଥିମାନେ ଯୋଗଦେବେ । ଦେଶର ସର୍ବୋଚ୍ଚ ନାଗରିକ ପୁରସ୍କାର ପ୍ରଦାନ ଉତ୍ସବର ପ୍ରଥମ ଦିନରେ, ରାଷ୍ଟ୍ରପତି ୨ଟି ପଦ୍ମ ବିଭୂଷଣ, ୬ଟି ପଦ୍ମ ଭୂଷଣ ଏବଂ ୫୮ଟି ପଦ୍ମଶ୍ରୀ ପୁରସ୍କାର ସମେତ ମୋଟ ୬୬ ଜଣ ପଦ୍ମ ପୁରସ୍କାର ପ୍ରଦାନ କରିବେ । ବାକି ପୁରସ୍କାରପ୍ରାପ୍ତମାନଙ୍କୁ ପରବର୍ତ୍ତୀ ସମୟରେ ଅନୁଷ୍ଠିତ ହେବାକୁ ଥିବା ସମାରୋହରେ ସମ୍ମାନିତ କରାଯିବ ।

• କିଏ ଡକ୍ଟର ମହେନ୍ଦ୍ର କୁମାର ମିଶ୍ର ?

ଚଳିତ ବର୍ଷର ପଦ୍ମ ପୁରସ୍କାରପ୍ରାପ୍ତମାନଙ୍କ ମଧ୍ୟରେ, ଓଡ଼ିଶାର ସୁନାମଧନ୍ୟ ଶିକ୍ଷାବିତ୍,ଜନଜାତି ସାହିତ୍ୟିକ ଡକ୍ଟର ମହେନ୍ଦ୍ର କୁମାର ମିଶ୍ର ଆଦିବାସୀ ଭାଷା, ଆଦିବାସୀ ଜ୍ଞାନ ପ୍ରଣାଳୀ ଏବଂ ବହୁଭାଷୀ ଶିକ୍ଷାର ସଂରକ୍ଷଣ ଓ ପ୍ରସାର କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ପଦ୍ମଶ୍ରୀ ପାଇବେ । ଚାରି ଦଶନ୍ଧିରୁ ଅଧିକ ସମୟ ଧରି, ଡକ୍ଟର ମିଶ୍ର ବିଲୁପ୍ତ ପ୍ରାୟ ଆଦିବାସୀ ଭାଷାକୁ ଶିକ୍ଷାରେ ସାମିଲ କରିବା ପାଇଁ କାର୍ଯ୍ୟ କରିଛନ୍ତି । ଏହାସହିତ ଓଡ଼ିଶାର ଆଦିବାସୀ ଐତିହ୍ୟ ଏବଂ ସାଂସ୍କୃତିକ ଐତିହ୍ୟକୁ ସୁରକ୍ଷା ଦେବାରେ ମଧ୍ୟ ଗୁରୁତ୍ୱପୂର୍ଣ୍ଣ ଅବଦାନ ରଖିଛନ୍ତି ।

• କଳାହାଣ୍ଡିର ଗର୍ବ ମହେନ୍ଦ୍ର

ପଶ୍ଚିମ ଓଡ଼ିଶାର ଅନ୍ୟତମ ଜିଲ୍ଲା କଳାହାଣ୍ଡିର ସୁନାପୁଅ ହେଉଛନ୍ତି ଡକ୍ଟର ମିଶ୍ର । ସେ ଆଦିବାସୀ ମୌଖିକ ପରମ୍ପରା, ଲୋକକଥା ଏବଂ ଆଦିବାସୀ ଜ୍ଞାନ ପ୍ରଣାଳୀକୁ ଡକ୍ୟୁମେଣ୍ଟେସନ୍ ପାଇଁ ଜାତୀୟ ଏବଂ ଅନ୍ତର୍ଜାତୀୟ ସ୍ତରରେ ସ୍ୱୀକୃତି ଅର୍ଜନ କରିଛନ୍ତି । ତାଙ୍କୁ ୟୁନେସ୍କୋ ଅନ୍ତର୍ଜାତୀୟ ମାତୃଭାଷା ପୁରସ୍କାର (୨୦୦୩) ପ୍ରଦାନ କରାଯାଇଥିଲା, ସେ ଏହି ସମ୍ମାନ ପାଇବାରେ ପ୍ରଥମ ଭାରତୀୟ ହୋଇପାରିଛନ୍ତି ।

• ଓଡ଼ିଶାରୁ ୪ଜଣଙ୍କୁ ପଦ୍ମ ସମ୍ମାନ

ବର୍ଷ ୨୦୨୬ ପାଇଁ ଓଡ଼ିଶାର ୪ ଜଣ ବିଶିଷ୍ଟ ବ୍ୟକ୍ତି ପଦ୍ମଶ୍ରୀ ପୁରସ୍କାର ପାଇବାକୁ ମନୋନୀତ ହୋଇଛନ୍ତି । କିନ୍ତୁ ଆଜି ସମାରୋହର ପ୍ରଥମ ଦିନରେ ଓଡ଼ିଶାର ପ୍ରଖ୍ୟାତ ଶିକ୍ଷାବିତ୍ ତଥା ଭାଷାବିତ୍ ଡକ୍ଟର ମହେନ୍ଦ୍ର କୁମାର ମିଶ୍ରଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଡକ୍ଟର ମିଶ୍ରଙ୍କ ବ୍ୟତୀତ, ସମାରୋହର ଅନ୍ୟ ଦିନରେ କଳା ପାଇଁ ସୀମାଞ୍ଚଳ ପାତ୍ର ଏବଂ ସାନ୍ତାଳି ଭାଷାବିତ୍‌, ଆଦିବାସୀ ସାହିତ୍ୟ ଓ ସଂସ୍କୃତିର ଗବେଷକ ତଥା ସଂରକ୍ଷକ ଚରଣ ହେମ୍ବ୍ରମ୍‌ (ସାହିତ୍ୟ ଏବଂ ଶିକ୍ଷା) ଏବଂ ମାଷ୍ଟର ବୁଣାକାର ଶରତ କୁମାର ପାତ୍ରଙ୍କୁ କଳା ପାଇଁ ଚଳିତ ବର୍ଷ ପଦ୍ମଶ୍ରୀରେ ସମ୍ମାନିତ କରାଯିବ ।

• କାହାକୁ ଦିଆଯାଏ ପଦ୍ମ ସମ୍ମାନ ?

ଭାରତର ସର୍ବୋଚ୍ଚ ନାଗରିକ ସମ୍ମାନ ମଧ୍ୟରେ ପଦ୍ମ ପୁରସ୍କାର କଳା, ସାହିତ୍ୟ ଏବଂ ଶିକ୍ଷା, ସମାଜସେବା, ବିଜ୍ଞାନ ଏବଂ ଇଞ୍ଜିନିୟରିଂ, ଔଷଧ, ସାର୍ବଜନୀନ ବ୍ୟାପାର, କ୍ରୀଡା, ନାଗରିକ ସେବା, ବାଣିଜ୍ୟ ଏବଂ ଶିଳ୍ପ ଭଳି ବିବିଧ କ୍ଷେତ୍ରରେ ବିଶିଷ୍ଟ ଏବଂ ଅସାଧାରଣ ସେବାକୁ ସ୍ୱୀକୃତି ଦିଏ । ପୁରସ୍କାରଗୁଡ଼ିକ ୩ଟି ବର୍ଗରେ ପ୍ରଦାନ କରାଯାଏ, ସେଗୁଡ଼ିକ ହେଉଛି ପଦ୍ମ ବିଭୂଷଣ, ପଦ୍ମ ଭୂଷଣ ଏବଂ ପଦ୍ମଶ୍ରୀ । ପ୍ରତିବର୍ଷ ଗଣତନ୍ତ୍ର ଦିବସ ଅବସରରେ ପଦ୍ମ ବିଜେତାଙ୍କ ନାମ ଘୋଷଣା କରାଯାଏ । ୨୦୨୬ ପାଇଁ, ରାଷ୍ଟ୍ରପତି ୧୩୧ଟି ପଦ୍ମ ପୁରସ୍କାର ପ୍ରଦାନ କରିବାକୁ ଅନୁମୋଦନ କରିଛନ୍ତି, ଯେଉଁଥିରେ ୫ଟି ପଦ୍ମ ବିଭୂଷଣ, ୧୩ଟି ପଦ୍ମ ଭୂଷଣ ଏବଂ ୧୧୩ଟି ପଦ୍ମଶ୍ରୀ ପୁରସ୍କାର ସାମିଲ ।

ପଢନ୍ତୁ ଏହି ଖବର: ସାହିତ୍ୟ ଓ ଶିକ୍ଷାରେ ଚରଣ ହେମ୍ବ୍ରମ, ମହେନ୍ଦ୍ର କୁମାର ମିଶ୍ର, କଳାରେ ଶରତ କୁମାର ପାତ୍ର ଓ ସୀମାଞ୍ଚଳ ପାତ୍ରୋଙ୍କୁ ପଦ୍ମଶ୍ରୀ