ନ୍ୟାସନାଲ ଟେଷ୍ଟିଂ ଏଜେନ୍ସି (NTA) ଡାକ୍ତରୀ ପ୍ରବେଶିକା ପରୀକ୍ଷା NEET UG ୨୦୨୬ ପାଇଁ ଫଳାଫଳ ପ୍ରକାଶ କରିଛି । ଏଥର ଝିଅମାନେ ପୁଅମାନଙ୍କ ତୁଳନାରେ ଭଲ ପ୍ରଦର୍ଶନ କରିଛନ୍ତି । ଏହି ବର୍ଷ ୧୧.୨୧ ଲକ୍ଷ ପ୍ରାର୍ଥୀ ପରୀକ୍ଷାରେ କୃତକାର୍ଯ୍ୟ ହୋଇଥିବାବେଳେ ସେଥିମଧ୍ୟରୁ ୫୮ ପ୍ରତିଶତରୁ ଅଧିକ ଝିଅ । ତେବେ ଏହି ଝିଅଙ୍କ ମଧ୍ୟରେ ଅଲ୍ ଇଣ୍ଡିଆ ରାଙ୍କ-୨୦ (୬୯୫ ମାର୍କ) ରଖି ଓଡ଼ିଶାକୁ ଗର୍ବିତ କରିଛନ୍ତି ଓଡ଼ିଆ ଝିଅ ବୈଷ୍ଣବୀ ଦାସ । ରଥଯାତ୍ରା ଦେଖିବାକୁ ଯାଉଥିବା ସମୟରେ ସେ କିପରି ରେଜଲ୍ଟ ଦେଖିଥିଲେ ଓ ତାଙ୍କର ପ୍ରତିକ୍ରିୟା କିପରି ଥିଲା ସେ ସମ୍ପର୍କରେ କହିଛନ୍ତି ସେ ।

• ରଥଯାତ୍ରା ଦେଖିବାକୁ ଯାଉଥିଲି...

ବୈଷ୍ଣବୀ ଏକ ଜାତୀୟ ଖରବରାହ ସଂସ୍ଥାକୁ ପ୍ରତିକ୍ରିୟା ଦେଇ କହିଛନ୍ତି, "ମୁଁ ଜଣେ ଓଡ଼ିଆ ହୋଇଥିବାରୁ ରଥଯାତ୍ରା ଦେଖିବା ଲାଗି କାରରେ ବାପାମାଆଙ୍କ ସହ ଯାଉଥିଲି । ଏହି ସମୟରେ ହଠାତ୍ ମୁଁ ନିଟ୍ ପରୀକ୍ଷା ରେଜଲ୍ଟ ଚେକ୍ କରିଥିଲି । ଏହାପରେ ମୋ ଆଖିରେ ଖୁସିର ଲୁହ ଥିଲା । ଯେତେବେଳେ ମୁଁ ଏକାଦଶ ଶ୍ରେଣୀରେ ପଢୁଥିଲି, ସେବେଠାରୁ ମୁଁ ମୋର ଇନଷ୍ଟାଗ୍ରାମ ଆକାଉଣ୍ଟ ଡିଆକ୍ଟିଭେଟ୍ କରିଥିଲି । ଏହା କେବଳ ଅନ୍ୟମନସ୍କ କରାଏ । ଜଣେ ନିଜ ଲକ୍ଷ୍ୟସ୍ଥଳରେ ନ ପହଞ୍ଚିବା ପର୍ଯ୍ୟନ୍ତ ଆଶା ଛାଡ଼ିବା କଥା ନୁହଁ । ଏହା ଏକ ଲମ୍ବା ଯାତ୍ରା ହୋଇଥାଏ । ସର୍ବଦା ସକରାତ୍ମକ ଭାବନା ରଖିବା ଆବଶ୍ୟକ ।"

#WATCH | Hyderabad | Vaishnavi Das, who secured AIR 20 in NEET UG 2026, says, "I had gone with my parents to watch the Rath Yatra; we were in the car. At that very moment, we checked the results, and tears of joy started to flow from my eyes. When I was in 11th grade, I… pic.twitter.com/9njDK4anIG

— ANI (@ANI) July 17, 2026

• ଚର୍ଚ୍ଚାରେ ଭୁବନର ମୋକ୍ଷ୍ୟ ରଞ୍ଜନ

ଢେଙ୍କାନାଳ ଜିଲ୍ଲା ଭୁବନ ଏନଏସି ଓ୍ବାର୍ଡ ନମ୍ବର ୯ର ମୋକ୍ଷ୍ୟ ରଞ୍ଜନ ସାହୁ ୫୩୪ ନମ୍ବର ରଖି ସଫଳତା ପାଇଛନ୍ତି । ଫଳରେ ଭୁବନ ପାଇଁ ସେ ଗର୍ବ ଓ ଗୌରବ ଆଣିଛନ୍ତି । ମୋକ୍ଷ ରଞ୍ଜନ ଜଣେ ସାଧାରଣ ପରିବାରରୁ ଆସିଥିବାବେଳେ ବହୁ କଷ୍ଟକରି ଏହି ସଫଳତା ପାଇଥିବା କହିଛନ୍ତି । ଭବିଷ୍ୟତରେ ଅସହାୟଙ୍କୁ ସହାୟତା କରିବା ପାଇଁ ସେ ଲକ୍ଷ୍ୟ ରଖିଥିବା ମଧ୍ୟ ପ୍ରକାଶ କରିଛନ୍ତି । ତେବେ ମୋକ୍ଷ ରଞ୍ଜନଙ୍କ ସଫଳତାକୁ ନେଇ ପରିବାର ମଧ୍ୟରେ ଖୁସିର ଲହରୀ ଖେଳିଯାଇଛି ।

• AIR 170 ରାଙ୍କରେ ପୁରୀର ଝିଅ ଅନ୍ବେଷା

ଅଲ୍ ଇଣ୍ଡିଆ ନିଟ୍‌ ପରୀକ୍ଷାରେ ୧୭୦ ରାଙ୍କ ରଖିଛନ୍ତି ଅନ୍ବେଷା ସୁନ୍ଦରାୟ । ପୁରୀର ଝିଅ ଅନ୍ବେଷା ଭୁବନେଶ୍ବରର ଏକ ଘରୋଇ ଇଷ୍ଟିଚ୍ୟୁଟରେ କୋଚିଂ ନେଇଥିଲେ । ସେହିପରି ଭୁବନେଶ୍ବରର ସୌମ୍ୟ ରଞ୍ଜନ ସ୍ବାଇଁ ୭୬୮ ରାଙ୍କ ରଖିଛନ୍ତି । ଗତକାଲି ପ୍ରକାଶ ପାଇଥିଲା NEET(UG)-୨୦୨୬ ପରୀକ୍ଷାଫଳ । ମୋଟ ୧୧ ଲକ୍ଷ ୨୧ ହଜାର ପରୀକ୍ଷାର୍ଥୀ କୃତକାର୍ଯ୍ୟ ହୋଇଛନ୍ତି । ଛାତ୍ରଙ୍କ ଅପେକ୍ଷା ଛାତ୍ରୀ ଆଗରେ ରହିଛନ୍ତି ।

• ନର୍ଲା ଅଞ୍ଚଳରୁ ୬ କୃତକାର୍ଯ୍ୟ

ସର୍ବୋଚ୍ଚ ମାର୍କ ୭୨୦ରୁ ୬୫୫ ମାର୍କ ରଖି ସ୍ୱୟଂ ସ୍ୱାଗତ କର ଓ ୫୬୯ ମାର୍କ ରଖି ସୁବ୍ରତ ସାହାଣୀ କଳାହାଣ୍ଡି ଜିଲ୍ଲା ପାଇଁ ଗର୍ବ ଆଣିଛନ୍ତି । ଏହି ଦୁଇ ଜଣ ଛାତ୍ର ମଧ୍ୟରୁ ଜଣେ କଳାହାଣ୍ଡି ଜିଲ୍ଲା ନର୍ଲା ବ୍ଲକ ନର୍ଲାରୋଡ ବାସିନ୍ଦା ଜୟ ଦୁର୍ଗା ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ସନ୍ତୋଷ କୁମାର କରଙ୍କ ପୁତ୍ର ସ୍ଵୟଂ ସ୍ୱାଗତ କର ହୋଇଥିବା ବେଳେ ଅନ୍ୟ ଜଣେ ଲାଞ୍ଜିଗଡ ବ୍ଲକ ଲକଟାଖମନ ବିଦ୍ୟାଳୟରେ କାର୍ଯ୍ୟରତ ଶିକ୍ଷକ ଶରତ ଚନ୍ଦ୍ର ସାହାଣୀଙ୍କ ପୁତ୍ର ସୁବ୍ରତ ସାହାଣୀ ବୋଲି ଜଣା ପଡିଛି ।

ପଢନ୍ତୁ ଏହି ଖବର:  'ଧ୍ବଂସ ହେବ ପ୍ରଶ୍ନପତ୍ର ମାଫିଆଙ୍କ ନେଟୱର୍କ, ଆସନ୍ତା ବର୍ଷଠାରୁ ବଦଳିପାରେ NEET ପରୀକ୍ଷା ପ୍ରକ୍ରିୟା'

ଠିକ ସେହିପରି କରଲାମୁଣ୍ଡା ବ୍ଲକର ଗୋଟିଏ ପରିବାର ୨ ଭଉଣୀ ନିଟ ପାଇଥିବା ଜଣାପଡିଛି । ଦୁଇ ଭଉଣୀ ହେଲେ ରେଗଡା ଗ୍ରାମର ଜୟଦ୍ରଥ କମ୍ପଙ୍କ ଦୁଇ ଝିଅ ପ୍ରେମଲତା କମ୍ପ (୬୧୩ ମାର୍କ) ଓ ପୁଷ୍ପଲତା କମ୍ପ ୫୭୭ ମାର୍କ ରଖି ନିଟ ଉତ୍ତୀର୍ଣ୍ଣ ହୋଇଛନ୍ତି । ସ. ମାଲପଡାର କୈଳାସ ସାହୁ ପୁତ୍ର ଚୈତନ୍ୟ ସାହୁ ୬୦୨ ମାର୍କ ରଖିଥିବା ବେଳେ କୁଶୁର୍ଲା ଗ୍ରାମର ମାନସ ରଞ୍ଜନ ଦାସ ୫୯୭ ମାର୍କ ରଖି କରଲାମୁଣ୍ଡା ବ୍ଲକ ପାଇଁ ଗର୍ବ ଆଣିଛନ୍ତି ।