Railway Job Alert / ରେଳବାଇରେ ୩୦ ହଜାର ପଦରେ ନିଯୁକ୍ତି ସମ୍ଭାବନା; ଦୀପାବଳି ପୂର୍ବରୁ ଆସିପାରେ ନୋଟିଫିକେସନ

ନୂଆଦିଲ୍ଲୀ: ରେଳବାଇରେ ସରକାରୀ ଚାକିରି ଅପେକ୍ଷାରେ ଥିବା ଯୁବକଯୁବତୀଙ୍କ ପାଇଁ ଆସିବ ଖୁସି ଖବର । ରେଳବାଇ ନିଯୁକ୍ତି ବୋର୍ଡ (RRB) ପକ୍ଷରୁ ଗ୍ରୁପ୍-ଡି (ଲେଭଲ୍-୧) ପଦରେ ପ୍ରାୟ ୩୦ ହଜାର କର୍ମଚାରୀ ନିଯୁକ୍ତି ବାହାରିବାର ସମ୍ଭାବନା ଅଛି । ଏହି ନିଯୁକ୍ତି ପାଇଁ ଦୀପାବଳି ପୂର୍ବରୁ ସଂକ୍ଷିପ୍ତ ବିଜ୍ଞପ୍ତି ଏବଂ ପର୍ବ ପରେ ବିସ୍ତୃତ ବିଜ୍ଞପ୍ତି ପ୍ରକାଶ ପାଇପାରେ । ତେବେ ଏନେଇ ରେଳବାଇ ପକ୍ଷରୁ ଆନୁଷ୍ଠାନିକ ଘୋଷଣାକୁ ଅପେକ୍ଷା ରହିଛି ।

• କେଉଁ କେଉଁ ପଦରେ ହେବ ନିଯୁକ୍ତି?

ପ୍ରସ୍ତାବିତ ନିଯୁକ୍ତି ଅଧୀନରେ ଟ୍ରାକ୍ ମେଣ୍ଟେନର, ପଏଣ୍ଟସମ୍ୟାନ୍ ସମେତ ବିଭିନ୍ନ ବୈଷୟିକ ଓ ଅଣବୈଷୟିକ ପଦ ପୂରଣ କରାଯାଇପାରେ । ଦେଶର ବିଭିନ୍ନ ରେଳ ଜୋନ୍ ଓ ଉତ୍ପାଦନ ୟୁନିଟ୍‌ରେ ଖାଲି ପଡ଼ିଥିବା ପଦ ସମ୍ପର୍କରେ ତଥ୍ୟ ସଂଗ୍ରହ କରାଯାଉଥିବା ସୂଚନା ରହିଛି । ତେବେ ମୋଟ ପଦ ସଂଖ୍ୟା କେତେ ରହିବ, କେଉଁ ଜୋନ୍‌ରେ କେତେ ପଦ ଖାଲି ରହିଛି ଏବଂ କେଉଁ ପଦ ପାଇଁ ନିଯୁକ୍ତି ହେବ, ତାହା ଚୂଡ଼ାନ୍ତ ବିଜ୍ଞପ୍ତି ପ୍ରକାଶ ପାଇବା ପରେ ସ୍ପଷ୍ଟ ହେବ ।

• କେବେ ଆରମ୍ଭ ହୋଇପାରେ ଆବେଦନ ପ୍ରକ୍ରିୟା?

ସୂତ୍ରରୁ ମିଳିଥିବା ସୂଚନା ଅନୁଯାୟୀ, ୨୦୨୬ ନଭେମ୍ବରରୁ ଡିସେମ୍ବର ମଧ୍ୟରେ ଅନଲାଇନ୍ ଆବେଦନ ପ୍ରକ୍ରିୟା ଆରମ୍ଭ ହୋଇପାରେ । ସେହିପରି ୨୦୨୭ ଜାନୁଆରୀରୁ ମାର୍ଚ୍ଚ ମଧ୍ୟରେ ପ୍ରଥମ ପର୍ଯ୍ୟାୟ କମ୍ପ୍ୟୁଟର ଆଧାରିତ ପରୀକ୍ଷା (CBT) ଅନୁଷ୍ଠିତ ହେବାର ସମ୍ଭାବନା ରହିଛି । କିନ୍ତୁ ଏହି ସମୟସୂଚୀ ଏବେ ସମ୍ଭାବନା ଉପରେ ଆଧାରିତ । ଆବେଦନ ତାରିଖ ଓ ପରୀକ୍ଷା କାର୍ଯ୍ୟସୂଚୀ ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ରେଳବାଇର ଅଫିସିଆଲ୍ ନୋଟିଫିକେସନ୍ ପରେ ହିଁ ଜଣାପଡ଼ିବ ।

• କିଏ ଆବେଦନ କରିପାରିବେ ?

ଏହି ନିଯୁକ୍ତି ପାଇଁ ଦଶମ ଶ୍ରେଣୀ ପାସ୍ ଏବଂ ଆଇଟିଆଇ (ITI) ଯୋଗ୍ୟତା ଥିବା ପ୍ରାର୍ଥୀମାନେ ଆବେଦନ କରିପାରିବେ କି ନାହିଁ, ତାହା ପଦ ଅନୁଯାୟୀ ବିସ୍ତୃତ ବିଜ୍ଞପ୍ତିରେ ସ୍ପଷ୍ଟ କରାଯିବ । ବୟସ ସୀମା, ସଂରକ୍ଷଣ ସୁବିଧା, ଆବେଦନ ଶୁଳ୍କ ଏବଂ ଅନ୍ୟାନ୍ୟ ଯୋଗ୍ୟତା ସମ୍ପର୍କରେ ମଧ୍ୟ ଆଧିକାରିକ ସୂଚନାକୁ ଅପେକ୍ଷା କରିବାକୁ ପଡ଼ିବ ।

ପଢନ୍ତୁ ଏହି ଖବର: ଚାକିରି ଆଶାୟୀଙ୍କ ପାଇଁ ବଡ଼ ଖବର; ୭, ୨୬୮ କନେଷ୍ଟବଳ ପଦବୀ ପାଇଁ ଆବେଦନ ଆରମ୍ଭ

• ଆଶାୟୀ ଏବେ କ'ଣ କରିବେ ?

ନିଯୁକ୍ତିକୁ ଅପେକ୍ଷା କରିଥିବା ପ୍ରାର୍ଥୀମାନେ ଏବେଠାରୁ ପରୀକ୍ଷା ପ୍ରସ୍ତୁତି ଆରମ୍ଭ କରିବା ସହ ନିଜର ଶିକ୍ଷାଗତ ପ୍ରମାଣପତ୍ର, ଜାତିଗତ ପ୍ରମାଣପତ୍ର ଏବଂ ଅନ୍ୟାନ୍ୟ ଆବଶ୍ୟକ ଦସ୍ତାବିଜ ପ୍ରସ୍ତୁତ ରଖନ୍ତୁ । ନିଯୁକ୍ତି ସମ୍ପର୍କିତ ସଠିକ୍ ଓ ଭରସାଯୋଗ୍ୟ ସୂଚନା ପାଇଁ ପ୍ରାର୍ଥୀମାନେ ରେଳବାଇ ନିଯୁକ୍ତି ବୋର୍ଡର ଅଧିକାରିକ ୱେବସାଇଟ୍‌ ଉପରେ ନଜର ରଖିବା ଉଚିତ । ଆଧିକାରିକ ବିଜ୍ଞପ୍ତି ପ୍ରକାଶ ପାଇବା ପରେ ହିଁ ନିଯୁକ୍ତିର ପଦ ସଂଖ୍ୟା, ଯୋଗ୍ୟତା ଓ ପରୀକ୍ଷା ତାରିଖ ସମ୍ପର୍କରେ ଚୂଡ଼ାନ୍ତ ଚିତ୍ର ସ୍ପଷ୍ଟ ହେବ ।