ମୁମ୍ବାଇ: ସେ ସମସ୍ତଙ୍କୁ ହସାଉଥିଲେ । ତାଙ୍କ ହସ ହସ ମୁହଁ ସମସ୍ତଙ୍କୁ ମତୁଆଲା କରୁଥିଲା । ବଲିଉଡ୍‌ର ବିଶିଷ୍ଟ କମେଡିଆନ୍ ଏବଂ ସହ କଳାକାର ଭାବେ ପ୍ରସିଦ୍ଧି ପାଇଥିଲେ । ଅନେକ ହିନ୍ଦୀ ଫିଲ୍ମର ସେ ଥିଲେ ମେରୁଦଣ୍ଡ । ଆଉ ଦୀପାବଳିରେ ସେ ଆଖି ବୁଜିଛନ୍ତି । ୮୪ ବର୍ଷ ବୟସରେ ଅଭିନେତା ଗୋବର୍ଦ୍ଧନ ଅସରାନିଙ୍କ ପରଲୋକ ଘଟିଛି ।

ହିନ୍ଦୀ ସିନେମାର ବରିଷ୍ଠ, ଭର୍ସାଟାଇଲ୍ ଅଭିନେତା ଗୋବର୍ଦ୍ଧନ ଅସରାନିଙ୍କ ମୃତ୍ୟୁ ହୋଇଛି । ଦୀର୍ଘ ଦିନରୁ ଅସୁସ୍ଥ ଥିବା ଅସରାନି ସୋମବାର ଦୀପାବଳି ଦିନ ୪ଟାରେ ଆଖି ବୁଜିଛନ୍ତି । ରାଜସ୍ଥାନ ଜୟପୁରରେ ଜନ୍ମିତ ଅସରାନି ୫ ଦଶନ୍ଧି ଧରି ବଲିଉଡ୍‌ରେ ରାଜ୍ କରିଥିଲେ ।

ଏଥିସହ ପଢ଼ନ୍ତୁ: ୨୮ ପୃଷ୍ଠାର ସୁଇସାଇଡ୍‌ ନୋଟ୍‌ରେ ସାଂଘାତିକ ଅଭିଯୋଗ, OLA ଫାଉଣ୍ଡରଙ୍କ ନାଁରେ ଏତଲା

ପ୍ରାୟ ୩୫୦ଟିରୁ ଅଧିକ ଚଳଚ୍ଚିତ୍ରରେ ଦେଖିବାକୁ ମିଳିଥିଲା ଅସରାନିଙ୍କ ଅଭିନୟର ଯାଦୁ । ୧୯୭୦ ଦଶନ୍ଧି ଥିଲା ଅସରାନଙ୍କ ଯୁଗ । ସେତେବେଳେ ସେ ଥିଲେ ଲୋକପ୍ରିୟ କଲାକାର । 'ମେରେ ଅପନେ', 'କୋଶିସ୍', 'ପରିଚୟ', 'ଅଭିମାନ', 'ଚୁପ୍‌କେ ଚୁପ୍‌କେ', 'ଛୋଟି ସି ବାତ', 'ରଘୁ ଚକ୍କର' ଆଦି ଫିଲ୍ମରେ ତାଙ୍କ ଭୂମିକା ଗୁରୁତ୍ଵପୂର୍ଣ୍ଣ ରହିଥିଲା । ଅଭିନୟ ସହ ସେ କିଛି ଫିଲ୍ମର ନିର୍ଦ୍ଦେଶନା ଦେବା ସହ କାହାଣୀ ମଧ୍ୟ ଲେଖିଥିଲେ ।

ଦୀର୍ଘ ଦିନରୁ ଅସରାନି ଅସୁସ୍ଥ ଥିବା ବେଳେ ତାଙ୍କୁ ଜୁହୁ ସ୍ଥିତ ଭାରତୀୟ ଆରୋଗ୍ୟ ନିଧି ହସ୍ପିଟାଲ୍‌ରେ ଭର୍ତ୍ତି କରାଯାଇଥିଲା । ତାଙ୍କ ଛାତିରେ ପାଣି ଜମି ରହିଥିବା ବେଳେ ଆଜି ତାଙ୍କର ଦେହାନ୍ତ ହୋଇଛି । ଗୋବର୍ଦ୍ଧନ ଅସରାନିଙ୍କ ଦେହାନ୍ତରେ ବଲିଉଡ୍‌ରେ ଶୋକର ଛାୟା ଖେଳି ଯାଇଛି ।

ଏଥିସହ ପଢ଼ନ୍ତୁ: ପର୍ଥରେ ୮ ରନ୍‌ କରି ବଡ଼ ରେକର୍ଡ ନିଜ ନାଁରେ କଲେ ରୋହିତ, ସଚିନ୍‌ଙ୍କୁ ପକାଇଲେ ପଛରେ

୧୯୭୫ରେ ବେଶ୍ ଲୋକପ୍ରିୟ ହୋଇଥିଲେ ଅସରାନି । ସେ କେତେକ ବଲିଉଡ୍ ଚଳଚ୍ଚିତ୍ରର ମୁଖ୍ୟ କଳାକାର ଭାବେ ଅଭିନୟ କରିଥିଲେ । ୧୯୭୭ରେ ଅସରାନି 'ଚାଲ୍ ମୁରାରୀ ହିରୋ ବନନେ'ର କାହାଣୀ ଲେଖିବା ସହ ନିର୍ଦ୍ଦେଶନା ଦେଇଥିଲେ । ୧୯୭୯ରେ 'ସଲାମ ମେମସାବ୍'ର ନିର୍ଦ୍ଦେଶନା ଦେଇଥିଲେ ।

ରାଜସ୍ଥାନରେ ଗ୍ରାଜୁଏସନ୍‌ ପରେ ଅସରାନି ଜଣେ ରେଡିଓ ଆର୍ଟିଷ୍ଟ ଭାବେ କାମ ଆରମ୍ଭ କରିଥିଲେ । ସେ ତାଙ୍କ ପତ୍ନୀ ମଞ୍ଜୁ ବଂସଲ ଈରାନୀଙ୍କ ସହ ମଧ୍ଯ ଏକାଧିକ ଫିଲ୍ମରେ କାମ କରିଛନ୍ତି । ଅଭିନୟରେ ପାରଦର୍ଶିତା ଦେଖାଇଥିବା ଅସରାନି ରାଜନୀତିରେ ବି ପାଦ ଥାପିଥିଲେ । ୨୦୦୪ ମସିହାରେ ସେ କଂଗ୍ରେସରେ ସାମିଲ ହୋଇଥିଲେ ।