Rajpal Yadav / ପୁଣି କମେଡିଆନ୍ ରାଜପାଲଙ୍କ ଉପରେ ଦୁଃଖର ପାହାଡ; ନିଲାମ ହେଇଯିବ ସମ୍ପତ୍ତି, ଏବେ କଣ କରିବେ..

ମୁମ୍ବାଇ: ବଲିଉଡର ଲୋକପ୍ରିୟ ହାସ୍ୟ ଅଭିନେତା ତଥା କମେଡିଆନ ରାଜପାଲ ଯାଦବଙ୍କ ପିଛା ଛାଡୁନି ସମସ୍ୟା । ଚେକ୍ ବାଉନ୍ସ ମାମଲାରେ ପୁଣି ମୁସ୍କିଲ ବଢିବାରେ ଲାଗିଛି । ନିଲାମ ହେବ ରାଜପାଲଙ୍କ ସମ୍ପତ୍ତି । ଗୋଟିଏ ପଟେ ପାଖରେ ଅର୍ଥ ନଥିବାବେଳେ ଏବେ ତାଙ୍କର ୨ଟି ପ୍ରପଟି ସେପ୍ଟେମ୍ବର ୯ ତାରିଖ ସୁଦ୍ଧା ନିଲାମ ହେବାକୁ ଯାଉଛି । ମୁମ୍ବାଇ ସ୍ଥିତ ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ ନିଲାମି ପାଇଁ ରାଜପାଲଙ୍କ ଏହି ଦୁଇ ସମ୍ପତ୍ତି ବାହାରେ ନୋଟିସ୍ ଲଗାଇଛି । ରାଜପାଲଙ୍କୁ ଏହି ବ୍ୟାଙ୍କକୁ ୧୬ କୋଟି ୬୧ ଲକ୍ଷ ୬୪ ହଜାର ଟଙ୍କା ଦେବା ବାକି ଅଛି ।

ରାଜପାଲ ନିଜ ଫିଲ୍ମ 'ଅତା ପତା ଲାପତା' ଲାଗି ଏହି ବ୍ୟାଙ୍କରୁ ଋଣ ନେଇଥିଲେ । ବ୍ୟାଙ୍କରୁ ନେଇଥିବା ଟଙ୍କାକୁ ପୈଠ ନକରିବା ପରେ ଏବେ କୋଟି କୋଟି ଟଙ୍କା ଋଣରେ ବୁଡ଼ି ରହିଛନ୍ତି ଏହି ବର୍ଷିୟାନ ଅଭିନେତା । ବ୍ୟାଙ୍କରେ ବନ୍ଧା ପଡ଼ିଥିବା ଏହି ସମ୍ପତ୍ତିକୁ ନେଇ ଏବେ ନୋଟିସ୍ ଆସିଛି । ରାଜପାଲଙ୍କ ଏହି ଦୁଇଟି ସମ୍ପତ୍ତିର ମୂଲ୍ୟ ୩ କୋଟି ୧୯ ଲକ୍ଷ ୨୬ ହଜାର ଟଙ୍କା ବୋଲି ଜଣାପଡ଼ିଛି । ଦୁଇଟି ସମ୍ପତ୍ତି ମଧ୍ୟରେ ଗୋଟିଏ ସହରରେ ଅଛି ଓ ଅନ୍ୟଟି ଗାଁରେ ଥିବା ଜମି ଓ କୋଠା । ସେପ୍ଟେମ୍ବର ୯ ତାରିଖରୁ ଏହାର ନିଲାମି ଆରମ୍ଭ ହେବ ।

• ମାଆଙ୍କ ସମ୍ପତ୍ତି ବନ୍ଧା ପକାଇଥିଲେ

ବ୍ୟାଙ୍କରୁ ଋଣ ନେବା ଲାଗି ରାଜପାଲ ଯାଦବ ନିଜ ପତ୍ନୀ ରାଧା ଯାଦବ ଓ ମାଆ ଗୋଦାବରୀ ଯାଦବଙ୍କ ସମ୍ପତ୍ତିକୁ ମଧ୍ୟ ବନ୍ଧା ପକାଇଥିଲେ । ଏଥିଲାଗି ବ୍ୟାଙ୍କ ସେହି ସମ୍ପତ୍ତି ଉପରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବା ଆରମ୍ଭ କରିଛି । କୁହାଯାଉଛି ଶାହାଜାହାଁପୁର ବ୍ୟତୀତ ମୁମ୍ବାଇରେ ତାଙ୍କର ଆଉ ଦୁଇଟି ସମ୍ପତ୍ତି ଉପରେ ମଧ୍ୟ ନିଲାମ ପ୍ରକ୍ରିୟା ଆରମ୍ଭ ହୋଇସାରିଛି ।

ପଢନ୍ତୁ ଏହି ଖବର: ରାଜପାଲ ଯାଦବଙ୍କୁ ଦିଲ୍ଲୀ ହାଇକୋର୍ଟରେ ଝଟ୍‌କା; ଚେକ୍ ବାଉନ୍ସ ମାମଲାରେ ଯିବେ ଜେଲ୍

• କଣ ପୂରା ଘଟଣା ?

ରାଜପାଲ ଯାଦବଙ୍କ ଉପରେ ଯେଉଁ କମ୍ପାନୀ ଚେକ୍ ବାଉନ୍ସ ହେବା ଲାଗି କେସ୍ କରିଥିଲା, ସେହି ମାଲିକ ମଧ୍ୟ ଶାହାଜାହାଁପୁରରେ ରହୁଛନ୍ତି । ଏହି ଘଟଣା ପରେ ରାଜପାଲ ଆଇନଗତ ସମସ୍ୟା ବ୍ୟତୀତ ଆର୍ଥିକ ସଙ୍କଟ ଦେଇ ଗତି କରୁଛନ୍ତି । ରାଜପାଲ ଯାଦବଙ୍କ ସମ୍ପତ୍ତିରେ ନୋଟିସ୍ ଲଗାଯିବା ପରେ ଏନେଇ ପୁଣି ଥରେ ଚର୍ଚ୍ଚା ଆରମ୍ଭ ହୋଇଛି । ବ୍ୟାଙ୍କ ଅଧିକାରୀମାନେ କହିଛନ୍ତି ଯେ ଋଣ ନେଇଥିବା ଟଙ୍କାକୁ ଆଦାୟ କରିବା ଲାଗି ନିୟମ ମୁତାବକ ଏହି ସବୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।