Argus News - ବଲିଉଡରୁ ଆସିଲା ଦୁଃଖ ଖବର; ଚାଲିଗଲେ ଏହି ବର୍ଷିୟାନ ଗାୟିକା

ବଲିଉଡର ଆସିଲା ଦୁଃଖଦ ଖବର । ଆଉ ନାହାନ୍ତି ବଲିଉଡର ପ୍ରସିଦ୍ଧ ଗାୟିକା ଆଶା ଭୋସଲେ । ୯୨ ବର୍ଷରେ ଦୁନିଆକୁ କହିଛନ୍ତି ଅଲବିଦା । ସେ ଗତକାଲି (ଏପ୍ରିଲ ୧୧)ରେ ହୃଦଘାତର ଶିକାର ହୋଇଥିଲେ । ଛାତିରେ ଯନ୍ତ୍ରଣା ଅନୁଭବ କରିବାରୁ ପରିବାର ଲୋକେ ତାଙ୍କୁ ତୁରନ୍ତ ହସ୍ପିଟାଲ ପହଞ୍ଚାଇଥିଲେ ଏବଂ ମୁମ୍ବାଇର ବ୍ରିଚ୍ କ୍ୟାଣ୍ଡି ହସ୍ପିଟାଲରେ ଭର୍ତ୍ତି ହୋଇ ଚିକିତ୍ସିତ ହେଉଥିଲେ । ତେବେ ରବିବାର ମଧ୍ୟାହ୍ନ ୧୨ଟାରେ ତାଙ୍କର ମୃତ୍ୟୁ ହୋଇଥିବା ନେଇ ପରିବାର ପକ୍ଷରୁ ସୂଚନା ଦିଆଯାଇଛି । ଶରୀରର ଏକାଧିକ ଅଙ୍ଗ ଖରାପ ହୋଇଯିବା ଯୋଗୁଁ ତାଙ୍କର ମୃତ୍ୟୁ ହୋଇଥିବା କୁହାଯାଉଛି ।

ତେବେ ୨୦୨୫ ବର୍ଷ ବଲିଉଡ୍ ଫିଲ୍ମ ଇଣ୍ଡଷ୍ଟ୍ରି ପାଇଁ ଭଲ ନଥିଲା । ସେହି ବର୍ଷ ଅନେକ କଳାକାରଙ୍କ ଦେହାନ୍ତ ହୋଇଥିଲା । ଏବେ ୨୦୨୬ରେ ମଧ୍ୟ ଭାରତୀୟ କଳା ଜଗତ ପାଇଁ ଏକ ବଡ଼ କ୍ଷତି ହୋଇଛି । ଆଶା ଭୋସଲେ ପ୍ରାୟ ଆଠ ଦଶନ୍ଧି ଚଳଚ୍ଚିତ୍ର ଶିଳ୍ପ ପାଇଁ ଉତ୍ସର୍ଗ କରିଥିଲେ ଏବଂ ସାରା ବିଶ୍ୱରେ ଦେଶକୁ ଗୌରବାନ୍ଵିତ କରିଥିଲେ । ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ଚିନ୍ତା ପ୍ରକଟ କରିଥିଲେ ।

• କାଲି ହେବ ଅନ୍ତିମ ସଂସ୍କାର

ଆଶା ଭୋସଲେଙ୍କ ଅନ୍ତିମ ସଂସ୍କାର ଆସନ୍ତାକାଲି (ସୋମବାର) ହେବ । ଗାୟିକାଙ୍କ ପାର୍ଥିବ ଶରୀର ସକାଳ ୧୧ଟାରେ ଲୋୟର ପରେଲଠାରେ ତାଙ୍କ ଘରେ ଶେଷ ଦର୍ଶନ ଲାଗି ରଖାଯିବ । ଏହାପରେ ଅପରାହ୍ନ ୪ଟାରେ ଶିବାଜୀ ପାର୍କରେ ତାଙ୍କର ଅନ୍ତିମ ସଂସ୍କାର କରାଯିବ । ଏହା ସେହି ସ୍ଥାନ, ଯେଉଁଠି ଭାରତର ସ୍ଵର ସାମ୍ରାଜ୍ଞୀ ତଥା ଆଶାଙ୍କ ବଡ଼ ଭଉଣୀ ଲତା ମଙ୍ଗେଶକରଙ୍କ ଅନ୍ତିମ ସଂସ୍କାର କରାଯାଇଥିଲା ।

• ଏହି ଫିଲ୍ମରେ ଗାଇଥିଲେ ପ୍ରଥମ ଗୀତ

୧୯୩୩ ମସିହା ସେପ୍ଟେମ୍ବର ୮ ତାରିଖରେ ଆଶା ଭୋସଲେଙ୍କ ଜନ୍ମ ଏକ ମରାଠି ପରିବାରରେ ହୋଇଥିଲା, ଯିଏକି ସଙ୍ଗୀତ ଜଗତ ସହିତ ଯୋଡ଼ି ହୋଇଥିଲେ । ତାଙ୍କ ବାପା ପଣ୍ଡିତ ଦୀନାନାଥ ମଙ୍ଗେଶକର ଜଣେ ଅଭିନେତା ଓ କ୍ଲାସିକାଲ୍ ସିଙ୍ଗର ଥିଲେ । ଆଶା ଭୋସଲେ ସ୍ଵର କୋକିଳା ଲତା ମଙ୍ଗେଶକରଙ୍କ ସାନ ଭଉଣୀ ଥିଲେ । ଯେତେବେଳେ ଆଶା ୯ ବର୍ଷର ଥିଲେ, ସେତେବେଳେ ତାଙ୍କ ବାପାଙ୍କ ପରଲୋକ ଘଟିଥିଲା । ଏହାପରେ ତାଙ୍କ ପରିବାର ପୁଣେରୁ କୋଲହାପୁର ଓ ପରେ ମୁମ୍ବାଇ ଚାଲିଆସିଥିଲା ।



ବଡ଼ ଭଉଣୀ ଲତା ମଙ୍ଗେଶକରଙ୍କ ରାସ୍ତାରେ ଚାଲି ଚାଲି ଆଶା ମଧ୍ୟ ସଙ୍ଗୀତ ଜଗତରେ ପ୍ରବେଶ କରିଥିଲେ । ଆଶା ଭୋସଲେ ନିଜର ପ୍ରଥମ ସଙ୍ଗୀତ ମରାଠୀ ଫିଲ୍ମ 'ମାଝା ବାଲ୍' (୧୯୪୩)ରେ 'ଚଲା ଚଲା ନାୱ ବାଲା' ଗାଇଥିଲେ । ସେହିପରି ବଲିଉଡ଼ର ପ୍ରଥମ ଗୀତ 'ଚୁନରିଆ' (୧୯୪୮) ଫିଲ୍ମରେ 'ଶାୱନ ଆୟା' ଗାଇଥିଲେ । ଏଠାରୁ ହିଁ ଆରମ୍ଭ ହୋଇଥିବା ଆଶାଙ୍କ ସଙ୍ଗୀତର ଯାତ୍ରା ପ୍ରାୟ ୫ ଦଶନ୍ଧି ଧରି ଚାଲିଥିଲା । ସମୟ ସହିତ ଆଶା ଭାରତ ସଙ୍ଗୀତ ଦୁନିଆର ଜଣେ ବର୍ଷିଆନ ଗାୟିକା ପାଲଟିଯାଇଥିଲେ । ଏବେ ଆଶାଙ୍କ ପରଲୋକ ସଙ୍ଗୀତ ଜଗତରେ ଏକ ଅପୂରଣୀୟ ଶୂନ୍ୟସ୍ଥାନ ସୃଷ୍ଟି କରିଛି ।

• ଦୁଇ ଥର ବିବାହ କରିଥିଲେ ଆଶା

ଆଶା ଭୋସଲେଙ୍କ ବୃତ୍ତିଗତ ଜୀବନ ବହୁତ ସଫଳ ଥିଲା, କିନ୍ତୁ ତାଙ୍କ ବ୍ୟକ୍ତିଗତ ଜୀବନ ଉତ୍ଥାନ-ପତନରେ ପରିପୂର୍ଣ୍ଣ ଥିଲା । ସେ ପ୍ରଥମେ ୧୯୪୯ ମସିହାରେ ଗଣପତରାଓ ଭୋସଲେଙ୍କୁ ବିବାହ କରିଥିଲେ, କିନ୍ତୁ ପରେ ଏହି ଦମ୍ପତି ଅଲଗା ହୋଇଯାଇଥିଲେ । ତା'ପରେ ଗାୟିକା ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ଆର.ଡି. ବର୍ମନଙ୍କୁ ବିବାହ କରିଥିଲେ ।

• ୮୨ ବର୍ଷରେ ଗାଇଛନ୍ତି ୧୨ ହଜାରରୁ ଅଧିକ ଗୀତ

୧୦ ବର୍ଷ ବୟସରୁ ଆଶା ମରାଠୀ ଭାଷାରେ ନିଜର ପ୍ରଥମ ଗୀତ ରେକର୍ଡ କରିବା ପରେ ଆଉ ପଛକୁ ଫେରି ଚାହିଁନଥିଲେ । ଆଶାଙ୍କ ୮୨ ବର୍ଷର କ୍ୟାରିଅରରେ ସେ ପ୍ରାୟ ୧୨,୦୦୦ରୁ ଅଧିକ ଗୀତ ଗାଇଛନ୍ତି । କଳା ପ୍ରତି ତାଙ୍କର ଅବିସ୍ମରଣୀୟ ଅବଦାନ ପାଇଁ ତାଙ୍କୁ ୨୦୦୮ରେ ଭାରତ ସରକାରଙ୍କ ଦ୍ଵାରା ପଦ୍ମ ବିଭୂଷଣରେ ମଧ୍ୟ ସମ୍ମାନିତ କରାଯାଇଥିଲା ।

ଅଧିକ ଖବର ପଢନ୍ତୁ...