Dharmendra Last Message / କଣ ଥିଲା ଧର୍ମେନ୍ଦ୍ରଙ୍କ ଶେଷ କଥା ? ସନି ଦେଓଲଙ୍କୁ ନେଇ ହେମାଙ୍କୁ କହିଥିଲେ କିଛି ଏମିତି

ମୁମ୍ବାଇ: ବଲିଉଡର କିମ୍ବଦନ୍ତୀ ଅଭିନେତା ଧର୍ମେନ୍ଦ୍ର ଗତବର୍ଷ ନଭେମ୍ବର ୨୪ ତାରିଖରେ ମୃତ୍ୟୁବରଣ କରିଥିଲେ । ଏବେ ବି ତାଙ୍କୁ ପରିବାରଠୁ ଆରମ୍ଭ କରି ପ୍ରଶଂସକ ଝୁରୁଛନ୍ତି । ବଲିଉଡରେ ସେ ନିଜର ସ୍ଵତନ୍ତ୍ର ଛାପ ଛାଡ଼ି ଯାଇଛନ୍ତି, ଯେଉଁଥିଲାଗି ପୁରା ଅଭିନୟ ଜଗତ ତାଙ୍କୁ ବର୍ଷ ବର୍ଷ ଧରି ମନେ ରଖିବ । ଧର୍ମେନ୍ଦ୍ରଙ୍କ ମୃତ୍ୟୁକୁ କିଛି ମାସ ବିତିଯାଇଥିବାବେଳେ ପତ୍ନୀ ହେମା ଧର୍ମେନ୍ଦ୍ରଙ୍କ ଶେଷ କଥା କଣ ଥିଲା ସେନେଇ ବଡ଼ ଖୁଲାସା କରିଛନ୍ତି ।

• ଏହା ଥିଲା ଧର୍ମେନ୍ଦ୍ରଙ୍କ ଶେଷ କଥା

ଯେତେବେଳେ ହେମାଙ୍କୁ ପଚରାଯାଇଥିଲା ଯେ ଧର୍ମେନ୍ଦ୍ର ମୃତ୍ୟୁ ପୂର୍ବରୁ ତାଙ୍କୁ କଣ ଶେଷଥର ପାଇଁ କହିଥିଲେ, ସେ ନେଇ ଅଭିନେତ୍ରୀରୁ ରାଜନେତ୍ରୀ ପାଲଟିଥିବା ହେମା କହିଥିଲେ ଯେ, ପରିବାର ମଧ୍ୟରେ ଶ୍ରଦ୍ଧା ଓ ପ୍ରେମଭାବ ସହିତ ସବୁବେଳେ ଏକାଠି ରହିବାକୁ ଧର୍ମେନ୍ଦ୍ର କହିଥିଲେ । ଯେତେ ବି କାମ ରହୁ, ସର୍ବଦା ପରିବାରକୁ ଅଧିକ ଗୁରୁତ୍ଵ ଦେବା ପାଇଁ ହେମାଙ୍କୁ କହିଥିଲେ ଧର୍ମେନ୍ଦ୍ର ।

ସେହିପରି ସନି ଦେଓଲ ଓ ବବି ଦେଓଲଙ୍କୁ ନେଇ ମଧ୍ୟ ଧର୍ମେନ୍ଦ୍ର ହେମାଙ୍କୁ କିଛି ଗୁରୁତ୍ଵପୂର୍ଣ୍ଣ କଥା କହିଥିଲେ । ଉଭୟ ପରିବାରକୁ ସାଥୀରେ ଧରି ଚଳିବାକୁ କହିଥିଲେ । ବବି ଓ ସନିଙ୍କୁ ନେଇ ହେମା କହିଥିଲେ ଯେ ଉଭୟ ବେଶ ଭଲ । ସେମାନେ ସବୁବେଳେ ଏକାଠି ରୁହନ୍ତି । ନିଜ ପରିବାରର ଅବସ୍ଥା ଓ ଚାଲିଚଳଣିକୁ ସେମାନେ କେବେ ସାର୍ବଜନୀନ କରିନାହାନ୍ତି । ଏପରିକି ପାରିବାରିକ ବିଷୟକୁ ସ୍ଵାମୀ ଧର୍ମେନ୍ଦ୍ର ମଧ୍ୟ ସର୍ବଦା ଗୋପନୀୟ ରଖିବା ଉପରେ ଗୁରୁତ୍ଵ ଦେଉଥିବା ହେମା କହିଛନ୍ତି ।

• ହେମାଙ୍କୁ ଦ୍ଵିତୀୟ ବିବାହ କରିଥିଲେ ଧର୍ମେନ୍ଦ୍ର

୧୯୬୦ ମସିହାରେ ଏକ ଫିଲ୍ମ ସୁଟ୍ କରିବା ସମୟରେ ଧର୍ମେନ୍ଦ୍ର ଓ ହେମା ପରସ୍ପରକୁ ଭେଟିଥିଲେ । ଏହାପରେ ଏହି ସୁପରହିଟ୍ ଯୋଡ଼ି ଶୋଲେ, ସୀତା ଔର ଗୀତା, ଡ୍ରିମ ଗର୍ଲ ଓ ଦ ବର୍ଣ୍ଣିଂ ଟ୍ରେନ୍ ଭଳି ସୁପରହିଟ୍ ଫିଲ୍ମ ଦର୍ଶକଙ୍କୁ ଭେଟି ଦେଇ ବେଶ ଲୋକପ୍ରିୟତା ସାଉଣ୍ଟିଛନ୍ତି । ସେମାନଙ୍କର ଅନସ୍କ୍ରିନ୍ ଯୋଡ଼ି ବେଶ ହିଟ୍ ହେବାପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ମଧ୍ୟ ଗଢି ଉଠିଥିଲା । ସେତେବେଳେ ଧର୍ମେନ୍ଦ୍ର ପ୍ରକାଶ କୌରଙ୍କୁ ବିବାହ କରିସାରିଥିଲେ, ତାଙ୍କ ଠାରୁ ୪ଟି ସନ୍ତାନ ଥିବାବେଳେ ସେମାନଙ୍କ ମଧ୍ୟରେ ବବି ଦେଓଲ ଓ ସନି ଦେଓଲ ମଧ୍ୟ ସାମିଲ ।

ପଢନ୍ତୁ ଏହି ଖବର: କ୍ୟାନ୍ସରରେ ପୀଡ଼ିତ ଦୀପିକା କକ୍କର; ବିପଦ ଭିତରେ ଏକା ପଡ଼ିଯାଇଛି ୨ବର୍ଷର ପୁଅ ରୁହାନ୍

ଯେହେତୁ ଧର୍ମେନ୍ଦ୍ର ବିବାହିତ ଥିଲେ ହେମାଙ୍କ ପିତାମାତା ଏହି ସମ୍ପର୍କକୁ ବିରୋଧ କରିଥିଲେ । କିନ୍ତୁ ପରବର୍ତ୍ତୀ ସମୟରେ ଧର୍ମେନ୍ଦ୍ର ପ୍ରଥମ ପତ୍ନୀଙ୍କୁ ଛାଡ଼ପତ୍ର ଦେଇ ୧୯୮୦ରେ ହେମାଙ୍କୁ ବିବାହ କରିଥିଲେ । ହେମା ଓ ଧର୍ମେନ୍ଦ୍ରଙ୍କ ଦୁଇଟି କନ୍ୟା ସନ୍ତାନ ଇଶା ଦେଓଲ ଓ ଆହାନା ଦେଓଲ ଅଛନ୍ତି । ଇଶା ଦେଓଲ ମଧ୍ୟ ଜଣେ ବଲିଉଡ ଅଭିନେତ୍ରୀ । ପ୍ରଥମ ପତ୍ନୀଙ୍କୁ ଛାଡ଼ପତ୍ର ଦେଇଥିଲେ ସୁଦ୍ଧା ଉଭୟ ପରିବାର ସହିତ ଧର୍ମେନ୍ଦ୍ର ଭଲ ସମ୍ପର୍କ ସ୍ଥାପନ କରିଥିଲେ ।

• ନଭେମ୍ବର ୨୪ରେ ଅଲବିଦା କହିଥିଲେ ଧର୍ମେନ୍ଦ୍ର

ନଭେମ୍ବର ୨୦୨୫ରେ ଧର୍ମେନ୍ଦ୍ରଙ୍କ ସ୍ଵାସ୍ଥ୍ୟାବସ୍ଥା ବିଗିଡ଼ିଯାଇଥିଲା । ଶେଷରେ ନଭେମ୍ବର ୨୪ ତାରିଖରେ ନିଜର ଜୁହୁ ବାସଭବନରେ ତାଙ୍କର ମୃତ୍ୟୁ ଘଟିଥିଲା । ଏହାପରେ ପୱନ ହାନ୍ସ ଶ୍ମଶାନରେ ପରିବାର ଓ ବଲିଉଡ ଫିଲ୍ମ ଜଗତର ଅନେକ କଳାକାରଙ୍କ ଉପସ୍ଥିତିରେ ତାଙ୍କର ଶେଷକୃତ୍ୟ ହୋଇଥିଲା । ଧର୍ମେନ୍ଦ୍ରଙ୍କୁ ଅନ୍ତିମ ବିଦାୟ ଦେବା ଲାଗି ସଲମାନ ଖାନ, ଶାହରୁଖ ଖାନ, ଆମିର ଖାନ, ଅମିତାଭ ବଚ୍ଚନ ପ୍ରମୁଖ ଯୋଗଦେଇଥିଲେ । ପରବର୍ତ୍ତୀ ସମୟରେ ସନି ଦେଓଲ ଓ ହେମା ମାଳିନୀ ଧର୍ମେନ୍ଦ୍ରଙ୍କ ଅମର ଆତ୍ମାର ସଦଗତି ଲାଗି ପୃଥକ ଶୋକସଭାର ଆୟୋଜନ କରିଥିଲେ ।