Kangana Ranaut / ଦୀପିକାଙ୍କୁ କୁହାଯାଇଥିଲା ଅନଫ୍ରଫେସନାଲ; ଏବେ ସମର୍ଥନରେ ବାହାରିଲେ କଙ୍ଗନା

ଦୀପିକା ପାଦୁକୋନ ଦିନକୁ ୮ ଘଣ୍ଟା କାମ କରିବା ଦାବି ପରେ ତାଙ୍କୁ ଗତ ବର୍ଷ ଦୁଇଟି ଫିଲ୍ମରୁ କାଢି ଦିଆଯାଇଥିଲା । ଏବେ ବଲିଉଡ ଅଭିନେତ୍ରୀ ଏବଂ ସାଂସଦ କଙ୍ଗନା ରଣାୱତ ତାଙ୍କୁ ସମର୍ଥନ କରିଛନ୍ତି । ଦୀପିକା ଜଣେ ଶ୍ରେଷ୍ଠ ଅଭିନେତ୍ରୀ ଏବଂ ଜଣେ ମାଆ ଭାବରେ ଏପରି ଦାବି କରିବାର ଅଧିକାର "ଅର୍ଜନ" କରନ୍ତି ବୋଲି କଙ୍ଗନା କହିଛନ୍ତି । ସେତେବେଳେ ଦୀପିକା ଏପରି ଦାବି କରିବା ପରେ ଏହା ଉପରେ ମିଶ୍ରିତ ପ୍ରତିକ୍ରିୟା ପ୍ରକାଶ ପାଇଥିଲା । କେତେକ ଏହାକୁ ଯୁକ୍ତିଯୁକ୍ତ ବୋଲି କହିଥିବା ବେଳେ ଅନ୍ୟମାନେ ଏହାକୁ ଚଳଚ୍ଚିତ୍ର ଶିଳ୍ପ ପାଇଁ ଅନଫ୍ରଫେସନାଲ୍ ବୋଲି କହିଥିଲେ ।

• 'ତାଙ୍କର ଗୋଟିଏ ଝିଅ ଅଛି, ସେ ଏବେ ଜଣେ ମାଆ'

ଏହି ବିତର୍କ ଉପରେ ନିଜର ମତ ରଖି କଙ୍ଗନା କହିଛନ୍ତି, "ମୁଁ ଭାବୁନାହିଁ ଯେ ଏଥିରୁ କୌଣସି ସମସ୍ୟା ସୃଷ୍ଟି ହେବା ଉଚିତ କାରଣ ଯଦି ଆପଣ ଦେଖନ୍ତି ଯେ ଦୀପିକା ବଲିଉଡର ଜଣେ ପ୍ରତିଷ୍ଠିତ ଅଭିନେତ୍ରୀ । ଏଣୁ ସେ ଏପରି ଦାବି କରିବାର ଅଧିକାର ଅର୍ଜନ କରିଛନ୍ତି । ଏହାବାଦ ତାଙ୍କର ଗୋଟିଏ ଝିଅ ଅଛି; ସେ ଏବେ ଜଣେ ମାଆ ।" ସେ ଏହା ମଧ୍ୟ ଗୁରୁତ୍ୱାରୋପ କରିଥିଲେ ଯେ ସମୟ ଏବଂ ଅଭିଜ୍ଞତା ସହିତ କାର୍ଯ୍ୟ-ଜୀବନ ସନ୍ତୁଳନ ପରିବର୍ତ୍ତନ ହୋଇଥାଏ ।

• ପୂର୍ବ ସମୟକୁ ମନେ ପକାଇଲେ କଙ୍ଗନା

ରଣାୱତ ସେହି ସମୟକୁ ମନେ ପକାଇଲେ ଯେତେବେଳେ ସେ ଏବଂ ପାଦୁକୋନ ଉଭୟ ବହୁତ ଘଣ୍ଟା କାମ କରୁଥିଲେ । ଏ ନେଇ କଙ୍ଗନା କହିଛନ୍ତି, ଯେତେବେଳେ ସେ ଓ ଦୀପିକା ଏକାଠି ରହୁଥିଲେ, ସେତେବେଳେ ଉଭୟଙ୍କ ଏହି ସିଫ୍ଟ ଉପରେ କଥାବାର୍ତ୍ତା ହୋଇଥିଲା । ଦୀପିକା ଗୋଟିଏ ଫିଲ୍ମ ପାଇଁ ୧୨ ଘଣ୍ଟା କାମ କରୁଥିବାବେଳେ କଙ୍ଗନା ୧୦ ଘଣ୍ଟା କାମ କରୁଥିଲେ । ଉଭୟ ସେତେବେଳେ ବଲିଉଡରେ ନୂଆ ଥିବାରୁ ନିଜର ଦାବି ରଖିପାରୁନଥିଲେ କି କାମ ସମୟ ହ୍ରାସ କରିବାକୁ କହିପାରୁନଥିଲେ ।

କଙ୍ଗନା କହିଥିଲେ ଯେ ମହିଳାମାନେ ସେମାନଙ୍କ କ୍ୟାରିଅର ଏବଂ ପାରିବାରିକ ଜୀବନକୁ ସନ୍ତୁଳିତ କରିବାରେ ଅସୁବିଧାର ସମ୍ମୁଖୀନ ହୁଅନ୍ତି । କଙ୍ଗନା ଆହୁରି କହିଥିଲେ ଯେ ଯେତେବେଳେ ବଲିଉଡରେ କେହି ନୂଆ ଥାଆନ୍ତି, ସେମାନଙ୍କୁ ଚୁଟକିରେ ଫିଲ୍ମରୁ ହଟାଯାଏ । କିନ୍ତୁ ଏଠାରେ ଦୀପିକାଙ୍କ ସ୍ଥିତି ଭିନ୍ନ । ଦୀପିକା ଏବେ ଜଣେ ପ୍ରତିଷ୍ଠିତ ଅଭିନେତ୍ରୀ । ଯଦି ସେ ୮ ଘଣ୍ଟା କାମ କରିବା ପାଇଁ ଦାବି କରୁଛନ୍ତି, ତେବେ ତାଙ୍କ ପ୍ରସ୍ତାବକୁ ବିଚାରକୁ ନିଆଯାଏ । ଫିଲ୍ମ ନିର୍ମାତାମାନେ ତାଙ୍କ ସହ କାମ କରିବାକୁ ଚାହୁଁଥିବାରୁ ତାଙ୍କ ଦାବିକୁ ସମ୍ମାନ ଜଣାନ୍ତି ବୋଲି କଙ୍ଗନା କହିଛନ୍ତି ।

• ଫିଲ୍ମରୁ ଆଉଟ୍ ହୋଇଥିଲେ ଦୀପିକା

ଗତବର୍ଷ ଦୀପିକା ପାଦୁକୋନ ଦୁଇଟି ବଡ଼ ବଜେଟ୍ ଫିଲ୍ମ ସ୍ପିରିଟ୍ ଏବଂ କଳ୍କି 2898 AD ସିକ୍ୱେଲରୁ ଆଉଟ୍ ହୋଇଥିଲେ । ଦୀପିକା ସେହି ସମୟରେ ୮ ଘଣ୍ଟା କାମ ପାଇଁ ଦାବି କରୁଥିବାବେଳେ ତାଙ୍କ ଦାବିକୁ ଅନପ୍ରଫେସନାଲ ବୋଲି କୁହାଯାଇଥିଲା । ପରବର୍ତ୍ତୀ ସମୟରେ ଦୀପିକା ଏକ ସାକ୍ଷାତକାରରେ ଲିଙ୍ଗ ପକ୍ଷପାତିତା ଅଭିଯୋଗ ଆଣିଥିଲେ । ସେ ଜଣେ ମହିଳା ହେତୁ ତାଙ୍କ ଦାବିକୁ କିପରି ଅଣଦେଖା କରାଯାଇଥିଲା, ସେ ସମ୍ପର୍କରେ କହିଥିଲେ ।

ପଢନ୍ତୁ ଏହି ଖବର: ଫିଲ୍ମ କଲକି ସିକ୍ଵେଲ୍‌ରୁ ବାହାରିଲେ ଦୀପିକା, ଜଣାପଡ଼ିଲା କାରଣ...

ବିବାଦ ସତ୍ତ୍ୱେ, ଦୀପିକା ଏବେ ଦୁଇଟି ପ୍ରମୁଖ ଚଳଚ୍ଚିତ୍ର ସହିତ ସୁଟିଂ ଜାରି ରଖିଛନ୍ତି । ସେ ଅଲ୍ଲୁ ଅର୍ଜୁନଙ୍କ ସହ ଆଟଲିଙ୍କ "ରାକା"ରେ ନଜର ଆସିବେ ଏବଂ ଶାହରୁଖ ଖାନଙ୍କ "କିଙ୍ଗ"ରେ ମଧ୍ୟ ମୁଖ୍ୟ ଭୂମିକାରେ ଅଭିନୟ କରିବେ । ସେପଟେ ବଲିଉଡ କ୍ଵିନ ରଣାୱତ ଶେଷ ଥର ପାଇଁ "ଇମରଜେନ୍ସି"ରେ ଇନ୍ଦିରା ଗାନ୍ଧୀଙ୍କ ଭୂମିକାରେ ନଜର ଆସିଥିଲେ । ଆଗାମୀ ଦିନରେ ସେ ହରର୍-ଡ୍ରାମା "ବ୍ଲେସଡ୍ ବି ଦ ଏଭିଲ୍" ସହିତ ତାଙ୍କର ଅନ୍ତର୍ଜାତୀୟ ଡେବ୍ୟୁ କରିବାକୁ ଯାଉଛନ୍ତି ।