Air Pistol / କାହିଁକି ମହିଳାଙ୍କୁ ପିସ୍ତଲ କିଣିବାକୁ କହିଲେ ଦିଶା ପଟାନୀଙ୍କ ଭଉଣୀ ? ଭିଡିଓ ଭାଇରାଲ୍

ପାଟନା: ବଲିଉଡ ଅଭିନେତ୍ରୀ ଦିଶା ପଟାନୀଙ୍କ ବଡ଼ ଭଉଣୀ ଖୁଶବୁ ପଟାନୀଙ୍କ ଏକ ଭିଡିଓ ଖୁବ ଭାଇରାଲ ହେବାରେ ଲାଗିଛି । ଏହି ଭିଡିଓରେ ଖୁଶବୁ ଏୟାର ପିସ୍ତଲ ଦେଖାଇ ଏହା କିଣିବାକୁ ଯୁବତୀମାନଙ୍କୁ କହୁଛନ୍ତି । ବିହାର ଜମୁଈରେ ନାବାଳିକାଙ୍କ ସହ ଅସଦାଚରଣ ଘଟଣା ପରେ ଖୁଶବୁଙ୍କ ଏହି ଭିଡିଓ ଆସିଛି ଓ ସେ ବେଶ ଚିନ୍ତାବ୍ୟକ୍ତ କରିଛନ୍ତି । 'ନିଜ ହାତରେ ନିଜ ସୁରକ୍ଷା' କଥାକୁ ମନେ ପକାଇ ଖୁଶବୁ ସମସ୍ତ ଯୁବତୀଙ୍କୁ ଏହି ପରାମର୍ଶ ଦେଇଛନ୍ତି । ଖୁଶବୁଙ୍କ ଭାଇରାଲ ଭିଡିଓରେ ସେ ସମସ୍ତ ଯୁବତୀ ଓ ମହିଳାଙ୍କୁ ଆତ୍ମରକ୍ଷାର ଗୁରୁତ୍ଵ ସମ୍ପର୍କରେ କହୁଛନ୍ତି । ଏହାସହିତ ପିସ୍ତଲ ଶିଖିବାର ଟ୍ରେନିଂକୁ ନେଇ ମଧ୍ୟ ଉତ୍ସାହିତ କରୁଛନ୍ତି ।

• ଖୁଶବୁ ପଟାନୀଙ୍କ ପ୍ରକୃତ ପରିଚୟ

ବଲିଉଡ ଅଭିନେତ୍ରୀ ଦିଶା ପଟାନୀଙ୍କ ବଡ଼ ଭଉଣୀ ହେଉଛନ୍ତି ଖୁଶବୁ ପଟାନୀ । ଏହାବ୍ୟତୀତ ତାଙ୍କର ନିଜସ୍ଵ ପରିଚୟ ମଧ୍ୟ ଅଛି । ଖୁଶବୁ ଭାରତୀୟ ସେନାର ପୂର୍ବ ଅଧିକାରୀ ଭାବେ କାର୍ଯ୍ୟ କରିସାରିଛନ୍ତି । ଏହାବ୍ୟତୀତ ଏବେ ଖୁଶବୁ ଦେଶର ବଡ଼ ବଡ଼ ପ୍ରସଙ୍ଗ ଉପରେ ନିଜ ସୋସିଆଲ ମିଡିଆ ହ୍ୟାଣ୍ଡେଲରେ ଆଲୋଚନା କରୁଛନ୍ତି । ସେ ଡିଆଇଟି ସ୍କୁଲ ଅଫ୍ ଇଞ୍ଜିନିୟରିଂରେ ଇଲେକ୍ଟ୍ରିକାଲ୍ ଇଞ୍ଜିନିୟରିଂରେ ଗ୍ରାଜୁଏସନ କରିଛନ୍ତି । ଡିଗ୍ରୀ ହାସଲ କରିବା ପରେ ସେ କମ୍ପାନୀର ଜଣେ ଇଞ୍ଜିନିୟର ଭାବେ କାମ କରିଥିଲେ, କିନ୍ତୁ ପରେ ଏସଏସବି ପରୀକ୍ଷାରେ ଉତ୍ତୀର୍ଣ୍ଣ ହୋଇ ସେନାରେ ସାମିଲ ହୋଇଥିଲେ । ଏବେ ସେ ସେନାରୁ ଅବସର ହୋଇସାରିଛନ୍ତି ।

• ଯୁବତୀଙ୍କୁ ଦେଲେ ଆତ୍ମରକ୍ଷା ମନ୍ତ୍ର

ବିହାର ଜମୁଈରେ ଜଣେ ନାବାଳିକାକୁ ଅସଦାଚରଣ ଖବର ଆସିବା ପରେ ଏହା ଉପରେ ନିଜର ମତ ରଖିଛନ୍ତି ଖୁଶବୁ । ସେ ନିଜ ଇନଷ୍ଟାଗ୍ରାମରେ ଏକ ଭିଡିଓ ସେୟାର କରିଛନ୍ତି ଓ ଯୁବତୀଙ୍କୁ ନିଜ ସୁରକ୍ଷା ଲାଗି ଅନ୍ୟ ଉପରେ ନିର୍ଭର ନକରିବାକୁ ପରାମର୍ଶ ଦେଇଥିଲେ । ନିଜେ ନିଜର ରକ୍ଷା କରିବାକୁ ସେ କହିଥିଲେ । ଏହି ଭିଡିଓରେ ଖୁଶବୁ CO2 ବା ଅଙ୍ଗାରକାମ୍ଳରେ ଚାଲୁଥିବା ଏୟାର ପିସ୍ତଲ ହାତରେ ଧରିଛନ୍ତି । ଏହି ପିସ୍ତଲ କେମିତି କାମ କରେ ଓ ଝିଅମାନେ ନିଜର ସୁରକ୍ଷା କଥା ଆସିଲେ ଏହାକୁ କିପରି ବ୍ୟବହାର କରିବେ ତାହା ଉପରେ ଆଲୋଚନା କରୁଛନ୍ତି । ପିସ୍ତଲରେ ଦୁର୍ବୃତ୍ତଙ୍କୁ ଟାର୍ଗେଟ୍ କରିବା କଳା ଶିଖିବାକୁ ପଡ଼ିବ ବୋଲି ଦେଶର ସମସ୍ତ ଯୁବତୀଙ୍କୁ ଏକ ବାର୍ତ୍ତା ଦେଇଛନ୍ତି ଖୁଶବୁ ପଟାନୀ ।

ପଢନ୍ତୁ ଏହି ଖବର: ଗର୍ଭବତୀ ମହିଳାଙ୍କୁ ମାଡ଼ ମାରିଲେ; ବେହୋସ୍ ଅବସ୍ଥାରେ ମୃତ ଭାବି ଜାଳିଦେଲେ

• ଏୟାର ପିସ୍ତଲ କଣ ?

ଖୁଶବୁ ନିଜ ଭିଡିଓରେ କହିଥିଲେ ଯେ ଏୟାର ପିସ୍ତଲ ଲାଗି ଲାଇସେନ୍ସର ଆବଶ୍ୟକ ପଡ଼େ ନାହିଁ । ଏହାସହିତ ସେ କହିଥିଲେ ଯେ ଏହି ପିସ୍ତଲକୁ ଅତି ସାବଧାନତାର ସହ ଚଳାଇବାକୁ ପଡ଼େ । ଏହା ଏକ ପ୍ରକାର ହ୍ୟାଣ୍ଡଗନ୍ ଯାହାକି ବାରୁଦ ବଦଳରେ ଗ୍ଯାସ୍ ଦ୍ଵାରା ଚାଲିଥାଏ । ଟ୍ରିଗର ଦବାଇବା ଦ୍ୱାରା ଗ୍ୟାସର ଚାପ ଗୁଳିକୁ ବ୍ୟାରେଲ୍ ବାହାରକୁ ତୀବ୍ର ଗତିରେ ଠେଲିଦିଏ । ଏହା ୧୦ ମିଟର ପର୍ଯ୍ୟନ୍ତ ଟାର୍ଗେଟକୁ ଭେଦିପାରେ ।