Actress Husband Death / ଚର୍ଚ୍ଚିତ ଅଭିନେତ୍ରୀ ମୌସୁମୀ ଚାଟାର୍ଜୀଙ୍କ ଘରେ ଶୋକର ଛାୟା

ମୁମ୍ବାଇ: ବଲିଉଡ୍‌ର ଭେଟେରାନ ଅଭିନେତ୍ରୀ ମୌସୁମୀ ଚାଟାର୍ଜୀଙ୍କ ପରିବାରରେ ଶୋକର ଛାୟା । ସ୍ୱାମୀ ତଥା ଚଳଚ୍ଚିତ୍ର ପ୍ରଯୋଜକ ଜୟନ୍ତ ମୁଖାର୍ଜୀଙ୍କର ପରଲୋକ ହୋଇଛି । ନଭେମ୍ବର ୧୨ ତାରିଖରେ ମୁମ୍ବାଇରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି । ସେ ଦୀର୍ଘଦିନ ଧରି ଅସୁସ୍ଥ ଥିଲେ । ତାଙ୍କ ବିୟୋଗରେ ହିନ୍ଦୀ ଓ ବଙ୍ଗଳା ଚଳଚ୍ଚିତ୍ର ଜଗତରେ ଶୋକର ଲହରୀ ଖେଳିଯାଇଛି ।

ଜୟନ୍ତ ମୁଖାର୍ଜୀ ଥିଲେ ପ୍ରସିଦ୍ଧ ଗାୟକ ଓ ସଙ୍ଗୀତକାର ହେମନ୍ତ କୁମାରଙ୍କ ପୁଅ । ପରିବାର ଓ ନିକଟତମ ଲୋକଙ୍କ ମଧ୍ୟରେ ସେ 'ବାବୁ' ନାମରେ ପରିଚିତ ଥିଲେ । ଚଳଚ୍ଚିତ୍ର ପ୍ରଯୋଜକ ଭାବେ ଜୟନ୍ତ ମୁଖାର୍ଜୀଙ୍କର ଅନେକ ଅବଦାନ ରହିଛି । ୧୯୭୫ର ଫିଲ୍ମ 'ମଜାକ୍' ଏବଂ ୧୯୭୯ର 'ଦୋ ଲଡ଼କେ ଦୋନୋ କଡ଼କେ' ସହ ସେ ଜଡ଼ିତ ଥିଲେ । ଏହାସହ ୧୯୯୨ରେ ପ୍ରସାରିତ ଟେଲିଭିଜନ୍ ସିରିଏଲ୍ 'ତଲାଶ'ରେ ମଧ୍ୟ ତାଙ୍କର ଯୋଗଦାନ ରହିଥିଲା ।

• ୧୫ବର୍ଷ ବୟସରେ ଜୟନ୍ତଙ୍କୁ ବିବାହ କରିଥିଲେ ମୌସୁମୀ

ମୌସୁମୀ ଚାଟାର୍ଜୀ ଏବଂ ଜୟନ୍ତ ମୁଖାର୍ଜୀଙ୍କ ବୈବାହିକ ଜୀବନକୁ ପାଞ୍ଚ ଦଶନ୍ଧିରୁ ଅଧିକ ସମୟ ବିତିଥିଲା । ମାତ୍ର ୧୫ ବର୍ଷ ବୟସରେ ମୌସୁମୀଙ୍କ ବିବାହ ହୋଇଥିଲା । ଏକ ସାକ୍ଷାତକାରରେ ସେ କହିଥିଲେ ଯେ, ତାଙ୍କ ନିର୍ବନ୍ଧ ସ୍ଥିର ହେବା ସମୟରେ ସେ ଦଶମ ଶ୍ରେଣୀରେ ପଢ଼ୁଥିଲେ । ବିବାହ ପରେ ଉଭୟ ମୁମ୍ବାଇ ଚାଲିଆସିଥିଲେ ଏବଂ ସେଠାରୁ ମୌସୁମୀ ନିଜ ଅଭିନୟ କ୍ୟାରିୟରକୁ ଆଗକୁ ବଢ଼ାଇଥିଲେ । ଦୀର୍ଘ ୫୦ବର୍ଷର ଉଭୟଙ୍କ ବୈବାହିକ ସମ୍ପର୍କ । 

• ବଡ଼ଝିଅକୁ ହରାଇଛନ୍ତି ମୌସୁମୀ ଚାଟାର୍ଜୀ

ତେବେ ମୌସୁମୀଙ୍କ ପାଇଁ ଏହା ପ୍ରଥମ ପାରିବାରିକ ଦୁଃଖ ନୁହେଁ । ଏହା ପୂର୍ବରୁ ୨୦୧୯ ଡିସେମ୍ବରରେ ସେ ନିଜ ବଡ଼ ଝିଅ ପାୟଲ ମୁଖାର୍ଜୀଙ୍କୁ ହରାଇଥିଲେ । ୪୫ ବର୍ଷ ବୟସରେ ପାୟଲଙ୍କ ଦେହାନ୍ତ ହୋଇଥିଲା । ସେ ଜୁଭେନାଇଲ୍ ଡାଇବେଟିସ୍‌ରେ ପୀଡ଼ିତ ଥିଲେ ଏବଂ ଦୀର୍ଘ ସମୟ ଧରି କୋମାରେ ରହିଥିଲେ । ଏବେ ସ୍ୱାମୀଙ୍କ ବିୟୋଗ ମୌସୁମୀଙ୍କ ପରିବାର ପାଇଁ ଆଉ ଏକ ବଡ଼ ଦୁଃଖଦ ଘଟଣା । ମୌସୁମୀଙ୍କ ଆଉ ଏକ ଝିଅ ମେଘା ଅଛନ୍ତି ।

ପଢନ୍ତୁ ଏହି ଖବର: ଥରେ ନୁହେଁ, ତିନି-ଚାରି ଥର ବିବାହ କରିଛନ୍ତି ବଲିଉଡ୍‌ର ଏହି ତାରକା

• ବଲିଉଡର ଲୋକପ୍ରିୟ ଅଭିନେତ୍ରୀ ମୌସୁମୀ ଚାଟାର୍ଜୀ

ଅନ୍ୟପଟେ, ମୌସୁମୀ ଚାଟାର୍ଜୀ ଭାରତୀୟ ସିନେମା ଜଗତର ଜଣେ ପରିଚିତ ଚେହେରା । ବଙ୍ଗଳା ଫିଲ୍ମ 'ବାଳିକା ବଧୂ'ରୁ ଶିଶୁ କଳାକାର ଭାବେ ସେ ଅଭିନୟ ଜଗତରେ ପାଦ ରଖିଥିଲେ । ପରେ 'ଅନୁରାଗ', 'ନୈନା', 'କଚ୍ଚେ ଧାଗେ', 'ବେନାମ୍', 'ହମଶକଲ୍ସ' ଏବଂ 'ରୋଟି କପଡ଼ା ଔର ମକାନ୍' ଭଳି ଅନେକ ହିଟ୍ ଫିଲ୍ମରେ ଅଭିନୟ କରି ଦର୍ଶକଙ୍କ ମନ ଜିତିଥିଲେ । ଜଣେ ଜୀବନସାଥୀଙ୍କୁ ହରାଇବାର ଦୁଃଖ ସହ ମୌସୁମୀ ଚାଟାର୍ଜୀଙ୍କ ପରିବାର ଏବେ ଗଭୀର ଶୋକରେ । ଜୟନ୍ତ ମୁଖାର୍ଜୀଙ୍କ ଦେହାନ୍ତରେ ଚଳଚ୍ଚିତ୍ର ଜଗତର ଅନେକ ବ୍ୟକ୍ତି ଶୋକ ପ୍ରକାଶ କରୁଛନ୍ତି ।