Salman Khan / ସୋହେଲଙ୍କ ଛାଡ଼ପତ୍ରକୁ ନେଇ ମୁହଁ ଖୋଲିଲେ ସଲମାନ; କହିଲେ ଭାଇ ମୋର ବହୁତ ସହିଛି

ମୁମ୍ବାଇ: ରିଆଲିଟି ଶୋ' 'ଦ ଅଲାଏନ୍ସ'ରେ ବଲିଉଡର ଦବଙ୍ଗ ସଲମାନ ଖାନଙ୍କ ଜବରଦସ୍ତ ଏଣ୍ଟ୍ରି ହୋଇଛି । ମାତ୍ର ଏଥର ସେ ହୋଷ୍ଟ ନୁହେଁ, ବରଂ ନିଜ ଭାଇ ସୋହେଲ ଖାନଙ୍କୁ ରିପୋର୍ଟ କରିବାକୁ ଶୋ'ରେ ପହଞ୍ଚିଛନ୍ତି । ଏହା ପ୍ରଥମ ଥର ହୋଇଛି ଯେ ସଲମାନ ଖାନଙ୍କ ପରିବାରର କେହି ଜଣେ ରିଆଲିଟି ଶୋ'ରେ ଅଂଶଗ୍ରହଣ କରିଛନ୍ତି । ଯେତେବେଳେ ପରିବାର କଥା ଆସିଛି ସେତେବେଳେ ଭାଇଜାନ ନିଜ ଭାଇର ସମର୍ଥନ କରିବା ପାଇଁ ଶୋ'ରେ ପହଞ୍ଚିଛନ୍ତି । ଫିନାଲେ ୱିକ୍‌ରେ ସଲମାନ ଅଲାଏନ୍ସ ସେଟ୍‌ରେ ପହଞ୍ଚିଛନ୍ତି ।

• ଭାଇକୁ ଆଲିଙ୍ଗନ କଲେ ସଲମାନ

ଅଲାଏନ୍ସର ହେଡକ୍ଵାର୍ଟରରେ ଯେତେବେଳେ ଦବଙ୍ଗ ଖାନଙ୍କ ଏଣ୍ଟ୍ରି ହୋଇଥିଲା, ସେତେବେଳେ ସମସ୍ତ ପ୍ରତିଯୋଗୀଙ୍କ ହୋସ୍ ଉଡ଼ିଯାଇଥିଲା । ସେତେବେଳେ ସଲମାନ ସ୍ପଷ୍ଟ କରିଥିଲେ ଯେ ସେ ଏହି ଶୋ'କୁ ହୋଷ୍ଟ କରିବାକୁ ଆସିନାହାନ୍ତି । ଏହାପରେ ସଲମାନ ନିଜ ସାନଭାଇ ସୋହେଲଙ୍କୁ ଆଲିଙ୍ଗନ କରିଥିଲେ । ଶୋ'ର ଅନ୍ୟ ପ୍ରତିଯୋଗୀଙ୍କ ସହ ସେ ମଜାମସ୍ତି କରୁଥିବା ନଜର ଆସିଥିଲେ ।

• ସୀମାଙ୍କୁ କାହିଁକି ଛାଡ଼ପତ୍ର ଦେଇଥିଲେ ସୋହେଲ ?

ସଲମାନ ଖାନ ନିଜ ଭାଇ ସୋହେଲ ଓ ସୀମାଙ୍କ ବୈବାହିକ ଜୀବନ ଉପରେ ପ୍ରତିକ୍ରିୟା ରଖିଥିଲେ । ସଲମାନ ନିଜ ଭାଇକୁ ପଚାରିଥିଲେ ଯେ 'ତୁମେ ଏବେ ବି ସୀମା କଥା ଶୁଣୁଛ ?' ସଲମାନ ସମସ୍ତ ପ୍ରତିଯୋଗୀଙ୍କ ସହ ବସି ନିଜ ଭାଇକୁ ସମର୍ଥନ କରିଥିଲେ । ସେ କହିଥିଲେ ଯେ ତାଙ୍କ ସାନ ଭାଇ ସୋହେଲ ଛାଡ଼ପତ୍ରର ସମସ୍ତ ଦୋଷ ନିଜ ଉପରକୁ ନେଇଥିଲେ । ମାତ୍ର ଜଣେ ଭାଇ ଭାବେ ସେ ଜାଣିଛନ୍ତି ଯେ ସୋହେଲ ସେହି ସମ୍ପର୍କକୁ ବଜାୟ ରଖିବା ଲାଗି କେତେ ଚେଷ୍ଟା କରିଥିଲେ । ଏହି ପୂରା ଯାତ୍ରାରେ ଭାବନାତ୍ମକ ଭାବେ ସୋହେଲ ବହୁତ କିଛି ସହିଛନ୍ତି ବୋଲି ସଲମାନ କହିଥିଲେ । ଏହି ସମୟରେ ସୋହେଲ ଶାନ୍ତ ହୋଇ ବସିଥିବା ଦେଖିବାକୁ ମିଳିଥିଲା।

• କାହିଁକି ଏପରି କହିଲେ ସଲମାନ ?

ଶୋ'ରେ ସୋହେଲ ନିଜ ବ୍ୟକ୍ତିଗତ ଜୀବନ ଉପରେ କଥା ହେଉଥିବା ଦେଖିବାକୁ ମିଳିଥିଲା । ସେ ନିଜ ବିବାହ ସମ୍ପର୍କ ଭାଙ୍ଗିବାର ସମସ୍ତ ଦୋଷ ନିଜ ଉପରେ ନେଉଥିଲେ । ସୋହେଲ କହିଥିଲେ, "ସେତେବେଳେ ମୋର କାମ ଠିକ୍ ଭାବରେ ଚାଲୁନଥିଲା । ମୁଁ ମାନସିକ ଭାବେ ଚିନ୍ତାରେ ଥିଲି । ମୋର ବ୍ୟବହାର କାରଣରୁ ମୁଁ ସେହି ଝିଅକୁ ହରାଇଲି । ସେ ମୋର ଦୁଇ ପିଲାଙ୍କ ମାଆ । ତାଙ୍କ ପ୍ରତି ମୋର ବହୁତ ସମ୍ମାନ ଅଛି ।"

ପଢନ୍ତୁ ଏହି ଖବର: "ମୁଁ ରାକ୍ଷସ ପାଲଟିଯାଇଥିଲି, ବହୁତି ପିଉଥିଲି"; କାନ୍ଦିଲେ ରାମ କପୁର, କହିଲେ ମରିଯାଇଥାନ୍ତେ

ଏଠାରେ କହିରଖୁଛୁ କି, ସଲମାନଙ୍କ ସାନ ଭାଇ ସୋହେଲ ଖାନଙ୍କ ପତ୍ନୀ ସୀମା ମଧ୍ୟ ଏହି ଶୋ'ରେ ପ୍ରତିଯୋଗୀ ରହିଛନ୍ତି । ଶୋ'ରେ ଉଭୟଙ୍କ ମଧ୍ୟରେ ଭଲ ବନ୍ଧୁତାପୂର୍ଣ୍ଣ ସମ୍ପର୍କ ମଧ୍ୟ ଦେଖିବାକୁ ମିଳିଛି । ଉଭୟ ୧୯୯୮ରେ ବିବାହ କରିଥିଲେ । ୨୦୨୨ରେ ତାଙ୍କର ବିବାହ ବିଚ୍ଛେଦ ହୋଇଥିଲା । ୨୪ ବର୍ଷ ପରେ ସେମାନେ ପରସ୍ପରଠାରୁ ଅଲଗା ହୋଇଥିଲେ । ତାଙ୍କର ଦୁଇଟି ଝିଅ ଅଛନ୍ତି, ଯେଉଁମାନେ ସୋହେଲଙ୍କ ସହିତ ରହୁଛନ୍ତି । ସୀମା ୱାଇଲ୍ଡ କାର୍ଡ ପ୍ରତିଯୋଗୀ ଭାବେ ଏହି ଶୋ'ରେ ଏଣ୍ଟ୍ରି ମାରିଥିଲେ । ଏହି ଶୋ'ଟି ଆମାଜନ୍ ପ୍ରାଇମ ଭିଡିଓରେ ଟେଲିକାଷ୍ଟ ହେଉଛି ।