୨୦୦୭ରେ ରିଲିଜ ହୋଇଥିବା ଆମିର ଖାନଙ୍କ ଫିଲ୍ମ "ତାରେ ଜମିନ୍ ପର" ଲୋକଙ୍କ ହୃଦୟକୁ ଛୁଇଁଥିଲା । ଏହା ଆଜି ମଧ୍ୟ ଲୋକଙ୍କ ମନ ଜିତୁଛି । ସେତେବେଳେ ଏହି ଫିଲ୍ମଟି ପିଲାମାନଙ୍କ ଶିକ୍ଷା ଏବଂ ପିତାମାତାଙ୍କ ମନୋଭାବ ଉପରେ ଏକ ବଡ଼ ବିତର୍କ ସୃଷ୍ଟି କରିଥିଲା । ଫିଲ୍ମ ସହିତ ଏହାର ଚରିତ୍ରଗୁଡ଼ିକୁ ମଧ୍ୟ ସବୁଦିନ ପାଇଁ ସ୍ମରଣୀୟ ରହିଛି । ଏହି ଫିଲ୍ମ ଆମକୁ ଦୁଇ ଚମତ୍କାର ଶିଶୁ କଳାକାରଙ୍କୁ ଦେଖିବାକୁ ମିଳିଥିଲା । ଜଣେ ହେଲେ ମୁଖ୍ୟ ଶିଶୁ କଳାକାର ଦର୍ଶିଲ୍ ସଫାରୀ ଏବଂ ଅନ୍ୟ ଜଣେ ସଚେତ୍ ଇଞ୍ଜିନିୟର । ଦର୍ଶିଲ୍ ଅଭିନୟ ଜଗତରେ ସକ୍ରିୟ ଥିବାବେଳେ ଈଶାନଙ୍କ ବଡ଼ ଭାଇ ୟୋହାନ୍ ଭୂମିକାରେ ଅଭିନୟ କରିଥିବା ସଚେତ୍ ଏବେ ସମ୍ପୂର୍ଣ୍ଣ ଭାବରେ ଲାଇମଲାଇଟରୁ ଦୂରେଇ ଯାଇଛନ୍ତି ।

'ତାରେ ଜମିନ୍ ପର; ଫିଲ୍ମରେ, ସଚେତ୍ ଇଞ୍ଜିନିୟର ୟୋହାନ୍ ନନ୍ଦକିଶୋର ଅବସ୍ଥି ଭୂମିକାରେ ଅଭିନୟ କରିଥିଲେ । ଚଳଚ୍ଚିତ୍ରରେ ୟୋହାନ୍ ପାଠପଢ଼ା ଏବଂ ଖେଳ ଉଭୟରେ ଉତ୍କର୍ଷତା ହାସଲ କରିଥିଲେ । ତେବେ ରିଅଲ୍ ଲାଇଫରେ ମଧ୍ୟ ବେଶ ମେଧାବୀ ସଚେତ୍ । ତାଙ୍କ ବାସ୍ତବ ଜୀବନ ତାଙ୍କ ଚଳଚ୍ଚିତ୍ର ଚରିତ୍ର ସହିତ ପ୍ରାୟତଃ ସମାନ । ବଡ଼ ହେବା ସହିତ ସେ ଗ୍ଲାମର ଜଗତ ଛାଡି କେବଳ ତାଙ୍କ ପାଠପଢ଼ାରେ ଧ୍ୟାନ ଦେଇଥିଲେ । ଆଜି ସେ ଚଳଚ୍ଚିତ୍ର ଶିଳ୍ପ ଏବଂ ଅଭିନୟରୁ ସମ୍ପୂର୍ଣ୍ଣ ଦୂରରେ ଅଛନ୍ତି ଏବଂ ଏକ ଭିନ୍ନ କ୍ଷେତ୍ରରେ ସଫଳତା ହାସଲ କରିଛନ୍ତି ।

• ସଚେତ ଇଞ୍ଜିନିୟର ଏବେ ଜଣେ ଦନ୍ତ ଚିକିତ୍ସକ

ବାସ୍ତବ ଜୀବନରେ, ସଚେତ୍ ଜଣେ ମେଧାବୀ ଛାତ୍ର । ତାଙ୍କ ଲିଙ୍କ୍ ଇନ୍ ପ୍ରୋଫାଇଲ୍ ଅନୁସାରେ, ସେ ଲଣ୍ଡନର ପ୍ରସିଦ୍ଧ UCL Eastman Dental Instituteରୁ ପିରିଓଡୋଣ୍ଟୋଲୋଜିରେ ଡିଗ୍ରୀ ହାସଲ କରିଛନ୍ତି । ସେ ୟୁରୋପୀୟ ପିରିଓଡୋଣ୍ଟୋଲୋଜି ଫେଡେରେସନର ମଧ୍ୟ ଜଣେ ସଦସ୍ୟ । ସଚେତ୍ ୟୁକେରେ ଦନ୍ତ ଚିକିତ୍ସା ଅଭ୍ୟାସ କରିବା ପାଇଁ ସବୁଠୁ ବଡ଼ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ । ଏହା ପୂର୍ବରୁ ସେ ଭାରତର DY ପାଟିଲ ବିଶ୍ୱବିଦ୍ୟାଳୟରେ ତାଙ୍କର ପାଠପଢ଼ା ସମାପ୍ତ କରିଛନ୍ତି, ଯେଉଁଠାରେ ସେ ତାଙ୍କର ଉତ୍କୃଷ୍ଟ ପ୍ରଦର୍ଶନ ପାଇଁ ସ୍ୱର୍ଣ୍ଣ ପଦକ ଜିତିଛନ୍ତି । ଏହି ଡିଗ୍ରୀ ଏବଂ ସଫଳତା ସ୍ପଷ୍ଟ ଭାବରେ ସୂଚାଇ ଦେଉଛି ଯେ ସଚେତ୍ ଫିଲ୍ମରେ ନିଜ ଚରିତ୍ର ପରି ବାସ୍ତବ ଜୀବନରେ ମଧ୍ୟ ପାଠପଢାରେ ବେଶ ଧୁରନ୍ଧର ।

• ସଚେତଙ୍କ ଅନ୍ୟ କଣ ସଉକ ଅଛି ?

ଜଣେ ଦନ୍ତ ଚିକିତ୍ସକ ହେବା ସହିତ ସଚେତ‌ଙ୍କର ଅନେକ ସଉକ ଅଛି । ସେ ଗୋଟିଏ କ୍ଷେତ୍ରରେ ସନ୍ତୁଷ୍ଟ ଥିବା ପରି ମନେ ହେଉନାହିଁ । କାରଣ ଏବେ ସେ ପାଇଲଟ୍ ହେବାକୁ ପ୍ରସ୍ତୁତ ହେଉଛନ୍ତି । ୨୦୨୪ରେ, ସେ ଏକ ବିମାନର କକପିଟ୍‌ରୁ ନିଜର ଏକ ଫଟୋ ସେୟାର କରିଥିଲେ। ସେ ଫଟୋର କ୍ୟାପସନରେ ଲେଖିଥିଲେ, "ଯେତେବେଳେ ଆପଣ ଆକାଶରେ ଥାଆନ୍ତି, ତଳେ ଥିବା ସମସ୍ତ ସମସ୍ୟା ଏତେ ଛୋଟ ମନେହୁଏ ।"

ପଢନ୍ତୁ ଏହି ଖବର: ସୁପର୍ ଗର୍ଲ ଚାରୁ ପାଣ୍ଡେ; SSCରୁ ନେଇ ବ୍ୟାଙ୍କ, ରେଲୱେ ନିଯୁକ୍ତି ପରୀକ୍ଷା… ସବୁଠି ସଫଳ

ଯଦି ଆମେ ସଚେତଙ୍କ ପରିବାର ବିଷୟରେ କହିବା, ତେବେ ସେ ଏକ ଫିଲ୍ମ ପରିବାରରୁ ଆସିଛନ୍ତି । ତାଙ୍କ ଜେଜେମା କୃଷ୍ଣା କୁମାରୀ ସେଠ୍ ଜଣେ ଜଣାଶୁଣା ଅଭିନେତ୍ରୀ ଥିଲେ ଏବଂ ତାଙ୍କ ଜେଜେବାପା ସୂରଜ ପ୍ରକାଶ ମଧ୍ୟ ଜଣେ ପ୍ରସିଦ୍ଧ ପ୍ରଯୋଜକ ଥିଲେ । ଏହି କାରଣରୁ ତାଙ୍କ ଘରେ ପିଲାଦିନରୁ ସମ୍ପୂର୍ଣ୍ଣ ଫିଲ୍ମୀ ପରିବେଶ ଥିଲା । ସେ ପିଲାବେଳେ କିଛି ଫିଲ୍ମରେ ନଜର ଆସିଥିଲେ ଓ ଚମତ୍କାର ଅଭିନୟ କରି ଦର୍ଶକଙ୍କ ହୃଦୟ ଜିତିଥିଲେ ।

• କେମିତି 'ତାରେ ଜମିନ୍ ପର୍' ଫିଲ୍ମ ସୁଯୋଗ ପାଇଲେ ?

ଏକ ପୁରୁଣା ସାକ୍ଷାତକାରରେ, ସଚେତ୍ ପ୍ରକାଶ କରିଥିଲେ ଯେ ପ୍ରଯୋଜକମାନେ ପ୍ରକୃତରେ ତାଙ୍କ ସାନ ଭାଇଙ୍କ ଅଡିସନ୍ ପାଇଁ ଆସିଥିଲେ । ସଚେତ୍ କେବଳ ଭାଇ ସହ ଯାଇଥିଲେ । ସେଠାକାର ପ୍ରଯୋଜକମାନେ ସଚେତଙ୍କୁ ଦେଖି ତାଙ୍କର ମଧ୍ୟ ଅଡିସନ୍ ନେଇଥିଲେ । ଏହାପରେ ଗୋଟିଏ ମାସ ପରେ ସଚେତଙ୍କୁ ଏହି ଭୂମିକା ପାଇଁ ଅଫର ଆସିଥିଲା । ସେତେବେଳେ ତାଙ୍କର ବୟସ ମାତ୍ର ୧୧ ବର୍ଷ ଥିଲା । ଚଳଚ୍ଚିତ୍ରଟି ସୁପରହିଟ୍ ହୋଇଥିଲା ଏବଂ ଲୋକମାନେ ତାଙ୍କୁ ଚିହ୍ନିବା ଆରମ୍ଭ କରିଥିଲେ । ମାତ୍ର ପରେ ସେ ନିଜକୁ ଚଳଚ୍ଚିତ୍ର ଜଗତରୁ ଦୂରେଇ ରଖିଥିଲେ ।

• ସବୁଠି ସଫଳ ସଚେତ

'ତାରେ ଜମିନ୍ ପର୍'ର ସଫଳତା ପରେ ସଚେତଙ୍କୁ ଅନେକ ଫିଲ୍ମ ଅଫର ଆସିଥିଲା, କିନ୍ତୁ ଅଭିନୟ ଉପରେ ସେ ତାଙ୍କର ପାଠପଢ଼ାକୁ ବାଛିଥିଲେ । କିଛି ବର୍ଷ ପୂର୍ବରୁ, ସଚେତ୍ କହିଥିଲେ, "ମୁଁ ମୋର ପାଠପଢ଼ା ସମାପ୍ତ କରିବା ପରେ ଅଭିନୟକୁ ଫେରିପାରେ।" କିନ୍ତୁ ଏବେ ପ୍ରାୟ ୪ ବର୍ଷ ପରେ ମଧ୍ୟ ତାଙ୍କର ଫେରିବାର କୌଣସି ସଙ୍କେତ ଦିଶୁନାହିଁ । ମାତ୍ର ଗୋଟିଁଏ କଥା ସ୍ପଷ୍ଟ ଯେ ସେ ଅଭିନୟ ଜଗତରୁ ଦୂରରେ ତାଙ୍କ ନୂତନ ଜୀବନକୁ ନେଇ ବହୁତ ଖୁସି । ଆଜି ସେ ନିଜ ଜୀବନରେ ସମ୍ପୂର୍ଣ୍ଣ ସଫଳ ।