Veteran Telugu Actor Death / ୮୩ ବର୍ଷରେ ଆଖି ବୁଜିଲେ ଦିଗ୍ଗଜ ଅଭିନେତା ଗିରିବାବୁ; ୬୦୦ରୁ ଅଧିକ ଫିଲ୍ମରେ କରିଛନ୍ତି ଯାଦୁ

ହାଇଦ୍ରାବାଦ: ତେଲୁଗୁ ଫିଲ୍ମ ଇଣ୍ଡଷ୍ଟ୍ରିରୁ ଆସିଛି ଏକ ଦୁଃଖଦ ଖବର । ଆଉ ନାହାନ୍ତି ଦକ୍ଷ ଅଭିନେତା, ନିର୍ଦ୍ଦେଶକ ତଥା ପ୍ରଯୋଜକ ଗିରିବାବୁ । ୮୩ ବର୍ଷ ବୟସରେ ତାଙ୍କର ପରଲୋକ ହୋଇଛି । ନଭେମ୍ବର ୧୪ ତାରିଖରେ ହାଇଦ୍ରାବାଦର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ତାଙ୍କ ବିୟୋଗରେ ସାରା ଦକ୍ଷିଣ ଭାରତୀୟ ସିନେମା ଜଗତରେ ଶୋକର ଛାୟା ଖେଳିଯାଇଛି ।

• ପାଞ୍ଚ ଦଶନ୍ଧିର ଅଭିନୟ ଯାତ୍ରା

ଦୀର୍ଘ ପାଞ୍ଚ ଦଶନ୍ଧି ଧରି ତେଲୁଗୁ ସିନେମା ଜଗତରେ ସକ୍ରିୟ ଥିଲେ ଗିରିବାବୁ । ନିଜର ଦମଦାର ଅଭିନୟ ଏବଂ ସ୍ୱତନ୍ତ୍ର ଶୈଳୀ ଜରିଆରେ ସେ ଦର୍ଶକଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ତିଆରି କରିଥିଲେ । ନିଜ କ୍ୟାରିୟର ମଧ୍ୟରେ ୬୦୦ରୁ ଅଧିକ ଫିଲ୍ମରେ କାମ କରିଥିଲେ ଏହି ବର୍ଷୀୟାନ କଳାକାର । ଖଳନାୟକ, ହାସ୍ୟ ଅଭିନେତା ଏବଂ ଚରିତ୍ର ଅଭିନେତା ଭାବେ ସେ ନିଜର ଅଭିନୟର ଛାପ ଛାଡ଼ିଯାଇଛନ୍ତି ।

• ଅଭିନୟ ସହ ନିର୍ଦ୍ଦେଶନା ଓ ପ୍ରଯୋଜନାରେ ମଧ୍ୟ ଥିଲା ରୁଚି

ଗିରି ବାବୁ କେବଳ ଜଣେ ଅଭିନେତା ନଥିଲେ, ବରଂ ନିର୍ଦ୍ଦେଶକ ଏବଂ ପ୍ରଯୋଜକ ଭାବେ ମଧ୍ୟ ତାଙ୍କର ଅବଦାନ ରହିଛି । ‘ଜଗମେ ମାୟା’ ଚଳଚ୍ଚିତ୍ରରୁ ସେ ନିଜର ଅଭିନୟ ଯାତ୍ରା ଆରମ୍ଭ କରିଥିଲେ । ଏହାସହ ‘ରଣରଙ୍ଗମ୍’, ‘ଇନ୍ଦ୍ରଜିତ୍’ ଏବଂ ‘ନୀ ସୁଖମେ’ ଭଳି ଚଳଚ୍ଚିତ୍ରର ନିର୍ଦ୍ଦେଶନା ଦେଇଥିଲେ । ସେହିପରି ‘ସିମ୍ହା ଗର୍ଜନା’, ‘ମେରୁପୁଦାଡ଼ି’ ଏବଂ ‘ଇନ୍ଦ୍ରଜିତ୍’ ଭଳି ଫିଲ୍ମର ପ୍ରଯୋଜନା ମଧ୍ୟ କରିଥିଲେ ।

• ଚିରଞ୍ଜୀବୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତିଙ୍କ ଶୋକ ପ୍ରକାଶ

ଗିରି ବାବୁଙ୍କ ବିୟୋଗରେ ଅଭିନେତା ଚିରଞ୍ଜୀବୀ ଗଭୀର ଶୋକ ପ୍ରକାଶ କରିଛନ୍ତି । ସୋସିଆଲ ମିଡିଆ ପ୍ଲାଟଫର୍ମ Xରେ ପୋଷ୍ଟ କରି ସେ କହିଛନ୍ତି ଯେ, ଗିରି ବାବୁଙ୍କ ନିଆରା ଅଭିନୟ ଶୈଳୀ ଏବଂ ଅଭିନେତା, ପ୍ରଯୋଜକ ଓ ନିର୍ଦ୍ଦେଶକ ଭାବେ ତେଲୁଗୁ ସିନେମା ପ୍ରତି ତାଙ୍କର ଅବଦାନ ସବୁବେଳେ ମନେ ରହିବ । ତାଙ୍କ ବିୟୋଗ ତେଲୁଗୁ ଫିଲ୍ମ ଇଣ୍ଡଷ୍ଟ୍ରି ପାଇଁ ଏକ ଅପୂରଣୀୟ କ୍ଷତି ବୋଲି ସେ ଉଲ୍ଲେଖ କରିଛନ୍ତି ।

ప్రముఖ సీనియర్ నటుడు, దర్శక నిర్మాత గిరిబాబు మరణం విచారకరం. ప్రకాశం జిల్లాలో ఒక సామాన్య వ్యవసాయ కుటుంబంలో జన్మించిన గిరిబాబు ఐదు దశాబ్దాల పాటు 600లకు పైగా చిత్రాల్లో నటించి... విలన్‌గా, హాస్యనటుడిగా ఇంకా క్యారెక్టర్ ఆర్టిస్టుగా ప్రేక్షకులను మెప్పించారు. గిరిబాబు ఆత్మకు శాంతి చేకూరాలని ప్రార్థిస్తున్నాను. వారి కుటుంబసభ్యులకు ప్రగాఢ సానుభూతిని తెలియజేస్తున్నాను.

— N Chandrababu Naidu (@ncbn) November 14, 2026

• ଆନ୍ଧ୍ର ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କ ଶ୍ରଦ୍ଧାଞ୍ଜଳି

ସେହିପରି ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ମଧ୍ୟ ଗିରି ବାବୁଙ୍କ ଦେହାନ୍ତରେ ଶୋକବ୍ୟକ୍ତ କରିଛନ୍ତି । ପ୍ରକାଶମ ଜିଲ୍ଲାର ଏକ ସାଧାରଣ କୃଷକ ପରିବାରରେ ଜନ୍ମ ନେଇଥିବା ଗିରି ବାବୁ ନିଜ ପ୍ରତିଭା ବଳରେ ପାଞ୍ଚ ଦଶନ୍ଧି ଧରି ସିନେମା ଜଗତରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ । ତାଙ୍କ ଭଳି ଜଣେ ବହୁମୁଖୀ ପ୍ରତିଭାଙ୍କ ବିୟୋଗ ଚଳଚ୍ଚିତ୍ର ଜଗତ ପାଇଁ ଏକ ବଡ଼ କ୍ଷତି ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ପଢନ୍ତୁ ଏହି ଖବର: ଚର୍ଚ୍ଚିତ ଅଭିନେତ୍ରୀ ମୌସୁମୀ ଚାଟାର୍ଜୀଙ୍କ ଘରେ ଶୋକର ଛାୟା

୬୦୦ରୁ ଅଧିକ ଫିଲ୍ମରେ ନିଜ ଅଭିନୟର ଯାଦୁ ଦେଖାଇଥିବା ଗିରି ବାବୁ ଆଜି ଆମ ଗହଣରେ ନାହାନ୍ତି ସତ, କିନ୍ତୁ ତାଙ୍କ ଅଭିନୟ ଏବଂ ସିନେମା ଜଗତ ପ୍ରତି ଅବଦାନ ସବୁଦିନ ପାଇଁ ଦର୍ଶକଙ୍କ ମନରେ ଅମର ହୋଇ ରହିବ ।