Tiger Shroff Firing / ବଲିଉଡ ଅଭିନେତା ଟାଇଗର ଶ୍ରଫ୍‌ଙ୍କୁ ଗୁଳିମାଡ଼

ମୁମ୍ବାଇ: ବଲିଉଡ୍ ଅଭିନେତା ଟାଇଗର ଶ୍ରଫ୍‌ଙ୍କ ଉପରେ ଆକ୍ରମଣ। ମୁମ୍ବାଇ ଜୁହୁ ଅଞ୍ଚଳରେ ଫୁଟବଲ୍ ଗ୍ରାଉଣ୍ଡରୁ ଫେରୁଥିବା ବେଳେ ତାଙ୍କ ଗାଡ଼ି ଉପରକୁ ହୋଇଛି ଗୁଳିମାଡ଼ । ଆକ୍ରମଣରେ ଟାଇଗର ସୁରକ୍ଷିତ ବର୍ତ୍ତି ଯାଇଥିବାବେଳେ ତାଙ୍କ ଡ୍ରାଇଭର ଗୁରୁତର ଆହତ ହୋଇଛନ୍ତି । ଅନ୍ୟପଟେ କୁଖ୍ୟାତ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ଏହି ହତ୍ୟା ଉଦ୍ୟମ ପଛରେ ଥିବା ଦାବି କରି ଭିଡିଓ ବାର୍ତ୍ତା ଜାରି କରିଛି । ଗୁଳିକାଣ୍ଡର କିଛି ସମୟ ପରେ ସୋସିଆଲ୍ ମିଡିଆରେ ଏକ ଭିଡିଓ ବାର୍ତ୍ତା ସାମ୍ନାକୁ ଆସିଛି ।

ଲରେନ୍ସ ବିଷ୍ଣୋଇ ଗ୍ୟାଙ୍ଗ୍‌ର ଅନିଲ ପଣ୍ଡିତ ନାମକ ଜଣେ ବ୍ୟକ୍ତି ନିଜକୁ ହରମାନ ସନ୍ଧୁଙ୍କ ସହ ସାମିଲ ରଖି ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି । ଟାଇଗର ଶ୍ରଫ୍‌ଙ୍କ ଉପରେ ଆକ୍ରମଣ ଘଟଣା ବଲିଉଡ୍‌ରେ ଭୟର ବାତାବରଣ ସୃଷ୍ଟି କରିଛି । ମୁମ୍ବାଇ ପୋଲିସ ଏହି ଆକ୍ରମଣକାରୀଙ୍କୁ ଧରିବା ପାଇଁ ଅଭିଯାନ ଜୋରଦାର କରିଛି ।

• ସନ୍ଧ୍ୟାବେଳେ କାରକୁ ଗୁଳିମାଡ଼

ରବିବାର ସନ୍ଧ୍ୟାରେ ଜୁହୁର ପୁଷ୍ପା ପାର୍କ ନିକଟରେ ତାଙ୍କ କାର୍‌ ଉପରକୁ ଗୁଳିମାଡ଼ ହୋଇଛି । ଏହି ଘଟଣାରେ ଟାଇଗର ଶ୍ରଫ୍‌ ସୁରକ୍ଷିତ ଥିବାବେଳେ ତାଙ୍କ ଡ୍ରାଇଭରଙ୍କ ସମେତ ତିନି ଜଣ ଆହତ ହୋଇଛନ୍ତି । ପ୍ରାଥମିକ ସୂଚନା ଅନୁସାରେ, ମୋଟରସାଇକେଲ୍‌ରେ ଆସିଥିବା ତିନି ଜଣ ଅଜ୍ଞାତ ଦୁର୍ବୃତ୍ତ ଅଞ୍ଚଳରେ ଗୁଳି ଚଳାଇଥିଲେ । ଟାଇଗରଙ୍କ କାର୍‌ ଉପରକୁ ଚାରି ରାଉଣ୍ଡ ଗୁଳି ଚଳାଯାଇଥିବା ମୁମ୍ବାଇ ପୋଲିସ ପକ୍ଷରୁ କୁହାଯାଇଥିବା ଜଣାପଡ଼ିଛି । ଅଭିନେତାଙ୍କ ଦେହରେ ଗୁଳି ବାଜିନାହିଁ ।

ପଢନ୍ତୁ ଏହି ଖବର: ଚୋରା ଚାଲାଣ ବେଳେ ଧରାପଡ଼ିଲା ୧୦୦ କୋଟି ମୂଲ୍ୟର ଡ୍ରଗ୍ସ; ସମୁଦ୍ର ଦେଇ ପଠାଯାଇଥାନ୍ତା ଶ୍ରୀଲଙ୍କା

ଆହତ ତିନି ଜଣଙ୍କ ମଧ୍ୟରେ ଟାଇଗରଙ୍କ ଡ୍ରାଇଭର ଏବଂ ଜଣେ ରିକ୍ସା ଚାଳକ ସାମିଲ ଥିବା କୁହାଯାଉଛି । ଏହି ଗୁଳିକାଣ୍ଡ ପାଇଁ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍‌ ନିଜକୁ ଦାୟୀ କରିଥିବା କୁହାଯାଉଛି । ଏହି ଘଟଣା ସହ ଜଡ଼ିତ ଏକ ଭିଡିଓ ମଧ୍ୟ ସାମ୍ନାକୁ ଆସିଛି । ଗ୍ୟାଙ୍ଗ୍‌ ସହ ଜଡ଼ିତ ଅନିଲ ପଣ୍ଡିତ ଓ ହରମନ ସନ୍ଧୁଙ୍କ ନାମ ମଧ୍ୟ ସାମ୍ନାକୁ ଆସିଛି । ଦିଲ୍ଲୀରେ ଗୁରୁ ରାନ୍ଧୱା ଜିମରୁ ଫେରୁଥିବାବେଳେ ହୋଇଥିବା ଗୁଳିମାଡ଼ରେ ମଧ୍ୟ ଅନିଲ ପଣ୍ଡିତର ନାଁ ସାମ୍ନାକୁ ଆସିଥିଲା । ଅନ୍ୟପକ୍ଷରେ, ଜୁହୁ ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଦୁର୍ବୃତ୍ତଙ୍କ ପରିଚୟ ଖୋଜିବା ସହ ସେମାନଙ୍କୁ ଧରିବା ପାଇଁ ତଲାସୀ ଅଭିଯାନ ଜାରି ରହିଛି । ଏହି ଗୁଳିକାଣ୍ଡ ସହିତ ଜଡ଼ିତ କୌଣସି ବି ତଥ୍ୟ ଲୋକଙ୍କ ନିକଟରେ ଥିଲେ ସେନେଇ ପୋଲିସକୁ ସହଯୋଗ କରିବାକୁ ଅପିଲ୍ କରାଯାଇଛି ।