Pawan Kalyan Third Wife / ପୱନ କଲ୍ୟାଣଙ୍କ ତୃତୀୟ ପତ୍ନୀ ଅନ୍ନା କୋନିଡେଲା କିଏ ? ହେବ ଛାଡ଼ପତ୍ର, କେମିତି ଭେଟ ହୋଇଥିଲେ

ହାଇଦ୍ରାବାଦ: ସାଉଥ୍ ସୁପରଷ୍ଟାର ତଥା ଆନ୍ଧ୍ର ପ୍ରଦେଶ ଉପମୁଖ୍ୟମନ୍ତ୍ରୀ ପୱନ କଲ୍ୟାଣ ନିଜ ତୃତୀୟ ପତ୍ନୀ ଅନ୍ନା କୋନିଡେଲାଙ୍କୁ ଛାଡ଼ପତ୍ର ଦେବାକୁ ଯାଉଛନ୍ତି । ଯାହାଙ୍କ ସହ ୧୩ ବର୍ଷର ବୈବାହିକ ସମ୍ପର୍କ ଶେଷ କରିବେ । ଅଭିନେତାରୁ ରାଜନେତା ପାଲଟିଥିବା ପୱନ କଲ୍ୟାଣ ଓ ତାଙ୍କ ପତ୍ନୀ ଅନ୍ନା କୋନିଡେଲା ପରସ୍ପରଠାରୁ ଅଲଗା ହେବା ନେଇ ଘୋଷଣା କରିଛନ୍ତି । ଉଭୟଙ୍କ ସହମତିରେ ଏହି ନିଷ୍ପତ୍ତି ହୋଇଥିବା ଏକ ମିଳିତ ବିବୃତିରେ କୁହାଯାଇଛି । ତେବେ ଏହି ଖବର ପରେ ଚର୍ଚ୍ଚାକୁ ଆସିଛନ୍ତି ଅନ୍ନା।

• କିଏ ଅନ୍ନା କୋନିଡେଲା?

ଅନ୍ନାଙ୍କ ପୂର୍ବ ନାମ ଥିଲା ଅନ୍ନା ଲେଝନେଭା । ସେ ଋଷିଆର ନାଗରିକ । ମଡେଲିଂ ସହ ଅଭିନୟ ଜଗତରେ ମଧ୍ୟ ନିଜ ଭାଗ୍ୟ ପରୀକ୍ଷା କରିଛନ୍ତି । ୨୦୧୧ରେ ରିଲିଜ୍ ହୋଇଥିବା ତେଲୁଗୁ ଫିଲ୍ମ 'ତିନ୍ ମାର୍'ରେ ପବନ କଲ୍ୟାଣଙ୍କ ସହ ନଜର ଆସିଥିଲେ ଅନ୍ନା । ଏହି ଫିଲ୍ମର ସୁଟିଂ ସମୟରେ ଉଭୟଙ୍କ ମଧ୍ୟରେ ପରିଚୟ ବଢ଼ିଥିଲା ।

• କେବେ ହୋଇଥିଲା ବିବାହ?

ପ୍ରାୟ ଦୁଇ ବର୍ଷର ସମ୍ପର୍କ ପରେ ୩୦ ସେପ୍ଟେମ୍ବର ୨୦୧୩ରେ ହାଇଦ୍ରାବାଦରେ ସ୍ପେଶାଲ୍ ମ୍ୟାରେଜ୍ ଆକ୍ଟ ଅନୁସାରେ ଉଭୟ ବିବାହ ବନ୍ଧନରେ ଆବଦ୍ଧ ହୋଇଥିଲେ । ଏହା ଥିଲା ପୱନ କଲ୍ୟାଣଙ୍କ ତୃତୀୟ ବିବାହ । ପୂର୍ବରୁ ୧୯୯୭ରେ ନନ୍ଦିନୀଙ୍କୁ ବିବାହ କରିଥିଲେ, ହେଲେ ଏହି ସମ୍ପର୍କ ଅଧିକ ଦିନ ତିଷ୍ଠି ପାରିନଥିଲା । ଏହାପରେ ୨୦୦୯ରେ ଅଭିନେତ୍ରୀ ତଥା ମଡେଲ୍ ରେଣୁ ଦେଶାଈଙ୍କୁ ସେ ବିବାହ କରିଥିଲେ । ରେଣୁଙ୍କ ସହ ତାଙ୍କ ବୈବାହିକ ସମ୍ପର୍କ କୌଣସି କାରଣରୁ ଶେଷ ହୋଇଥିଲା । ଅନ୍ନା ଓ ପୱନଙ୍କ ଦୁଇଟି ସନ୍ତାନ ଅଛନ୍ତି । ଅନ୍ୟପଟେ ଅନ୍ନା ୨୦୨୪ରେ ସିଙ୍ଗାପୁରର ନ୍ୟାସନାଲ୍ ୟୁନିଭର୍ସିଟିରୁ ମାଷ୍ଟର ଅଫ୍ ଆର୍ଟସ୍ ଡିଗ୍ରୀ ହାସଲ କରିଥିବା ଖବର ମଧ୍ୟ ଚର୍ଚ୍ଚାରେ ରହିଥିଲା ।

ପଢନ୍ତୁ ଏହି ଖବର: ୧୩ବର୍ଷର ସମ୍ପର୍କ ଭାଙ୍ଗିଲା…ତୃତୀୟ ପତ୍ନୀଙ୍କୁ ବି ଛାଡ଼ପତ୍ର ଦେବେ ଆନ୍ଧ୍ରପ୍ରଦେଶ ଉପମୁଖ୍ୟମନ୍ତ୍ରୀ ପଓ୍ବନ କଲ୍ୟାଣ

• ପରସ୍ପର ସହମତିରେ ଛାଡ଼ପତ୍ର

ଗତ ନଭେମ୍ବର ୯ରେ ଜାରି ମିଳିତ ବିବୃତିରେ ଉଭୟ ପରସ୍ପରର ସମ୍ମାନ ବଜାୟ ରଖି ଅଲଗା ହେବାକୁ ନିଷ୍ପତ୍ତି ନେଇଥିବା କହିଛନ୍ତି । ତେବେ ସେମାନେ ଭଲ ବନ୍ଧୁ ଓ ଦାୟିତ୍ୱବାନ ଅଭିଭାବକ ଭାବେ ରହିବେ ବୋଲି ସ୍ପଷ୍ଟ କରିଛନ୍ତି । ବିଚ୍ଛେଦର କାରଣ ସମ୍ପର୍କରେ କିନ୍ତୁ କୌଣସି ସୂଚନା ଦେଇନାହାନ୍ତି । ଏହାସହିତ ସେମାନେ ନିଜ ପ୍ରଶଂସକମାନଙ୍କୁ ବି ଧନ୍ୟବାଦ ଜଣାଇଛନ୍ତି, ଯେଉଁମାନେ ପ୍ରତିକୂଳ ସମୟରେ ତାଙ୍କ ସହ ରହିଥିଲେ ।