Gold Price Falling / କମିଲା ସୁନା ଦର; ଆଗକୁ ଆହୁରି କମିବ କହିଲେ ଅର୍ଥନୀତି ବିଶେଷଜ୍ଞ

ଭୁବନେଶ୍ଵର/ନୂଆଦିଲ୍ଲୀ: ଘରୋଇ ବଜାରରେ ଆଜି ସୁନା ଦାମ ଖସିଥିବା ଜଣାପଡ଼ିଛି । ରବିବାର ଓ ସୋମବାର ମଧ୍ୟରେ ସୁନା ଦାମ ପାଖାପାଖି ୧୦୦୦ ଟଙ୍କା ଶସ୍ତା ହୋଇଛି । ଆଜି ୨୪ କ୍ୟାରେଟ୍ ସୁନାର ଦାମ ପ୍ରତି ଗ୍ରାମ ପିଛା ୧୪,୪୦୦ ଟଙ୍କା ରହିଛି । ଏହି ଦର ଆଗକୁ ଆହୁରି କମିବ ବୋଲି ସୂଚନା ଦେଇଛନ୍ତି ଅର୍ଥନୀତି ବିଶେଷଜ୍ଞ ତ୍ରିନାଥ ଲେଙ୍କା । ବର୍ତ୍ତମାନ ଦାମରୁ ୬ରୁ ୭ ପ୍ରତିଶତ ସୁନା ଦାମ୍ କମିବ ବୋଲି ସେ କହିଛନ୍ତି, ଯାହାକି ମଧ୍ୟବିତ୍ତ ପରିବାରକୁ ସାମାନ୍ୟ ଆଶ୍ଵସ୍ତି ଦେଇଛି ।

• ୨୨ ଓ ୧୮ କ୍ୟାରେଟ୍ ସୁନା ଦାମ କେତେ ?

ଆଜି ୨୨ କ୍ୟାରେଟ୍ ସୁନାର ଦାମ ୧୩,୨୦୦ ଟଙ୍କା ପ୍ରତି ଗ୍ରାମ ପିଛା ଅଛି । ରବିବାର ଓ ସୋମବାରକୁ ମିଶାଇ ଏହି ଦାମ ପ୍ରାୟ ୧୦୦୦ ଟଙ୍କା ହ୍ରାସ ପାଇଛି । ୧୦ ଗ୍ରାମ ୨୨ କ୍ୟାରେଟ୍ ସୁନାର ଦାମ ୧,୩୨,୦୦୦ ଟଙ୍କା ରହିଛି । ସେହିପରି ୧୮ କ୍ୟାରେଟ୍ ସୁନା ଦାମ ଆଜି ୧୦,୮୦୦ ଟଙ୍କା ପ୍ରତି ଗ୍ରାମ ଓ ପ୍ରତି ୧୦ ଗ୍ରାମ ପିଛା ୧,୦୮,୦୦୦ ଟଙ୍କା ଅଛି ।

• ସୁନା ଦରରେ ମିଳିବ ଆଶ୍ୱସ୍ତି

ଆଗକୁ ସୁନା ଦର ଆହୁରି କମିବ । ୧ ଲକ୍ଷ ୨୦ ହଜାର କିମ୍ବା ୧ ଲକ୍ଷ ୨୫ ହଜାରକୁ ଖସି ଆସିବ ସୁନା ଦର୍ । ୱାଲ୍ଡ ଗୋଲ୍ଡ କ୍ୟନ୍ସିଲର ରିପୋର୍ଟ ଅନୁସାରେ, ଜାନୁଆରୀର ସର୍ବୋଚ୍ଚ ସ୍ତରରୁ ସୁନା ଦର ୩୭% ପର୍ଯ୍ୟନ୍ତ ହ୍ରାସ ପାଇବାକୁ ଯାଉଛି । କାହିଁକି ନା ୟେନ୍ ଶକ୍ତିଶାଳୀ ହେବାକୁ ଯାଉଛି । କିଛି ଦିନ ଧରି ସୁନା ଦର କମିଥିବା ବେଳେ ବର୍ତ୍ତମାନ ୨୨ କ୍ୟାରେଟ ସୁନା ମୂଲ୍ୟ ରହିଛି ୧ଲକ୍ଷ ୩୨ ହଜାର ଓ ୨୪ କ୍ୟାରେଟ ସୁନା ଦର ରହିଛି ୧ ଲକ୍ଷ ୪୪ ହଜାର । ବର୍ତ୍ତମାନ ଦାମରୁ ୬ରୁ ୭ ପ୍ରତିଶତ ସୁନା ଦାମ କମିବ । ଅର୍ଥାତ୍ ସୁନା ଦର ହୋଇଯିବ ୧ ଲକ୍ଷ ୨୦ ହଜାରରୁ ୨୫ ହଜାର ମଧ୍ୟରେ ବୋଲି ଆକଳନ କରିଛନ୍ତି ଅର୍ଥନୀତି ବିଶେଷଜ୍ଞ ତ୍ରିନାଥ ଲେଙ୍କା।

• କେଉଁ ସହରରେ କେତେ ଦାମ ସୁନା ?

ଆଜି ମୁମ୍ବାଇ, ଚେନ୍ନାଇ, କୋଲକାତା, ହାଇଦ୍ରାବାଦ, ପୁଣେ, କୋଏମ୍ବାଟୁର, ନାଗପୁର, ମଦୁରାଇ, ବିଜୟୱାଡା ଭଳି ବଡ଼ ବଡ଼ ସହରରେ ୨୪ କ୍ୟାରେଟ୍ ସୁନା ଦାମ ପ୍ରତି ୧୦ ଗ୍ରାମ ପିଛା ୧ ଲକ୍ଷ ୪୪ ହଜାର ଟଙ୍କା ଅଛି । ଏହି ସହରଗୁଡ଼ିକରେ ୨୨ ଓ୧୮ କ୍ୟାରେଟ୍ ସୁନାର ଦାମ ଯଥାକ୍ରମେ ୧,୩୨,୦୦୦ ଓ ୧,୦୮,୦୦୦ ଟଙ୍କା ରହିଛି । କେବଳ ଚେନ୍ନାଇରେ ୧୮ କ୍ୟାରେଟ୍ ସୁନା ଦାମ ପ୍ରତି ଗ୍ରାମ ପିଛା ୧୧,୦୧୫ ଟଙ୍କା ଅଛି । ଅନ୍ଯପଟେ ଦିଲ୍ଲୀ, ଲକ୍ଷ୍ନୌ ଓ ଚଣ୍ଡିଗଡ଼ରେ ଆଜି ୨୪ କ୍ୟାରେଟ୍ ସୁନା ଦାମ ୧୪,୪୧୫ ଟଙ୍କା ଓ ୨୨ କ୍ୟାରେଟ୍ ସୁନାର ଦମ ୧୩,୨୧୫ ଏବଂ ୧୮ କ୍ୟାରେଟ୍ ସୁନାର ଦାମ ୧୦,୮୧୫ ଟଙ୍କା ଅଛି ।

ପଢନ୍ତୁ ଏହି ଖବର: ବନ୍ୟା ପରେ ପରିବା ବଜାରରେ ନିଆଁ; କନ୍ଦାଇଲାଣି ଦାମ, କେଉଁଠି କେତେ ଦର ଜାଣନ୍ତୁ

• ରୁପା ଦାମ କେତେ ?

ଅନ୍ୟତମ ମୂଲ୍ୟବାନ ଧାତୁ ରୁପାର ଦାମ ପ୍ରତି ଗ୍ରାମ ପିଛା ୨୩୫ ଟଙ୍କା ଓ ୧୦ ଗ୍ରାମ ପିଛା ୨୩୫୦ ଟଙ୍କା ଏବଂ କିଲୋ ପିଛା ୨ ଲକ୍ଷ ୩୫ ହଜାର ଟଙ୍କା ଅଛି । ଗତକାଲି ତୁଳନାରେ ରୁପା ଦାମରେ କୌଣସି ପରିବର୍ତ୍ତନ କରାଯାଇନାହିଁ । ଆଜି ଚେନ୍ନାଇ, ମୁମ୍ବାଇ, ଦିଲ୍ଲୀ, କୋଲକାତା, ବେଙ୍ଗାଲୁରୁ ଭଳି ବଡ଼ ବଡ଼ ସହରରେ ରୁପା ଦାମ ପ୍ରତି ୧୦ ଗ୍ରାମ ପିଛା ୨୩୫୦ ଟଙ୍କା ଅଛି ।