ନୂଆଦିଲ୍ଲୀ: ଆଜି ବି ମୂଲ୍ୟବାନ ଧାତୁ ସୁନା ଏବଂ ରୂପା ମୂଲ୍ୟ ହ୍ରାସ ପାଇବା ଜାରି ରହିଛି । ଆମେରିକା ଏବଂ ଇରାନ ମଧ୍ୟରେ ଉତ୍ତେଜନା ଲାଗି ରହିଥିବାବେଳେ ମଲ୍ଟି-କମୋଡିଟି ବଜାର (MCX)ରେ ସୁନା ଏବଂ ରୁପା ମୂଲ୍ୟ ଦ୍ରୁତ ଭାବରେ ହ୍ରାସ ପାଇଛି । ଆମେରିକା ଫେଡେରାଲ ରିଜର୍ଭର ନିଷ୍ପତ୍ତି ଯୋଗୁଁ ଏହି ଧାତୁଗୁଡ଼ିକର ଦାମ କମିଛି । ସର୍ବୋଚ୍ଚ ସ୍ତରରୁ ଏବେ ରୁପା ୧.୯୮ ଲକ୍ଷ ଟଙ୍କା ଶସ୍ତା ହୋଇଥିବାବେଳେ ସୁନା ମଧ୍ୟ ସର୍ବୋଚ୍ଚ ସ୍ତରରୁ ୫୦ ହଜାର ଟଙ୍କା କମିଛି ।
- ସୁନା ଏବଂ ରୂପା କେତେ ଶସ୍ତା ହେଲା ?
ଶୁକ୍ରବାର ଅର୍ଥାତ ଆଜି MCXରେ ଅଗଷ୍ଟ 5 ତାରିଖର ଫ୍ୟୁଚର୍ସ ପାଇଁ ସୁନା ମୂଲ୍ୟ ୮୦୦ ଟଙ୍କା ହ୍ରାସ ପାଇ ପ୍ରତି ୧୦ ଗ୍ରାମ ପିଛା ୧,୪୪,୫୧୧ ଟଙ୍କାରେ ପହଞ୍ଚିଛି । ସେହିପରି ସେପ୍ଟେମ୍ବର ୪ ତାରିଖର ଫ୍ୟୁଚର୍ସ ପାଇଁ ରୁପା ମୂଲ୍ୟ ୩,୫୭୭ ଟଙ୍କା ହ୍ରାସ ପାଇ ପ୍ରତି କିଲୋଗ୍ରାମ ପିଛା ୨,୨୨,୮୦୦ ଟଙ୍କାରେ ପହଞ୍ଚିଛି । ପ୍ରାରମ୍ଭିକ କାରବାରରେ ସୁନା ଏବଂ ରୁପା ମୂଲ୍ୟ ଏତେ କମି ନଥିଲା, କିନ୍ତୁ ସକାଳ ୧୧ଟା ସମୟରେ ହ୍ରାସ ଦ୍ରୁତ ଗତିରେ ବୃଦ୍ଧି ପାଇଥିଲା ।
- ଅନ୍ତର୍ଜାତୀୟ ବଜାରରେ ସୁନା-ରୁପା ମୂଲ୍ୟ
ଅନ୍ତର୍ଜାତୀୟ ବଜାରରେ ମଧ୍ୟ ସୁନା ଏବଂ ରୁପା ମୂଲ୍ୟ ହ୍ରାସ ପାଇଛି । ସୁନା ୦.୫୦ ପ୍ରତିଶତ ହ୍ରାସ ପାଇ ଆଉନ୍ସ ପ୍ରତି ୪,୧୨୨ ଆମେରିକୀୟ ଡଲାରରେ କାରବାର ହୋଇଛି । ସେହିପରି ରୁପା ମଧ୍ୟ ୦.୫୦ ପ୍ରତିଶତ ହ୍ରାସ ପାଇ ଆଉନ୍ସ ପ୍ରତି ୬୦.୪୪୫ ଆମେରିକୀୟ ଡଲାରରେ ପହଞ୍ଚିଛି ।
- ସର୍ବୋଚ୍ଚ ସ୍ତରରୁ କେତେ ହ୍ରାସ ପାଇଛି ?
MCX ଅନୁଯାୟୀ, ଜାନୁଆରୀରେ ସୁନା ଏବଂ ରୁପା ରେକର୍ଡ ସର୍ବୋଚ୍ଚ ଛୁଇଁଥିଲା, ଯାହା ପ୍ରତିଟି ମଧ୍ୟବିତ୍ତ ପରିବାରକୁ ଚିନ୍ତାରେ ପକାଇଥିଲା । କାରଣ ଭାରତୀୟମାନେ ପର୍ବପର୍ବାଣିଠୁ ଆରମ୍ଭ କରି ବିଶେଷ କରି ବିବାହ ବ୍ରତଘରରେ ସୁନା ନିହାତି ଭାବରେ କିଣିଥାନ୍ତି । ଜାନୁଆରୀ ପରେ ଏହି ମୂଲ୍ୟବାନ ଧାତୁରେ ଏକ ଗୁରୁତ୍ୱପୂର୍ଣ୍ଣ ହ୍ରାସ ପରିଲକ୍ଷିତ ହେବାପରେ ଭାରତୀୟଙ୍କୁ ସାମାନ୍ୟ ଆଶ୍ଵସ୍ତି ମିଳିଛି । ସେତେବେଳେ ସୁନା ପ୍ରତି ୧୦ ଗ୍ରାମ ₹୧.୯୩ ଲକ୍ଷରେ ପହଞ୍ଚିଥିଲା, କିନ୍ତୁ ବର୍ତ୍ତମାନ ଏହା ପ୍ରାୟ ₹୫୦,୦୦୦ ହ୍ରାସ ପାଇଛି । ସେପଟେ, ରୁପା ପ୍ରତି କିଲୋଗ୍ରାମ ₹୪.୨୦ ଲକ୍ଷରେ ପହଞ୍ଚିଥିଲା, କିନ୍ତୁ ବର୍ତ୍ତମାନ ଏହା ₹୨.୨୨ ଲକ୍ଷକୁ ଖସି ଆସିଛି, ଅର୍ଥାତ୍ ଏହାର ରେକର୍ଡ ସର୍ବୋଚ୍ଚ ସ୍ତରରୁ ₹୧.୯୮ ଲକ୍ଷ ଶସ୍ତା ହୋଇଛି ।
ପଢନ୍ତୁ ଏହି ଖବର: ଖସିଖସି ୭ମାସରେ ସବୁଠୁ ଶସ୍ତା ହେଲା ସୁନା; ₹୧.୯୦ ଲକ୍ଷ ପର୍ଯ୍ୟନ୍ତ ରୁପା ବି ଶସ୍ତା- କେଉଁ ସହରରେ କେତେ ଅଛି ସୁନାଦର ?
ମୁମ୍ବାଇରେ ୨୪ କ୍ୟାରେଟ୍ ସୁନାର ମୂଲ୍ୟ ପ୍ରତି ୧୦ ଗ୍ରାମ ₹୧,୪୪,୮୨୦ ଅଛି । ରୁପାର ମୂଲ୍ୟ ପ୍ରତି କିଲୋଗ୍ରାମ ₹୨,୪୦,୦୦୦ ରହିଛି । ସେହିପରି ଲକ୍ଷ୍ନୌରେ, ସୁନାର ମୂଲ୍ୟ ପ୍ରତି ୧୦ ଗ୍ରାମ ₹୧୪,୪୯୫୦ ଏବଂ ରୁପାର ମୂଲ୍ୟ ₹୨,୪୦,୦୦୦ ପ୍ରତି କିଲୋଗ୍ରାମ ରହିଛି । ରାଜଧାନୀ ଭୁବନେଶ୍ଵରରେ ୨୪ କ୍ୟାରେଟ୍ ସୁନାର ମୂଲ୍ୟ ପ୍ରତି ୧୦ ଗ୍ରାମ ₹୧,୪୪,୮୨୦ ଅଛି ଏବଂ ୨୨ କ୍ୟାରେଟ୍ ସୁନାର ମୂଲ୍ୟ ପ୍ରତି ୧୦ ଗ୍ରାମ ପିଛା ₹୧,୩୨,୭୫୦ ରହିଛି ।
