Gold Silver Price Hike / ଧନତେରସ ପୂର୍ବରୁ ମହଙ୍ଗା ହେଲା ସୁନା-ରୂପା; କେତେ ବଢିଲା ଦର ଜାଣନ୍ତୁ

ନୂଆଦିଲ୍ଲୀ: ଧନତେରସ ପୂର୍ବରୁ ସୁନା ଓ ରୂପା ଦରରେ ବଡ଼ ବୃଦ୍ଧି । ନଭେମ୍ବର ୪ ତାରିଖରେ ସୁନା ଦର ୪୦୪୬ ଟଙ୍କା ବଢ଼ିଥିବା ବେଳେ, ରୂପା ଦରରେ ମଧ୍ୟ ୯ ହଜାର ୭୦୮ ଟଙ୍କାର ବୃଦ୍ଧି ହୋଇଛି । ଇଣ୍ଡିଆ ବୁଲିଅନ୍ ଆଣ୍ଡ ଜୁଏଲର୍ସ ଆସୋସିଏସନ୍ ବା IBJA ଅନୁଯାୟୀ, ୧୦ ଗ୍ରାମ୍ ୨୪ କ୍ୟାରେଟ୍ ସୁନା ଦର ୧ ଲକ୍ଷ ୪୨ ହଜାର ଟଙ୍କାରେ ପହଞ୍ଚିଥିବା ବେଳେ, ଏକ କିଲୋଗ୍ରାମ୍ ରୂପା ଦର ୧ ଲକ୍ଷ ୮୬ ହଜାର ଟଙ୍କା ହୋଇଛି । ଆସନ୍ତା ନଭେମ୍ବର ୬ ତାରିଖରେ ପାଳନ ହେବ ଧନତେରସ ।

• ଚଳିତ ବର୍ଷ ସୁନା ୯ ହଜାର ଟଙ୍କା ମହଙ୍ଗା

ଚଳିତ ବର୍ଷ ସୁନା ଓ ରୂପା ଦରରେ ଲାଗି ରହିଛି ଉତ୍ଥାନ-ପତନ । ୨୦୨୫ ଡିସେମ୍ବର ୩୧ ତାରିଖରେ ୧୦ ଗ୍ରାମ୍ ସୁନା ଦର ୧ ଲକ୍ଷ ୩୩ ହଜାର ଟଙ୍କା ଥିବା ବେଳେ, ଏବେ ଏହା ୧ ଲକ୍ଷ ୪୨ ହଜାର ଟଙ୍କାରେ ପହଞ୍ଚିଛି । ଅର୍ଥାତ୍ ଚଳିତ ବର୍ଷ ସୁନା ଦର ପ୍ରାୟ ୯ ହଜାର ଟଙ୍କା ମହଙ୍ଗା ହୋଇଛି ।

• ରୂପା ଦରରେ ୪୪ ହଜାର ଟଙ୍କାର ହ୍ରାସ

ଅନ୍ୟପଟେ ରୂପା ଦରରେ ଦେଖିବାକୁ ମିଳିଛି ବଡ଼ ହ୍ରାସ । ୨୦୨୫ ଡିସେମ୍ବର ୩୧ ତାରିଖରେ ଏକ କିଲୋଗ୍ରାମ୍ ରୂପା ଦର ୨ ଲକ୍ଷ ୩୦ ହଜାର ଟଙ୍କା ଥିବା ବେଳେ, ଏବେ ଏହା ୧ ଲକ୍ଷ ୮୬ ହଜାର ଟଙ୍କାକୁ ଖସିଛି । ଏହି ସମୟରେ ଜାନୁଆରୀ ୨୯ ତାରିଖରେ ସୁନା ୧ ଲକ୍ଷ ୭୬ ହଜାର ଟଙ୍କା ଏବଂ ରୂପା ୩ ଲକ୍ଷ ୮୬ ହଜାର ଟଙ୍କାର ଅଲ୍ ଟାଇମ୍ ହାଇ ଛୁଇଁଥିଲା ।

• କିସ୍ତିରେ ସୁନା କିଣିବାକୁ ପରାମର୍ଶ

କମୋଡିଟି ଏକ୍ସପର୍ଟମାନଙ୍କ ମତରେ, ସୁନା ଓ ରୂପା କିଣିବା ସମୟରେ ଏକାଥରକେ ବଡ଼ ନିବେଶ କରିବା ପରିବର୍ତ୍ତେ କିସ୍ତିରେ କିଣିବା ଉଚିତ । କିଛି ସୁନା ଏବେ କିଣିବା ସହ ପ୍ରତି ୧୫ରୁ ୨୦ ଦିନ ବ୍ୟବଧାନରେ ଧୀରେ ଧୀରେ କିଣିପାରିବେ । ନିବେଶ ପାଇଁ ଏକରୁ ଦୁଇ ମାସ ବଦଳରେ ୬ ମାସରୁ ଏକ ବର୍ଷର ବ୍ୟବଧାନ ରଖିବା ଉଚିତ।

ପଢନ୍ତୁ ଏହି ଖବର: ଧନତେରସ୍‌ ପୂର୍ବରୁ ଶସ୍ତା ହେଲା ସୁନା; ୧୦ ଦିନରେ କମିଲାଣି ୮ ହଜାରରୁ ଅଧିକ

• ସୁନା କିଣିବା ପୂର୍ବରୁ ଏହି ୨ଟି କଥା ମନେ ରଖନ୍ତୁ

ସୁନା କିଣିବା ସମୟରେ ଗ୍ରାହକମାନେ ଦୁଇଟି ଦିଗ ପ୍ରତି ଧ୍ୟାନ ଦେବା ଜରୁରୀ । ପ୍ରଥମତଃ ସର୍ବଦା BIS ହଲମାର୍କ ଥିବା ସାର୍ଟିଫାଏଡ୍ ସୁନା କିଣନ୍ତୁ । ହଲମାର୍କ ଦ୍ୱାରା ସୁନାର ଶୁଦ୍ଧତା ଓ କ୍ୟାରେଟ୍ ସମ୍ପର୍କରେ ଜଣାପଡ଼େ । ଦ୍ୱିତୀୟତଃ, ସୁନାର ଓଜନ ଓ କିଣିବା ଦିନର ଦରକୁ ଯାଞ୍ଚ କରନ୍ତୁ । ୨୪, ୨୨ ଓ ୧୮ କ୍ୟାରେଟ୍ ସୁନାର ଦର ଭିନ୍ନ ରହିଥାଏ । ଧନତେରସ ପୂର୍ବରୁ ସୁନା ଓ ରୂପା ଦରରେ ବୃଦ୍ଧି ଗ୍ରାହକଙ୍କ ଚିନ୍ତା ବଢ଼ାଇଛି । ତେଣୁ ଗହଣା କିଣିବା ପୂର୍ବରୁ ଦର ଯାଞ୍ଚ କରିବା ସହ ସାବଧାନତାର ସହ ନିବେଶ କରିବା ଜରୁରୀ।