Bank Locker Gold Loot / ବ୍ୟାଙ୍କ ଲକରରୁ ୪୦ ଲକ୍ଷ ସୁନା ଚୋରି; ଅସଲି ନେଇଗଲେ, ନକଲି ରଖିଦେଲେ

ଘରେ ସୁନା ଅଳଙ୍କାର ରଖିବା ସୁରକ୍ଷିତ ନୁହେଁ । କେତେବେଳେ ବି ଚୋର ସୁଯୋଗ ଉଣ୍ଡି ସବୁ ଧନ ଲୁଟି ନେଇପାରେ । ଏଥିଲାଗି ଲୋକମାନେ ଏବେ ଅଧିକାଂଶ ବ୍ୟାଙ୍କ ଲକରରେ ସୁନା ଅଳଙ୍କାର ରଖୁଛନ୍ତି । କିନ୍ତୁ ଏଠି ଯେଉଁ ଘଟଣା ସାମ୍ନାକୁ ଆସିଛି, ତାହା ସାଧାରଣ ଲୋକଙ୍କୁ ଚିନ୍ତାରେ ପକାଇଛି । ଏଠି ବ୍ୟାଙ୍କ ଲକରରୁ ଚୋରି ହୋଇଯାଇଛି ଅଳଙ୍କାର । ଗୁଜରାଟ ଜାମ ନଗରରୁ ଆସିଛି, ଯେଉଁଠି ଜଣେ ବ୍ୟକ୍ତିଙ୍କ ୪୦ ଲକ୍ଷ ଟଙ୍କାର ସୁନା ଅଳଙ୍କାର ଚୋରି ହୋଇଯାଇଛି ।

• ଋଣ ପାଇଁ ସୁନା ବନ୍ଧା ପକାଇଥିଲେ

ଚୋରିର ଶିକାର ହୋଇଥିବା ଗ୍ରାହକ ଜଣକ ଋଣ ପାଇଁ ବ୍ୟାଙ୍କରେ ନିଜର ସୁନା ଅଳଙ୍କାର ବନ୍ଧା ପକାଇଥିଲେ । ମାତ୍ର ଏଠି ବ୍ୟାଙ୍କ କର୍ମଚାରୀ ଜଣକ ଚୋର ସାଜିଛନ୍ତି । ଲକରରୁ ଅସଲି ସୁନା ଅଳଙ୍କାର ନେଇ ତା ଜାଗାରେ ନକଲି ସୁନା ରଖିଥିବା ଜଣାପଡ଼ିଛି । ଗ୍ରାହକଙ୍କ କହିବା କଥା, ସେ ବ୍ୟାଙ୍କରେ ୩୯.୪୮ ଲକ୍ଷ ଟଙ୍କାର ପ୍ରାୟ ୩୪୨.୧ ଗ୍ରାମ ସୁନା ରଖିଥିଲେ । ପୋଲିସ ଏହି ଘଟଣାରେ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି । ଲକରରୁ ଅସଲି ସୁନା ଚୋରି କରିବା କେବେଠୁ ଆରମ୍ଭ ହୋଇଛି ଓ ଏହା ପଛରେ ମୁଖ୍ୟ ସୂତ୍ରଧର କିଏ ସେ ନେଇ ପୋଲିସ ତଦନ୍ତ ଜାରି ରଖିଛି ।

• ବ୍ୟାଙ୍କ କର୍ମଚାରୀ ମୁଖ୍ୟ ଚୋର

ଜାମନଗରର ରଣଜିତସାଗର ଅଞ୍ଚଳରେ ଥିବା ଇଣ୍ଡିଆନ ବ୍ୟାଙ୍କରେ ଏପରି ଘଟଣା ଘଟିଛି । ଶାଖାରେ ଜଣେ ଗ୍ରାହକ ଗୋଲ୍ଡ ଲୋନ୍ ନେଇଥିଲେ, ଏଣୁ ତାଙ୍କର ଅସଲି ସୁନାକୁ ଲକରରେ ସୁରକ୍ଷିତ ରଖାଯାଇଥିଲା । ଗ୍ରାହକଙ୍କ ସୁନା ଅଳଙ୍କାର କିପରି ସୁରକ୍ଷିତ ରହିବ ତାହାର ଦାୟିତ୍ଵ ବ୍ୟାଙ୍କ ଉପରେ ଥିଲା । ଅଭିଯୋଗ ହେଉଛି ଯେ ଅଗଷ୍ଟ ୨୭ ତାରିଖ ସକାଳ ପ୍ରାୟ ୧୦ରୁ ସନ୍ଧ୍ୟା ୬ଟା ମଧ୍ୟରେ ଶାଖା ମ୍ୟାନେଜରଙ୍କ ଚାମ୍ବରରୁ ଲକରର ଚାବି ଚୋରି ହୋଇଥିଲା । ଏହାପରେ କର୍ମଚାରୀ ଜଣକ ପ୍ରାୟ ୩୪୨.୧ ଗ୍ରାମର ଅସଲି ସୁନା ନେଇ ସେହି ସ୍ଥାନରେ ନକଲି ସୁନା ରଖିଦେଇଥିଲେ ।

ପଢନ୍ତୁ ଏହି ଖବର: ବ୍ୟାଙ୍କ ଲକରରୁ ୫୦ ଲକ୍ଷ ଟଙ୍କାର ସୁନା ଅଳଙ୍କାର ଚୋରି; କ୍ଷତି କିଏ ବହନ କରିବ ?

• ବଜାରରେ ବିକ୍ରି ହୋଇଛି ଚୋରି ସୁନା

ବ୍ୟାଙ୍କ କର୍ମଚାରୀ ଜଣକ ଅସଲି ସୁନା ଅଳଙ୍କାରଗୁଡ଼ିକ ନେଇ ବିଜୟଭାଇ ବଗୋରାଙ୍କୁ ବିକ୍ରି କରିଛି । ଏହି ମୋଟ ସୁନା ଅଳଙ୍କାରର ଦାମ ୩୯ ଲକ୍ଷ ୪୮ ହଜାର ୯୧୨ ଟଙ୍କା । ବ୍ୟାଙ୍କ ଲକରରୁ ସୁନା ଚୋରି ହେବାପରେ ଏବେ ପୂରା ଘଟଣା ବ୍ୟାଙ୍କର ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ସେପଟେ ବ୍ୟାଙ୍କ କର୍ମଚାରୀ ଯାହାକୁ ସୁନା ବିକିଥିଲେ, ସେହି ବ୍ୟକ୍ତି ଜଣକ ଆଉ କାହାକୁ ସୁନା ବିକ୍ରି କରିବାକୁ ଯାଉଥିଲେ । ପୋଲିସ ଖୋଳତାଡ଼ କରିବା ପରେ ବିଜୟଭାଇ ବଗୋରାକୁ ଅଟକ ରଖିଛି । ସେପଟେ ଅଭିଯୁକ୍ତ ବ୍ୟାଙ୍କ କର୍ମଚାରୀ ହିସମୁଖଭାଇ ପାରିୟାକୁ ପୋଲିସ ହେପାଜତକୁ ନେଇଛି ।