New Virus Outbreak / ଚିନ୍ତା ବଢାଇଲାଣି ଚାନ୍ଦିପୁରା ଭାଇରସ୍ ; ୫ ବର୍ଷରୁ କମ୍ ବୟସର ଶିଶୁମାନଙ୍କୁ ଆଟାକ୍ କରୁଛି

ନୂଆଦିଲ୍ଲୀ: ମାରାତ୍ମକ ହେଲାଣି ଚାନ୍ଦିପୁରା ଭାଇରସ୍ । ଏହି କିଲର ଭାଇରସ ଦେଶରେ ୨୨ ଜଣଙ୍କ ଜୀବନ ନେଇଛି । ଭାରତର ବିଭିନ୍ନ ଅଞ୍ଚଳରେ ଅନେକ ଶିଶୁଙ୍କ ମୃତ୍ୟୁ ଘଟିବା ପରେ ଏହି ଭୂତାଣୁ ଚିନ୍ତା ବଢାଇଛି । ଗୁଜରାଟରୁ କେବଳ ୨୨ ଶିଶୁଙ୍କ ଜୀବନ ଯାଇଥିବା ସୂଚନା ରହିଛି । ଏହି ନୂଆ ଭୂତାଣୁ ସିଧାସଳଖ ଶିଶୁଙ୍କ ମସ୍ତିଷ୍କ ବା ବ୍ରେନ୍‌କୁ ଆକ୍ରମଣ କରୁଥିବା ଜଣାପଡ଼ିଛି । ଏହି ଭାଇରସଠୁ କିପରି ଦୂରେଇ ରହିବେ ସେ ସମ୍ପର୍କରେ ସମସ୍ତେ ଜାଣି ସୁରକ୍ଷିତ ରହିବାକୁ ସ୍ଵାସ୍ଥ୍ୟ ବିଶେଷଜ୍ଞ ସୂଚନା ଦେଇଛନ୍ତି ।

• ଛୋଟ ପିଲା ସବୁଠାରୁ ବଡ଼ ଶିକାର

ଏହି ଭୂତାଣୁ ସଂକ୍ରମଣ ଏକ ବିରଳ ଘଟଣା ୫ ବର୍ଷରୁ କମ୍ ବୟସର ଶିଶୁମାନଙ୍କ କ୍ଷେତ୍ରରେ ହିଁ ଏହି ଭୂତାଣୁ ଦେଖିବାକୁ ମିଳିଥାଏ । ଡାକ୍ତରମାନଙ୍କ ମତରେ, ଛୋଟ ପିଲାମାନେ ଏହାର ସବୁଠାରୁ ବଡ଼ ଶିକାର ହେଉଛନ୍ତି। କାରଣ ଏହି ଭାଇରସ୍ ସେମାନଙ୍କ ଶରୀରରେ ଶୀଘ୍ର ପ୍ରଭାବ ପକାଇ ମସ୍ତିଷ୍କକୁ ସଂକ୍ରମିତ କରିଥାଏ । ବିଶେଷଜ୍ଞଙ୍କ ମତରେ ଶିଶୁମାନଙ୍କ ମସ୍ତିଷ୍କକୁ ରକ୍ତର ବିଷାକ୍ତ ତତ୍ତ୍ୱରୁ ରକ୍ଷା କରୁଥିବା ସୁରକ୍ଷା କବଚ ସମ୍ପୂର୍ଣ୍ଣ ରୂପେ ବିକଶିତ ହୋଇନଥାଏ । ଚାନ୍ଦିପୁରା ଭାଇରସ୍ ରକ୍ତରେ ମିଶିବା ପରେ ଏହି ଦୁର୍ବଳ ପ୍ରତିବନ୍ଧକକୁ ସହଜରେ ଭାଙ୍ଗି ମସ୍ତିଷ୍କ କୋଷ ମଧ୍ୟକୁ ପ୍ରବେଶ କରିଯାଏ ଏବଂ ପ୍ରବଳ ଫୁଲା ସୃଷ୍ଟି କରେ।

• କାହିଁକି ଛୋଟପିଲା ହେଉଛନ୍ତି ଶିକାର ?

ବୟସ୍କମାନଙ୍କ ତୁଳନାରେ ଛୋଟ ଶିଶୁଙ୍କ ରୋଗ ପ୍ରତିରୋଧକ ପ୍ରଣାଳୀ ସମ୍ପୂର୍ଣ୍ଣ ପ୍ରସ୍ତୁତ ନଥାଏ । ଶରୀରରେ ଏହି ନୂତନ ଭାଇରସ୍ ବିରୋଧରେ ଆବଶ୍ୟକ ଆଣ୍ଟିବଡି ନଥିବାରୁ ଭାଇରସଟି ଅତି ଦ୍ରୁତଗତିରେ ନିଜର ସଂଖ୍ୟା ବୃଦ୍ଧି କରି ଶରୀରକୁ ଅକ୍ତିଆର କରିନିଏ । ସାଣ୍ଡଫ୍ଲାଏ ବା ବାଲୁକା ମାଛିଗୁଡ଼ିକ ମୁଖ୍ୟତଃ କଚ୍ଚାଘର, ମାଟିର ଫାଟ, ନାଳ-ନର୍ଦ୍ଦମା ଏବଂ ଗୋବର ଆଦି ସ୍ଥାନରେ ବଂଶବୃଦ୍ଧି କରନ୍ତି ।

• ଲକ୍ଷଣ କଣ ଦେଖାଯାଉଛି ?

ଛୋଟ ଶିଶୁମାନେ ତଳେ ବା ମାଟିରେ ଅଧିକ ସମୟ ଖେଳୁଥିବାରୁ ସେମାନେ ଏହି ମାଛିଙ୍କ କାମୁଡ଼ାର ସହଜ ଶିକାର ହୋଇଥାନ୍ତି । ଏହି ଭାଇରସ୍ ଅନ୍ୟ ସାଧାରଣ ସଂକ୍ରମଣ ତୁଳନାରେ ଅତି ଦ୍ରୁତଗତିରେ ମସ୍ତିଷ୍କରେ ଆକ୍ରମଣ କରେ । ସଂକ୍ରମଣର ମାତ୍ର ୨୪ରୁ ୪୮ ଘଣ୍ଟା ମଧ୍ୟରେ ଶିଶୁର ମସ୍ତିଷ୍କରେ ଫୁଲା, ବାତ ଏବଂ ଅଚେତ ହେବା ଭଳି ଗୁରୁତର ପରିସ୍ଥିତି ସୃଷ୍ଟି ହୋଇଥାଏ ।

ପଢନ୍ତୁ ଏହି ଖବର: ପିଲାଙ୍କୁ ଥଣ୍ଡା-କାଶରୁ ରକ୍ଷା କରିବେ କିପରି ? ମାନନ୍ତୁ ଏହି ଟିପ୍ସ୍ ...

• କେମିତି ରହିବେ ସତର୍କ ?

ଏହି ମାରାତ୍ମକ ଭୂତାଣୁ କବଳରୁ ରକ୍ଷା ପାଇବାକୁ ହେଲେ ଘର ଏବଂ ଆଖପାଖ ପରିବେଶ ପରିଷ୍କାର ରଖନ୍ତୁ । ମାଟି କାନ୍ଥରେ ଥିବା ଫାଟକୁ ବନ୍ଦ କରନ୍ତୁ କାରଣ ସେଠାରେ ମାଛି ବା ପୋକ ରୁହନ୍ତି । କୀଟନାଶକ ସ୍ପ୍ରେ ବ୍ୟବହାର କରନ୍ତୁ । ପିଲାମାନଙ୍କ ଦେହରେ ଜ୍ୱର କିମ୍ବା ବାନ୍ତି ଭଳି ଲକ୍ଷଣ ଦେଖାଗଲେ ବିଳମ୍ବ ନକରି ତୁରନ୍ତ ଡାକ୍ତରଖାନାରେ ଭର୍ତ୍ତି କରନ୍ତୁ ।