Rare Surgery / ଭୀମ ଭୋଇ ମେଡିକାଲ କଲେଜରେ ଅସ୍ତ୍ରୋପଚାର, ଛାତିରୁ ବାହାରିଲା କୋଦାଳ

ବଲାଙ୍ଗୀର: ରାଜ୍ୟର ପଶ୍ଚିମ ଜିଲ୍ଲା ବଲାଙ୍ଗୀରରେ ଆଶ୍ଚର୍ଯ୍ୟଜନକ ଘଟଣା । ଚାଷୀଙ୍କ ଛାତିରେ ପଶିଲା କୋଦାଳ । ସୌଭାଗ୍ୟବଶତଃ ଡାକ୍ତରମାନେ ସଫଳତାର ସହିତ କୋଦାଳକୁ ବାହାର କରି ଚିକିତ୍ସା କ୍ଷେତ୍ରରେ ଏକ ବଡ଼ ସଫଳତା ହାସଲ କରିଛନ୍ତି । ଭୀମ ଭୋଇ ମେଡିକାଲ କଲେଜ ହସପିଟାଲରେ ଏହି ବିରଳ ଅସ୍ତ୍ରୋପଚାର ହୋଇଛି । ଏହି ସଫଳତା ପାଇଁ ସ୍ଵାସ୍ଥ୍ୟମନ୍ତ୍ରୀ ଡକ୍ଟର ମୁକେଶ ମହାଲିଙ୍ଗ ଏକ୍ସ ଜରିଆରେ ଡାକ୍ତରୀ ଟିମକୁ ଧନ୍ୟବାଦ ଜଣାଇଛନ୍ତି । 

• କଣ ପୂରା ଘଟଣା ?

ଜଣେ ଚାଷୀଙ୍କ ଛାତିରେ ପଶିଯାଇଥିବା କୋଦାଳକୁ ସଫଳତାର ସହ ବାହାର କରି ଜୀବନ ବଞ୍ଚାଇଛନ୍ତି ଡାକ୍ତରୀ ଟିମ୍ । ବଲାଙ୍ଗୀର ଖୁଜେନପାଲି ବାଗଭାଡି ଗାଁର ନାରାୟଣ ସାହୁ ଏକ ବହଳ ଗଛକୁ ଚଢ଼ିଥିବା ସମୟରେ ଗୋଡ଼ ଖସିଯିବାରୁ ତଳେ ପଡ଼ିଯାଇଥିଲେ । ତଳେ ଥିବା ଏକ କୋଦାଳ ତାଙ୍କ ଛାତିର ବାମ ପାଖରେ ପଶିଯାଇଥିଲା । ପରିବାର ଲୋକେ ଗୁରୁତର ଅବସ୍ଥାରେ ତାଙ୍କୁ ତୁରନ୍ତ ଭୀମ ଭୋଇ ମେଡିକାଲ କଲେଜ ହସପିଟାଲରେ ଭର୍ତ୍ତି କରିଥିଲେ ।

ସେଠାରେ ଡାକ୍ତର ସରୋଜ ଗୋଛାୟତଙ୍କ ନେତୃତ୍ୱରେ ଏକ ବିଶେଷ ଡାକ୍ତରୀ ଟିମ୍ ଗଠନ କରାଯାଇ ଜରୁରୀକାଳୀନ ଅସ୍ତ୍ରୋପଚାର କରାଯାଇଥିଲା । ଏହି ଅପରେସନ୍ ଅତ୍ୟନ୍ତ ସମ୍ବେଦନଶୀଳ ଓ ଚ୍ୟାଲେଞ୍ଜିଂ ଥିଲେ ମଧ୍ୟ ସଫଳତାର ସହ କୋଦାଳଟିକୁ କଢ଼ାଯାଇପାରିଛି । ରୋଗୀ ହସ୍ପିଟାଲ ଆସିବା ସମୟରେ ବହୁତ ରକ୍ତ ବହି ଯାଇଥିଲା । ଏଠାରୁ ଅନ୍ୟତ୍ର ସ୍ଥାନାନ୍ତର କଲେ ଜୀବନ ପ୍ରତି ବିପଦ ଥିଲା । ଏଣୁ ତୁରନ୍ତ ତାଙ୍କୁ ଏଠାରେ ଅସ୍ତ୍ରୋପଚାର କରାଯାଇଥିବା ଡାକ୍ତର କହିଛନ୍ତି ।

ପଢନ୍ତୁ ଏହି ଖବର: ପୂର୍ବ ଭାରତରେ ପ୍ରଥମ; AIIMS ଭୁବନେଶ୍ଵରରେ ଅତ୍ୟାଧୁନିକ ରୋବୋଟିକ ଯକୃତ ପ୍ରତିରୋପଣ ୟୁନିଟ୍ ଆରମ୍ଭ

• ଡାକ୍ତରଙ୍କୁ ପ୍ରଶଂସା କଲେ ସ୍ଵାସ୍ଥ୍ୟମନ୍ତ୍ରୀ

ଭୀମଭୋଇ ମେଡିକାଲ କଲେଜ ଓ ହସ୍ପିଟାଲର ସର୍ଜରୀ ବିଭାଗର ଡାକ୍ତର ଡ଼ ସରୋଜ ଗୋଚ୍ଛାୟତ, ଡ଼ ସୁମିତ ସାମଲ, ଡ଼ ଅନିଲ ବେହେରା, ଡ଼ ସତ୍ୟବ୍ରତ ସାମଲ, ଆନାସ୍ଥେସିଆ ଡ଼ ନେହା ପାଢ଼ୀ ଓ ଟିମ ଏହି ସଫଳ ଅସ୍ତ୍ରୋପଚାର କରି ଚାଷୀଙ୍କ ଛାତିରେ ପଶିଥିବା କୋଦାଳକୁ ସଫଳତାର ସହ ସୁରକ୍ଷିତ ଭାବେ ବାହାର କରି ତାଙ୍କ ଜୀବନ ରକ୍ଷା କରିଛନ୍ତି । ଏହି ଜଟିଳ ଅସ୍ତ୍ରୋପଚାରକୁ ସଫଳ କରିଥିବା ସମସ୍ତ ଡାକ୍ତରୀ ଦଳ ଓ ସହଯୋଗ କରିଥିବା ସ୍ୱାସ୍ଥ୍ୟକର୍ମୀମାନଙ୍କୁ ସ୍ଵାସ୍ଥ୍ୟମନ୍ତ୍ରୀ ଡକ୍ଟର ମୁକେଶ ମହାଲିଙ୍ଗ ଏକ୍ସ ଜରିଆରେ ଧନ୍ୟବାଦ ଜଣାଇଛନ୍ତି । ସେମାନଙ୍କର ଦକ୍ଷତା, ସମର୍ପଣ ଓ ସେବାଭାବ ଓଡ଼ିଶାର ସ୍ୱାସ୍ଥ୍ୟସେବା ପ୍ରତି ରାଜ୍ୟବାସୀଙ୍କ ବିଶ୍ୱାସକୁ ଆହୁରି ସୁଦୃଢ଼ କରିଛି ବୋଲି ସେ ଉଲ୍ଲେଖ କରିଛନ୍ତି ।

ବଲାଙ୍ଗୀର ଭୀମଭୋଇ ମେଡିକାଲ କଲେଜ ଓ ହସ୍ପିଟାଲର ସର୍ଜରୀ ବିଭାଗର ଡାକ୍ତର ଡ଼ ସରୋଜ ଗୋଚ୍ଛାୟତ, ଡ଼ ସୁମିତ ସାମଲ, ଡ଼ ଅନିଲ ବେହେରା, ଡ଼ ସତ୍ୟବ୍ରତ ସାମଲ, ଆନାସ୍ଥେସିଆ ଡ଼ ନେହା ପାଢ଼ୀ ଓ ଟିମ ଜଣେ ବ୍ୟକ୍ତିଙ୍କ ଛାତିରେ ପଶିଥିବା କୋଦାଳକୁ ସଫଳତାର ସହ ସୁରକ୍ଷିତ ଭାବେ ବାହାର କରି ତାଙ୍କ ଜୀବନ ରକ୍ଷା କରିଛନ୍ତି। ଏହି ଜଟିଳ… pic.twitter.com/gq43tn7YFl

— Dr. Mukesh Mahaling (@MahalingMukesh) July 26, 2026