Indian Student Death / ରାତିରେ ଖାଇ ସାରି ବୁଲୁଥିଲେ, ହଠାତ୍ ଟଳିପଡ଼ିଲେ; ଆମେରିକାରେ ୨୫ବର୍ଷୀୟ ଯୁବତୀଙ୍କ ମୃତ୍ୟୁ

ହାଇଦ୍ରାବାଦ: ଆଖିରେ ଥିଲା ଅନେକ ସ୍ୱପ୍ନ । ଉଚ୍ଚଶିକ୍ଷା ଶେଷ କରି ଆରମ୍ଭ କରିଥାନ୍ତେ ନୂଆ ଜୀବନ । ହେଲେ ତା’ପୂର୍ବରୁ ସବୁକିଛି ଯେମିତି ଅଧାରେ ରହିଗଲା । ଆମେରିକାରେ ରହି ଉଚ୍ଚଶିକ୍ଷା ଶେଷ କରିବା ପରେ ଚାକିରି ଜୀବନ ଆରମ୍ଭ କରିବାକୁ ଯାଉଥିବା ତେଲେଙ୍ଗାନାର ଜଣେ ୨୫ ବର୍ଷୀୟା ଯୁବତୀଙ୍କ ଅକାଳ ମୃତ୍ୟୁ ତାଙ୍କ ପରିବାରକୁ ଗଭୀର ଶୋକରେ ବୁଡ଼ାଇ ଦେଇଛି । ମୃତ ଯୁବତୀ ହେଉଛନ୍ତି ତେଲେଙ୍ଗାନାର ଖମ୍ମମ ଜିଲ୍ଲାର ନଲ୍ଲାମାଲା ଅକ୍ଷିତା । ଆମେରିକାର ନ୍ୟୁୟର୍କ ରାଜ୍ୟର ଆଲବାନିରେ ହୃଦ୍‌ଘାତ ଯୋଗୁଁ ତାଙ୍କର ମୃତ୍ୟୁ ହୋଇଥିବା ପରିବାର ପକ୍ଷରୁ ଜଣାପଡ଼ିଛି ।

• ରାତିରେ ଖାଇ ସାରି ବୁଲୁଥିବା ବେଳେ ଅଘଟଣ

ପରିବାର ସଦସ୍ୟଙ୍କ ସୂଚନା ଅନୁଯାୟୀ, ଅକ୍ଷିତା ଶୁକ୍ରବାର ରାତିରେ ଖାଇବା ପରେ ବାହାରେ ଚାଲିଚାଲି ବୁଲୁଥିଲେ । ଏହି ସମୟରେ ହଠାତ୍ ସେ ତଳେ ପଡ଼ିଯାଇଥିଲେ । ଅକ୍ଷିତାଙ୍କୁ ଏପରି ଅବସ୍ଥାରେ ଦେଖି ତାଙ୍କ ଭାଇ ଅକ୍ଷୟ ଏବଂ ଅନ୍ୟମାନେ ତୁରନ୍ତ ତାଙ୍କୁ ଡାକ୍ତରଖାନାକୁ ନେଇଥିଲେ । ହେଲେ ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ । ହଠାତ୍ ଏଭଳି ଘଟଣା ଘଟିବାରୁ ପରିବାର ସଦସ୍ୟ ଏବଂ ନିକଟ ସମ୍ପର୍କୀୟମାନେ ସ୍ତବ୍ଧ ହୋଇଯାଇଛନ୍ତି । ଯେଉଁ ଝିଅଟି ନିଜ ଭବିଷ୍ୟତକୁ ନେଇ ନୂଆ ସ୍ୱପ୍ନ ଦେଖୁଥିଲା, ତାର ଏପରି ଅକାଳ ବିୟୋଗକୁ ପରିବାର ଲୋକେ ସହଜରେ ଗ୍ରହଣ କରିପାରୁନାହାନ୍ତି।

• ଖୁବଶୀଘ୍ର କରିଥାନ୍ତେ ଚାକିରି

ଅକ୍ଷିତା ତେଲେଙ୍ଗାନାର ଖମ୍ମମ ଜିଲ୍ଲାର ବାସିନ୍ଦା ଥିଲେ । ସେ ଖମ୍ମମ ଚାମ୍ବର ଅଫ୍ କମର୍ସ ସହ ଜଡ଼ିତ ବ୍ୟବସାୟୀ ନଲ୍ଲାମାଲା ଆନନ୍ଦଙ୍କ ଝିଅ ଥିଲେ । ଉଚ୍ଚଶିକ୍ଷା ହାସଲ କରିବା ଉଦ୍ଦେଶ୍ୟରେ ସେ ଆମେରିକା ଯାଇଥିଲେ । ନିକଟରେ ସେ ମାଷ୍ଟର ଅଫ୍ ସାଇନ୍ସ (MS) ପାଠ୍ୟକ୍ରମ ଶେଷ କରିଥିଲେ । ଏହାପରେ ତାଙ୍କୁ ଚାକିରି ମଧ୍ୟ ମିଳିଥିଲା । ଖୁବ୍‌ଶୀଘ୍ର ନିଜର ପେସାଦାର ଜୀବନ ଆରମ୍ଭ କରିବାକୁ ସେ ପ୍ରସ୍ତୁତ ହେଉଥିଲେ । ହେଲେ ନୂଆ ଜୀବନ ଆରମ୍ଭ ହେବା ପୂର୍ବରୁ ତାଙ୍କର ମୃତ୍ୟୁ ଖବର ପରିବାର ଉପରେ ଦୁଃଖର ପାହାଡ଼ ଲଦି ଦେଇଛି ।

ପଢନ୍ତୁ ଏହି ଖବର: ରାଜ୍ୟରେ ପଞ୍ଜୀକୃତ ଦାନ୍ତ ଡାକ୍ତରଙ୍କ ପାଇଁ କଠୋର କଟକଣା

• ଖମ୍ମମରେ ଶୋକର ଛାୟା

ଅକ୍ଷିତାଙ୍କ ଆକସ୍ମିକ ମୃତ୍ୟୁ ପରେ ଖମ୍ମମର ମମତା ରୋଡ୍‌ ଅଞ୍ଚଳରେ ରହୁଥିବା ତାଙ୍କ ପରିବାରରେ ଶୋକର ବାତାବରଣ ଖେଳିଯାଇଛି । ସ୍ଥାନୀୟ ବ୍ୟବସାୟୀ ଏବଂ ରାଜନେତାମାନେ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି । ଅନ୍ୟପକ୍ଷରେ, ଅକ୍ଷିତାଙ୍କ ମୃତଦେହକୁ ଆମେରିକାରୁ ଭାରତ ଫେରାଇ ଆଣିବା ପାଇଁ ପରିବାର ପକ୍ଷରୁ ଆବଶ୍ୟକ ବ୍ୟବସ୍ଥା କରାଯାଉଛି । ଏହାପରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ । ଉଚ୍ଚଶିକ୍ଷା ଶେଷ କରି ନିଜ ଗୋଡ଼ରେ ଠିଆ ହେବାକୁ ଯାଉଥିବା ଅକ୍ଷିତାଙ୍କ ଏପରି ଅକାଳ ବିୟୋଗ ତାଙ୍କ ପରିବାର ପାଇଁ ଏକ ଅପୂରଣୀୟ କ୍ଷତି ।