ଇଣ୍ଡୋନେସିଆରୁ ଆସିଲା ବିଚଳିତ କଲା ପରି ଖବର । ଲିଭ୍ଇନ୍ ରିଲେସନସିପ୍‌ରେ ଥିବା ପ୍ରେମୀଯୁଗଳଙ୍କୁ ବିବାହ ବିନା ଶାରୀରିକ ସମ୍ପର୍କ ରଖିବା ଓ ମଦ ପିଇବା ଲାଗି ମିଳିଛି ତାଲିବାନୀ ସଜା । ଏକ ଅନ୍ତର୍ଜାତୀୟ ଖବର ସରବରାହ ସଂସ୍ଥାର ରିପୋର୍ଟ ଅନୁସାରେ, ମୁସଲିମ ବହୁଳ ଦେଶ ଇଣ୍ଡୋନେସିଆର ଆଚେ ଅଞ୍ଚଳରେ ଘଟିଛି ଏହି ଘଟଣା । ଇସଲାମି ଧାର୍ମିକ ପୋଲିସ, ଯାହାକୁ ସାରିୟା ପୋଲିସ ମଧ୍ୟ କୁହାଯାଏ ସେମାନେ ପ୍ରେମୀଯୁଗଳଙ୍କୁ ଏକ ବାଡ଼ିରେ ୧୪୦ ଥର ମାଡ଼ ମାରିଛନ୍ତି । ଫଳରେ ଯୁବତୀ ଜଣକ ଚେତାଶୂନ୍ୟ ହୋଇପଡ଼ିଥିବା ଜଣାପଡ଼ିଛି ।

ଏହି ପ୍ରେମୀଯୁଗଳଙ୍କୁ ଏକ ସାର୍ବଜନୀନ ସ୍ଥାନରେ ପିଠିକୁ ବାଉଁଶ ପାତିଆରେ ମାରି ଚାଲିଥିଲା ସାରିୟା ପୋଲିସ । ଆଉ ସେଠାରେ ଉପସ୍ଥିତ ଲୋକେ ଦର୍ଶକ ସାଜିଥିଲେ । ଯୁବତୀ ଜଣକ ଚେତାଶୂନ୍ୟ ହେବା ପରେ ତାଙ୍କୁ ଆମ୍ବୁଲାନ୍ସରେ ନିକଟସ୍ଥ ଡାକ୍ତରଖାନା ନିଆଯାଇଥିଲା । ଏଠାରେ କହିରଖୁଛୁ କି, ଆଚେଠାରେ ଅବିବାହିତ ଶାରୀରିକ ସମ୍ପର୍କ ରଖିବା ସମ୍ପୂର୍ଣ୍ଣ ବେଆଇନ ଏବଂ ଆଚେ ହେଉଛି ଇଣ୍ଡୋନେସିଆର ଏକମାତ୍ର ସ୍ଥାନ ଯେଉଁଠି ସାରିୟା ଆଇନ ଲାଗୁ କରାଯାଇଛି ।

୧୪୦ ଥର ବାଡ଼ିରେ ପିଟିଲେ ସାରିୟା ପୋଲିସ

ତେବେ ଆଚେର ସାରିୟା ପୋଲିସ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ ଯୁବକ ଯୁବତୀ ଜଣକ ଏପରି ବେଆଇନ କାମ କରିଥିବାରୁ ଉଭୟଙ୍କୁ ୧୪୦-୧୪୦ ଥର ମାଡ଼ ମରାଯାଇଥିଲା । ୧୦୦ଟି ଶାରୀରିକ ସମ୍ପର୍କ ରଖିବା ପାଇଁ ଏବଂ ୪୦ଟି ମାଡ଼ ମଦ ପିଇବା ପାଇଁ ମରାଯାଇଥିଲା ।

୨୦୦୧ ମସିହାରେ ଇଣ୍ଡୋନେସିଆର ଆଚେକୁ ସ୍ବତନ୍ତ୍ର ସ୍ବାୟତ୍ତତା ପ୍ରଦାନ କରାଯାଇଥିଲା । ଏହାପରେ ସେଠାରେ ସାରିୟା ଆଇନକୁ ଲାଗୁ କରାଯାଇଥିଲା । ରିପୋର୍ଟ ଅନୁସାରେ ସାରିୟା ଆଇନ ଲାଗୁ ହେବା ପରଠାରୁ ଏଯାବତ ସେଠାରେ ଏପରି ମାମଲାରେ ସବୁଠୁ ଅଧିକ ଦଣ୍ଡ ଦିଆଯାଇଥାଏ । ଏହି ପ୍ରେମୀଯୁଗଳ ସେହି ୬ ଜଣଙ୍କ ମଧ୍ୟରେ ସାମିଲ, ଯେଉଁମାନଙ୍କୁ ସାରିୟା ଆଇନ ଉଲ୍ଲଙ୍ଘନ ପାଇଁ ବାଉଁଶ ପାତିଆରେ ମାଡ଼ ମାରି ଦଣ୍ଡ ଦିଆଯାଇଛି । ଏପରିକି ଥରେ ସାରିୟା ପୋଲିସର ଜଣେ ଅଧିକାରୀଙ୍କୁ ତାଙ୍କ ବାନ୍ଧବୀ ସହିତ ଏହି ଦଣ୍ଡ ଦିଆଯାଇଥିଲା ବୋଲି ସାରିୟା ପୋଲିସ ପ୍ରମୁଖ ମୁହମ୍ମଦ ରିଜଲ କହିଛନ୍ତି ।

ଏପରିକି ଆଚେରେ ଜୁଆ ଖେଳିବା, ମଦ ପିଇବା, ସମଲିଙ୍ଗୀ ଯୌନ ସମ୍ପର୍କ ଏବଂ ଅବିବାହିତ ଅବସ୍ଥାରେ ଶାରୀରିକ ସମ୍ପର୍କ ରଖିବା ଆଦି ଲାଗି ମଧ୍ୟ ସାରିୟା ପୋଲିସ ଏପରି ଦଣ୍ଡ ପ୍ରଦାନ କରେ ବୋଲି ମୁହମ୍ମଦ କହିଛନ୍ତି ।

ଏଥିସହ ପଢନ୍ତୁ:- ସ୍ତ୍ରୀ ଗର୍ଭ ନଷ୍ଟ ହେଲା ବୋଲି ମାଆକୁ ମାରିଦେଲା ଜହ୍ଲାଦ ପୁଅ