Argus News - ପାକିସ୍ତାନକୁ ଚେତାବନୀ, ଚୁପ୍‌ ବସିବନି ଆଫଗାନିସ୍ତାନ...ଏୟାରଷ୍ଟ୍ରାଇକ୍‌ର ନେବ ପ୍ରତିଶୋଧ

ଆଫଗାନିସ୍ତାନ ଉପରେ ପାକିସ୍ତାନର ଏୟାର ଷ୍ଟ୍ରାଇକ୍‌ । ଇସଲାମାବାଦରେ ଆତଙ୍କବାଦୀ ଆକ୍ରମଣ ଘଟଣା ପ୍ରତିବାଦରେ ପାକିସ୍ତାନ ଏହି ଆକ୍ରମଣ କରିଥିବା ସୂଚନା ମିଳିଛି । ଆଫଗାନିସ୍ତାନ ସରକାରଙ୍କ ଅନୁଯାୟୀ, ଏହି ଆକ୍ରମଣରେ ୧୭ରୁ ଅଧିକ ଲୋକଙ୍କ ପ୍ରାଣହାନୀ ହୋଇଛି । ନଙ୍ଗରହାର ଏବଂ ପାକ୍ତିକା ପ୍ରଦେଶରେ ସାଧାରଣ ଲୋକଙ୍କ ଉପରେ ପାକିସ୍ତାନ ବାୟୁସେନା ବୋମା ମାଡ଼ କରିଥିବା କହିଛନ୍ତି ଆଫଗାନ ସରକାର ।
ରବିବାର ଦିନ ଆଫଗାନିସ୍ତାନର ତାଲିବାନ ପ୍ରଶାସନ କହିଛି ଯେ ପାକିସ୍ତାନର ବିମାନ ଆକ୍ରମଣର ମୂଲ୍ୟାଙ୍କନ କରୁଛି ଏବଂ ପ୍ରତିଶୋଧ ନେବା ପାଇଁ ଚେତାବନୀ ଦେଇଛି । ଏହି ଘଟଣା ପରେ ଆଫଗାନ-ପାକିସ୍ତାନ ସୀମାରେ ଉତ୍ତେଜନା ପୁଣି ଥରେ ବୃଦ୍ଧି ପାଉଛି। ଏକ ବିବୃତ୍ତିରେ, ଆଫଗାନ ତାଲିବାନ ସରକାରଙ୍କ ମୁଖପାତ୍ର ଜାବିଉଲ୍ଲା ମୁଜାହିଦ ପାକିସ୍ତାନ ଉପରେ ଆଫଗାନ ସାର୍ବଭୌମତ୍ୱ ଉଲ୍ଲଂଘନ କରିବା ଏବଂ ନିରୀହ ନାଗରିକଙ୍କୁ ଆକ୍ରମଣ କରିବାର ଅଭିଯୋଗ ଆଣିଛନ୍ତି ।

ମୁଜାହିଦ କହିଛନ୍ତି ଯେ, ପାକିସ୍ତାନ ପୁଣି ଥରେ ଆଫଗାନିସ୍ତାର ସୀମାରେ ଅନୁପ୍ରବେଶ କରିଛି । ବେଆଇନ ଭାବେ ଏୟାର ଷ୍ଟ୍ରାଇକ୍ କରିଛି । ନାଙ୍ଗରହାର ଏବଂ ପକ୍ତିକାରେ ବୋମାମାଡ କରିଛି ପାକ୍ ସେନା । ଏଥିରେ ମହିଳା ଏବଂ ଶିଶୁ ପ୍ରାଣ ହରାଇଛନ୍ତି । ପାକିସ୍ତାନୀ ଜେନେରାଲ ଏପରି ଅପରାଧ ଘଟାଇ ନିଜ ଦେଶର ସୁରକ୍ଷାରେ ଥିବା ତ୍ରୁଟିକୁ ଭରଣା କରୁଛନ୍ତି । ଗୋଟିଏ ପରିବାରର ୧୯ ଜଣଙ୍କୁ ପାକିସ୍ତାନ ହତ୍ୟା କରିଛି । ଯାହା ଗ୍ରହଣୀୟ ନୁହେଁ ।

ତାଲିବାନର ନିକଟତମ ସୂତ୍ର କହିଛନ୍ତି ଯେ ଅଧିକାରୀମାନେ ଏହି ଆକ୍ରମଣ ଦ୍ୱାରା ହୋଇଥିବା କ୍ଷତିର ପରିମାଣ ଯାଞ୍ଚ କରୁଛନ୍ତି। ସୂତ୍ରଗୁଡ଼ିକ ତାଲିବାନକୁ ଉଦ୍ଧୃତ କରି କହିଛନ୍ତି, "ପାକିସ୍ତାନ ଆଫଗାନିସ୍ତାନର ବାୟୁସୀମା ଉଲ୍ଲଂଘନ କରିଛି ଏବଂ ଆଫଗାନିସ୍ତାନକୁ ପ୍ରତିଶୋଧର ଅଧିକାର ଅଛି । ଆମେ ଉପଯୁକ୍ତ ସମୟରେ ପ୍ରତିଶୋଧ ନେବୁ।"

ପାକ୍ତିକା ଏବଂ ନାଙ୍ଗରହାରରେ ପାକିସ୍ତାନର ବିମାନ ଆକ୍ରମଣ ପରେ ତାଲିବାନ ପ୍ରଶାସନର ବରିଷ୍ଠ ଅଧିକାରୀମାନେ ପରିସ୍ଥିତି ଉପରେ ଆଲୋଚନା କରିବା ଏବଂ ସେମାନଙ୍କର ଭବିଷ୍ୟତ ରଣନୀତି ନିର୍ଣ୍ଣୟ କରିବା ପାଇଁ କାବୁଲ ଏବଂ କାନ୍ଦାହାରରେ ଜରୁରୀକାଳୀନ ବୈଠକ ଡକାଇଛନ୍ତି । ଆଭ୍ୟନ୍ତରୀଣ ବିଚାର ବିମର୍ଶ ପରେ ଆଫଗାନିସ୍ତାନୀ ତାଲିବାନ ପାକିସ୍ତାନୀ ଆକ୍ରମଣର ଆନୁଷ୍ଠାନିକ ଜବାବ ଦେଇପାରେ ।

ଏଥିସହ ପଢ଼ନ୍ତୁ:  ପାକିସ୍ତାନରେ ଚାଲିଥିଲା ବିବାହ ଉତ୍ସବ: ହେଲା ବିସ୍ଫୋରଣ, ୫ ମୃତ