Syria President / ଦିନେ ମାରିବାକୁ ଚାହୁଁଥିଲା ଆମେରିକା, ଏବେ ରାଷ୍ଟ୍ରପତି ହୋଇ ନ୍ୟୁୟର୍କ ପହଞ୍ଚିଲା ସେହି 'ଆତଙ୍କବାଦୀ'...

ନୂଆଦିଲ୍ଲୀ: ଯେଉଁ ବ୍ୟକ୍ତିଙ୍କୁ ଦିନେ ଆତଙ୍କବାଦୀ ସଂଗଠନର ନେତା ମାନି ଆମେରିକା ଖୋଜୁଥିଲା । ସେହି ଅହମଦ ଅଲ-ଶାରା ଏବେ ସିରିଆର ରାଷ୍ଟ୍ରପତି ଭାବେ ନ୍ୟୁୟର୍କରେ ପହଞ୍ଚିଛନ୍ତି । ସିରିଆ ରାଷ୍ଟ୍ରପତି ଅହମଦ ଅଲ-ଶାରା ଜାତିସଂଘ ସାଧାରଣ ସଭାର ୮୧ତମ ଅଧିବେଶନରେ ଯୋଗଦେବେ ।

ସେ ସୋମବାର ଏକ ସରକାରୀ ପ୍ରତିନିଧିମଣ୍ଡଳ ସହ ନ୍ୟୁୟର୍କ ଯାଇଛନ୍ତି । ପ୍ରତିନିଧିମଣ୍ଡଳରେ ସିରିଆର ବୈଦେଶିକ ମନ୍ତ୍ରୀ ଆସାଦ ହସନ ଅଲ-ଶୈବାନୀ ଏବଂ ଜରୁରୀକାଳୀନ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ରାଏଦ ଅଲ-ସାଲେହଙ୍କ ସହ ଅନ୍ୟ ଅଧିକାରୀ ଅଛନ୍ତି ।

ଏଥିସହ ପଢ଼ନ୍ତୁ: ଦିନ ଦ୍ଵି-ପ୍ରହରରେ ମନ୍ତ୍ରୀଙ୍କ କାର୍ ଅଟକାଇ ଟେକିନେଲେ ଆତଙ୍କବାଦୀ; ଦେଖନ୍ତୁ ଛାତିଥରା Video 

ଏହି ଗସ୍ତ ସମୟରେ ଅଲ-ଶାରା ଜାତିସଂଘ ସାଧାରଣ ସଭାରେ ସିରିଆ ପକ୍ଷରୁ ଭାଷଣ ଦେବେ । ଏହା ସହ ବିଭିନ୍ନ ଦେଶର ନେତା ଓ ବରିଷ୍ଠ ଅଧିକାରୀଙ୍କ ସହ ତାଙ୍କର ଆଲୋଚନା ହେବ । ଆମେରିକାରେ ଥିବା ସିରିଆ ସମୁଦାୟର ସଦସ୍ୟମାନଙ୍କୁ ମଧ୍ୟ ସେ ଭେଟିବା କାର୍ଯ୍ୟକ୍ରମ ରହିଛି ।

ସବୁଠାରୁ ଚର୍ଚ୍ଚାରେ ରହିଛି ଅଲ-ଶାରା ଓ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓଙ୍କ ମଧ୍ୟରେ ହେବାକୁ ଥିବା ବୈଠକ । ୨୨ ସେପ୍ଟେମ୍ବରରେ ଦୁଇ ନେତାଙ୍କ ମଧ୍ୟରେ ସିରିଆ-ଆମେରିକା ସମ୍ପର୍କ, ସୁରକ୍ଷା ଓ ଅର୍ଥନୈତିକ ସହଯୋଗ ଭଳି ବିଷୟରେ ଆଲୋଚନା ହେବାର କାର୍ଯ୍ୟକ୍ରମ ରହିଛି ।

ଅଲ-ଶାରାଙ୍କ ଏହି ଗସ୍ତ ତାଙ୍କ ଅତୀତକୁ ନେଇ ବେଶ୍ ଗୁରୁତ୍ଵ ରଖୁଛି । ସେ ପୂର୍ବରୁ ଅବୁ ମହମ୍ମଦ ଅଲ-ଜୋଲାନି ନାମରେ ପରିଚିତ ଥିଲେ ଏବଂ ହୟାତ ତାହରିର ଅଲ-ଶାମ (HTS)ର ନେତୃତ୍ଵ ନେଉଥିଲେ । ଆମେରିକା ତାଙ୍କୁ ଧରାଇବା ପାଇଁ ରିୱାର୍ଡ ଫର୍ ଜଷ୍ଟିସ୍ କାର୍ଯ୍ୟକ୍ରମ ଅଧୀନରେ ୧ କୋଟି ଡଲାର ପର୍ଯ୍ୟନ୍ତ ପୁରସ୍କାର ଘୋଷଣା କରିଥିଲା । ୨୦୨୪ ଡିସେମ୍ବରରେ ଆମେରିକୀୟ ଅଧିକାରୀଙ୍କ ସହ ଆଲୋଚନା ପରେ ଆମେରିକା ଉକ୍ତ ଅର୍ଥ ରାଶିକୁ ଆଗକୁ ବଢ଼ାଇନଥିଲା ।

ଏବେ ଆମେରିକା ଓ ସିରିଆ ମଧ୍ୟରେ ସମ୍ପର୍କରେ ପରିବର୍ତ୍ତନ ଦେଖାଯାଉଛି । ଜୁଲାଇ ୨୦୨୬ରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସିରିଆକୁ ଆମେରିକାର 'ଷ୍ଟେଟ୍ ସ୍ପନସର ଅଫ୍ ଟେରରିଜମ୍' ତାଲିକାରୁ ହଟାଇବା ପାଇଁ ପଦକ୍ଷେପ ଘୋଷଣା କରିଥିଲେ ।

ତେବେ ନ୍ୟୁୟର୍କ ଗସ୍ତ ସମୟରେ ଅଲ-ଶାରା ଓ ଟ୍ରମ୍ପଙ୍କ ମଧ୍ୟରେ ଅଲଗା ଔପଚାରିକ ବୈଠକ ହେବାର କୌଣସି କାର୍ଯ୍ୟକ୍ରମ ଏପର୍ଯ୍ୟନ୍ତ ନିର୍ଦ୍ଧାରିତ ହୋଇନାହିଁ । ଜାତିସଂଘ ସଭାର ବିଭିନ୍ନ କାର୍ଯ୍ୟକ୍ରମରେ ଦୁଇ ନେତାଙ୍କ ସାକ୍ଷାତ କିମ୍ବା ସଂକ୍ଷିପ୍ତ ଆଲୋଚନାର ସମ୍ଭାବନା ନେଇ ଚର୍ଚ୍ଚା ରହିଛି ।

ଏଥିସହ ପଢ଼ନ୍ତୁ: ବଢିପାରେ ଏଲପିଜି ଓ ପେଟ୍ରୋଲ ଦର; ପୁଣି ମଧ୍ୟପ୍ରାଚ୍ଯରେ ଯୁଦ୍ଧ ଆଶଙ୍କା 

ପୂର୍ବରୁ ଟ୍ରମ୍ପଙ୍କୁ କରିଛନ୍ତି ସାକ୍ଷାତ

ଅହମଦ ଅଲ-ଶାରା ଓ ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ପୂର୍ବରୁ ଏକାଧିକ ଥର ସିଧାସଳଖ ଆଲୋଚନା ହୋଇଛି । ଦୁଇ ନେତା ପୂର୍ବରୁ ହ୍ଵାଇଟ୍ ହାଉସରେ ଭେଟିଛନ୍ତି । ଏଥିସହ ନାଟୋ ସମ୍ମିଳନୀ ବେଳେ ତୁର୍କୀଏର ରାଜଧାନୀ ଅଙ୍କାରାରେ ଦ୍ଵିପାକ୍ଷିକ ଆଲୋଚନା କରିଥିଲେ ।

ଅର୍ଥାତ୍ ଗୋଟିଏ ସମୟରେ ଆମେରିକା ଯାହା ମୁଣ୍ଡ ଉପରେ ୧ କୋଟି ଡଲାର ପୁରସ୍କାର ରଖିଥିଲା । ଏବେ ସେହି ବ୍ୟକ୍ତିଙ୍କ ନେତୃତ୍ଵରେ ଆମେରିକା ସହ ରାଜନୈତିକ ସ୍ତରରେ ବାର୍ତ୍ତାଳାପ ହେବା ସିରିଆର ପରିବର୍ତ୍ତିତ ଚିତ୍ର ପ୍ରତିପାଦନ କରୁଛି ।