War Situation Again / ବଢିପାରେ ଏଲପିଜି ଓ ପେଟ୍ରୋଲ ଦର; ପୁଣି ମଧ୍ୟପ୍ରାଚ୍ଯରେ ଯୁଦ୍ଧ ଆଶଙ୍କା

ମଧ୍ୟପ୍ରାଚ୍ୟରେ ପୁଣି ଘନେଇଲା ଯୁଦ୍ଧ ଆଶଙ୍କା । ଓ୍ବାଶିଂଟନ୍ ଓ ତେହେରାନ୍ ମଧ୍ୟରେ ମୁହାଁମୁହିଁ ପରିସ୍ଥିତି ଦେଖାଦେଇଥିବା ବେଳେ ୫୦ ମାସରେ ସର୍ବାଧିକ ୧୩୩ ଡଲାର ପାର୍ କଲା ଅଶୋଧିତ ତୈଳ ଦର । ଏଥିଯୋଗୁଁ ଭାରତୀୟ ବଜାରରେ ମହଙ୍ଗାମାଡ ହୋଇପାରେ । ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଇରାନକୁ ପୁରା ଭୂଗୋଳରୁ ଉଡାଇ ଦେବାକୁ ଧମକ ଦେଇଛନ୍ତି । ଯଦି ଇରାନ୍ ଡିଲ୍ ନକରେ ପରିଣାମ ଭୟାବହ ହେବ ବୋଲି ସେ ଚେତାବନୀ ଦେଇଛନ୍ତି ।

• କଡ଼ା ଜବାବ ଦେଲା ଇରାନ

ଇରାନ୍ ମଧ୍ୟ ଯେକୌଣସି ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ । ଯଦି ଇରାନ୍ ଉପରେ କୌଣସି ଆକ୍ରମଣ ହୁଏ ତେବେ ଆମେରିକାର ବେସ୍ କ୍ୟାମ୍ପଗୁଡିକୁ ଟାର୍ଗେଟ କରାଯିବ । ମାସ ମାସ ଧରି ଦୁଇ ଦେଶ ମଧ୍ୟରେ ଯୁଦ୍ଧ ଚାଲିଥିଲେ ମଧ୍ୟ ସେମାନେ ଏହାର ସମାଧାନ ଚାହୁଁନାହାନ୍ତି । ବାରମ୍ବାର ଉତ୍ତେଜନାମୂଳକ ପରିସ୍ଥିତି ସୃଷ୍ଟି କରୁଛନ୍ତି । ଏଥିଯୋଗୁଁ ହର୍ମୁଜ ପ୍ରଣାଳୀ ଦେଇ ତୈଳ ପରିବହନ ପ୍ରଭାବିତ ହୋଇଛି । ସେପଟେ ୯ଜଣ ଭାରତୀୟଙ୍କୁ ନେଇ ଯାଉଥିବା ଏଲପିଜି ଟ୍ୟାଙ୍କରକୁ ହର୍ମୁଜ ପ୍ରଣାଳୀରେ ଟାର୍ଗେଟ କରାଯାଇଛି ।

• ହୁ ହୁ ହୋଇ ବଢୁଛି ତୈଳଦର

ମଧ୍ୟ ଏସିଆ ଯୁଦ୍ଧ ଅନିଶ୍ଚିତତା ମଧ୍ୟରେ ହୁ ହୁ ହୋଇ ବଢୁଛି ତୈଳଦର । ୫୦ ମାସ ମଧ୍ୟରେ ତେଳ ଦର ବ୍ୟାରେଲ ପ୍ରତି ସର୍ବାଧିକ ୧୩୩ ଡଲାର ପାର ହୋଇଛି । ଆଗାମୀ ଦିନରେ ଏହା ଆହୁରି ବୃଦ୍ଧି ପାଇପାରେ ବୋଲି ଆଶଙ୍କା ପ୍ରକାଶ ପାଇଛି । ଅଗଷ୍ଟ ମାସରେ ବ୍ୟାରେଲ ପ୍ରତି ହାରାହାରି ଦଳ ୧୧୦ ଡଲାର ରହିଥିଲା । ତୈଳ ଦର ବୃଦ୍ଧି ଯୋଗୁଁ ତୈଳ ବିତରଣ କମ୍ପାନୀମାନେ ପେଟ୍ରୋଲରେ ୫ ଟଙ୍କା ଓ ଡିଜେଲର ପ୍ରାୟ ୨୦ଟଙ୍କା କ୍ଷତି ସହୁଛନ୍ତି । ସେପଟେ ଋଷିଆଠାରୁ ତୈଳ କିଣା ବନ୍ଦ କରିବାକୁ ଭାରତ ଓ ଚୀନ ଉପରେ ବାରମ୍ବାର ଚାପ ପ୍ରୟୋଗ କରୁଛି ଆମେରିକା । ଏପରିକି ୧୦୦ ପ୍ରତିଶତ ଟାରିଫ୍ ଲାଗୁ କରିବାକୁ ଧମକ ଦେଇଛି । ଆମେରିକା ପରେ ଭାରତ ଓ ଚୀନ୍ ହେଉଛନ୍ତି ବିଶ୍ବର ବୃହତ୍ ତୈଳ ବ୍ୟବହାରକାରୀ ରାଷ୍ଟ୍ର । ଯଦି ଦୁଇ ଦେଶ ଯୋଗୁଁ ତୈଳ କିଣା ପ୍ରଭାବିତ ହୁଏ ତେବେ ଇନ୍ଧନ ଯୋଗାଣ ବାଧାପ୍ରାପ୍ତ ହୋଇପାରେ । ଘରୋଇ ଏଲପିଜି ଦର ମଧ୍ୟ ବଢିବା ଆଶଙ୍କା ରହିଛି ।

ପଢନ୍ତୁ ଏହି ଖବର: ସିରିଜ ଡ୍ରୋନ୍ ଆକ୍ରମଣରେ କମ୍ପି ଉଠିଲା ଋଷିଆ; ୟୁକ୍ରେନ୍ ଛାଡ଼ିଲା ହଜାରରୁ ଅଧିକ ଡ୍ରୋନ୍

ସେପଟେ ସୋମବାର ଦିନ ମଜଭୁତ ଡଲାର ଏବଂ ଆମେରିକୀୟ ଫେଡେରାଲ୍ ରିଜର୍ଭ ଦ୍ୱାରା ସୁଧହାର ବୃଦ୍ଧି ଆଶଙ୍କା ଯୋଗୁଁ ସୁନା ଦର ହ୍ରାସ ପାଇଛି। କିନ୍ତୁ ଯୁଦ୍ଧ ଆଶଙ୍କା ମଧ୍ୟରେ ସୁନା ଦର ପୁଣି ବଢିବା ଆଶଙ୍କା ଦେଖାଦେଇଛି । ଇରାନ ଓ ଆମେରିକା ଯୁଦ୍ଧ ପାଇଁ ଅନେକ ଦେଶର ଅର୍ଥନୀତି ପ୍ରଭାବିତ ହେଉଛି । ଆଗକୁ ମଧ୍ୟ ଆହୁରି ପ୍ରଭାବିତ ହୋଇପାରେ ବୋଲି ଆଶଙ୍କା କରାଯାଉଛି ।