Argus News - ପରିବେଶ ପାଇଁ ବିପଦ AI; ଡାଟା ସେଣ୍ଟର ଉତ୍ତାପ ଯୋଗୁଁ ୩୪ କୋଟି ଲୋକ ପ୍ରଭାବିତ

ନୂଆଦିଲ୍ଲୀ: ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ଆସିବା ଦ୍ଵାରା ମଣିଷର କାର୍ଯ୍ୟ ସହଜ ହୋଇଛି । ଘଣ୍ଟା ଘଣ୍ଟାର କାମ କେଇ ମିନିଟ୍‌ରେ ଗୋଟିଏ ଚୁଟ୍‌କିରେ ସମ୍ଭବ ହୋଇ ପାରୁଛି । କେବେ ଭାବିଛନ୍ତି ଆମ କାମକୁ ଏତେ ସହଜ କରି ଦେଇଥିବା AI ଡାଟା ସେଣ୍ଟର ପରିଚାଳନା ପାଇଁ କେତେ ବିଦ୍ୟୁତ୍ ଓ କେତେ ପାଣି ଦରକାର ?

ଉତ୍ତର ହେଉଛି ଅତ୍ୟଧିକ ବିଦ୍ୟୁତ୍ ଓ ହଜାର ହଜାର ଲିଟର ପାଣି । ଏହା ପଛରେ ବି ରହସ୍ୟ ଅଛି । AI ଡାଟା ସେଣ୍ଟର ଥିବା ବିଲ୍ଡିଂ ଦ୍ଵାରା ସେହି କୋଠା ତଳ ଭୂମି ଯେ ତାତୁଛି ତା' ନୁହେଁ ପାଖଆଖ ଅଞ୍ଚଳରେ ତାପମାତ୍ରା ବଢ଼ୁଛି । ଏକ ଅଧ୍ୟୟନରୁ ଜଣାପଡ଼ିଛି, AI ଡାଟା ସେଣ୍ଟର ଉତ୍ତାପ ଯୋଗୁଁ ବିଶ୍ଵବ୍ୟାପୀ ୩୪୦ ମିଲିୟନ୍ ଅର୍ଥାତ୍ ୩୪ କୋଟି ଲୋକ ପ୍ରଭାବିତ ହୋଇଛନ୍ତି ।

ଏଥିସହ ପଢ଼ନ୍ତୁ: କୁକୁରର ଶେଷ ପର୍ଯ୍ୟାୟ କ୍ୟାନସର୍‌କୁ ଭଲ କରିଦେଲା AIରୁ ତିଆରି ଭ୍ୟାକ୍ସିନ୍

ବିଶ୍ଵ ତାପନ ପଛରେ AI ?

କେମ୍ବ୍ରିଜ୍ ବିଶ୍ଵବିଦ୍ୟାଳୟର ଅଧ୍ୟୟନକାରୀ ବିଗତ ୨୦ ବର୍ଷର ତାପମାତ୍ରାକୁ ନେଇ ଗବେଷଣା କରିଛନ୍ତି । ଗ୍ରାମାଞ୍ଚଳ ସହ AI ଡାଟା ସେଣ୍ଟର ଥିବା ସ୍ଥାନର ତାପମାତ୍ରା ତୁଳନା କରିଛନ୍ତି । AI ଡାଟା ସେଣ୍ଟର ଗୁଡ଼ିକ ୯୩ ହଜାର ସ୍କୋୟାର୍ ବର୍ଗ ମିଟର ଅଞ୍ଚଳରେ ଥିବା ବେଳେ ଏଥିରେ ହଜାର ହଜାର ସର୍ଭର ରହିଛି ।

ଗୋଟିଏ AI ଡାଟା ସେଣ୍ଟର କାର୍ଯ୍ୟକ୍ଷମ ହେବା ପରେ ତାହା ଭୂ-ପୃଷ୍ଠରେ ତାପମାତ୍ରା ବଢ଼ାଏ । ସେହି ଅଞ୍ଚଳରେ ତାପମାତ୍ରା ୨ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ବୃଦ୍ଧି ପାଇଥାଏ । ଅଧିକାଂଶ ମାମଲାରେ ତାପମାତ୍ରା ୯ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ବୃଦ୍ଧି ପାଇପାରେ ବୋଲି ଜଣାପଡ଼ିଛି ।

୧୦ କିମି ପର୍ଯ୍ୟନ୍ତ ଉତ୍ତାପ ପ୍ରଭାବ

ଏହି ଉତ୍ତାପ ବୃଦ୍ଧିକୁ ବୈଜ୍ଞାନିକ ଭାଷାରେ 'ହିଟ୍ ଆଇଲ୍ୟାଣ୍ଡ' କୁହାଯାଉଛି । ଏହା କେବଳ ଚାରିକାନ୍ଥ ମଧ୍ୟରେ ଥିବା ଡାଟା ସେଣ୍ଟରର ଉତ୍ତାପ ବଢ଼ାଏ ତା' ନୁହେଁ । ଡାଟା ସେଣ୍ଟର ଆଖପାଖ ଅଞ୍ଚଳରେ ତାପମାତ୍ରାବଢ଼େ । ଗୋଟିଏ ଡାଟା ସେଣ୍ଟର ଯୋଗୁଁ ୧୦ କିଲୋମିଟର ପରିଧିରେ ତାପମାତ୍ରା ବୃଦ୍ଧି ଘଟିପାରେ ।

ପରିବେଶରୁ ନେଇ ଅର୍ଥନୀତି ଯାଏ ପ୍ରଭାବ

ଏହି ଅଧ୍ୟୟନର ମୁଖ୍ୟ ଆଣ୍ଡେଆ ମାରିନୋନି ଡାଟା ସେଣ୍ଟର ଉତ୍ତାପ ବାବଦରେ ବର୍ଣ୍ଣନା କରିଛନ୍ତି । କହିଛନ୍ତି, "ଡାଟା ସେଣ୍ଟରର ନାଟକୀୟ ପ୍ରଭାବ ସମାଜ ଉପରେ ପଡୁଛି । ପରିବେଶ, ଜନ କଲ୍ୟାଣ ଓ ଅର୍ଥନୀତି ସବୁ କ୍ଷେତ୍ରରେ ପ୍ରଭାବ ରହୁଛି ।"

ଡାଟା ସେଣ୍ଟର ପାଇଁ ଉତ୍ତାପ ବିଶ୍ଵରେ ବୃଦ୍ଧି ପାଉଛି । ମେକ୍ସିକୋର ଡାଟା ସେଣ୍ଟର ହବ୍ ବାଜିଓ ହେଉକି ସ୍ପେନ୍‌ର ଆରାଗନ ସବୁଠି ବଢ଼ିଛି ତାପମାତ୍ରା । ଏସବୁ ସ୍ଥାନରେ ତାପମାତ୍ରା ପ୍ରାୟ ୨ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ବୃଦ୍ଧି ପାଇଛି ।

ଏଥିସହ ପଢ଼ନ୍ତୁ: ଗୁଗଲର Gemini ଓ ChatGPTକୁ ଟକ୍କର ଦେବାକୁ ଆସିଲା AI Sarvam

ଗ୍ରାମାଞ୍ଚଳୁ ସହରରେ ଅଧିକ ପ୍ରଭାବ

ଏହାର ପ୍ରଭାବ ଗ୍ରାମାଞ୍ଚଳ ତୁଳନାରେ ସହରାଞ୍ଚଳରେ ଅଧିକ ରହିବ । କାରଣ ସହରରେ ଅଧିକ କୋଠାଘର ସହ ରାସ୍ତା ରହିଛି । ଯାହାକି ଗାଁ ତୁଳନାରେ ତାପମାତ୍ରା ବୃଦ୍ଧିରେ ସହାୟକ ହେଉଛି । ଏହାଛଡ଼ା ଯାନବାହନ, ଶୀତତାପ ନିୟନ୍ତ୍ରିତ ଯନ୍ତ୍ର ଏବଂ ଶିଳ୍ପ ଯୋଗୁଁ ବଢ଼ୁଛି ତାପମାତ୍ରା ।

ଭାରତ ପାଇଁ କେତେ ବିପଦ ?

ଏବେ ଆମ ଦେଶରେ ମୁମ୍ବାଇ, ଚେନ୍ନାଇ ଏବଂ ହାଇଦ୍ରାବାଦରେ ଡାଟା ସେଣ୍ଟର ସମ୍ପ୍ରସାରଣ ହେଉଛି । AI ଭିତ୍ତିଭୂମି ବଢ଼ିବା ସହ ତାପମାତ୍ରା ବୃଦ୍ଧି ହେବ । ଡାଟା ସେଣ୍ଟର ସମ୍ପ୍ରସାରଣ ହେଉଥିବା ଅଞ୍ଚଳଗୁଡ଼ିକ ପୂର୍ବରୁ ହିଁ ଅସହ୍ୟ ଗ୍ରୀଷ୍ମପ୍ରବାହର ସାମ୍ନା କରୁଛନ୍ତି ।