Jeffrey Sachs World War 3: ବାବା ବେଙ୍ଗାଙ୍କ ପରେ ଏବେ ଆଉ ଜଣେ ଭବିଷ୍ୟବକ୍ତାଙ୍କ ପୂର୍ବାନୁମାନ ଏବେ ବିଶ୍ୱରେ ଚହଳ ପକାଇଛି। ବୁଲଗେରିଆର ଜ୍ୟୋତିଷ ବାବା ବେଙ୍ଗାଙ୍କ ପରେ ଜେଫ୍ରି ସାକ୍ସ ମଧ୍ୟପ୍ରାଚ୍ୟ ଯୁଦ୍ଧକୁ ନେଇ ଯେଉଁ ପୂର୍ବାନୁମାନ କରିଛନ୍ତି ତାହା ବିଶ୍ୱର ହୋସ୍ ଉଡ଼ାଇ ଦେଇଛି। ଗତ ଜାନୁଆରୀରେ ନ୍ୟୁୟର୍କ ପୋଷ୍ଟ ପକ୍ଷରୁ ପ୍ରକାଶିତ ଏକ ରିପୋର୍ଟ ଅନୁଯାୟୀ, ବାବା ବେଙ୍ଗା ଚଳିତ ବର୍ଷ ବିଶ୍ୱ ଯୁଦ୍ଧ ଆରମ୍ଭ ହେବା ଏବଂ ମାନବ ଜାତି ଅଲୌକିକ ପ୍ରାଣୀଙ୍କ ସହ ସାକ୍ଷାତ ହେବା ନେଇ ପୂର୍ବାନୁମାନ କରି ସାରିଛନ୍ତି।

କ'ଣ ଥିଲା ବାବା ବେଙ୍ଗାଙ୍କ ଚେତାବନୀ
ବାବା ବେଙ୍ଗା ଚେତାବନୀ ଦେଇଥିଲେ ଯେ ମାନବଜାତି ବାହ୍ୟଜୀବୀଙ୍କ ସଂସ୍ପର୍ଶରେ ଆସିବ, ଯାହା ସମ୍ଭାବ୍ୟ ଭାବରେ ଏକ ବିଶ୍ୱ ସଙ୍କଟ କିମ୍ବା ବିପର୍ଯ୍ୟୟ ଆଣିପାରେ। ତାଇୱାନ ଉପରେ ଚୀନ୍ ର ନିରନ୍ତର ସାମରିକ ଚାପ, ଇରାନ-ଆମେରିକା ଏବଂ ଋଷିଆ-ୟୁକ୍ରେନ୍ ସଂଘର୍ଷକୁ ଦୃଷ୍ଟିରେ ରଖି, ବାବା ବେଙ୍ଗାଙ୍କ ତୃତୀୟ ବିଶ୍ୱଯୁଦ୍ଧକୁ ନେଇ କରିଥିବା ଭବିଷ୍ୟବାଣୀ ସନ୍ଦେହର ବାହାରେ ରହିଛି। ଯଦିଓ ଚଳିତ ବର୍ଷ ତୃତୀୟ ବିଶ୍ୱଯୁଦ୍ଧ ଆରମ୍ଭ ହେବ ହେଲେ ଏହା ମାନବତାକୁ ବିନାଶ ଆଡ଼କୁ ନେଇଯିବାର ସମ୍ଭାବନା କମ୍ ରହିଛି। ତାଙ୍କର ପୂର୍ବ ଭବିଷ୍ୟବାଣୀରେ କୁହାଯାଇଥିଲା ଯେ ମାନବତାର ପତନ ଗତ ବର୍ଷ ଆରମ୍ଭ ହୋଇଥିଲା ଏବଂ ଦୁନିଆ ଆନୁଷ୍ଠାନିକ ଭାବରେ ୫୦୭୯ ବର୍ଷରେ ଶେଷ ହେବ।

ଜେଫ୍ରି ସାକ୍ସ କିଏ?
ପ୍ରସିଦ୍ଧ ଆମେରିକୀୟ ଅର୍ଥନୀତିଜ୍ଞ ପ୍ରଫେସର ଜେଫ୍ରି ସାକ୍ସ କହିଛନ୍ତି ଯେ ଆମେରିକା ଇରାନ ବିରୋଧରେ ଏହାର ସାମରିକ ଅଭିଯାନକୁ ପୁନର୍ବାର ଆରମ୍ଭ କରିବା ଠିକ ନୁହେଁ। କାରଣ ଏହି ସଂଘର୍ଷ ଅନିୟନ୍ତ୍ରିତ ଭାବରେ ଏକ ବିଶ୍ୱଯୁଦ୍ଧରେ ପରିଣତ ହୋଇପାରେ। ସାମ୍ବାଦିକ ଟକର କାର୍ଲସନଙ୍କୁ ଦେଇଥିବା ଏକ ସାକ୍ଷାତକାରରେ କହିଛନ୍ତି, "ଆମକୁ ସିଧାସଳଖ ବୋମା ମାଡ଼ ଏବଂ ନୂତନ ସାମରିକ କାର୍ଯ୍ୟାନୁଷ୍ଠାନରୁ ଦୂରେଇ ରହିବା ଆବଶ୍ୟକ। ମୋ ମନରେ ରହିଥିବା ଅନ୍ୟ ଏକ ସମ୍ଭାବନା ହେଉଛି ଯେ ଏହି ସଂଘର୍ଷ ଅନିୟନ୍ତ୍ରିତ ଭାବରେ ଏକ ବଡ଼ ଯୁଦ୍ଧରେ ପରିଣତ ହୋଇପାରେ। ଯାହା ଏକ ଆଞ୍ଚଳିକ ଯୁଦ୍ଧ ଏବଂ ପରେ ଏକ ବିଶ୍ୱଯୁଦ୍ଧରେ ପରିଣତ ହେବ।"

କ'ଣ ଚେତାବନୀ ଦେଇଛନ୍ତି ଜେଫ୍ରି ସାକ୍ସ?
ଏହି ଆମେରିକୀୟ ବିଶେଷଜ୍ଞ ଜଣଙ୍କ ଆହୁରି କହିଛନ୍ତି ଯେ ଯଦି ଇରାନ ଉପରେ ଆକ୍ରମଣ ପୁନର୍ବାର ଆରମ୍ଭ ହୁଏ, ତାହେଲେ ତେହେରାନ ଏହାର ପ୍ରତିଶୋଧ ନେବ। ଯାହା ବହୁତ ଶକ୍ତିଶାଳୀ ଏବଂ ଦ୍ରୁତ ଗତିରେ ହେବ। ସେ ଆହୁରି କହିଛନ୍ତି ଫେବୃଆରୀ ୨୮ ତାରିଖରୁ ଏହି ଯୁଦ୍ଧର ଆରମ୍ଭରୁ ଆମେ ସମସ୍ତେ ଜାଣିଛେ ଯେ ସମଗ୍ର ଉପସାଗରୀୟ ଅଞ୍ଚଳ ସମେତ ଇସ୍ରାଏଲ, ଇରାନ କ୍ଷେପଣାସ୍ତ୍ର ଆକ୍ରମଣରେ ଥରହର ହୋଇଉଠିଛି। କ୍ଷେପଣାସ୍ତ୍ର ଆକ୍ରମଣକୁ ରୋକିବାରେ ବାୟୁ ପ୍ରତିରକ୍ଷା ପ୍ରଣାଳୀ ଅନେକ କ୍ଷେତ୍ରରେ ଦୁର୍ବଳ ହୋଇଯିବା ସହ ଏହା ସୀମିତ ଏବଂ ଏପରିକି ଏହାର ଅବନତି ମଧ୍ୟ ହୋଇସାରିଛି। ଉପସାଗରୀୟ ଅଞ୍ଚଳରେ ଅବସ୍ଥିତ ଡିସାଲିନେସନ୍ ପ୍ଲାଣ୍ଟ (ସମୁଦ୍ର ପାଣିକୁ ପାନୀୟ ଜଳରେ ପରିଣତ କରୁଥିବା କାରଖାନା), ତୈଳ ଏବଂ ଗ୍ୟାସ କ୍ଷେତ୍ର ଏବଂ ବନ୍ଦର ଇରାନ ଆକ୍ରମଣରୁ ବ୍ୟବସ୍ଥିତ ଏବଂ ବ୍ୟାପକ ଭାବରେ ସୁରକ୍ଷିତ ନୁହେଁ। ଇରାନ ସ୍ୱାଭାବିକ ଭାବରେ ଟ୍ରମ୍ପଙ୍କ ଦ୍ୱାରା ଦିଆଉଥିବା ଧମକର ପୂର୍ଣ୍ଣ ଜବାବ ଦେବ।

ଋଷିଆ-ୟୁରୋପ ମଧ୍ୟରେ ବଢୁଛି ଶତ୍ରୁତା
ଜେଫ୍ରି ସାକ୍ସଙ୍କ ବକ୍ତବ୍ୟକୁ ଗମ୍ଭୀରତାର ସହିତ ନିଆଯାଇପାରେ। କାରଣ ଟ୍ରମ୍ପଙ୍କ ଆଗମନ ପରେ ଶେଷ ହେବାକୁ ଥିବା ଋଷିଆ-ୟୁକ୍ରେନ ଯୁଦ୍ଧ ଏବେ ପୁଣି ଥରେ ସକ୍ରିୟ ହୋଇପାରେ। ଗତକାଲି ୟୁରୋପୀୟ ସଂଘ ଦ୍ୱାରା ୟୁକ୍ରେନ୍କୁ ଆର୍ଥିକ ଏବଂ ସାମରିକ ଆବଶ୍ୟକତା ପୂରଣ କରିବା ପାଇଁ ଏକ ବିଶାଳ ଋଣ ପ୍ରଦାନକୁ ମଞ୍ଜୁରୀ ଦେଇଛି। ଏହି ଅନୁମୋଦନ ସାଇପ୍ରସ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବୈଠକରେ ନିଆଯାଇଛି। ଯଦିଓ ହଙ୍ଗେରୀ ଏହି ପ୍ରସ୍ତାବ ବିରୋଧ କରି ଏହାର ଭିଟୋ ଅଧିକାର ପ୍ରୟୋଗ କରିଛି। ଗୁରୁବାର ରାଷ୍ଟ୍ରପତି ଭୋଲଡ଼ମିର ଜେଲେନସ୍କି ୟୁକ୍ରେନ ପାଇଁ ୟୁରୋପୀୟ ସଂଘର ୯୦ ବିଲିୟନ ୟୁରୋ (୧୦୫ ବିଲିୟନ ଆମେରିକୀୟ ଡଲାର) ଋଣ ମଞ୍ଜୁରକୁ ସ୍ୱାଗତ କରିଛନ୍ତି। ଏହା ସ୍ପଷ୍ଟ ଯେ ୟୁକ୍ରେନ୍ ଏହି ଟଙ୍କାକୁ ଋଷିଆ ବିରୋଧରେ ବ୍ୟବହାର କରିବ। ଯାହା ଶାନ୍ତିର ଆଶାକୁ ଦୁର୍ବଳ କରିବ। ଋଷିଆ-ଆମେରିକା ଧିରେ ଧିରେ ନିକଟତର ହେଉଥିବା ବେଳେ ୟୁରୋପ-ଆମେରିକା ମଧ୍ୟରେ ଦୂରତା ବଢ଼ିବାରେ ଲାଗିଛି। ଟ୍ରମ୍ପ ନାଟୋ ଛାଡିବା କଥା ମଧ୍ୟ କହୁଛନ୍ତି। ଯାହା ଋଷିଆ-ୟୁରୋପ ମଧ୍ୟରେ ସିଧାସଳଖ ଯୁଦ୍ଧର ବିପଦ ବୃଦ୍ଧି କରୁଛି। ୟୁରୋପ, ଋଷିଆକୁ ଏକ ବିପଦ ଭାବରେ ଚିତ୍ରଣ କରୁଛି।

ଏହା ସହ ପଢନ୍ତୁ: ଆମେରିକା-ଇରାନ ଯୁଦ୍ଧକୁ ନେଇ କ'ଣ ଥିଲା ବାବା ବେଙ୍ଗାଙ୍କ ପୂର୍ବାନୁମାନ?

ଆମେରିକା-ଚୀନ ମଧ୍ୟରେ ବଢୁଛି ବିବାଦ
ଯେତେବେଳେ ଆମେରିକା-ଚୀନ୍ ଶୀତଳ ଯୁଦ୍ଧ ଜାରି ରହିଛି। ଆମେରିକା ପ୍ରତିନିଧି ସଭା କମିଟି ଉନ୍ନତ ସେମିକଣ୍ଡକ୍ଟର ପ୍ରଯୁକ୍ତିବିଦ୍ୟାରେ ଚୀନର ପ୍ରବେଶକୁ ସୀମିତ କରିବା ପାଇଁ ଲକ୍ଷ୍ୟ ରଖି କୋଡ଼ିଏଟି ନୂତନ ରପ୍ତାନି ନିୟନ୍ତ୍ରଣ ପଦକ୍ଷେପକୁ ମଞ୍ଜୁର କରିଛି। ରିପୋର୍ଟ ଅନୁସାରେ ଆମେରିକା ପ୍ରତିନିଧି ସଭାର ବୈଦେଶିକ ବ୍ୟାପାର କମିଟି ପର୍ଯ୍ୟାୟକ୍ରମେ ଗୃହରେ ଏହି ପ୍ରସ୍ତାବ ଉପରେ ଅଧିକ ଆଲୋଚନା କରିବାକୁ ଯାଉଛି। ଏହି ପଦକ୍ଷେପ ଅଧିନରେ ରିପବ୍ଲିକାନ୍ ପ୍ରତିନିଧି ମାଇକେଲ୍ ବାଉମଗାର୍ଟନରଙ୍କ ଦ୍ୱାରା ପ୍ରବର୍ତ୍ତିତ ପ୍ରସ୍ତାବିତ MATCH ଆଇନ ଅନ୍ତର୍ଭୁକ୍ତ। ଯାହା ଚୀନ୍‌କୁ ଉନ୍ନତ ସେମିକଣ୍ଡକ୍ଟର ଉତ୍ପାଦନ ଉପକରଣ ରପ୍ତାନି ଉପରେ ୱାଶିଂଟନର କଟକଣା ସହିତ ଆମେରିକାର ସହଯୋଗୀଙ୍କୁ ଅଧିକ ଘନିଷ୍ଠ ଭାବରେ ସମନ୍ୱିତ କରିବା ଲକ୍ଷ୍ୟ ରଖିଛି।

ବାଉମଗାର୍ଟନରଙ୍କ କହିବା ଅନୁଯାୟୀ ଚୀନ୍‌ ସ୍ପଷ୍ଟ କରିଛି ଯେ ସେ ଆମେରିକାର ଅର୍ଥନୀତି ଏବଂ ଏହାର ଜାତୀୟ ପ୍ରତିରକ୍ଷା ଉଭୟକୁ ଆଧାର କରୁଥିବା ପ୍ରଯୁକ୍ତିବିଦ୍ୟା ଉପରେ ପ୍ରାଧାନ୍ୟ ବିସ୍ତାର କରିବାକୁ ଚାହୁଁଛି। ଯଦି ଚୀନ୍‌-ଆମେରିକା ଶତ୍ରୁତା ବୃଦ୍ଧି ପାଇବାକୁ ଲାଗେ, ତାହେଲେ ତାଇୱାନ ପ୍ରସଙ୍ଗ ଆହୁରି ଗୁରୁତ୍ୱପୂର୍ଣ୍ଣ ହୋଇପାରେ।