Bakrid 2026 / ଆସୁଛି ବକ୍ରି ଇଦ୍; ଟ୍ରମ୍ପଙ୍କ ପାଇଁ ଏଇଠି ଛେଳି ମହଙ୍ଗା

ଇଦ୍-ଉଲ୍-ଅଜହା ବା ବକ୍ରି ଇଦ୍ ପୂର୍ବରୁ ନାଇଜେରିଆରେ ଛେଳି ଓ ମେଣ୍ଢା ବଜାରରେ ଚିନ୍ତା ଦେଖାଦେଇଛି । ଆର୍ଥିକ ସଙ୍କଟ, ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ପେଟ୍ରୋଲ ଦର ବୃଦ୍ଧି ଓ ଆତଙ୍କବାଦୀ ଆକ୍ରମଣର ଭୟ ଯୋଗୁଁ ସ୍ଥିତି ମୁସ୍କିଲ ହୋଇପଡ଼ିଛି । ନାଇଜେରିଆର ବଜାରରେ ହଜାରରୁ ଅଧିକ ମେଣ୍ଢା ଅଛନ୍ତି, କିନ୍ତୁ କିଣିବା ଲାଗି କେହି ନାହାନ୍ତି । ବକ୍ରି ଇଦର ବଳି ପ୍ରଥା ଲାଗି ପଶୁଙ୍କୁ କିଣିବା ଏବେ ମଧ୍ୟବିତ୍ତ ପରିବାର ଲାଗି ମୁସ୍କିଲ ହୋଇପଡ଼ିଛି । କିଛି ଲୋକ ବକ୍ରି ଇଦରେ ଘରକୁ ଆସୁନଥିବାବେଳେ ଯାତ୍ରା ଓ ପଶୁ ଉଭୟ ମହଙ୍ଗା ହୋଇଛି ।

• କେମିତି ଅଛି ନାଇଜେରିଆ ସ୍ଥିତି ?

ନାଇଜେରିଆ ଜନସଂଖ୍ୟାର ପ୍ରାୟ ଅଧାରୁ ଅଧିକ ହେଉଛନ୍ତି ମୁସଲିମ । ଏଣୁ ଏଠାରେ ବକ୍ରି ଇଦ୍ ବେଶ ଧୁମଧାମର ସହ ପାଳନ କରାଯାଏ । କିନ୍ତୁ ଏଥର ମହଙ୍ଗା ମାଡ଼ ଯୋଗୁଁ ବଳି ପ୍ରଥା ଲାଗି ପଶୁଙ୍କୁ କିଣିବାରେ ଅକ୍ଷମ ହୋଇପଡ଼ିଛନ୍ତି ଲୋକେ । ଦକ୍ଷିଣ-ପଶ୍ଚିମ ନାଇଜେରିଆର ଲାଗୋସ-ଓଗୁନ ନିକଟରେ ଥିବା ବଡ଼ ପଶୁ ବଜାରରେ ଅନେକ ଛେଳି, ମେଣ୍ଢା ବିକ୍ରି ପାଇଁ ଠିଆ ହୋଇଥିଲେ, କିନ୍ତୁ କ୍ରେତାଙ୍କ ଅଭାବ ବ୍ୟବସାୟୀଙ୍କୁ ଚିନ୍ତିତ କରିଥିଲା । ଏହି ବଜାରକୁ ଉତ୍ତର ନାଇଜେରିଆରୁ ହଜାର ହଜାର ପଶୁ ବିକ୍ରି ଲାଗି ଆସନ୍ତି । ପ୍ରତିବର୍ଷ ଏହି ଦେଶରେ ବକ୍ରି ଇଦ୍ ସମୟରେ ପଶୁଙ୍କ ଚାହିଦା ବଢିଥାଏ, କିନ୍ତୁ ଏଥର ପରିସ୍ଥିତି ସମ୍ପୂର୍ଣ୍ଣ ଭିନ୍ନ ହୋଇପଡ଼ିଛି ।

• ଚିନ୍ତାରେ ପଶୁ ବ୍ୟବସାୟୀ

ଏହି ବଜାରକୁ ଆସୁଥିବା ବ୍ୟବସାୟୀମାନେ କହିଛନ୍ତି ଯେ ପଶୁଙ୍କ ଦାମ ବୃଦ୍ଧି ପାଇଛି । ବକ୍ରି ଇଦରେ ସବୁଠୁ ପସନ୍ଦ ପଶୁ ମେଣ୍ଢାର ଦାମ ୨ ଲକ୍ଷ ୫୦ ହଜାର ନାୟରାରୁ ୧୨ ଲକ୍ଷ ନାୟରା (ଭାରତୀୟ ମୁଦ୍ରାରେ ପ୍ରାୟ ୧୮ ହଜାରରୁ ୮୪ ହଜାର ଟଙ୍କା)ରେ ପହଞ୍ଚିଛି । ଏହାସହିତ ମେଣ୍ଢାର ଦାମ ନିର୍ଦ୍ଦିଷ୍ଟ ପଶୁର ଓଜନ ଓ ଆକାର ଉପରେ ନିର୍ଭର କରେ । ବ୍ୟବସାୟୀ ଅବଦୁଲ୍ଲା ବୁକାର କହିଛନ୍ତି ଯେ ଗତବର୍ଷ ଏହି ପଶୁ ୯ ହଜାର ଟଙ୍କାରୁ ବିକ୍ରି ହୋଇଥିଲା । ମାତ୍ର ଏବେ ବିଭିନ୍ନ ପ୍ରକାରର ଟ୍ୟାକ୍ସ, ସୁରକ୍ଷାକର୍ମୀଙ୍କ ବେଆଇନ ହଡ଼ପ ଯୋଗୁଁ ମୂଲ୍ୟ ବେଶ ବୃଦ୍ଧି ପାଇଛି ।

ପଢନ୍ତୁ ଏହି ଖବର: ଉଡ଼ିଲା ମିସାଇଲ୍ ଲଞ୍ଚ ସାଇଟ୍; ପୁଣି ଇରାନ ଉପରେ ଆମେରିକାର ଆକ୍ରମଣ

• ଟ୍ରମ୍ପଙ୍କ ପାଇଁ କାହିଁକି ବଢିଲା ଦାମ ?

ଅନେକ ବ୍ୟବସାୟୀ ପ୍ରାୟ ୧୦୦୦ କିଲୋମିଟର ଦୂରରୁ ଏହି ବଜାରକୁ ପଶୁ ବିକ୍ରି ପାଇଁ ଆସିଥାନ୍ତି । ବକ୍ରି ଇଦ୍ ସମୟରେ ପଶୁଙ୍କ ଚାହିଦା ବଢୁଥିବାରୁ ବ୍ୟବସାୟୀମାନେ ଏତେ ଦୂରରୁ ଆସିଥାନ୍ତି । ଏବେ ଆମେରିକା ଓ ଇରାନ ଯୁଦ୍ଧ ଯୋଗୁଁ ପଶୁଙ୍କୁ ନେଇ ବଜାରକୁ ଆସିବା ଖର୍ଚ୍ଚ ଦ୍ଵିଗୁଣିତ ହୋଇଛି । ସାଧାରଣତଃ ବକ୍ରି ଇଦ୍ ସମୟରେ ପଶୁଙ୍କ ମୂଲ୍ୟ ବଢିଥାଏ, କିନ୍ତୁ ଏଥର ଯୁଦ୍ଧ ଯୋଗୁଁ ପଶୁଙ୍କ ମୂଲ୍ୟ ଅପ୍ରତ୍ୟାଶିତ ଭାବେ ବୃଦ୍ଧି ପାଇଛି ।