ଯୁଦ୍ଧ ଯୋଗୁଁ ଗୋଟିଏ ପଟେ ପୂରା ବିଶ୍ଵ ମହଙ୍ଗା ମାଡ଼ରେ ଅସ୍ତବ୍ୟସ୍ତ ହେଉଥିବାବେଳେ ଏପଟେ ଯୁଦ୍ଧ ଥମିବାର ନାଁ ନେଉନି । ପୁଣି ଇରାନ ଉପରେ ଆକ୍ରମଣ କରିଛି ଆମେରିକା । ଉଭୟ ରାଷ୍ଟ୍ର ମଧ୍ୟରେ ଅସ୍ତ୍ରବିରତି ଲାଗୁ ଥିବାବେଳେ ଆମେରିକା ଆତ୍ମରକ୍ଷା ପାଇଁ ଆକ୍ରମଣ କରିଥିବା କହିଛି । ଏହି ତାଜା ଆକ୍ରମଣରେ ଇରାନର ମିସାଇଲ୍ ଲଞ୍ଚ କରାଯାଉଥିବା ସ୍ଥାନ ଓ ବାରୁଦ ସୁଡଙ୍ଗ ଉପରେ ଏୟାର ଷ୍ଟ୍ରାଇକ୍ କରିଛି । ବାରୁଦ ସୁଡ଼ଙ୍ଗ ହେଉଛି ଏକ ଲୁକ୍କାୟିତ ବିସ୍ଫୋରକ, ଯାହାକୁ ମାଟି ତଳେ ରଖାଯାଇଥାଏ । ଏହାଉପରେ ଶତ୍ରୁ ପକ୍ଷର କୌଣସି ଯାନ ଗଲେ ଏହା ପ୍ରଚଣ୍ଡ ଶବ୍ଦରେ ବିସ୍ଫୋରଣ ହୋଇଥାଏ ।

ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ସାରା ବିଶ୍ଵରେ ମହଙ୍ଗା ମାଡ଼ ହୋଇଛି । ଏଣୁ ଦୁଇ ଦେଶ ମଧ୍ୟରେ ଯୁଦ୍ଧ ରୋକିବା ଲାଗି ଅସ୍ତ୍ରବିରତି ଉପରେ ଆଲୋଚନା ହେଉଥିଲା । କିନ୍ତୁ ଆମେରିକା ଇରାନ ଉପରେ 'ସେଲ୍ପ-ଡିଫେନ୍ସ ଷ୍ଟ୍ରାଇକ୍' ବା ଆତ୍ମରକ୍ଷା ନାମ ଦେଇ ଆକ୍ରମଣ କରିଛି । ଏହି ଆକ୍ରମଣ ପରେ ଏବେ ଆହୁରି ଯୁଦ୍ଧ ଘନେଇବ ବୋଲି ଆଶଙ୍କା କରାଯାଉଛି । ଆମେରିକାର କହିବା କଥା ଯେ, ସୈନ୍ୟଙ୍କ ସୁରକ୍ଷା ଉଦ୍ଦେଶ୍ୟରେ ସେ ଏହି ଆକ୍ରମଣ କରିଛି । ସେପଟେ ଇରାନର ଦ୍ଵୀପ ସହର ବନ୍ଦର ଅବ୍ବାସ ନିକଟରେ ବିସ୍ଫୋରଣର ଶବ୍ଦ ଶୁଭିଛି, ଏହାପରେ ଇରାନର ବାୟୁସେନା ସେଠାରେ ସକ୍ରିୟ ହୋଇଛି ।

• ଆମେରିକା କଣ କହିଲା ?

ଆମେରିକୀୟ ସେନା ସୋମବାର ଇରାନର ମିସାଇଲ ଲଞ୍ଚ ସାଇଟ୍ସ ଓ ହର୍ମୁଜ ପ୍ରଣାଳୀ ନିକଟରେ ଥିବା ଡଙ୍ଗା ଉପରେ ଆକ୍ରମଣ କରିଥିଲା । ଏନେଇ ନିଜେ ଆମେରିକାର ସେଣ୍ଟ୍ରାଲ କମାଣ୍ଡ ପକ୍ଷରୁ ଦିଆଯାଇଛି । ରିପୋର୍ଟରେ କୁହାଯାଇଛି ଯେ ଆମେରିକୀୟ ସେନାଙ୍କୁ ଇରାନ ବଳ ପକ୍ଷରୁ କୌଣସି ବି ବିପଦରୁ ରକ୍ଷା କରିବା ଲାଗି ଏହି ଆକ୍ରମଣ ହୋଇଛି । ଯୁଦ୍ଧବିରତି ସତ୍ତ୍ଵେ ଆମେରିକା ନିଜ ସୈନ୍ୟଙ୍କ ସୁରକ୍ଷା ଲାଗି ସବୁକିଛି କରିବ ବୋଲି ଆମେରିକୀୟ ସେଣ୍ଟ୍ରାଲ କମାଣ୍ଡ ପକ୍ଷରୁ କୁହାଯାଇଛି।

ପଢନ୍ତୁ ଏହି ଖବର: 'ଭାରତ ଯାହା ଚାହିଁବ, ତାକୁ ସେୟା ମିଳିବ', ମୋଦିଙ୍କ ପ୍ରଶଂସାରେ ଟ୍ରମ୍ପ

ଯୁଦ୍ଧବିରତି ସତ୍ତ୍ଵେ ମେ ମାସ ଆରମ୍ଭରୁ ଆମେରିକା ଓ ଇରାନ ମଧ୍ୟରେ ବିବାଦ ଦେଖାଦେଇଥିଲା । ସେତେବେଳେ ଆମେରିକା ସେନା ଇରାନ ସାମରିକ ପ୍ରତିଷ୍ଠାନଗୁଡ଼ିକୁ ଟାର୍ଗେଟ କରିଥିଲା, ​​ଯାହା ଉପରେ ହର୍ମୁଜ ପ୍ରଣାଳୀ ଦେଇ ଗତି କରୁଥିବା ଆମେରିକୀୟ ଯୁଦ୍ଧଜାହାଜ ଉପରେ କ୍ଷେପଣାସ୍ତ୍ର, ଡ୍ରୋନ୍ ଏବଂ ଛୋଟ ଡଙ୍ଗା ଆକ୍ରମଣ କରିବାର ଅଭିଯୋଗ ହୋଇଥିଲା ।

• ଆକ୍ରମଣ ନେଇ ସ୍ପଷ୍ଟ କଲା ଇରାନ

ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (IRGC) ସ୍ପଷ୍ଟ କରିଛି ଯେ ଇରାନର ବନ୍ଦର ଅବ୍ବାସ ଏୟାରପୋର୍ଟ ନିକଟରେ ବିସ୍ଫୋରଣର ଶବ୍ଦ ଶୁଭିଛି । ଏହାପରେ ଇରାନର ଏୟାର ଡିଫେନ୍ସ ସିଷ୍ଟମକୁ ଶତ୍ରୁଙ୍କ ମୁକାବିଲା କରିବା ଲାଗି ସକ୍ରିୟ କରାଯାଇଛି । ସେହିପରି ଇରାନର ସରକାରୀ ସମାଚାର ଏଜେନ୍ସି ମଧ୍ୟ ବିଳମ୍ବିତ ରାତିରେ ବନ୍ଦର ଅବ୍ବାସ ନିକଟରେ ଏକାଧିକ ବିସ୍ଫୋରଣର ଶବ୍ଦ ଶୁଭିଛି । ଏଠାରେ କହିରଖୁଛୁ କି, ବନ୍ଦର ଅବ୍ବାସ ହେଉଛି ଇରାନର ଦକ୍ଷିଣରେ ସ୍ଥିତ ଏକ ସହର, ଯେଉଁଠି ଇରାନର ଗୁରୁତ୍ଵପୂର୍ଣ୍ଣ ନୌସେନା ଓ ବାୟୁସେନା କ୍ୟାମ୍ପ ଅଛି । ବନ୍ଦର ଅବ୍ବାସ ରଣନୈତିକ ଦୃଷ୍ଟିରୁ ହର୍ମୁଜ ପ୍ରଣାଳୀ ନିକଟରେ ଅଛି ।