ଆମେରିକା ଓ ଇସ୍ରାଏଲ ମଧ୍ୟରେ ପାକିସ୍ତାନ ଶତ୍ରୁତା ସୃଷ୍ଟି କରିବାକୁ ଚାହୁଁଛି । ଏପରିକି ମିଛ ଖବର ପ୍ରଚାର କରିବାକୁ ପଛାଇନାହିଁ । ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ପାକିସ୍ତାନ ବିରୋଧରେ ଏହି ଅଭିଯୋଗ ଆଣିଛନ୍ତି । ପାକିସ୍ତାନୀ ମିଡିଆ ମିଛ କଥା କହି ଇସ୍ରାଏଲକୁ ବଦନାମ କରୁଛି । ଗୋଟିଏ ପରେ ପାକିସ୍ତାନ ଉପରେ ନେତାନ୍ୟାହୁ ବର୍ଷିଥିବାବେଳେ ଅନ୍ୟପଟେ ଭାରତକୁ ପ୍ରଶଂସା କରିଛନ୍ତି । ଭାରତରେ ଇସ୍ରାଏଲ ନାଗରିକଙ୍କୁ ବହୁତ ସମ୍ମାନ ମିଳେ । ଏହାସହିତ ସେ ନିଜ ପତ୍ନୀଙ୍କ ସହିତ ଭାରତ ଯାତ୍ରାକୁ କୌଣସି ଉତ୍ସବଠାରୁ କମ ନୁହେଁ ବୋଲି କହିଛନ୍ତି ।

ଏକ ଅନ୍ତର୍ଜାତୀୟ ଗଣମାଧ୍ୟମ ସଂସ୍ଥାକୁ ସାକ୍ଷାତକାର ଦେଇ ଇସ୍ରାଏଲ ପ୍ରଧାନମନ୍ତ୍ରୀ କହିଛନ୍ତି, "ପାକିସ୍ତାନ ନକଲି ଆକାଉଣ୍ଟ ଖୋଲି ଏପରି ମିଛ ଖବର ପ୍ରସାରିତ କରୁଛି । ଏହାର ଉଦ୍ଦେଶ୍ୟ ହେଉଛି ଆମେରିକା ଓ ଇସ୍ରାଏଲ ମଧ୍ୟରେ ସୁସମ୍ପର୍କକୁ ଦୁର୍ବଳ କରିବା ।" ପାକିସ୍ତାନର ଏହି କାର୍ଯ୍ୟକଳାପକୁ ଦେଶ ବିରୋଧରେ ଏକ ଗୁପ୍ତ ଡିଜିଟାଲ ଯୁଦ୍ଧ ବୋଲି କହିଛନ୍ତି ନେତାନ୍ୟାହୁ । ନେତାନ୍ୟାହୁ ଆହୁରି କହିଛନ୍ତି ଯେ ପାକିସ୍ତାନ ନକଲି ଆକାଉଣ୍ଟ ଜରିଆରେ ଇସ୍ରାଏଲ ବିରୋଧୀ ଅନେକ ମିଛ ଖବର ପ୍ରଚାର କରୁଛି । ଯାହାକୁ ବରଦାସ୍ତ କରାଯିବ ନାହିଁ ।

• ପାକିସ୍ତାନ-ଇସ୍ରାଏଲର ସମ୍ପର୍କ କିପରି ?

ଅନେକ ସମୟରୁ ପାକିସ୍ତାନ ଓ ଇସ୍ରାଏଲ ସମ୍ପର୍କରେ ତିକ୍ତତା ଦେଖିବାକୁ ମିଳିଛି । ଗାଜା ଓ ଇରାନ ଉପରେ ଇସ୍ରାଏଲର ଆକ୍ରମଣକୁ ପାକିସ୍ତାନ କଡ଼ା ନିନ୍ଦା କରିଛି । ଅନ୍ୟପଟେ ପାକିସ୍ତାନ ସେନାଠାରୁ ବିପଦ ଥିବା ବାରମ୍ଵାର ଇସ୍ରାଏଲ ଅଭିଯୋଗ କରିଛି । ମଧ୍ୟପ୍ରାଚ୍ୟରେ ଜାରି ରହିଥିବା ଯୁଦ୍ଧକୁ ବନ୍ଦ କରିବା ଲାଗି ପାକିସ୍ତାନ ମଧ୍ୟସ୍ଥତା କରୁଛି, କିନ୍ତୁ ମଧ୍ୟସ୍ଥତା ବଦଳରେ ଇସ୍ରାଏଲ ଓ ଆମେରିକା ମଧ୍ୟରେ ନାରଦ ସାଜିଥିବା ନେତାନ୍ୟାହୁ କହିଛନ୍ତି ।

• ଭାରତକୁ ପ୍ରଶଂସା କଲେ ନେତାନ୍ୟାହୁ

ବେଞ୍ଜାମିନ ନେତାନ୍ୟାହୁ ଏହି ଇଣ୍ଟରଭ୍ୟୁରେ ଭାରତର ଖୁବ ପ୍ରଶଂସା କରିଛନ୍ତି ଏବଂ ଭାରତ ଓ ଇସ୍ରାଏଲର ସମ୍ପର୍କକୁ ସ୍ଵତନ୍ତ୍ର ବୋଲି କହିଛନ୍ତି । ପତ୍ନୀଙ୍କ ସହିତ ଯେତେବେଳେ ସେ ଭାରତ ଗସ୍ତ କରିଥିଲେ, ଏହା 'ପ୍ରେମର ଉତ୍ସବ' ଥିଲା । ଭାରତରେ ଇସ୍ରାଏଲର ଲୋକଙ୍କୁ ଶ୍ରଦ୍ଧା ଓ ସମ୍ମାନ କରନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯେତେବେଳେ ଇସ୍ରାଏଲ ଗସ୍ତ କରିଥିଲେ, ସେତେବେଳେ ସେ ମଧ୍ୟ ତାଙ୍କୁ ବେଶ ଶ୍ରଦ୍ଧାର ସହିତ ସ୍ଵାଗତ କରିଥିଲେ ବୋଲି କହିଥିଲେ ।

ପଢନ୍ତୁ ଏହି ଖବର: ଉତ୍ତର କୋରିଆର ନୂଆ ସମ୍ଵିଧାନ; ସେନା କରିବ ଅଟୋମେଟିକ୍ ପରମାଣୁ ଆକ୍ରମଣ, ଯଦି...

• ଇରାନ ଉପରେ ଆକ୍ରମଣ ପଛର କାରଣ କହିଲେ

ଇରାନ ସହିତ ଯୁଦ୍ଧ ସମ୍ପର୍କରେ ନେତାନ୍ୟାହୁ ଏକ ବଡ଼ ଖୁଲାସା କରିଛନ୍ତି । ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଦାବି କରିଛନ୍ତି ଯେ ଯଦି ଇସ୍ରାଏଲ ଓ ଆମେରିକା ଫେବୃଆରୀ ୨୮ ତାରିଖରେ ଇରାନ ଉପରେ ଆକ୍ରମଣ କରିନଥାନ୍ତା, ତେବେ ଆଗାମୀ ୧ରୁ ୨ ମାସ ମଧ୍ୟରେ ଇରାନ ପରମାଣୁ ବୋମା ତିଆରି କରିବାରେ ସଫଳ ହୋଇଥାନ୍ତା । ଇରାନ ଦୀର୍ଘ ଦିନ ଧରି ପରମାଣୁ ବୋମା, ଅସ୍ତ୍ରଶସ୍ତ୍ର ଓ ବହୁ ଦୂରକୁ ଲକ୍ଷ୍ୟଭେଦ କରିପାରୁଥିବା ମିସାଇଲ ତିଆରି କରିବାକୁ ଉଦ୍ୟମ କରୁଛି । ଏହାସହିତ ଇରାନର ନୂଆ ସୁପ୍ରିମଲିଡର ମୋଜତବା ଖାମେନେଇ ଜୀବିତ ଓ ସେ ସରକାର ସମ୍ଭାଳିବା ଲାଗି କୌଣସି ଏକ ଗୁପ୍ତ ସ୍ଥାନରେ ଅଛନ୍ତି । କିନ୍ତୁ ତାଙ୍କର ନେତୃତ୍ଵ ପିତା ଅଲ୍ଲୀ ଆୟୋତୋଲ୍ଲାହ ଖାମେନେଇଙ୍କ ପରି ମଜଭୁତ ନୁହଁ ବୋଲି ନେତାନ୍ୟାହୁ କହିଛନ୍ତି ।