ଏକଛତ୍ରବାଦୀ ଶାସନ କରୁଥିବା ଉତ୍ତର କୋରିଆ ନିଜର ସମ୍ବିଧାନରେ ଏକ ବଡ଼ ପରିବର୍ତ୍ତନ କରିଛି । ବିଶ୍ୱର ସବୁଠାରୁ କଠୋର ଏକଛତ୍ରବାଦୀ ଶାସକ ତଥା ଉତ୍ତର କୋରିଆର ସର୍ବୋଚ୍ଚ ନେତା କିମ୍ ଜୋଙ୍ଗ ଉନଙ୍କୁ ଯଦି ହତ୍ୟା ହୁଏ ବା କୌଣସି ବିଦେଶୀ ଆକ୍ରମଣରେ ଦେଶର କମାଣ୍ଡ ବ୍ୟବସ୍ଥା ଭୁଶୁଡ଼ି ପଡ଼େ, ତେବେ ସେନା ବିନା କୌଣସି ନିର୍ଦ୍ଦେଶର ଅପେକ୍ଷାରେ ଅଟୋମେଟିକ୍ ପରମାଣୁ ଅସ୍ତ୍ରଶସ୍ତ୍ରରେ ଜବାବ ଦେବ । ଦକ୍ଷିଣ କୋରିଆର ଗୁପ୍ତଚର ସଂସ୍ଥା ପକ୍ଷରୁ ଏ ସମ୍ପର୍କରେ ସୂଚନା ମିଳିଛି । ଇରାନ ଉପରେ ଆମେରିକା ଓ ଇସ୍ରାଏଲ ଆକ୍ରମଣ ଏବଂ ଇରାନର ସର୍ବୋଚ୍ଚ ନେତା ଆୟତୁଲ୍ଲାହ ଖାମେନେଇଙ୍କ ମୃତ୍ୟୁ ପରେ ଏହି ନିୟମ ଆଣିଛନ୍ତି କିମ୍ ଜୋଙ୍ଗ ଉନ୍ ।

• ନୂଆ ସମ୍ବିଧାନରେ କଣ ନିୟମ ?

ଉତ୍ତର କୋରିଆର ୧୫ତମ ସୁପ୍ରିମ ପିପୁଲ୍ସ ଆସମ୍ଵେଲିର ବୈଠକ ଗତ ମାର୍ଚ୍ଚ ୨୨ ତାରିଖରେ ପ୍ୟୋଙ୍ଗୟାଙ୍ଗଠାରେ ଅନୁଷ୍ଠିତ ହୋଇଥିଲା । ଏଠାରେ ଏହି ସଂଶୋଧନ ପାରିତ ହୋଇଛି । ନ୍ୟାସନାଲ ଇଣ୍ଟେଲିଜେନ୍ସ ସର୍ଭିସ (NIS)ର ବରିଷ୍ଠ ଅଧିକାରୀ କହିଥିଲେ ଯେ ଏବେ ନ୍ୟୁକ୍ଲିୟାର ଫୋର୍ସ ଉପରେ ନିୟନ୍ତ୍ରଣ ଯଦି ଶତ୍ରୁ ପକ୍ଷ ଆକ୍ରମଣ ପରେ ବିପଦରେ ପଡ଼େ, ତେବେ ସ୍ଵୟଂଚାଳିତ ଏବଂ ତୁରନ୍ତ ପରମାଣୁ ଆକ୍ରମଣ କରାଯିବ ।

ନୂଆ ନିୟମ ଅନୁସାରେ, କିମ ଜୋଙ୍ଗ ଉନଙ୍କ କମାଣ୍ଡ ସିଷ୍ଟମକୁ ବିପଦ ଆସିଲେ, କୌଣସି ନିର୍ଦ୍ଦେଶର ଅପେକ୍ଷା କରାଯିବ ନାହିଁ । ପରମାଣୁ ଅସ୍ତ୍ରଶସ୍ତ୍ରର ବ୍ୟବହାର ତୁରନ୍ତ କରାଯିବ । ପୂର୍ବରୁ ଉତ୍ତର କୋରିଆରେ ଏହି ନିୟମ ଥିଲା, କିନ୍ତୁ ଏବେ ଇରାନ ଆକ୍ରମଣ ପରେ ଏହାକୁ ସମ୍ବିଧାନରେ ଲିଖିତ ରୂପରେ ଅଣାଯାଇଛି ।

• ଇରାନ ଆକ୍ରମଣ ପରେ ଭୟଭୀତ କିମ୍ ଜୋଙ୍ଗ

ଆମେରିକା ଓ ଇସ୍ରାଏଲ ମିଳିତ ଭାବରେ ଇରାନ ଉପରେ ଆକ୍ରମଣ କରିବା ପରେ ଉତ୍ତର କୋରିଆ ଭୟଭୀତ ଅବସ୍ଥାରେ ଅଛି । ଆମେରିକା ଓ ଇସ୍ରାଏଲ ଯେଉଁଭଳି ଭାବରେ ଇରାନର ନେତୃତ୍ଵକୁ ଟାର୍ଗେଟ୍ କରିଥିଲା, ତାହାକୁ ଦେଖି ଏକଛତ୍ର ଶାସନ କରୁଥିବା କିମ୍ ଜୋଙ୍ଗ ଉନ ଡରିଯାଇଛନ୍ତି । ପ୍ରଫେସର ଆନ୍ଦ୍ରେଇ ଲେକାୱ କହିଛନ୍ତି ଯେ ଇରାନ ଘଟଣା ଉତ୍ତର କୋରିଆ ଲାଗି ବ୍ୟାକ୍-ଅପ୍ କଲ୍ ସାବ୍ୟସ୍ତ ହୋଇଛି । ଉତ୍ତର କୋରିଆ ଏବେ ଏହି ସ୍ଥିତିରୁ ବର୍ତ୍ତିବା ପାଇଁ ଚାହୁଁଛି । ଯଦି କିମ କିମ୍ବା ତାଙ୍କ କମାଣ୍ଡ ଟିମଙ୍କ ହତ୍ୟା ହେଉଛି, ତେବେ ଦେଶର ପରମାଣୁ ଜବାବ ଆପେ ଆପେ ଆକ୍ଟିଭ୍ ହୋଇଯିବ ।

ପଢନ୍ତୁ ଏହି ଖବର: ରେକର୍ଡ ମତରେ ବିଜୟୀ ହେଲେ କିମ୍; କିଏ ପାଇଲେ ବାକି ୦.୦୭% ଭୋଟ?

• କେତେ ମୁସ୍କିଲ କିମଙ୍କ ହତ୍ୟା ?

କିମ୍ ଜୋଙ୍ଗ ଉନ୍ ନିଜ ସୁରକ୍ଷାକୁ ନେଇ ବେଶ ସତର୍କ । ସେ ସବୁବେଳେ କଡ଼ା ସୁରକ୍ଷା ବଳୟ ଭିତରେ ରୁହନ୍ତି । ଏଥିଲାଗି ସେ ବିମାନ ଯାତ୍ରା କରନ୍ତି ନାହିଁ, ଅଧିକାଂଶ ଟ୍ରେନରେ ଯାତ୍ରା କରନ୍ତି । ଏପରିକି ସେ ଉତ୍ତର କୋରିଆର ସୀମାକୁ ବି ସମ୍ପୂର୍ଣ୍ଣ ଭାବେ ବନ୍ଦ ରଖିଛନ୍ତି । ସେଠାକୁ ବିଦେଶୀ ବହୁତ କମ ଯାତ୍ରା କରନ୍ତି ଏବଂ ବିଦେଶୀଙ୍କ ଉପରେ ସୁରକ୍ଷାକର୍ମୀଙ୍କ କଡ଼ା ନଜର ରହିଥାଏ । ଇରାନରେ ଇସ୍ରାଏଲର ଗୁପ୍ତଚରମାନେ ଟ୍ରାଫିକ୍ କ୍ୟାମେରାକୁ ହ୍ୟାକ୍ କରି ଖାମେନେଇଙ୍କ ଲୋକେସେନ ସମ୍ପର୍କରେ ଜାଣିଥିଲେ, ଏଥିଲାଗି ପ୍ୟୋଙ୍ଗୟାଙ୍ଗରେ ସିସିଟିଭି ଓ ଇଣ୍ଟରନେଟର ବ୍ୟବସ୍ଥା ବି ସୀମିତ । ଏଥିଲାଗି କୌଣସି ଶତ୍ରୁ ପକ୍ଷ ସେଠାରେ ଏପରି କୌଣସି ତଥ୍ୟ ସଂଗ୍ରହ କରିବା କାଠିକର ପାଠ । ତଥାପି ଉତ୍ତର କୋରିଆ ସାଟେଲାଇଟ୍ ଟେକ୍ନୋଲୋଜି ଓ ଗୁପ୍ତଚର ଏଜେନ୍ସିକୁ ନେଇ ଚିନ୍ତିତ ।