Port Fire / ହୁତୁହୁତୁ ହୋଇ ଜଳିଗଲା ବନ୍ଦରରେ ଛିଡ଼ା ହୋଇଥିବା କାର୍ଗୋ ଜାହାଜ, ୨୫ ଜଣ ଜୀବନ୍ତ ଦଗ୍ଧ

ନୂଆଦିଲ୍ଲୀ: ବନ୍ଦର ଭିତରେ ଛିଡ଼ା ହୋଇଥିବା ମାଲବାହୀ ଜାହାଜରେ ନିଆଁ ଲାଗିଲା । ଦେଖୁ ଦେଖୁ ଚାଲିଗଲା ୨୫ ଜଣଙ୍କ ଜୀବନ । ଗୁରୁବାର ସକାଳେ ଚୀନର ପୂର୍ବଭାଗରେ ଥିବା କ୍ଵିଙ୍ଗଡାଓ ପୋର୍ଟରେ ଏହି ଅଘଟଣ ଘଟିଛି । ସୂଚନା ଅନୁସାରେ, ମାଲବାହୀ ଜାହାଜଟି ମରାମତି ପାଇଁ ସେଠାରେ ଥିବାବେଳେ ସେଥିରେ ପ୍ରାୟ ୪୨ ଜଣ ଥିଲେ ।

ସୂଚନା ଅନୁସାରେ, ଦିନ ପ୍ରାୟ ୧୧ଟା ୧୫ ମିନିଟ୍ ସମୟରେ ଜାହାଜରେ ହଠାତ୍ ନିଆଁ ଲାଗି ଯାଇଥିଲା । ମଧ୍ୟାହ୍ନ ସାଢ଼େ ୨ଟା ସୁଦ୍ଧା ନିଆଁ ଆୟତ୍ତ ହୋଇଥିବା ଜଣାପଡ଼ିଛି । ଜାହାଜରୁ ୧୨ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ବେଳେ ଅନ୍ୟ ୫ ଜଣଙ୍କୁ ମେଡିକାଲ୍‌ରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।

ଏଥିସହ ପଢ଼ନ୍ତୁ: ପୁଟିନଙ୍କ ପରେ କନଫର୍ମ କଲେ ଜିନପିଙ୍ଗ; BRICSରେ ସାମିଲ୍ ହେବା ପାଇଁ ଭାରତ ଆସିବେ 

ମରାମତି ପାଇଁ ଆସିଥିଲା, ଜଳିଗଲା

ଅଗ୍ନିକାଣ୍ଡକୁ ନେଇ ଚୀନ ରାଷ୍ଟ୍ରପତି ସି ଜିନପିଙ୍ଗ ଦୁଃଖ ପ୍ରକାଶ କରିବା ସହ ଉଦ୍ଧାର ଓ ସର୍ଚ୍ଚ ଅପରେସନ୍ ଲାଗି ନିର୍ଦ୍ଦେଶ ଦେଇଥିଲେ । ଏଥିସହ ବନ୍ଦରରେ ମରାମତି ପାଇଁ ଛିଡ଼ା ହୋଇଥିବା ଜାହାଜରେ କିଭଳି ଓ କେଉଁ ପରିସ୍ଥିତିରେ ଅଗ୍ନିକାଣ୍ଡ ଘଟିଲା ତାର ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ଜିନପିଙ୍ଗ ।

ଚୀନର ସରକାରୀ ମିଡିଆ ସେୟାର୍ କରିଥିବା ଫଟୋ ଅନୁସାରେ, ଜାହାଜରେ ପଶ୍ଚିମ ଆଫ୍ରିକୀୟ ଦେଶ ଲାଇବେରିଆର ପତାକା ରହିଛି । ମାଲବାହୀ ଜାହାଜର ନାଁ ଓସେନ୍ ମେଲୋଡି ବୋଲି ଜଣାପଡ଼ିଛି । ପ୍ରଶାସନ ପକ୍ଷରୁ ଉଦ୍ଧାର ଓ ସର୍ଚ୍ଚ ଅପରେସନକୁ ଗୁରୁତ୍ଵ ଦିଆଯାଇଛି ।

କ୍ଵିଙ୍ଗଡାଓ ବେଇହାଇ ହେଉଛି ଚୀନର ଏକ ବୃହତ ଜାହାଜ କାରଖାନା । ଯାହାକୁ ଚୀନର ଷ୍ଟେଟ ସିପବିଲ୍ଡିଂ କର୍ପୋରେସନ ପରିଚାଳନା କରିଥାଏ । ଏହି କାରଖାନା ୩୩୦ ହେକ୍ଟରରେ ୯ କିଲୋମିଟର ପର୍ଯ୍ୟନ୍ତ ବ୍ୟାପିଛି । ତେବେ ଅଗ୍ନିକାଣ୍ଡ ନେଇ କାରଖାନା ପକ୍ଷରୁ କୌଣସି ତତ୍‌କ୍ଷଣାତ୍ ପ୍ରତିକ୍ରିୟା ମିଳିପାରି ନାହିଁ ।

ଜାହାଜର ଗତିବିଧି ଉପରେ ନଜର ରଖୁଥିବା ଟ୍ରାକିଂ ପ୍ଲାଟଫର୍ମ ଅନୁସାରେ, ଓସେନ୍ ମେଲୋଡି ଜାହାଜ ଅଗଷ୍ଟ ୩୧ ତାରିଖରେ କ୍ଵିଙ୍ଗଡାଓରେ ପହଞ୍ଚିଥିଲା । ଓସେନ୍ ମେଲୋଡି ଆସନ୍ତା ରବିବାର କ୍ଵିଙ୍ଗଡାଓ ଛାଡ଼ିବାର ଥିଲା । ତା' ପୂର୍ବରୁ ଶୁକ୍ରବାର ଜାହାଜରେ ନିଆଁ ଲାଗି ୨୫ ଜଣଙ୍କ ଜୀବନ ଯାଇଛି ।

ଏଥିସହ ପଢ଼ନ୍ତୁ: ଫାୟାରିଂ ଅଭ୍ୟାସ ବେଳେ ଟ୍ୟାଙ୍କ୍‌ରେ ବିସ୍ଫୋରଣ, ୨ ବାଂଲାଦେଶୀ ସୈନିକ ମୃତ…. ଅଧିକାରୀ ଗୁରୁତର 

ନିଆଁ ଲାଗି ଜଳି ଯାଇଥିବା ଓସେନ୍ ମେଲୋଡି ଜାହାଜର ମାଲିକାନା ଚୀନର କମ୍ପାନୀ ହୁଇଲି ସିପିଂ ପାଖରେ ରହିଥିବା ବେଳେ ଏହାର ପରିଚାଳନା ୟୁୟାଙ୍ଗକୁନପେଙ୍ଗ ସାଂଘାଇ ସିପ୍ ମ୍ୟାନେଜମେଣ୍ଟ କରୁଥିଲା । ମାତ୍ର ଗୋଟିଏ ମାସ ଭିତରେ ଚୀନରେ ଏଭଳି ଦ୍ଵିତୀୟ ଅଘଟଣ ଘଟିଛି ।

ଏହା ପୂର୍ବରୁ ଅଗଷ୍ଟ ୧୩ ତାରିଖରେ ହୁହାଇର ସିପୟାର୍ଡରେ ଏକ ଜାହାଜରେ ବିସ୍ଫୋରଣ ହୋଇଥିଲା । ଯେଉଁଥିରେ ଜଣେ ଅଗ୍ନିଶମ କର୍ମଚାରୀ ପ୍ରାଣ ହରାଇଥିଲେ । ଆଉ ଏବେ କ୍ଵିଙ୍ଗଡାଓରେ ଓସେନ୍ ମେଲୋଡି ଜାହାଜରେ ଅଗ୍ନିକାଣ୍ଡ ୨୫ ଜଣଙ୍କ ଜୀବନ ନେଇଛି ।