ଚୀନ କାଫେରେ ଅଜବ କଫି । ସୋସିଆଲ ମିଡିଆରେ ହେଉଛି ଜୋରଦାର ଚର୍ଚ୍ଚା । ଏହି କଫିରେ ଏପରି ଅଣ୍ଡାର ବ୍ୟବହାର ହେଉଛି, ଯାହାକି ଶିଶୁଙ୍କ ମୂତ୍ରରେ ଫୁଟି ସିଝିଥାଏ । ଏହାକୁ ପୁଷ୍ଟିଯୁକ୍ତ କୁହାଯାଇ ବିକ୍ରି କରାଯାଉଥିବାବେଳେ ସେଠାକାର ଲୋକେ ଏହାକୁ ବେଶ ପସନ୍ଦ କରୁଛନ୍ତି । ମାତ୍ର ଏହି କଫିଟି ଲୋକଲୋଚନକୁ ଆସିବା ପରେ ଅଧିକାଂଶ ଲୋକେ ନାକ ଟେକୁଥିବାବେଳେ ଏହା ଉପରେ ବିବାଦ ମଧ୍ୟ ଉପୁଜିଛି ।

• କଣ ପୂରା ଘଟଣା ?

ସାଉଥ ଚାଇନା ମର୍ଣ୍ଣିଂ ପୋଷ୍ଟର ଏକ ରିପୋର୍ଟ ଅନୁସାରେ, ଚୀନର ଝୋଜିୟାଙ୍ଗର ଏକ କାଫେରେ ଏକ ବିଶେଷ କଫି ବିକ୍ରି କରାଯାଉଛି । ଏହି କଫିର ଦାମ ହେଉଛି ୨୮ ୟୁଆନ୍ (ପ୍ରାୟ ୩୦୦-୩୫୦ ଟଙ୍କା ) । ସବୁଠୁ ଖାସ କଥା ହେଉଛି ଏଥିରେ ବ୍ୟବହାର କରାଯାଉଥିବା ଅଣ୍ଡା । ଏହି ଅଣ୍ଡାଗୁଡ଼ିକୁ ୧୦ ବର୍ଷରୁ କମ ଶିଶୁଙ୍କ ମୂତ୍ରରେ ରଖି ଅଣ୍ଡାକୁ ସିଝାଯାଉଛି ଏହାପରେ ସେହି ଅଣ୍ଡାଗୁଡ଼ିକୁ ରୋଷ୍ଟ୍ କରାଯାଇ କଫି (ଆମେରିକାନୋ) ଉପରେ ସର୍ଭ୍ କରାଯାଉଛି । ଲୋକେ ଏହାକୁ ବେଶ ପସନ୍ଦ କରୁଥିବାବେଳେ କାଫେରେ ଛୁଟି ଦିନଗୁଡ଼ିକରେ ୧୦୦ରୁ ଅଧିକ କପ୍ ବିକ୍ରି ହେଉଛି ।

• ପରମ୍ପରା ସହ ଜଡ଼ିତ କଫି

ଚୀନରେ ବିକ୍ରି ହେଉଥିବା ଏହି ଅଜବ କଫି ଡୋଙ୍ଗୟାଙ୍ଗ ଅଞ୍ଚଳର ଏକ ପୁରୁଣା ପରମ୍ପରା ସହ ଜଡ଼ିତ ବୋଲି କୁହାଯାଉଛି । ଏଠାରେ ୟୁରିନ୍ ଏଗ୍ସ (Urine Eggs)କୁ ପାରମ୍ପରିକ ସ୍ନାକ୍ସ ଭାବେ ବିବେଚନା କରାଯାଏ । ସ୍ଥାନୀୟ ଲୋକଙ୍କ କହିବା କଥା ଯେ ଏଥିରେ ଶରୀର ଥଣ୍ଡା ରହିଥାଏ, ଅଂଶୁଘାତରୁ ରକ୍ଷା ମିଳିଥାଏ ଏବଂ ଶକ୍ତି ବଢିଥାଏ ।

• କଣ କହୁଛନ୍ତି ଡାକ୍ତର ?

ଗୋଟିଏ ପଟେ ଚୀନର ନିର୍ଦ୍ଦିଷ୍ଟ ଅଞ୍ଚଳର ବାସୀ ଏହାକୁ ପାରମ୍ପରିକ ଖାଦ୍ୟ ଭାବେ ଗ୍ରହଣ କରୁଥିବାବେଳେ କିନ୍ତୁ ମେଡିକାଲ ସାଇନ୍ସ ଏଥିପ୍ରତି ସହମତି ପ୍ରକାଶ କରିନାହିଁ । ଜଣେ କିଡନୀ ବିଶେଷଜ୍ଞ କହିଛନ୍ତି ଯେ ମୂତ୍ର ମଣିଷ ଶରୀରର ଆବର୍ଜନା ହୋଇଥାଏ ଏବଂ ଏଥିରେ କୌଣସି ପୁଷ୍ଟିକର ଯୁକ୍ତ ଜିନିଷ ନଥାଏ । ଏପରି ଖାଦ୍ୟ ଶରୀର ଉପରେ ଗମ୍ଭୀର ପ୍ରଭାବ ପକାଇପାରେ ବୋଲି ଡାକ୍ତର କହିଛନ୍ତି ।

• କ୍ରୋଧ ପ୍ରକାଶ କଲେ ନେଟିଜେନ୍ସ

ଯେତେବେଳେ ଏହି କଫିଟି ସୋସିଆଲ ମିଡିଆରେ ଭାଇରାଲ ହେଲା, ସେତେବେଳେ ୟୁଜର୍ସମାନେ ଅସନ୍ତୋଷ ପ୍ରକାଶ କରିଥିବା ଦେଖିବାକୁ ମିଳିଛି । ଜଣେ ୟୁଜର ଲେଖିଛନ୍ତି, "କଏ ଏପରି ପ୍ରକାର ଖାଦ୍ୟ ବା ପାନୀୟର ସ୍ଵଚ୍ଛତାର ଗ୍ୟାରେଣ୍ଟି ଅଛି ?" ସେହିପରି ଆଉ ଜଣେ ଲେଖିଛନ୍ତି, " ମୁଁ ସେହି ଅଞ୍ଚଳର ଅଧିବାସୀ, କିନ୍ତୁ ଏପରି କଫି କେବେ ପିଇନାହିଁ । ଏହାକୁ ଦେଖିଲା ବେଳକୁ ଭୟ ଲାଗୁଛି ।"

ଅଧିକ ଖବର ପଢନ୍ତୁ...