ଋଷ ଓ ୟୁକ୍ରେନ ଯୁଦ୍ଧ ଭିତରେ ଋଷ ଆଗରେ ଏକ ବଡ଼ ସମସ୍ୟା ଉପୁଜିଛି । ଗୋଟିଏ ପଟେ ସାରା ବିଶ୍ଵରେ ସୁନା ରୁପା ଦରକୁ ନେଇ ହଇଚଇ ସୃଷ୍ଟି ହେଉଥିବାବେଳେ ଏପଟେ ଋଷରେ ଆକାଶଛୁଆଁ ହୋଇଛି କାକୁଡ଼ି ଦର । ବଜାରରେ ହଠାତ କାକୁଡ଼ି ମହଙ୍ଗା ହେବା ପରେ ଗ୍ରାହକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି । ସୋସିଆଲ ମିଡିଆରେ କାକୁଡ଼ି ଦର ଉଛୁଳିବାକୁ ନେଇ ବେଶ ଚର୍ଚ୍ଚା ହେଉଛି । ନେଟିଜେନ୍ସ କାକୁଡ଼ିକୁ ଏବେ ସୁନା ସହିତ ତୁଳନା କରିବା ଆରମ୍ଭ କରିଦେଇଛନ୍ତି ।

ଏକ ଗଣମାଧ୍ୟମ ସଂସ୍ଥାର ରିପୋର୍ଟ ଅନୁଯାୟୀ, ଦେଶରେ କାକୁଡ଼ିର ମୂଲ୍ୟ ଆକାଶଛୁଆଁ ହୋଇଛି । ଗତ ଡିସେମ୍ବର ମାସଠାରୁ ଏହା ଦୁଇଗୁଣ ବୃଦ୍ଧି ପାଇ ପ୍ରାୟ ୩୦୦ ରୁବେଲ୍ (୩୫୬ ଟଙ୍କା) ପ୍ରତି କିଲୋଗ୍ରାମରେ ପହଞ୍ଚିଛି । କିଛି କାକୁଡ଼ି ସେହି ପରିମାଣର ଦୁଇ କିମ୍ବା ତିନି ଗୁଣ ମୂଲ୍ୟରେ ବିକ୍ରି ହେଉଛି । ପନିପରିବା ଦର ଆକାଶଛୁଆଁ ହେବା ପରେ ଋଷର ସୋସିଆଲ ମିଡିଆ ବ୍ୟବହାକାରୀମାନେ ପ୍ଲାଟଫର୍ମରେ ମହଙ୍ଗା ପନିପରିବାର ଫଟୋ ପୋଷ୍ଟ କରିଛନ୍ତି ଏବଂ କାକୁଡ଼ିକୁ ବିଳାସପୂର୍ଣ୍ଣ ସାମଗ୍ରୀ ସହିତ ତୁଳନା କରି ସରକାରଙ୍କୁ ତାତ୍ସଲ୍ୟ କରିଛନ୍ତି ।

ଏଥିସହ ପଢ଼ନ୍ତୁ: ଖରାଦିନ ପୂର୍ବରୁ ମହଙ୍ଗା ହେଲା AC: ବ୍ଲୁ ଷ୍ଟାର୍‌ ୧୦ରୁ ୧୫% ବଢ଼ିଯିବ ଦାମ

• ମାଂସ ଅପେକ୍ଷା କାକୁଡ଼ିର ମହଙ୍ଗା

ଫୋର୍ବସ୍ ଋଷିଆ ରିପୋର୍ଟ ଅନୁଯାୟୀ, ଫେବୃଆରୀ ଆରମ୍ଭ ସୁଦ୍ଧା କାକୁଡ଼ିର ମୂଲ୍ୟ ମାଂସ ପରି ମହଙ୍ଗା ହୋଇଯାଇଥିଲା। ଅନେକ ସୁପରମାର୍କେଟରେ କାକୁଡ଼ିର ମୂଲ୍ୟ ମାଂସ ଏବଂ କଦଳୀ ପରି ଆମଦାନୀ ଫଳ ସହିତ ସମାନ କିମ୍ବା ତା'ଠାରୁ ମଧ୍ୟ ଅଧିକ ଥିଲା । ଏବେ ଋଷରେ ଲୋକମାନେ ସାଧାରଣ ଖାଦ୍ୟ କିଣିବାକୁ ମଧ୍ୟ ସଂଘର୍ଷ କରୁଛନ୍ତି ।

The price of cucumbers in Moscow, Russia is just insane right now pic.twitter.com/vXtfU4CLOs

— Jack Miles (@Jacksm227) February 9, 2026

• ଋଷରେ କାକୁଡ଼ି ଦର କାହିଁକି ବୃଦ୍ଧି ପାଇଲା ?

ଯୁଦ୍ଧକାଳୀନ ମୁଦ୍ରାସ୍ଫୀତି ଯୋଗୁଁ ଋଷରେ ପନିପରିବା ଦର ଆବଶ୍ୟକ ଅପେକ୍ଷା ଅଧିକ ମୂଲ୍ୟ ବୃଦ୍ଧି ପାଇଥିବା କୁହାଯାଉଛି । ପୂର୍ବରୁ ଗ୍ରୀନହାଉସ୍ ଶିଳ୍ପକୁ ପ୍ରଚୁର ସବସିଡି ଦ୍ୱାରା ପ୍ରୋତ୍ସାହିତ କରାଯାଇଥିଲା, କିନ୍ତୁ ଯୁଦ୍ଧ ଏବଂ ପରବର୍ତ୍ତୀ ଡ୍ରାଫ୍ଟିଂ ଯୋଗୁଁ ଗୁରୁତର ଶ୍ରମିକ ଅଭାବ ଦେଖାଦେଇଛି । ସେହିପରି ୧ ଜାନୁଆରୀ, ୨୦୨୬ଠାରୁ ଭ୍ୟାଲୁ-ଏଡେଡ୍-ଟାକ୍ସ (ଭାଟ୍) ୨୦ ପ୍ରତିଶତରୁ ୨୨% କୁ ବୃଦ୍ଧି ହେବା ଦ୍ୱାରା ଗ୍ରାହକ ମୂଲ୍ୟ ଉପରେ ଚାପ ପଡ଼ିଛି ।

ଅନ୍ୟପଟେ ଋଷ କୃଷି ମନ୍ତ୍ରଣାଳୟ ଏହି ଦରଦାର ବୃଦ୍ଧି ଶୀତକାଳୀନ ପାଣିପାଗ ଯୋଗୁଁ ହୋଇଥିବା କହିଛି । କିନ୍ତୁ ସେପଟେ ଖୁଚୁରା ବ୍ୟବସାୟୀମାନେ ଆଶା କରୁଛନ୍ତି ଯେ ଆସନ୍ତା ମାସରେ ପାଗ ଗରମ ହେଲେ କାକୁଡ଼ି ଦର ହ୍ରାସ ପାଇବ ।

ଅଧିକ ଖବର ପଢନ୍ତୁ...