Number Plate Auction / ଗୋଟିଏ ନମ୍ବର ପ୍ଲେଟ୍‌ର ଦାମ୍ ୧୭ କୋଟି, ନମ୍ବର ଜାଣିଲେ ହେବେ ଆଶ୍ଚର୍ଯ୍ୟ

କିଛି ଗାଡ଼ିର ନମ୍ବର ପ୍ଲେଟ୍ ଏତେ ମହଙ୍ଗା ହୋଇଥାଏ ଯେ, ଏହାର ଦାମରେ ଅନେକ ଦାମୀ କାର୍‌ ମଧ୍ୟ କିଣିହେବ । ନିଜ ପସନ୍ଦର ଫ୍ୟାନ୍ସି ନମ୍ବର ପ୍ଲେଟ୍ ପାଇବା ପାଇଁ ଲୋକେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରନ୍ତି । କିନ୍ତୁ ଦୁବାଇରେ ଜଣେ ବ୍ୟକ୍ତି ଗୋଟିଏ ନମ୍ବର ପ୍ଲେଟ୍ ପାଇଁ ୧-୨ ଲକ୍ଷ ଟଙ୍କା ନୁହେଁ ବରଂ ୧୭ କୋଟି ଟଙ୍କା ଖର୍ଚ୍ଚ କରିଛନ୍ତି । ଦୁବାଇରେ ଆୟୋଜିତ ୧୨୧ତମ ନମ୍ବର ପ୍ଲେଟ୍ ନିଲାମୀରେ ଏଭଳି ରେକର୍ଡ ଦାମ୍‌ରେ ନମ୍ବର ବିକ୍ରି ହୋଇଛି ।

ଖଲିଜ୍ ଟାଇମ୍ସର ରିପୋର୍ଟ ଅନୁସାରେ, ଦୁବାଇର ସଡ଼କ ଓ ପରିବହନ କର୍ତ୍ତୃପକ୍ଷ (RTA) ପକ୍ଷରୁ ଏହି ସ୍ୱତନ୍ତ୍ର ନମ୍ବର ପ୍ଲେଟ୍ ନିଲାମୀର ଆୟୋଜନ କରାଯାଇଥିଲା । ଏଥିରେ ମୋଟ ୬୫.୭୨୧ ମିଲିୟନ ଦିରହମ୍‌ର ନିଲାମୀ ହୋଇଥିଲା । ଭାରତୀୟ ମୁଦ୍ରାରେ ଏହାର ମୂଲ୍ୟ ପ୍ରାୟ ୧୭୦ କୋଟି ଟଙ୍କା ।

ଏଥି ସହ ପଢନ୍ତୁ:  ଦଶହରା ମେଳାରେ ଅଘଟଣ; ଷ୍ଟଣ୍ଟ ସମୟରେ ବାଇକ୍‌ରେ ଲାଗିଲା ନିଆଁ, ଜଳିଗଲେ ଯୁବତୀ

CC44 ନମ୍ବର ପ୍ଲେଟ୍ ସବୁଠାରୁ ମହଙ୍ଗା

ଏହି ନିଲାମୀରେ CC44 ନମ୍ବର ପ୍ଲେଟ୍ ୬.୭୨ ମିଲିୟନ ଦିରହମ୍‌ରେ ବିକ୍ରି ହୋଇଛି, ଯାହାର ଭାରତୀୟ ମୂଲ୍ୟ ପ୍ରାୟ ୧୭ କୋଟି ଟଙ୍କା । ଏହା ନିଲାମୀର ସବୁଠାରୁ ମହଙ୍ଗା ନମ୍ବର ପ୍ଲେଟ୍ ଥିଲା ।

ଅନ୍ୟପଟେ, BB18 ନମ୍ବର ପ୍ଲେଟ୍ ୬.୬୨ ମିଲିୟନ ଦିରହମ୍‌ରେ ବିକ୍ରି ହୋଇଥିବା ବେଳେ BB80 ନମ୍ବର ପ୍ଲେଟ୍ ପାଇଁ ୫.୯ ମିଲିୟନ ଦିରହମ୍‌ର ନିଲାମୀ ହୋଇଥିଲା । ସେହିପରି BB117 ନମ୍ବର ପ୍ଲେଟ୍ ୧.୦୧୬ ମିଲିୟନ ଦିରହମ୍‌ରେ ବିକ୍ରି ହୋଇଥିଲା ।

୬୦ଟି ଫ୍ୟାନ୍ସି ନମ୍ବର ପ୍ଲେଟ୍ ନିଲାମୀରେ ରଖାଯାଇଥିଲା

ଦୁବାଇର ହିଲଟନ୍ ଦୁବାଇ ଅଲ୍ ହବତୁର୍ ସିଟିରେ ଏହି ନିଲାମୀ ଆୟୋଜିତ ହୋଇଥିଲା । ଏଥିରେ ଦୁଇ, ତିନି, ଚାରି ଓ ପାଞ୍ଚ ଅଙ୍କ ବିଶିଷ୍ଟ ମୋଟ ୬୦ଟି ସ୍ୱତନ୍ତ୍ର ନମ୍ବର ପ୍ଲେଟ୍ ନିଲାମୀ ପାଇଁ ରଖାଯାଇଥିଲା । ଏହି ନମ୍ବରଗୁଡ଼ିକରେ AA, BB, CC, H, U, V, W, X, Y ଓ Z ଭଳି କୋଡ୍ ସାମିଲ ଥିଲା ।
ଏହି ନିଲାମୀରେ ଯୋଗ ଦେବା ପାଇଁ ଆଗ୍ରହୀ ବ୍ୟକ୍ତିଙ୍କୁ ୨୫,୦୦୦ ଦିରହମ୍‌ର ସିକ୍ୟୁରିଟି ଜମା କରିବା ସହ ଆବଶ୍ୟକ ଫି’ ଦେବାକୁ ପଡ଼ିଥିଲା ।

ଗତବର୍ଷ ମଧ୍ୟ ହୋଇଥିଲା କୋଟି କୋଟି ଟଙ୍କାର ନିଲାମୀ

ଦୁବାଇରେ ପ୍ରତିବର୍ଷ ଏଭଳି ଫ୍ୟାନ୍ସି ନମ୍ବର ପ୍ଲେଟ୍‌ର ନିଲାମୀ ଆୟୋଜନ କରାଯାଏ । ଅନେକ ଲୋକ ନିଜର ସ୍ୱତନ୍ତ୍ର ପରିଚୟ ଓ ସଉକ ପାଇଁ ଏଭଳି ନମ୍ବର କିଣିବାକୁ କୋଟି କୋଟି ଟଙ୍କା ଖର୍ଚ୍ଚ କରନ୍ତି। ୨୦୨୫ ମସିହାରେ ମଧ୍ୟ ଦୁବାଇର RTA ପକ୍ଷରୁ ଆୟୋଜିତ ନିଲାମୀରେ ମୋଟ ୧୦୯ ମିଲିୟନ ଦିରହମ୍‌ର ନମ୍ବର ପ୍ଲେଟ୍ ବିକ୍ରି ହୋଇଥିଲା ।