Twin Babies Rescued / ବନ୍ୟା କବଳରୁ ଉଦ୍ଧାର ହେଲେ ଜାଁଆଳା ଶିଶୁ; କୋଳେଇ ନେଇ ସାହସ ଦେଲେ ଯବାନ

ନେପାଳରେ ଜାରି ରହିଥିବା ପ୍ରଳୟଙ୍କରୀ ଆକସ୍ମିକ ବନ୍ୟା ଓ ଭୂସ୍କଳନ ମଧ୍ୟରେ ସେନା ପକ୍ଷରୁ ଯୁଦ୍ଧକାଳୀନ ଭିତ୍ତିରେ ଉଦ୍ଧାର ଅଭିଯାନ ଜାରି ରହିଛି । ଏହି ସଙ୍କଟଜନକ ପରିସ୍ଥିତି ମଧ୍ୟରେ ଉଦ୍ଧାର କାର୍ଯ୍ୟରୁ ଏକ ଅତ୍ୟନ୍ତ ସମ୍ବେଦନଶୀଳ ତଥା ହୃଦୟସ୍ପର୍ଶୀ ଚିତ୍ର ସାମ୍ନାକୁ ଆସିଛି, ଯେଉଁଥିରେ ନେପାଳ ସେନାର ଯବାନମାନେ ବନ୍ୟା କବଳରୁ ଉଦ୍ଧାର ହୋଇଥିବା ଦୁଇ ଜାଁଆଳା ଶିଶୁଙ୍କୁ କୋଳେଇ ନେଇ ଆଶ୍ୱାସନା ଦେଉଥିବାର ଦେଖାଯାଇଛି ।

• କୋଳେଇ ନେଇ ସାହସ ଦେଲେ ଯବାନ

ପ୍ରବଳ ବର୍ଷା ଓ ଜଳପ୍ରଳୟ ଯୋଗୁଁ ନେପାଳର ବନ୍ୟା ପ୍ରଭାବିତ ଜଳମଗ୍ନ ଅଞ୍ଚଳରେ ଏକ ପରିବାର ନିଜର ଦୁଇ ଜଣ କୋମଳମତି ଜାଁଆଳା ଶିଶୁଙ୍କ ସହ ଫସି ରହିଥିଲେ । ବନ୍ୟାର ଭୟଙ୍କର ସ୍ରୋତ ଓ ଚାରିଆଡ଼େ ଜଳରାଶି ଦେଖି ଶିଶୁଦ୍ୱୟ ଅତ୍ୟନ୍ତ ଭୟଭୀତ ହୋଇପଡ଼ିଥିଲେ । ନେପାଳ ସେନାର ସ୍ୱତନ୍ତ୍ର ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ବୋଟ୍ ଓ ରସି ସାହାଯ୍ୟରେ ସମ୍ପୂର୍ଣ୍ଣ ପରିବାରକୁ ନିରାପଦରେ ଉଦ୍ଧାର କରିଥିଲେ । ଉଦ୍ଧାର ପରେ ଶିଶୁମାନଙ୍କର ଭୟ ଦୂର କରିବା ପାଇଁ ସେନା ଯବାନମାନେ ସେମାନଙ୍କୁ ନିଜ କୋଳକୁ ନେଇ କାନ୍ଧରେ ପକାଇ ସ୍ନେହ ଆଦର କରିବା ସହ ସୁରକ୍ଷିତ ଅନୁଭୂତି ଦେଇଥିଲେ ।

VIDEO | Nepal floods: Rescued twin children comforted by Nepal Army personnel amid ongoing relief operations. pic.twitter.com/12fLMnjS0f

— Press Trust of India (@PTI_News) August 27, 2026

• ନେପାଳରେ ରିଲିଫ୍ ଓ ଉଦ୍ଧାର ଅଭିଯାନ ଜାରି

ନେପାଳ ସେନା, ଆର୍ମଡ୍ ପୋଲିସ ଫୋର୍ସ ଏବଂ ସ୍ଥାନୀୟ ପ୍ରଶାସନ ପକ୍ଷରୁ ସବୁଠାରୁ ବେଶି ପ୍ରଭାବିତ ଅଞ୍ଚଳଗୁଡ଼ିକରେ ହେଲିକପ୍ଟର, ରବର ବୋଟ୍ ଓ ବିଶେଷ ଯନ୍ତ୍ରପାତି ବ୍ୟବହାର କରାଯାଇ ଉଦ୍ଧାର କାର୍ଯ୍ୟ କରାଯାଉଛି । ଫସି ରହିଥିବା ହଜାର ହଜାର ଲୋକଙ୍କୁ ସୁରକ୍ଷିତ ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଉଛି । ସେନା ଯବାନମାନଙ୍କର ଏହି ମାନବୀୟ ସ୍ପର୍ଶ ଏବଂ ତ୍ୟାଗକୁ ନେପାଳବାସୀଙ୍କ ସମେତ ସାରା ବିଶ୍ୱରେ ଉଚ୍ଚ ପ୍ରଶଂସା କରାଯାଉଛି ।

ପଢନ୍ତୁ ଏହି ଖବର: ନେପାଳରେ ପୁଣି ଆସିପାରେ ମହାପ୍ରଳୟ; ଚୀନ କଲାଣି ସତର୍କ, ଜମା ହେଲାଣି 'ଡେଥ୍ ଲେକ୍'

• ଆସୁଛି ଆଉ ଏକ ପ୍ରଳୟ

ପୁଣି ନେପାଳରେ ହୋଇପାରେ ମହାପ୍ରଳୟ । ନେପାଳରୁ ୧୮ କିମି ଦୂର ତିବ୍ଦତରେ ପୁଣି ସୃଷ୍ଟି ହୋଇଛି ହ୍ରଦ । ଏଠାରେ ଜମା ହୋଇସାରିଲାଣି ୨୦ ଲକ୍ଷ କ୍ୟୁବିକ୍ ମିଟର ଜଳ । ଫଳରେ ପୁନର୍ବାର ବନ୍ୟା ଆଶଙ୍କା ବିଷୟରେ ନେପାଳକୁ ସତର୍କ କରାଇଛି ଚୀନ । ସୀମାର ଉଭୟ ପାର୍ଶ୍ୱରେ ଦୁଇଟି ବଡ଼ ହ୍ରଦ ସୃଷ୍ଟି ହୋଇଛି, ଯାହାକି ଆଗାମୀ ୨ରୁ ୩ ଦିନ ମଧ୍ୟରେ ଫାଟିବା ସହ ବନ୍ୟା ଆଶଙ୍କା ସୃଷ୍ଟି କରିପାରେ । ଚୀନ କହିଛି ଯେ ଆସନ୍ତା ୩ ଦିନ ମଧ୍ୟରେ ପ୍ରାୟ ୩୦ ଲକ୍ଷ ଘନ ମିଟର ପାଣି ବା ପ୍ରାୟ ୧୨୦୦ ଅଲମ୍ପିକ୍ ସ୍ଵିମିଂ ପୁଲ୍ ଯେତିକି ପାଣି ହ୍ରଦରେ ପହଞ୍ଚିପାରେ ।