Cockpit Fight / ଦୁଇ ପାଇଲଟଙ୍କ ମଧ୍ୟରେ ଛୁରାମାଡ଼ ପରେ ବିମାନର ଜରୁରୀ ଅବତରଣ

ନୂଆଦିଲ୍ଲୀ: ୩୪ ହଜାର ଫୁଟ୍ ଉପରେ ଆତଙ୍କ । ଶତାଧିକ ଯାତ୍ରୀଙ୍କ ଜୀବନ ସହ ଖେଳିଲେ ପାଇଲଟ୍ । ଦୁବାଇରୁ ଇସ୍ରାଏଲ୍‌ର ତେଲ ଅଭିବ ଯାଉଥିବା ଫ୍ଲାଏ ଦୁବାଇର ଫ୍ଲାଇଟ୍ FZ1073 ବୁଧବାର ମଝି ଆକାଶରେ ହାଇଜ୍ୟାକ୍ କରିବାକୁ ପ୍ରୟାସ କରାଯାଇଥିବା ଆଶଙ୍କା ହୋଇଛି ।

ପ୍ରାୟ ୧୮୯ ଯାତ୍ରୀଙ୍କୁ ନେଇ ଉଡ଼ାଣ ଭରିଥିବା ଫ୍ଲାଏଦୁବାଇ ବିମାନ ପ୍ରଥମେ ଏମରଜେନ୍ସି ସିଗନାଲ୍ ପଠାଇଥିଲା । ଆଉ କିଛି ସେକେଣ୍ଡ ପରେ ବିମାନରୁ ଏଭଳି କୋଡ୍ ଆସିଲା, ଯାହା ବିମାନକୁ ହାଇଜ୍ୟାକ୍ କରାଯିବା କିମ୍ବା ବେଆଇନ୍ ଭାବେ ଦଖଲ ଦେବାର ସଂକେତ ଥିଲା ।

ଏଥିସହ ପଢ଼ନ୍ତୁ: ଉଡ଼ାଣ ଭରୁ ଭରୁ କ୍ରାସ୍ ହୋଇଗଲା ସେନା ବିମାନ, ୬ ଜଣଙ୍କ ମୃତ୍ୟୁ 

ଏହାରି ଭିତରେ ବିମାନର କକପିଟ୍‌ରେ ଦୁଇ ପାଇଲଟଙ୍କ ମଧ୍ୟରେ ଛୁରାମାଡ଼ ହୋଇଥିବା ଖବର ଆସିଛି । ଏପରିକି ଜଣେ ପାଇଲଟ୍ ଆତ୍ମହତ୍ୟା ଉଦ୍ୟମ କରିଥିବା ଦାବି ହେଉଛି । ସ୍ଥିତି ଏଭଳି ହୋଇଥିଲା ଯେ, ଇସ୍ରାଏଲ୍ ତାର ଯୁଦ୍ଧ ବିମାନ ମଧ୍ୟ ପଠାଇବାକୁ ପ୍ରସ୍ତୁତ ହୋଇ ଯାଇଥିଲା ।

ସୂଚନା ଅନୁସାରେ, ବୋଇଂ 737 ମ୍ୟାକ୍ସ ୮ ପ୍ରଥମେ ୭୭୦୦ ସ୍କ୍ଵାଙ୍କ କୋଡ୍ ପଠାଇଥିଲା । ଏହା ଆନ୍ତର୍ଜାତୀୟ ସ୍ତରରେ ସାମାନ୍ଯ ଜରୁରୀ ସ୍ଥିତିର ସଂକେତ । କିଛି ସେକେଣ୍ଡ ପରେ ବିମାନ ୭୫୦୦ କୋଡ୍ ପଠାଇଥିଲା । ଏହି କୋଡ୍ ହାଇଜ୍ୟାକିଂ କିମ୍ବା ବିମାନରେ କୌଣସି ବେଆଇନ୍ ହସ୍ତକ୍ଷେପର ଆଶଙ୍କାର ସଂକେତ ।

ତାବୁକରେ ଜରୁରୀ ଅବତରଣ

ତେଲ ଅଭିବ ଯାଉଥିବା ବିମାନ ଆକାଶ ମାର୍ଗରେ ଗତିପଥ ବଦଳାଇ ଶେଷରେ ସାଉଦି ଆରବର ତାବୁକ ବିମାନବନ୍ଦରରେ ସୁରକ୍ଷିତ ଅବତରଣ କରିଛି । ଫ୍ଲାଇଟ୍ ଟ୍ରାକିଂ ଡାଟା ଅନୁସାରେ, ବିମାନଟି ଭାରତୀୟ ସମୟ ସକାଳ ୧୦ଟା ୫୦ ସମୟରେ ଉତ୍ତର-ପଶ୍ଚିମ ସାଉଦି ଆରବ ଆକାଶରେ ମାତ୍ର ୨ ମିନିଟରେ ୩୪ ହଜାର ଫୁଟ୍‌ରୁ ୧୬ ହଜାର ୬୦୦ ଫୁଟ୍ ପର୍ଯ୍ୟନ୍ତ ଖସି ଆସିଥିଲା । ତାର ୧୨ ମିନିଟ୍ ପରେ ୧୧ଟା ୨ରେ ବିମାନ ଜରୁରୀ ଅବତରଣ ସିଗନାଲ୍ ପଠାଇଥିଲା ।

ବିମାନରେ କ'ଣ ଘଟିଲା ?

ଇସ୍ରାଏଲ୍ ଗଣମାଧ୍ୟମ ଅନୁସାରେ, ପଠା ଯାଇଥିବା ଏମରଜେନ୍ସି ସିଗନାଲ୍ କୌଣସି ହାଇଜ୍ୟାକିଂ ପାଇଁ ନୁହେଁ ବରଂ ଦୁଇ ପାଇଲଟ ମଧ୍ୟରେ ହୋଇଥିବା ଝଗଡ଼ା ପାଇଁ ଆସିଥିଲା । ପ୍ରକୃତରେ କକପିଟ୍ ଭିତରେ ଦୁଇ ପାଇଲଟଙ୍କ ମଧ୍ୟରେ ସଂଘର୍ଷ ଓ ଛୁରାମାଡ଼଼ ହୋଇଛି କି ନାହିଁ ତାର ଯାଞ୍ଚ ଆରମ୍ଭ ହୋଇଛି ।

ଏଥିସହ ପଢ଼ନ୍ତୁ: AIର ନାମ ବଦଳାଇଲେ ଡୋନାଲ୍ଡ ଟ୍ରମ୍ପ, ଏଣିକି କୁହାଯିବ ‘ସୁପର ଇଣ୍ଟେଲିଜେନ୍ସ’ 

ସୂଚନା ଅନୁସାରେ, ବିମାନଟି ଏମରଜେନ୍ସି ଆଲର୍ଟ ପଠାଇବା ପରେ ସମ୍ପର୍କ ତୁଟି ଯାଇଥିଲା । ସାଉଦି ଏୟରସ୍ପେସରେ ସମ୍ପର୍କ ନ ହେବାରୁ ଇସ୍ରାଏଲ୍ ଏହାକୁ ସମ୍ଭାବ୍ୟ ହାଇଜ୍ୟାକିଂ ଆଶଙ୍କା କରି ପ୍ରଧାନମନ୍ତ୍ରୀଙ୍କ ସୁରକ୍ଷା ଅଧିକାରୀଙ୍କୁ ଖବର ଦେଇଥିଲା । ଯାହାପରେ ତାବୁକରେ ସୁରକ୍ଷିତ ଅବତରଣ ହୋଇଛି ।

ଏବେ ସ୍ଥିତି ନିୟନ୍ତ୍ରଣରେ ରହିଥିବା ବେଳେ ବିମାନରେ ଥିବା ଯାତ୍ରୀଙ୍କୁ ଇସ୍ରାଏଲ୍‌ ନେବାକୁ ପଦକ୍ଷେପ ଗ୍ରହଣ କରାଯାଉଥିବା ଇସ୍ରାଏଲ୍ ରାଷ୍ଟ୍ରପତିଙ୍କ କାର୍ଯ୍ୟାଳୟ କହିଛି । ସେପଟେ ଫ୍ଲାଏଦୁବାଇ କହିଛି, "ଯାତ୍ରୀଙ୍କୁ ନେବା ପାଇଁ ଦୁବାଇରୁ ଆଉ ଏକ ବିମାନ ସାଉଦି ଆରବ ପଠାଯିବ, ଯାହା ଇସ୍ରାଏଲ୍ ଯିବ ।"