Fly Dubai Plane Hijack / ଫ୍ଲାଇଦୁବାଇ ପ୍ଲେନ୍ ହାଇଜ୍ୟାକ୍; କେମିତି ବିମାନ ଚଳାଇଲେ ସାଧାରଣ ଇସ୍ରାଏଲୀ ନାଗରିକ ? ନିଜେ କହିଲେ

ଦୁବାଇରୁ ଇସ୍ରାଏଲର ରାଜଧାନୀ ତେଲ ଅଭିଭ ଅଭିମୁଖେ ପ୍ଲେନଟି ବାହାରିଥିଲା । ବିମାନରେ ୧୮୦ ଜଣ ଯାତ୍ରୀ ଥିଲେ । ଏହି ବିମାନକୁ ହାଇଜ୍ୟାକ୍ କରି ୯/୧୧ ଆତଙ୍କୀ ହମଲା ପରି କରିବାର ଷଡ଼ଯନ୍ତ୍ର ହୋଇଥିଲା । ଜଣେ ଭାରତୀୟ ପାଇଲଟ୍ ଓ କିଛି ଇସ୍ରାଏଲୀ ବୀରଙ୍କ ଏହି ବଡ଼ ଅଘଟଣରୁ ରକ୍ଷା ପାଇଯାଇଛନ୍ତି ୟାତ୍ରୀ । ଫ୍ଲାଇଦୁବାଇର ଏହି ବିମାନ ଚଲାଉଥିବା ଭାରତୀୟ ପାଇଲଟ ସ୍ମିତ୍ ମଚ୍ଛାରଙ୍କୁ ହାଇଜ୍ୟାକର ଓମାନି ସହ-ପାଇଲଟ୍ ଛୁରୀ ମାରି ଚାଲିଥିଲା, କିନ୍ତୁ ସେ ହାର ମାନିନଥିଲେ । ଏହି ବିପଦ ସମୟରେ ଯେତେବେଳେ ମାତ୍ର ୨ ମିନିଟ୍ ଭିତରେ ବିମାନଟି ୧୭,୪୦୦ ଫୁଟ ତଳକୁ ଆସିଥିଲା, ସେତେବେଲେ ଜଣେ ଇସ୍ରାଏଲୀ ହିରୋଙ୍କ ଯୋଗଦାନକୁ ନେଇ ଚର୍ଚ୍ଚା ହେଉଛି । ଜଣେ ସାଧାରଣ ନାଗରିକ ହୋଇ ସେ କିପରି ବିମାନ ଚଲାଇବା ଶିଖିଲେ ଓ ଯାତ୍ରୀଙ୍କ ବିମାନ ବଞ୍ଚାଇଲେ, ଆସନ୍ତୁ ଜାଣିବା ।

ଏହି ଇସ୍ରାଏଲୀ ନାଗରିକ ଜଣକ ଟିଭି ଶୋ'ରୁ ବିମାନ ଚଲାଇବା ଟେକନିକ୍ ଶିଖିଥିଲେ । ଯେତେବେଳେ ବିମାନଟି ଦ୍ରୁତ ଗତିରେ ତଳକୁ ଖସିଚାଲିଥିଲା, ସେତେବେଳେ ସେ ନିଜର ବୁଦ୍ଧିକୁ ଉପଯୋଗ କରି ବିମାନକୁ ଆକାଶରେ ରଖିଥିଲେ । ଯେତେବେଳେ ଏହି ବୀର ଜଣକ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କୁ ଭେଟିଥିଲେ ସେତେବେଳେ ଛାତିଥରା କାହାଣୀ ବଖାଣିଲେ।

• କେମିତି ଟଳିଲା ୯/୧୧ ଆତଙ୍କୀ ଆକ୍ରମଣ ?

ଆମେ ଯେଉଁ ହିରୋଙ୍କ ସମ୍ପର୍କରେ କହୁଛୁ, ସେ ହେଉଛନ୍ତି ୟାନିବ ହାୟୁନ । ୟାନିବ ସେହି ୩ ଜଣ ଇସ୍ରାଏଲୀ ଲୋକଙ୍କ ମଧ୍ୟରୁ ଜଣେ, ଯିଏକି ଫ୍ଲାଇଦୁବାଇର ସନ୍ଦିଗ୍ଧ ହାଇଜ୍ୟାକର (ସହ-ପାଇଲଟ)କୁ କାବୁ କରିବାରେ ସକ୍ଷମ ହୋଇଥିଲେ । ଏପରି ସ୍ଥିତିରେ କଣ କରିବାକୁ ହେବ ସେ ପୂର୍ବରୁ ଜାଣିଥିଲେ, କାରଣ ଏହାକୁ ନେଇ ସେ ଏକ ଟିଭି ଶୋ' ଦେଖିଥିଲେ । ଏହି ଶୋ'ର ବିମାନକୁ ନେଇ ବଡ଼ ବଡ଼ ଘଟଣାର ଯାଞ୍ଚ କରାଯାଏ ।

• ଯେତେବେଳେ ନେତାନ୍ୟାହୁ ଭେଟିବାକୁ ଆସିଲେ

ଇସ୍ରାଏଲ ସୁରକ୍ଷିତ ଭାବେ ଫେରିବାବେଳେ ବେନ୍ ଗୁରିଆନ ଏୟାରପୋର୍ଟରେ ଏହି ବୀରମାନଙ୍କୁ ଭେଟିବା ଲାଗି ନିଜେ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ପୂର୍ବରୁ ଉପସ୍ଥିତ ଥିଲେ । ଏହି ସମୟରେ ୟାନିବ ସମସ୍ତ ଘଟଣା ପ୍ରଧାନମନ୍ତ୍ରୀଙ୍କୁ କହିଥିଲେ । ସେ କହିଥିଲେ ଯେ ଯେତେବେଳେ ଭାରତୀୟ ପାଇଲଟ ଜଣକ ସହ-ପାଇଲଟଙ୍କ ଛୁରାମାଡ଼ରେ କକପିଟ୍‌ର ବାହାରେ ପଡ଼ିଥିଲେ, ସେତେବେଳେ ୟାନିବ ଓ ଆଉ ଜଣେ ଇସ୍ରାଏଲୀ ନାଗରିକ ଜୋରଜବରଦସ୍ତ କକପିଟ୍‌ ଭିତରକୁ ପଶିଥିଲେ । ସେ କହିଥିଲେ, "ଯେତେବେଳେ ମୁଁ କକପିଟ୍‌ ଭିତରକୁ ଯାଇଥିଲି, ସେତେବେଳେ ଆତଙ୍କବାଦୀ କଣ୍ଟ୍ରୋଲ ପାଖରେ ଥିଲା । ସେ ଦୁଇଟି ସିଟ୍‌ର ମଝିରେ ବସିଥିଲା । ମୁଁ ଆତଙ୍କବାଦୀକୁ ଧରିଲି, ତାକୁ କାବୁ କଲି ଓ ସର୍ବପ୍ରଥମେ ତାକୁ କକପିଟ୍‌ରୁ ବାହାରକୁ ଆଣିଲି ।"

ପଢନ୍ତୁ ଏହି ଖବର: ‘ଜଣେ ଭାରତୀୟ ୯/୧୧ ଭଳି ବିପର୍ଯ୍ୟୟ ରୋକିଦେଲେ’, କ୍ୟାପଟେନ୍‌ ସ୍ମିତଙ୍କୁ ପ୍ରଶଂସା କଲେ ମୋଦି

• କେମିତି ନିଶ୍ଚିତ ମୃତ୍ୟୁକୁ ରୋକିଲେ ୟାନିବ ?

ଯେତେବେଳେ ବେଞ୍ଜାମିନ ନେତାନ୍ୟାହୁ ପଚାରିଥିଲେ ଯେ ଆତଙ୍କବାଦୀ ସିଟ୍‌ରେ ବସି କଣ କରୁଥିଲା, ଏହାର ଜବାବରେ ୟାନିବ ହାୟୁନ କହିଥିଲେ, "ସେ ବିମାନକୁ ବେକାର କରିବା ପାଇଁ ଉଦ୍ୟମ ଚଲାଇଥିଲା । କଣ୍ଟ୍ରୋଲ ବଟନ୍‌ଗୁଡ଼ିକୁ ନଷ୍ଟ କରିବାକୁ ଚେଷ୍ଟା କରୁଥିଲା ।" ଏହାପରେ ହାୟୁନ କହିଥିଲେ ଯେ କକପିଟ୍‌ରୁ ବାହାରିବା ପୂର୍ବରୁ ସେ ଅନ୍ୟ ଇସ୍ରାଏଲୀ ନାଗରିକମାନଙ୍କୁ ଏହି ଆତଙ୍କବାଦୀକୁ ଧରିବାକୁ ଚିତ୍କାର କରି ଡାକିଥିଲେ, କାରଣ ଠିକ୍ ସେହି ସମୟରେ ବିମାନଟି ଦ୍ରୁତ ଗତିରେ ତଳକୁ ଖସୁଥିଲା । ଏହାପରେ ସେ ପୁଣି କକପିଟ୍‌ ଭିତରକୁ ପଶିଥିଲେ, ବିମାନକୁ ନିୟନ୍ତ୍ରଣକୁ ଆଣିବାକୁ ଚେଷ୍ଟା କରିଥିଲେ ।

• "ମୁଁ ମେଡେ-ଏୟାର ଡିଜାଷ୍ଟର ଦେଖେ"

ୟାନିବ କହିଥିଲେ ଯେ ସେ କଣ୍ଟ୍ରୋଲକୁ ପଛ ଆଡ଼କୁ ଟାଣିଥିଲେ । ସେ କଣ କରିବେ ତାକୁ ଜଣାଥିଲା । କାରଣ ସେ 'ମେଡେ- ଏୟାର ଡିଜାଷ୍ଟର' ଶୋ' ଦେଖନ୍ତି ବୋଲି କହିଥିଲେ । ଏଠାରେ କହିରଖୁଛୁ କି, ଏହା ଏକ କାନାଡାର ଡକ୍ୟୁମେଣ୍ଟ୍ରି ଟିଭି ପ୍ରୋଗ୍ରାମ, ଯାହାକି ବିମାନ ଦୁର୍ଘଟଣାର ଯାଞ୍ଚ କରେ । ଏହାପରେ ୟାନିବ କହିଥିଲେ, ଯେତେବେଳେ ବିମାନଟି ସିଧା ହୋଇଥିଲା, ସେତେବେଳେ ପାଇଲଟ ଜଣକ କହିଥିଲେ ଯେ ସେ ସମ୍ଭାଳିନେବେ । ୟାନିବଙ୍କ ଏହି ଯୋଗଦାନ ପାଇଁ ଏକ ବଡ଼ ଦୁର୍ଘଟଣା ବର୍ତ୍ତିଯାଇଥିଲା ।